O Gagagapalag 5

1Pa tuara tanun nasasana i Ananias, tana rasoana i Saphira, me wolreag nautagina; 2wa ni me taur pata o takele som, wa i rasoana we gilala apena, wa ni me le ma o takelei, me map ape raŋraŋora sala. 3Nava i Peter me vet wa, Ananias, ape sa i Satan me soso ura naloloma si a gale o Vui we Roŋo, wa si a taur pata o takele som tape utag? 4Alo qale toga gate toga napulama? wa me wolreag veta gate toga ran ma amaiko si ka ge tama ko we maros apena? ape sa ko me nonom tamaike alo loloma? ko gate gale o tanun nava God. 5Wa i Ananias me roŋotag o vavae iloke, pa ni me mas mapsag mot. Wa o gogolo liwoa me gara avunarasei nol we roŋotag apena. 6Wa o rerelumagav me tavaraka, me lolosia, me sasa luea, me tavigia.

7Wa tama o masao qoŋ nitol me paso, irasoana me mule pata ma, pa ni gate gilala o sava me ge ti. 8Naŋ i Peter me valui goro ineia wa, Ka gaganag mun nau, me ŋarag o utag ape som tamaike? Naŋ neia wa, We, tamaine. 9Naŋ i Peter wa, Ape sava kamrua me nom vasarig tuwale si a meregale o Vui non i Lord? Ilo, naraŋoragai me tavig rasoama ti we tira ape mateima, pa neira te sasa lue iniko. 10Wa ni me masu gaplot ape raŋona, me mapsag mot; wa o rerelumagav me mule pata ma, me iloa me mate veta, wa neira me sasa luea, wa me tavigia peteŋ rasoana. 11Wa o gogolo liwoa me ge nol o loglue, tarasei nol me roŋotag ape ike ŋaŋ.

12Wa me ge o vasasa wa o vaglala we qoqo amaira sul mun napanera sala. Wa neira we toga nom sara tuwale alo malumaluima non i Solomon. 13Wa i tagai qalo o tanun nan ragai we sea me sov naapena si a kata amaira, panava o sul me sotalira. 14Wa me tuan taso mun i Lord ira nomtup, o rereata wa o retavine o sul. 15O manigiu neira me sasa lue irasei me mageregere ilo matesala ŋaŋ, me vanovira vawo tano epa ŋaŋ wa o tapenoŋ ŋaŋ, si naninian Peter, alo we mule vakiksag, te al avune tuara i tuwale. 16Wa o sul talo laqlaqe vanua ŋaŋ we toga wawaliog Jerusalem me vug tuwale, me sasa ma irasei we mageregere, wa irasei o vui gagavu ŋaŋ we anumagira, wa me ge esura nol.

17Nava i moe oloolo tara ragai nol amaia, ineira talo liŋara Saduke, me tavaraka, we toqosag o loloanu; 18wa me takul ira sala, me mapura ilo ima rotrot tape sul. 19Pa alo qoŋ o angel anan Lord me waka reag o mateima rotrot, me sapan lue neira, ti vet wa, 20Tur mule, tur tira alo vatine we roŋo, tur gaganag nol mun o sul o vavae ŋaŋ ape esuva iloke. 21Wa neira me roŋotag, neira me mule pata ilo vatine we roŋo, alo mera we lamasag, wa me vatogo. Pa i moe oloolo tarasei amaia me mule ma, wa me suware ma o vavtig veveg, wa ira tamaragai nora nanat Israel, wa me vatraŋ irasei ilo ima rotrot si a vile neira ma. 22Nava ira vatvatraŋ me niŋa aia, pa gate ilora alo ima rotrot, wa me vusiag kel, qara gaganag tamaike wa, 23Kamam me ilo momam gai o ima rotrot, pa qale pala, we tatapuga nol, wa ira ilogoro qale tira goro o mateima, wa me waka, pa kamam gate ilo o tanun alolona. 24Naŋ i gene we ilogoro o vatine we roŋo tara oloolo liwoa ŋaŋ me roŋotag o vavae ŋaŋ iloke, pa me tama mun neira apena, si o sava te ge aŋaisa apena. 25Naŋ isei me rowo tira ma, me gaganag mun neira wa, Ilo, iragai ŋaŋ kamiu me mapura ti ilo ima rotrot, neira we tira ilokenake alo vatine we roŋo, wa we vatvatogo o sul. 26Naŋ i ilogoro tara tanun anana ŋaŋ me mule at, me sapan neira ma, nava gate ge vavakaera, ape neira me gogolo o sul, si wa patuŋ neira. 27Wa me lav neira ma, me vatira ineira ape nagora veveg. Naŋ i moe oloolo ti varus neira, we vet wa, 28Kamam me gatogoro aneane ikamiu si nan wa vatogo alo sasai iloke; wa ilo, kamiu me ge ura veta Jerusalem mun nomiu o vatvatogo, wa ikam we maros we ge nanaran i gene iloke sin gara ivune qatumam. 29Naŋ i Peter tara sala ŋaŋ me valui gorora we vet wa, Namomam ran si a meremaŋas goro God wa goro o tanun tagai. 30God ra tamanina me ge raka kel i Jesus, pa kamiu me ge mateia, me vatakaua vawo tangae. 31Ineia iloke God me sau raka mun namatuana, o Maranaga wa o Vaesu, sin le o nomleas mun ra Israel, wa o nomvitag pugai. 32Wa ikamam we gaganag we tira ape vavae ŋaŋ iloke, wa o Vui we Roŋo mulaŋ, God me sogov neia ti mun ragai we maŋas goroa.

33Pa neira me roŋotag iloke, nalolora ti gagan, wa qara nom vasarig si a ge mateira. 34Pa i tuara tanun, nasasana i Gamaliel, o Pharise, me tavaraka alo vavtig veveg, pa ineia o vatogo ape lea, wa o sul nol we nommava ineia, wa ni me vatraŋ si a lavreag galean ira gene ivarea; 35ti vet mun neira wa, Ragai, ra nanat Israel, tur ilogoro momiu ape tanun ŋaŋ iloke, kamiu te ge o sava ape neira. 36Ape amoa nan o qoŋ ŋaŋ iloke i Theudas me tavaraka, ti vava si ineia isei liwoa; wa o vavtig tanun tama melnol vagavat me pul amaia; pa me vus mateia, wa irasei nol me nomtupua ti me totoa salsaleŋa, pa me pea ran. 37Pa ape kulan o tanun iloke, i Judas ta Galilea me tavaraka alo qoŋ raverave ŋaŋ, wa ni me korave suria o tuan tanun tamaira sul; naŋ ineia mulaŋ me mate, wa ragai nol me nomtupua ti me salsaleŋa gegese. 38Wa ilokenake na we vava mun kamiu wa, Tur toga sur nan ragai iloke, pa ukeg roroŋo ineira: ape si o liŋai wa o gagapalag iloke ta qeteg amen o tanun, te tavaul tagea; 39panava si ta qeteg amen God, kamiu tete ul tagea lai; nan wa ilo aŋaisa kamiu we varlai amen God. 40Wa neira me mawui ape neia, wa me suware ma ira sala, pa me towosira, me gatogorora sin pea vavava alo sasan Jesus, qara ukegira. 41Pa neira me rowolue malakalaka nan nanagor o vavtig veveg, ape me nonom si neira we sar si rasei a ge tagtageagira, o manigiu nasasana. 42Wa valqoŋ, alo vatine we roŋo, wa alo imara, neira gate motmot o vatvatogo wa o toretore goro, si i Jesus ineia i Christ.

Currently Selected:

O Gagagapalag 5: MOTA

Highlight

Copy