Lamentaciones 4
4
Xchanibal sc'oplal ti muc' ta ic'al me'inale
1C'ot to ta sac vaytajel ma' ti oro une.
C'ot to ta ch'ayel ta ts'ayetel xojobal ti lequil oroe.
Stanaltac ti ch'ulnae tanij batel slilijemal ta bebetic.
2Ti jnaclejetic yu'un Sión ti cajal to ox sc'oplalique, ti c'otem to ox sc'oplalic jech c'u cha'al ti oroe,
co'ol s'elan ta x'ilatic jech c'u cha'al lumal bin meltsanbil yu'un ti jpotobe.
3Ja'uc ti me' oq'uile ta to xac' xchu' yo' ta xchu'iltas ti yalabtaque,
yan ti jnaclejetic yu'un ti jlumale, jti'oval ta j'ech'el, co'ol s'elan jech c'u cha'al spucujil ti j'anilajel-mut ti oy ta sbajtical banomile.
4Mu x'ech' taqui ti'il ta xa'iic ti jchu'nel ololetique, spac'oj xa sba ti yoq'uic ta spac'obique.
Yo'ntonuc ve'icuc ya'iic ti ololetique, mu'yuc buch'u ta x'ac'bun un.
5Ti buch'u oy to ox ta ye ta sti'ic ti sve'el yuch'omique, tana une, javajtic ta be ta xlajic ta vi'nal.#2 R 25.3; Jer 52.6.
Ti spajebal to ox yutsil ti bu ch'iic talele, tana une, ta yavil c'a'eptic nacalic.
6Smul scolo' ti muc' ta lum yu'un ti jteclumale, jc'ol to mu sta smul scolo'ic ti Sodomae,
ti ta jech to yepal ta jliquel lilijem com ti mu'yuc buch'u tsacun ta leto yu'une.#Gn 19.24.
7X'ech' to ox sts'aytsun saquil yutsilic jech c'u cha'al bot ti viniquetic ti buch'u laj yich'ic t'ujele.
Xjelav to ox saquil jech c'u cha'al ti chu' vacaxe.
Xjelav to ox stsajal xch'ich'elic jech c'u cha'al ti coral tone.
Yaxts'ijan no'ox ti sbec' satic jech c'u cha'al ti zafiro tone.
8Avi tana li' une, ic'al c'abin xa ta j'ech'el, jc'ol to mu sta com ti yic'ubel osile.
Mu x'ojtiquinatic buch'uic ti bu ta xanavic ta beetique.
Pac'al ta j'ech'el ti snuculilic ta sbaquilique, taqui xotan ta j'ech'el jech c'u cha'al junuc si'.
9Ti buch'u cham lajic ta letoe, ech' xa ti svocolique.
Ti buch'u ta xchamic ta vi'nale, mu x'ech' ta xa'i ti svocolique, yu'un naca xcham ta scoj ti mu'yuc c'usi staic ta lajesel ti c'usi x'ayan ta banomile.
10Ti antsetic ti oy slequil yo'ntonique, ta jech yepal lic slacan ti yolique.
Laj stunesic ta ve'lil ma' ti yolic ti yacalic ta vi'nal ti muc' ta lum yu'un ti jteclumale.#Dt 28.56-57; Lm 2.20; Ez 5.10.
11Ti mu xa c'usi x'ech' o ta xa'i sc'ac'al yo'nton ti Diose, laj sbusan talel scotol ti sti'emal sjole.
Laj stsanbe sc'ac'al ti Sione; laj slilinbe c'alal to sliqueb ti yoctaque.
12Mi jutebuc laj sjolinic ti ajvaliletic li' ta banomile, xchi'uc scotol ti sventainojic ta spasel mantal ta banomile
ti xc'ulet ochel ta ti'naetic yu'un Jerusalén ti contrainvanej j'ac'-vocole.
13Scotol taje, scoj smulic ti j'alc'opetique, ti paleetic ti mu albajuc chopol c'usitic laj spasique.
Ta yutil jteclum laj smalbeic xch'ich'el ti buch'u jeche' muts'ul sba sat laj smilique.
14Ma'satetic s'elan, xcuclajet ta xanavic ta beetic yu'un ti lume.
Bonolic ta ch'ich', mi junuc sc'an spicbe ti sc'u'ique.#Nm 19.11-16.
15“Mu xbat anopic, mu xanopic, jsoquesvanejetic, mu stac' nopel, ch'aco abaic ta stojol”, xi x'avet sc'oplal.
“Jatvil, j'ech'el-beetic, mu stac' xcomic ta naclej li'e”, xi sc'oplal ta x'albat yu'un ti buch'u yan yajvalique.
16Ti Diose laj stenan loq'uel ta stojol, mi jutebuc laj sjoybin talel sat ta stojolic.
Mu'yuc x'aq'ueic ta venta ti paleetique, mi jutebuc xc'uxubaj o'ntonal ta stojol ti moletique.
17Xlub xa ta j'ech'el jsatcutic ti ts'ijiluncutic ta smalael ti coltael ti jeche' ech' ti vocole.
Jpatoj xa ox co'ntoncutic ta xvul ta loq'uel jun jteclum ti c'alal mu'yuc c'usi xu' yu'un ta xpojvane.#Jer 37.5-10.
18Pa'ibiluncutic ta j'ech'el bu ta xixanavcutic, mi ja'uc stac' xiloc'cutic batel ta be.
Ta xa sta yorail ta xic'otcutic ta tsutsel, c'ot xa yorail ta xquich'cutic un.
Sta xa yorail un, mu xa cha'bel.
19Ti jcontracutique xvilic no'ox ta snutseluncutic ta jujun vitstic, ja' mu sta xvil ma' ti xique.
Cotajtic no'ox jpets'alcutic yu'unic ta sbajtical banomil.
20Tsaque xa ta chuquel ti buch'u t'ujbil yu'un ti Diose,#2 R 25.4-6; Jer 39.4-6. ti sac jaman to ti banomil ta xca'icutic yu'une, ja' ti ajvalil ti xi laj calcutic ta stojole:
“Ta yolon aqueoval avaxinal capaluncutic ta naclej xchi'uc ti jteclumetique.”
21Tse'inan, muyubajan xch'a un, muc' ta lum Edom, ti aventainojbe yosilal ti Uze.
Mu no'ox xacol ec un, ta xac'upin ava'i ti mu x'ech' xjelav ti vocole, ti co'ol s'elan jyacubel t'anal ta xacom yu'une.
22Ti atsitsele, Sión, c'ot ta tsutsel,#Is 40.2. mu'yuc xa ta xacha'beq'ue loq'uel yu'un Dios ta avosilal.
Ta stsitsot ava'i ec un, ta scoj ti mu albajuc chopol laj apase, muc' ta lum Edom, ta svinajesbot ava'i ti amule.#Abd 1-12.
Currently Selected:
Lamentaciones 4: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000
