O Gagagapalag 4

1Wa alo rarua we vava mun o sul, ira oloolo wa i i gene we ilogoro o vatine we roŋo wa ira Saduke me tira peteŋ rara. 2We vavagaile neira ape rara we vatogo o sul, wa we maŋasag alo i Jesus o tavaraka kel nan ra mate. 3Wa we takul rara, me lav rara ilo ima rotrot gai maran, ape me ravrav veta. 4Pa we qoqo nan iragai me roŋotag o vavae me nomtup, wa me vasogo o tanun tama tar vagatavelima.

5Naŋ me maran ira liwoa goro, wa ira tamaragai, wa ira vatogo, me gogorag tuwale a Jerusalem; 6wa i Anas i moe oloolo, wa i Kaiaphas, wa i John, wa i Aleksander, wa iragai ŋaŋ talo veve i moe oloolo. 7Wa me vatira rara alo vatitnai, qara varus irara wa, Mun o sava mana, wa alo sava sasai kamurua me ge tamaike nia? 8Naŋ i Peter me liwat mun o Vui we Roŋo, ti vet mun neira wa, Ragai, ira liwoa goro o sul, tamiu ra tamaragai ŋaŋ ta Israel, 9si qe sike waririag qarig amen kara ape gene we wia me ge ti mun i gene mageregere, si amonsei me ge esua; 10kamiu nol te gilala momiu, wa iragai ŋaŋ talo veve Israel, si i gene iloke we tira maremare nol alo nagomiu mun nasasan i Jesus Christ ta Nasaret, kamiu me woso teterpania ti, wa God me ge raka kelua nan ra mate. 11Wa iloke o vat ikamiu ira tautaur ima me gevtag ti, wa ilokenake me ge mun qat vat tape sigrai. 12Wa i tagai mulaŋ o esuva amensei, ape i tagai ran mulaŋ o varue sasai alalaŋe tuka me le mun ra tanun ŋaŋ si nina te esu nia.

13Naŋ neira me sagarag mora ira Peter tana i John we wawaŋ lue; wa me gilala veta si rara o purei wa o tanun worawora gese, qara mamakei, wa me lolomaran vaglala si rara me toga tuwale ti amen Jesus. 14Wa neira we ilo i gene me esu ti we tira tuwale amen rara, wa gate vava goro lai. 15Wa me suware lue at irara ivarea nan o vavtig veveg, neira qara varvava vires neira, 16we vet wa, Nina ge o sava mun ragera iloke? ape me ge lue o vasasa liwoa mun rara alo nagora nol we togatoga a Jerusalem; wa inina tete leasag goro lai. 17Pa, nan o ike wa loloŋar alo sul, nina lavavakae goro mun rara, si rara nipea vavava mulaŋ mun sei alo sasai iloke. 18Wa ineira me suware rara ma, me gatogoro rara nan wa vavava ran, wa nan wa vatvatogo alo sasan Jesus. 19Nava i Peter tana i John me valui gorora we vet wa, Tur ilo sur momiu, si we sar alo nagon God si a roŋotag mantag kamiu nan we roŋotag God. 20Pa kara tete ge sea lai nan we vavava lue ape savasava kara me ilo wa me roŋotag veta ti. 21Naŋ neira me lavavakae goro mulaŋ mun rara, me ukeg rara, neira gate ilo qalo si te ge irara tama avea, o manigiu ape sul; ape tanun nol me wievavae God ape gene me ge ti. 22Pa o tanun me ge o vasasa ti iloke ape neia si a vaesua, natauna me qoqo nan saŋavul vat veta.

23Naŋ me ukegirara, rara me mule surira tuanirara, me gaganag muneira o savasava ŋaŋ ira oloolo liwoa tara tamaragai me vava ti munrara. 24Wa neira me roŋotag mora, neira me la kalo naliŋara nom sara tuwale mun God, we vet wa, Lord, iniko God me tiŋ o tuka ti, wa o lalaŋana, wa o lama, wa o savasava alo lolora ŋaŋ. 25Wa ko me vava mun o Vui we Roŋo mun navalan i tamamam i David o rowrowovag anama wa,

Ape sa o veve sul ŋaŋ we mataka,

Wa o vanua ŋaŋ we nom vasarig ava?

26Ira maranaga talo marama me tur raka lue,

Wa ira tanun liwoa me gogorag sara tuwale ma,

Goro i Lord wa i Christ anana.

27We nun i Herod, wa i Pontius Pilat tara sul ŋaŋ we sea, wa ira Israel me gogorag tuwale alo laqlaqe vanua iloke ape Rowrowovag anama we roŋo i Jesus, ko me urai veta ineia; 28si a ge o savasava napanema wa nom o maros me vonog vasarig tuai ti apena si a ge. 29Wa ilokenake, Lord, ka ilo nor o lavavakae; wa ka vasoal mun o rowrowovag ŋaŋ anama, neira wawaŋ lue ape nom o vavae; 30mun we kaka napanema si a ge esu, wa si a ge o vasasa wa o vaglala ŋaŋ mun nasasan Jesus o Rowrowovag anama we roŋo. 31Wa alo neira we tataro paso, o vatine neira we vug alolona ti magologolo; wa neira nol me liwat mun o Vui we Roŋo, wa me wawaŋ lue ape vavae non God.

32Wa iragai o sul me nomtup, nalolora wa naatara me sara tuwale; wa i tagai qalo o tanun amaira me vet ape non o savasava ŋaŋ si napulana, nava me pulara gegese. 33Wa ira sala ŋaŋ me gaganag we tira ape tavaraka kel non i Lord Jesus mun o mana liwoa; wa o sogov we poa me gara amaira nol. 34Wa i tagai qalo isei mamasa amaira; apensei napulana apena, si o utag, si o ima, me wolreag wa me la o som ape gene me wolreag ti, 35me map siwo ape raŋraŋora sala; wa me la valval munsei munsei tama me maros ran.

36Wa i Joseph, ira sala me tiu mulaŋ nasasana si Barnabas, we vava leas si, i Nat masur, talo veve Levi, pa o qeteg vanua ta Kupros: 37nautagina apena pa me wolreag, me la o som wa me map ape raŋraŋora sala.

Currently Selected:

O Gagagapalag 4: MOTA

Highlight

Copy