Génesis 20

Ti Abrahame xchi'uc ti Abimeleque

1Ti Abrahame loc' batel ti bu to ox oye. Bat ta yosilal Néguev banomil. Com nacluc ta jteclum Gerar ti oy ta o'lol yu'unic ti Cadese xchi'uc ti Shure. 2C'alal tey xa oyique, lic yalilan ti ja' xchi'il ta voq'uel ti Sarae,#Gn 12.13; 26.7. ti c'alal ja' yajnile. Va'i un, ti Abimelec ajvalil yu'un ti jteclum Gerare, laj yal mantal ti ac'o ic'batuc talel ti Sarae yo' jech ta xajnilin. 3C'u stu un, ta ac'ubaltique, laj yil ta xvaich ti Abimeleque, ti xi albat yu'un ti Diose: “Ta xacham, yu'un ti ants laj aviq'ue, oy smalal.”

4Manchuc mi jech sc'oplal un, ja' no'ox ti stuque mu'yuc to laj xchi'in ta vayel. Jech o xal xi laj staq'ue:

“Ch'ul Dios, ¿mi yu'un anopoj xa ta xc'ot ta pasel avu'un ta smilel ti buch'u mu'yuc to c'usi chopol spasoje? 5Yu'un laj yal stuc ti Abrahame ti ja' xchi'il ta voq'uel ti antse. Jech ti antse laj yal ec ti ja' xchi'il ta voq'uel ti vinique. Jech ti c'usi laj jpase, laj jpas ta slequil co'nton scotol. Mu'yuc c'usi chopol laj jpas.”

6Xi tac'bat ta xvaich laj yil yu'un ti Diose:

“Jna' lec ti ta slequil avo'nton c'usi laj apase. Jech o xal mu'yuc xcac' xachi'in yo' mu xata amul ta jtojol yu'un. 7Ja'uc avi tana le' une, ac'bo sutel yajnil ti vinique, yu'un ja' jun j'alc'op ti stuque. Ta xc'opoj xti'in ta sc'anel vocol ta jtojol yo' jech ta to xach'i xac'opoj. Yan mi mu xavac'be sutel ti yajnile, ti vo'ote xchi'uc ti c'u yepal achi'uc ta nacleje, j'ech'el ta xachamic.”

8Jech ti Abimeleque sob xa lic ta yoc'omal. Laj staan ta iq'uel ti yajtuneltaque. Laj slo'iltabe ya'iic ti c'u s'elan ac'bat yil ta xvaiche. C'alal laj ya'iique, xi'ic ta jmec. 9Ts'acal to un, ti Abimeleque laj sta ta iq'uel ti Abrahame, ti xi laj yalbee:

—¡Q'uel avil ti c'usi laj apasbuncutique! ¿Bu laj jsoquesbot avo'nton ti jech xtal avac'bun ta jba jun muc'ul mulil xchi'uc ti c'u yepal oy ta jnae? Mu stac' alel ti c'usi laj apase. 10¿C'usi yacalot ta snopilanel ya'yel ti jech laj apas scotol le'e?

Ja' jech laj yal ti Abimelec ta stojol ti Abrahame.

11Jech ti Abrahame xi laj staq'ue:

—Yu'un ti lum li'e, laj jnop ti mu'yuc buch'u ta xi'taic ti Diose, ti xu' xtoc ta xilaj ta milel ta scoj ti cajnile. 12Ja' no'ox un, xi s'elan sc'oplal laj cal ti ja' jchi'il ta voq'uele, yu'un ja' yantsil nich'on jtot. Ja' no'ox mu jmojuc ti jme'cutique. Jech o xal c'ot ta pasel ti laj quiq'ue. 13Yu'un c'alal laj yalbun mantal Dios ti ac'o quicta comel sna ti jtote, laj calbe ya'i ti buyuc no'ox ta xibatcutique, ti ac'o yalilan ti ja' xchi'ilun ta voq'uele.

14Va'i un, ti Abimeleque laj sutes ti Sara yajnil ti Abrahame. Ma'uc no'ox taje, laj sq'uelanbe chijetic, vacaxetic, mosovil viniquetic, antsetic. 15Va'i un, xi laj yal ti Abimeleque:

—Q'uelo avil, oy ta asat ti jlumale. T'ujo bu xal avo'nton yo' jech ta xanaqui.

16Ja'uc ti Sarae xi laj yalbee:

—Ti c'u yepal laj cac'be ti achi'il ta voq'uele, ja' stojol o jmil (1,000) ta sep plata taq'uin yo' xamac aq'uexlalil ta sba ta sat scotol ti c'u yepal achi'uc ta nacleje. Mu'yuc buch'u junuc xu' chopol xc'opoj ta atojol.

17Jech ti Abrahame lic sta ta c'oponel ti Diose. Jech ti Dios xtoque laj scoles ti Abimeleque xchi'uc ti yajnile. Ja' jech xtoc laj scolesbe ti sme' mosovtaque yo' jech xu' ta xlic alajicuc. 18Yu'un ja' ta scoj ti Sarae, ti Diose laj smacbe yalajeb ti antsetic oyic ta sna ti Abimelec ti mu xu' x'alajique.

Currently Selected:

Génesis 20: TZC00

Highlight

Copy