John 21

1Wa o gene ŋaŋ iloke me paso, i Jesus me ge ŋaŋa lue kelua mulaŋ munra tiŋqoro alo qilo Tiberias; wa ni me ge ŋaŋa lue kelua tamaike. 2I Simon Peter, tana i Thomas we logia si Didimus, ratol i Nathanael ta Kana a Galilea, tara natun i Sebede, wa ira tiŋqoro mulaŋ nirua we vug tuwale. 3Naŋ i Simon Peter me vava muneira wa, Nau we van ape saosao iga. Naŋ neira we vava munia wa, Ikamam mulaŋ we mule at amaiko. Wa neira me rowolue at, we vega kalo i vawo aka; pa gate sao ilo lai tea alo qoŋ nane ilone. 4Wa o maran qara teve nake, i Jesus we tira a lau, pa nava ira tiŋqoro gate lolomaran si ineia i Jesus. 5Naŋ i Jesus ti vet muneira wa, Ra nanatmera, o pigpig tea amen kamiu? Naŋ neira we valui goroa wa, Tagai. 6Naŋ ni me vava muneira wa, Tul siwo o gape ape kiki aka matua, wa kamiu te sao suar. Wa neira me tul, wa me raverave matila o gape ape iga we tar. 7Naŋ i tiŋqoro i Jesus we tapea ti vet mun Peter wa, I Lord iloke. Wa i Simon Peter we roŋotag vaglala ape neia i Lord, pa ti rot goro non o siopa, ape neia mamasa, pa ti wal sur ilo lama. 8Wa ira tiŋqoro we sea we rasu ma alo natiaka; ape ineira gate aras nan o salilina, o masaoi tama rova vaga saŋavul tavelima; we raverave o gape wa o iga ŋaŋ. 9Wa neira me kalo veta i salilina, neira we ilo o av, o gartaweris, wa o iga me map avunana, wa o wo bread. 10Naŋ i Jesus me vava muneira wa, La ma o tuan iga kamiu qara sao ti. 11Wa i Simon Peter me rap kalo kel, ti rave o gape i salilina me uravag o iga qatqatmatau, melnol vatuwale o avaviu saŋavul tavelima o numei nitol; pa o iga we qoqo, nava gate sare lai o gape. 12Naŋ i Jesus we vava muneira wa, Van ma, ganagana. Wa isei nan ra tiŋqoro gate nommot si a varusia wa, Iniko isei? we gilala lova si ineia i Lord. 13Wa i Jesus we mule surira, ti taur o bread, ti tirag muneira, wa o iga mulaŋ. 14I Jesus me ŋaŋalue vatoliu iloke munra tiŋqoro, me tavaraka veta nanra mate.

15Wa neira me gana paso, i Jesus ti vet mun Simon Peter wa, Simon, natun Jonas, ko we maros nau nan neira iloke we maros nau? Naŋ ni me vava munia wa, Uwe, Lord, ko we gilala ape nau we tape iniko. Naŋ ni we vet munia wa, Vaŋan nok o lamb ŋaŋ. 16Naŋ ni me vava vagaruei munia wa, Simon, natun Jonas, ko we maros nau? Naŋ neia wa, Uwe, Lord, ko we gilala ape nau we tape iniko. Naŋ ti vet munia wa, Ilo goro nok o sheep ŋaŋ. 17Naŋ ni me vava vagatoliu munia wa, Simon, natun Jonas, ko we tape inau? Wa nalolon Peter me wono ape ni me vava vagatol munia wa, Ko we tape inau? Naŋ ni me vava munia wa, Lord, ko we gilala o gene ŋaŋ, ko we lolomaran ape nau we tape iniko. Naŋ i Jesus we vet munia wa, Vaŋan nok o sheep ŋaŋ. 18We nun, we nun, nau we vava muniko wa, Alo iniko o lumagav ko me rotig kelu ko, wa ko me mulemule ivea ko we maros; wa aŋaisa ko te tamaragai, wa ko te sigag napanema, wa isei we sea te rotigiko, wa te laviko ivea ko gate maros. 19Ni me vava tamaike, pa ni we vaglala ape ni te ge ronoga God mun o matea we savai. Naŋ ni me vava paso tamaike, ti vet munia wa, Tataga inau. 20Wa i Peter we kilau, ti ilo i tiŋqoro i Jesus we tapea we tataga, ineia ilone me sale taragiate vawo varana ape ganagana ravrav ilone, we varusia wa, Lord, isei i gene we maniriŋiko? 21I Peter we ilo i gene iloke, pa ti vet mun Jesus wa, Lord, i gene iloke te ge gasei? 22Naŋ i Jesus ti vet munia wa, Si na qe maros ni toga galtag nau gai kel ma, o sava ilone amaiko? Iniko, ka tataga inau. 23Wa o roroi iloke me gao lue amaira tatasiu apen i tiŋqoro ilone si ni tete mate; panava i Jesus gate vava munia si ni tete mate, panava, Si na qe maros ni toga galtag nau gai kel ma, o sava ilone amaiko?

24Iloke i tiŋqoro we gaganag we tira ape gene ŋaŋ iloke, me raverave o gene ŋaŋ iloke, wa kamam we gilala ape non o vavae gaganag si we nun.

25Wa o gene ŋaŋ we sea we tar i Jesus me ge, pa si ta rave qet ilone, nau we nonom si o marama mulaŋ te uravag vitag o raverave ŋaŋ ilone te rave gese apena.

Currently Selected:

John 21: MOTA

Highlight

Copy