O Gagagapalag 1

1O raverave ilone tamoa nau me rave tuai muniko, Theophilus, ape savasava i Jesus me qeteg ge ti wa me vatvatogo apena, 2me niŋa ape qoŋ me lav kaloa at, ni me vareg paso veta mun o Vui we Roŋo mura sala ni me ilo rakatira. 3Wa ni me gaganag luea mun neira si we esu, pa me roŋo vivtig ti, mun o tur vaglala we qoqo, ti ŋaŋaŋalue tiutiu mun neira o qoŋ saŋavul vat, ti vavava mun neira ape gene ŋaŋ tape marana non God. 4Naŋ ni me vug tuwale amaira, ti gatogorora nan wa toavtag o Jerusalem, nava si a toga nerei o gene o Mama me ligoligog ti, wa si, Ilone nane kamiu me roŋotag veta amen nau. 5Ape i John me vasugroŋo mona mun o pei, nava te vasugroŋo kamiu mun o Vui we Roŋo, o qoŋ nake gate purat ti.

6Naŋ neira me vug tuwale veta, neira we varusia wa, Lord, ko te ge raka kel nake iloke o marana mun Israel? 7Naŋ ti vet muneira wa, Gate momiu si a gilala o tau wa o masao tau o Mama me map mona alo non o tano liwoagoro. 8Pa kamiu te la momiu o mana, alo Vui we Roŋo me siwo veta avunamiu, wa kamiu te gaganag we tira ape nau a Jerusalem, wa a Judea nol, wa a Samaria, gai niŋa ape ulus marama. 9Naŋ me vava paso tamaike me lav kaloa, wa neira we sagsagarag; wa o maligo me lavia sage nan namatara. 10Wa alo neira we sagarag matapaparau kalo i vunana ape non o vanoga, ilo, o tanun pulrua we saru o siopa aqaga me tira veta amaira, 11we vava wa, Ragai ta Galilea, ape sava kam we tira ate laŋ ivunana? i Jesus ilone me lav kaloa at nan kamiu i vunana, te kel ma aŋaisa, tama kamiu we iloa ilokenake me va sage ivunana.

12Naŋ neira me vusiag kel i Jerusalem nan o tauwe o sasai Olivet, we toga rivtag o Jerusalem o masaoi tama we vano mot alo qoŋ mapsag. 13Wa me mule ma ilo vanua, me rap kalo ilo tawtawu ima neira me togatoga aia; i Peter, wa i John, wa i James, wa i Andrew, i Philip tana i Thomas, i Bartholomew tana i Mathew, i James natun i Alpheus, wa i Simon Selotes, wa i Juda tasin i James. 14Iragai nol iloke me goara nom sara tuwale ape tataro amaira vavine, wa i Meri i raveven Jesus, wa ira tatasina.

15Naŋ alo qoŋ ŋaŋ ilone i Peter me tavaraka alo vatitnara tatasiu; naŋ nasasara o sul me vug tuwale tama melnol vatuwale wa o avaviu saŋavul rua; ti vet wa, 16Ragai, ratasik, o raverave iloke me tira ran, wa gate ava lai, o Vui we Roŋo me ligoligog moai ti mun naŋusun i David apen Judas, me tira salemoa iragai me taur Jesus ti. 17Ape me vasogo tuwale veta ineia ti amen nina, wa ni me taur mona veta ti natakelena alo gagapalag iloke. 18Wa ineia iloke me la goro o malatou mun o rusarusai ganganor, wa me sargag valiliugia siwo, me tuawora alo tine malatou, wa natinaena nol me rowolue. 19Wa iragai nol we toga a Jerusalem me gilala o ike; gai niŋa me log o malatou ilone alo liŋara si Akeldama, si O malatou nara. 20Ape me rave alo raverave psalm ŋaŋ si,

Napaitona ni wou,

Wa isei nipea toga alolona:

wa,

Isei ni la leas non o tano ilogoro.

21O manigiu o ike isei tuwale nan ragai me goara taso ma amen nina alo qoŋ ŋaŋ i Lord Jesus me van pata ma ti, wa me rowolue at alo vatitnanina, 22qeteg ma alo vasugroŋo non i John, we niŋa ape qoŋ ilone me lav kaloa at nan nina, amona ran sin qeteg gaganag sara tuwale we tira amen kamam ape non o tavaraka kel. 23Wa neira me vatira lue pulrua, i Joseph we logia i Barsabas, me log mulaŋ si i Justus, tana i Mathias. 24Naŋ neira me tataro, we vava wa, Lord, ko we gilala natoqar o tanun nol, ka gaganag lue, ko me ilo raka isei iloke nan tuana, 25si ni taur natakelena alo gagapalag iloke, wa o tano sala i Judas me masu vitag ti, sin mule ilo tur tanona. 26Naŋ neira me map nor o vaglala ŋaŋ apen rara, wa me qalo apen i Mathias, wa me vasogo tuwalea amen ra sala o numei tuwale.

Currently Selected:

O Gagagapalag 1: MOTA

Highlight

Copy