Isaías 65
65
Ta xich'ic contrainel ti jtoyobbaetique, oy smulic
1Ti Diose xi ta xale: “Ti buch'utic mu'yuc c'usi laj sc'anbeicun jset'uque, ja' talic ta jtojol. Ti buch'utic mi ja'uc juteb laj sa'icune, ja' laj staicun ta sa'el.#Ro 10.20. Ti lum ti mu ja'uc xvocoletic ta jtojole, ja'ic ti xi laj calbeique: ‘Li'une’, xcutic. 2Scotol c'ac'al, xye'elet coc jc'ob ta yiq'uel talel jun toyobba lum#Ro 10.21. ti chopol ti bu stamojic batele. Stamojic batel ti c'usi xal ti yo'nton stuquique. 3Jun lum ti ta jba ta jsat yac'ojbeic ono'ox yipal ta soquesel ti co'ntone. Ta xaq'uic milbil matanal ta stojol diosetic ti bu ts'unbil ti nichime. Ta xchiq'uic pom ta sba altar ti meltsanbil ta latriyoe. 4Ja' jun lum ti xchotet ta muquinale. Nac'alic xa stic'ojan sbaic ti bu ta x'ech' yu'unic ti ac'ubale, ti sti'ic no'ox ti chitome,#Lv 11.7; Dt 14.8. ti snojesic no'ox ti sbinic ta calto ti albil sc'oplal mu stac' tunesele. 5Xi ta xalique: ‘Tey no'ox oyan, mu xtal apicun, yu'un jelavem cutsilal ta j'ech'el.’ Ti jnaclejetic taje, co'ol s'elan c'oc' c'otemic ti ta xtil scotol c'ac'ale, ti mu ch'an xiyute, ti co'ol xa s'elan ti ch'ail ta xtal ta jni'e.
6“Ja'uc le' une, ts'ibabil sc'oplal ta jtojol, mu xch'ay sc'oplal. Mu jmeyojuc coc jc'ob ta xicom yu'un. Ta xcac'be ya'i ti jech laj sc'ane, 7jech c'u cha'al ti c'usitic chopol laj spas ti stuquique, xchi'uc ti c'usitic chopol laj spas ti stot sme'ic ta vo'nee. Ti stuquique laj xchiq'uic pom ec ta vitstic. Laj soquesbeicun co'nton ta stselejtic. Ta xlic jchap ba'yel un. Ta xcac'be yich'ic ya'i un”, xi laj yal stuc Dios ma' taj une.
Ti Diose ta xal ti ta sva'an sba ta yaq'uel ti slequilale
8Ti Diose xi ta xale: “C'alal oy lec ya'lel sat ti uvae, mu xch'ayic ec ma' ti jnaclejetique, yu'un ep ta staic ti vinoe. Ta sventa ti syail xc'uxul co'nton yu'un ti cajtuneltaque, jech ta jpas ec ti xi s'elan ta xc'ot ta stojol cu'une: Mu scotoluc ta jtubbe sc'oplal ma' ti muc' ta lume. 9Ta xc'ot ta pasel cu'un ti ta jbolesbe snitilultac ti Jacobe, ti oyuc buch'u oy ta yosilal ti Judá ti naquiicuc ta vitstic cu'une. Ti buch'utic t'ujbilic cu'une ta xu'ninic ti banomile. Tey ta xnaquiic ti cajtuneltaque. 10Ta stenlejal banomil Sarón, ta xnoj ta chij ta j'ech'el. Ta stenlejal Acor,#Jos 7.24-26. xlamet no'ox ta sa' sve'el ti vacaxetic yu'unic ti jteclum ti buch'u ta sa'icune.
11“Ja'uc ti vo'oxuc ti ta xach'ac abaic ta stojol ti Diose, ti ta xavalopatinic comel ti ch'ul vits cu'une, ti ta xavac'beic ve'lil xchi'uc vino ti Gade, ti Menie, diosetic yu'un ti lec oraile, 12xi s'elan ma' ti lec orail ti lamal ta xc'ot ta atojolique: Ta xachamic ta espada cu'un. Yu'un lic'opoj, mu'yuc xac'opoj xati'inic. Xivulvun, mi ja'uc laj ats'et chiquintaic. Lic apasic ti c'usi mu lecuc ta xquile. Lic atamic ta spasel ti c'usi chopol ta xquile.#Is 66.4; Jer 7.13. 13Jech o xal un, ti cajtuneltaque, oy no'ox yu'unic ma' ti c'usi ta staic ta lajesele. Ja'uc ti vo'oxuque ta xlic chamanic ta vi'nal. Oy no'ox ma' ti vo' ta xuch'ique. Ja'uc ti vo'oxuque ta xavich' avocolic yu'un ti taqui ti'ile. Xlaet no'ox ta xa'i ti stuquique. Ja'uc ti vo'oxuque ta xavac' abaic ta lo'il maxil. 14Yu'un ti stuquique xlaetic no'ox xmuyubajic ta q'uejimol ta sventa ti mu'yuc c'usi xal ti yo'ntonique. Ja'uc ti vo'oxuc une xa'avanic xa, xa'oq'uic xa ta scoj ti at-o'ntone, xchi'uc ti ilbajinel ta xavich'ique. 15Ti buch'utic t'ujbilic cu'une ta stunes abiic ta sbisel ta cotol chaval ti c'otuc ta lajel tubel ti yane. Ti cajtuneltac une, ta xlic jelbe ti sbiique. 16Buch'uuc no'ox ta jteclum ti ta sc'an ti lequilale, ja' ta sc'anbe Dios ti oy stuq'uil sjol yo'ntone. Buch'uuc no'ox ta jteclum ti ta sva'an sba ta rextico ti c'usi ta xale, ja' ta sva'an ta rextico Dios ti oy stuq'uil sjol yo'ntone. Ti ilbajinel ti laj c'otuc ta pasel ta vo'nee, ch'aybil xa c'ot ta o'ntonal, mu'yuc xa ta jsat un.
17“A'yio ava'iic, ta xlic jmeltsan ta ach' ti vinajele, ta ach' ta xlic jmetsan ti banomile.#Is 66.22; 2 P 3.13; Ap 21.1. Ti c'usitic laj c'otuc ta pasel ta vo'nee, ch'aybil xa c'ot ta o'ntonal, mi junuc xa oy buch'u ta svules ta sjol taje. 18Batuc avo'nton ta muyubajel, laetan sbatel osil yu'un ti c'usi ta jmeltsane, yu'un ta xc'ot ta pasel cu'un ti mu'yuc c'usi sna' liquel ti jteclum Jerusalene, ja' jun jteclum ti xmuyubajic ta xlic naquiicuque. 19Ximuyubaj no'ox liquel ec yu'un ti Jerusalene, ti xlaet no'ox co'nton ta xca'i yu'un ti jlumale. Mi ja'uc xa oy buch'u ta x'oc', ti x'ajet yu'un ti ilbajinele.#Ap 21.4. 20Ti bu taje, mi ja'uc xa ta xcham ti ololetic ti jun chib no'ox c'ac'al yich'oje, mi ja'uc ti moletic mu xilbeic stsutseb ti yorailique. Squeremal to ta xcham ti buch'u yich'oj vo'vinic (100) jabile. Jti'o'nton jelav ta stojol mi mu to ta sta ti vo'vinic (100) jabile. 21Ti jteclume ta smeltsan snaic yo' jech ta xlic naquiicuc. Ta xlic sts'unic ti uvae, ta slo'beic ti sate.#Jer 31.5; Am 9.14. 22Ma'uc xa xc'ot ta pasel ti jun xa yac'ojbe yipal ta smeltsanele, ti yan xa ti buch'u ta xnaquie. Ma'uc xa xc'ot ta pasel ti yac'ojbe xa yipal ta sts'un ti june, ti yan xa ti buch'u ta stun ta slajese. Ti jlumale, jal ta j'ech'el ti xch'iel sc'opojelique, yu'un co'ol s'elan jpets te'. Ti buch'utic t'ujbilic cu'une, ta stunesic ta slajesel ti slubel xchamel yoc sc'obique. 23Mu jeche'uc no'ox ta x'ech' svocol ta abtel. Mi ja'uc ta xcham xnich'onic c'alal mu to ta xc'ot ti yoraile, yu'un ja' snitilultac ti buch'utic staojic ti sva'anoj sba ti Dios ta stojolique. 24C'alal mu to ta xc'opoj xti'inique, laj xa jtac'beic ti sc'opique. C'alal mu to ta stsuts ti sc'opojel sti'inelique, laj xa jchiquintabeic ti sc'opique. 25Ti oq'uile xchi'uc ti ch'in chije, jmoj xvolet ta xve'ic. Ti leone ta slo' yaxal jech c'u cha'al junuc vacax. Ti chone naca banomil ta xipan.#Gn 3.14. Ta sjunul ti ch'ul vits cu'une, mi junuc ti oy c'usi chopol ta spase”, xi laj yal stuc Dios ma' taj une.#Is 11.6-9.
Currently Selected:
Isaías 65: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000
