Ezequiel 4
4
Ti Ezequiele ta scaj'al ti volibil ta xc'ot ti Jerusalene
1“Yojtot, sa'o jbejuc xamit. Pechano ta ats'el. Loc'tao sloc'obbail jteclum Jerusalén ta sba. 2Mi laj une, cholo ta loc'tael sloc'obbail epal soldadoetic, xchi'uc sloc'obbail ep ta tos jmilvanej abtejebaletic yu'un ti ac'ob-letoe. Joyoluc xa ta meltsanbil moc xaloc'ta sloc'obbail. Bujuluc bitebal lum xaloc'ta sloc'obbail, uninbil xa yilel ta xvinaj ti jteclume. 3Sa'o junuc pech-pech taq'uin. Pechano ta o'lol ti bu oyote, xchi'uc ti jteclume, co'oluc s'elan c'otem ta moc yilel, xchi'uc xava'an aba ta yeloval jteclum ti co'ol xa s'elan ta xatsac ta leto yilele. Ta xtun ta svinajeb yu'un ti israeletic ma' taje.
4“Ta xapuch'an aba ta stuq'uil ats'et c'ob un. Ta xalaman ta aba smul scolo' ti jteclum Israele. Jech puch'ul ta xacom lamal ta aba ti smul scolo'ique. 5Vo'lajunvinic xchi'uc lajuneb yo'vinic (390) c'ac'al sjalil, lamal ta aba smul scolo' ti Israele, ti ta xjoybij ta jun jabil ti jun c'ac'ale. 6Mi c'ot ta ts'aquiel avu'un taj une, ta xlic apuch'an aba ta stuq'uil abats'i c'ob un. Ta xalaman ta aba cha'vinic (40) c'ac'al smul scolo' slumal ti Judae. Ti cha'vinic (40) c'ac'al sjalile, ta xjoybij ta jun jabil ti jun c'ac'ale.
7“Mi laj une, xavac' batel asat ta jteclum Jerusalén ti joyobtabil yu'un ti scontrae. Lic balo sc'ob acoton. C'opojan ta jventa ta scontrainelic. 8A'yio ava'i un, ta xajchucot ta ch'ojon yo' mu xavalc'uj xasutbij ta jujujot, ja' to mi c'ot ta tsutsel avu'un sc'ac'alil ti vocol ta xavich'e.
9“Sa'o talel trigo, chop o ta trigo, tos o sat ts'unubil ti sbiinoj mijoe, ti avenae, ti javaxe, xchi'uc ti jchop o ta arbijae. Ta jun yavil xacap scotol. Xameltsan ta pan un. Ja' ta xave' ti vo'lajunvinic xchi'uc lajuneb yo'vinic (390) c'ac'al sjalil puch'ulot ta ats'et c'obe. 10Ti ave'el ta xatame, bisbil, jch'ac ta jujun c'ac'al ti loq'uem chanch'ac ta jun kiloe. 11Ti vo' ta xavuch'e, bisbil, o'lol litro ono'ox ti jujun c'ac'ale. 12Jbej pan ma' ti ave'el ti meltsanbil ta jchop o ta trigoe, ti yilojicuc ta sba ta satic ta xchapanel ti ta'ajesbiluc avu'un ta taqui tso'e.”
13Xi laj sts'ac to batel slo'il ti Diose: “Jech ta xc'ot slajesic ti israeletic ti bu tan puc ta jtaquic batel ta jujun muc'tiquil lum ti bec'bil ta xloc' ta slumalic jech c'u cha'al ti ve'lil le'e ti mu xal o'ntonal ta slajesele.”
14Xichi laj jtac'bee: “Le' une, Cajval, ti c'u xa sjalil jch'iel jc'opojel talele, j'ech'el mu'yuc jpicoj ti albil sc'oplal mu stac' piquele. J'ech'el mu'yuc jlajesoj ti chon bolometic ta xcham stuque, mi ja'uc ti milbil yu'un ti jti'oval chon bolometique. Mu'yuc jlajesoj ti beq'uet albil sc'oplal mu stac' lajesele.”
15Va'i un, xi laj yalbune: “Ta xcac' que jti' un cha'e, tuneso taqui tso' vacax ta sta'ajesel ti pane. Ma'ucuc xatunes ti taqui tso'e.”
16Ts'acal un, xi laj yalbune: “Ta xcac' c'otuc ta pasel ta xjaltaj ti ve'lil li' ta Jerusalene. Ch'acbil ti ve'lile. Vul o'nton xa ti jnaclejetic ta slajes ti sve'elique. Ch'acbil ti vo' ta xuch'ic ti batem xa xch'ulelic ta xi'el xchi'uquic c'alal ta xuch'ique. 17Ch'abal liquel ti vo'e, ti ve'lile. Batem xa xch'ulelic ta xi'el ti sq'uel-q'uelbe sba ti satique. Ta xtaqui lajic batel ta scoj ti smulique.”
Currently Selected:
Ezequiel 4: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000
