Ezequiel 3
3
1Va'i un, xi laj yalbun une: “Tuno, lajeso ti ts'ibabil vun li'e, yojtot, xan me ach'a ta xchi'inel ta lo'il ti muc' ta lum Israele.”
2Laj jach' ti quee, laj yac'bun jtun jlajes ti ts'ibabil vune. 3Ta jech yepal, xi laj yalbune: “Bic'o batel ti ts'ibabil vun laj cac'bote, nojeso ach'ut xchi'uc.”#Jer 15.16; Ap 10.9-11.
Co'ol s'elan yutsil xchi'il ajapom laj ca'i ti laj jtun laj jlajese. 4Va'i un, xi laj yalbune: “Batan, ba albo ya'i xch'a ti jteclum Israel ti c'usi oy ta co'nton ta xcalbe ya'iique. 5Ma'uc ta jtacot batel ta stojol jun muc' ta lum ti chucul ta a'yibel ti sc'opique, ti vocol ta a'yibele. Ta jteclum Israel no'ox ta xabat. 6Ma'uc ta jtacot batel ta stojol epal muc'tiquil lum ti chucul vocol ta a'yibel ti sc'opic ti mu xava'ie. Mi ta jtacot batel ta stojolic ti lumetic taje, ta xich'ic ta muc' ti ac'ope. 7Ja'uc ti lum Israele, mu xaq'uic ta venta ti ac'ope, yu'un mu xiyich'ic ta muc' ec. Scotol ti lum Israele pucujibemic, tsots ti snopbenal yu'unique. 8Ta jpas ta atojol ti oyuc xi'elal asat ta q'uelel jech c'u cha'al ti stuquic ti c'alal tsots ta xava'an aba ta stojolique. 9Ta xac'ot cu'un ec un jech c'u cha'al ti laplajetel tsatsal bax-tone, ti jelavem xu' yu'une, mu sta ti yan tonetique. Mu xaxi' yu'un, mi ja'uc xatsiq'ues avo'nton yu'un c'u s'elan ta spas ti satique, manchuc mi spajeb xa no'ox ma' ti stoyobbailique.”
10Laj taj une, xi lic yalbune: “Ts'etano achiquin ta ya'yiel ti c'u s'elan ta xacalbote, bejano ta ajol un. 11Batan, ba q'uelo ti avinquileltac ti bec'bilic loq'uique. ‘Jech laj yal ma' ti Dios une’, uto. Mi xaq'uic ta venta, mi mu xaq'uic ta venta, ipaluc mi laj avalbe ya'iique.”
12Va'i un, smuc'ul stsatsal ti Diose laj xchechun loq'uel. Ti ta jpate, laj ca'i oy c'usi tsots xtininet jech c'u cha'al junuc niquel ya'yel c'alal tots batel yutsilal slequilal ti Dios ti bu oye. 13Ti c'usi tsots xtininete, ja' ta spasic ti c'usi cuxulic c'alal tijil ta xc'ot ti xiq'uique. Ti carosetic ti jmoj oy xchi'uquique, co'ol s'elan junuc muc' ta niquel ti yech'omale. 14Smuc'ul stsatsal ti Dios une laj xchechun loq'uel ti bu taje. Xme'inaj xa banomil xchi'uc vul o'nton xa oyun ti tsots mich'bilun loq'uel yu'un sc'ob ti Diose. 15Lic'ot ta Tel Abid ta sti'il uc'um Quebar ti bu nacalic ti israeletic c'alal bec'bil loc' ta slumalique. Lijalij vucub (7) c'ac'al ta stojolic ti bu taje. Mu stac' a'yeluc c'usi ta jpas, c'usi ta xcal.
Ti Ezequiele ta x'ac'bat tsots stunel yu'un Dios
(Ez 33.1-9)
16Ta yucubal (7) xa ox c'ac'al jc'otel une, tal ta jtojol ti Dios ti xi laj yalbune: 17“Yojtot, ta xac'ot cu'un ta jq'uelvanej#Is 21.6,11; Jer 6.17; Os 9.8. yu'un ti lum Israele. C'alal ta jcholbot ava'i mi oy c'usi sc'an alele, ta xava'an aba ta jventa ta yalbel ya'iic ti scajbijubtaselique. 18Xcaltic no'oxe, xu' nan loq'uem xa sc'oplal ta xcham cu'un ti buch'u mu'yuc xch'ulel xa'i sbae. Mi xajax q'uel no'ox ti mu xavalbe ya'i ti yictauc ta spasel chopol ti jech cuxul to ti buch'u mu'yuc xch'ulel xa'i sbae, ti cham ta scoj ti smule, ta xquich' ave ati' ava'i ti palch'uj batel une. 19Mi ta xacajbijubtas ti buch'u mu'yuc xch'ulel xa'i sbae, mi mu xicta sba ti spajebal c'usi chopol ta spase, ti yan ta j'ech'el ta xloc' ta pasel yu'une, xcham ta scoj smul stuc un. Mu'yuc atijel ta c'op un.
20“Xcaltic no'oxe, xu' nan oy jun lequil tuq'uil vinic ta xlic yicta sba ta spasel ti c'usi leque, yochel ta spasel ti c'usi chopole, ti xac' o xa sjol sbaquil xchi'uque. Mi mu xacajbijubtas une, ta xcham un. Yu'un ma'uc ta jtsacbe ta venta ti oy c'usi lec laj spas to oxe. Ta scoj smul stuc cham. Oy atijel ta c'op cu'un un ti cham une. 21Yan mi ta xacajbijubtas ti vinic ti mu ta sa' ti smule, mi mu ta sa' ti smul une, ta to xch'i xc'opoj batel un. Laj yich' ta muc' ti scajbijubtasel laj avac'be sna'e. Mu'yuc atijel ta c'op un.”
C'ot ta uma' ti Ezequiele
22Ti bu ono'oxe, ti Diose laj yac' sc'ob ta jtojol ti xi laj yalbune: “Lican, va'lan, batan ta stenlejtic. Ti bu taje, ta jchi'inot ta lo'il.”
23Liva'i un, laj jtam batel jbe ta stenlejtic. Ti bu taj une, laj quilbe yutsilal slequilal Dios jech c'u cha'al laj quil ta sti'il uc'um Quebare. Jnupilan xa banomil laj jpatan jba ta lumtic. 24Ti smuc'ul stsatsal Diose lic sventainun, laj sva'anun, xi lic yalbun ti Dios une: “Batan, ba bajo aba ta ana. 25A'yio ava'i, ta xaschuquic ta ch'ojon ti j'ech'el mu xaloc' batele, mi ta svolel abaic xchi'uc ti jteclume. 26Ma'uc no'ox taje, ta spac' sba ta apac'ob cu'un ti avoc' ti uma' ta xac'ot yu'une. Manchuc mi toyobba ti jteclume, laj c'op ma' ti xajajet ta svulele. 27Mi oy c'usi ta jc'an ta xcalbot ava'ie, ta jam ti avee. Va'i unbi, xi ta xaval liquele: ‘Xi s'elan ta xal ti Diose.’ Ti buch'u sc'an ta sts'etan xchiquin ta ya'yiele, ta xa'i. Ti buch'u mu sc'an sts'etan xchiquin ta ya'yiele, mu ono'ox xa'i. Toyobba jteclum ono'ox.
Currently Selected:
Ezequiel 3: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000
