O Gagagapalag 3

1Naŋ i Peter tana John me mule tuwale sage ilo vatine we roŋo, alo masao qoŋ tataro, o lavevatiu. 2Wa neira me sasa ma o tuara sei me wotavag o qages, wa me mapua vagae ape mategeare vatine we roŋo we log si Lulum, sin paepaere o som nan rasei qe mulemule pata ilo vatine. 3Naŋ ni me ilo i Peter tana i John te mule pata ilo vatine we roŋo, ti paere sin taur o sogov nan rara. 4Wa i Peter me sagarag maremarea, tana i John, ti vet wa, Ilo ikara. 5Naŋ ni me roŋotag nurnur rarua, we nom nerei sin taur goro o sava nan rara. 6Nava i Peter me vet wa, O silver wa o gold tagai amenau, pa o gene amenau na te le at muniko. Alo sasan Jesus Christ ta Nasaret, tavaraka, mule atalia. 7Wa ti tauria ape panena o matua, ti rave kaloa; wa namalekana wa napawurana me maremare gaplot; 8wa ni me wal raka, me tira, me mule atalia; naŋ ratol we kalo pata tuwale alo vatine we roŋo, pa ti mule kelkel, ti walwal, ti wievavae God. 9Wa o sul nol we iloa we mule atalia we wievavae God. 10Wa neira we gilala nurnur mora si neia ilone me putepute vagae ti ape paepaere ape mategeare vatine we roŋo we Lulum; wa neira me liwatvag o mamakei liwoa wa o malarowo ape gene me ge ti munia.

11Wa i gene qale taur i Peter tana i John, wa o sul nol me valago tuwale sur ratol alo malmaluima, we log si non Solomon, me mamakei aneane. 12Naŋ i Peter me ilo, ti valui goro o sul wa, Ragai ra nanat Israel, ape sa kam we mamakei ape ike? wa ape sa kam we sagarag maremare ikatol, tama si mun matapunkara o mana wa si mun namatevunkara we wia kara me ge i gene iloke ni mule atalia? 13God Abraham tana Isaak, ratol Jakob, God tupunina me ge ronoga o Rowrowovag anana i Jesus, i gene kamiu me sueg savragia veta, wa me titis vitagia alo nagon Pilat; pa ni me nommot sin ukegia; 14pa kamiu me titis vitag i Roŋo wa i Taniniga, wa me paere si a ukeg mun kamiu i vusnawono; 15wa me ge mate o Qeteg esu; pa God me na raka kelua nan ra mate, wa kamam ira gaganag we tira apena. 16Naŋ nasasana gina, mun o nomtup nasasana, me ge maremare i gene iloke, kamiu we ilo wa we gilala ineia; we nun, o nomtup, wa ineia o manigiu apena, me le mun i gene iloke ni wia kel mantag alo nagomiu nol. 17Wa ilokenake, ratasik, nau we gilala si kamiu wa iragai we liwoa goro kamiu me ge iloke mun o loloqoŋ. 18Pa o gene ŋaŋ ilone God me ligog veta ti mun navalara prophet ŋaŋ si i Christ anana te roŋo vivtig apena, ni me ge tira ran tamaike. 19Wa ikamiu, tur nom leas momiu apena, tur vusiag kel, si te maŋ savrag napugamiu, si o masao mapmapsag ŋaŋ te roworowo ma tamaike nan nanagon Lord apena; 20wa si ni vatraŋ ma i Christ iloke me vonogia veta apen kamiu, i Jesus nake; 21o tuka nane te lav galava ran ineia gai wesu o masmasao wurwurvag kel o savasava ŋaŋ, God me vava ma mun navalara prophet ŋaŋ we roŋo alo qeteg marama ma. 22Wa i Moses me vet mona mun ra tupunina wa, I Lord God ikamiu te ge raka mun kamiu nan ira tasimiu o prophet tama inau; kamiu te tiŋtiŋqoroa ape savasava ŋaŋ ni ta vava mun kamiu. 23Wa te tamaike, si val atai ta tete tiŋqoro o prophet ilone, te ge tagea reagia nan o sul. 24We nun, ira prophet ŋaŋ we qeteg raka alo i Samuel, wa ineira a tagir ma, me vava nol ma, wa me ligoligog ape qoŋ ŋaŋ iloke. 25Kamiu ranatura prophet ŋaŋ, wa ira nat vatavata ilone, God me vatavata veta mun tamamiu, ti vet mun Abraham wa, Te vawia o veve ŋaŋ a marama alo woturiama. 26God me ge raka kel veta o Rowrowovag anana i Jesus, me vatraŋia ma sur kamiu amoa, si a vawia kamiu alo we ge vusiag kel val kamiu nan nomiu o sale ganganor ŋaŋ.

Currently Selected:

O Gagagapalag 3: MOTA

Highlight

Copy