Numeros 13
13
1Bhodïrï ka aïkai go Israelitas ugidïrï Kanaanïrï xako ukami gïn baidaja agaitadai Diuxi tai Gïr Nukadakami aataga ïmadï Moises daidi itïtïdai,
2—Gaagañi bhaibuxtama dan goka kïkïïrhi bai mïï nïnïabana oidigi xi maaxi Kanaanïrï xako maaki iñagai aanï xi óídakagi go Israelitas. Gobai ix makïdï otosamu aapi gï aagai xi ïr bhaitï gukakamigadï ïgai go Israelitas. Bhaibuxtama dan gokadukana maamaradï go kïrhiodami Israelkaru dai aanï ipïrhidi pïxi otosagi ïïmo piipixaradï ïïmo maamaradï ïgai. Kaxkïdï gï aagai xi bhaibuxtama dan gokadukagi ix makïdï otosamu aapi— itïtïdai Gïr Nukadakami.
3Dai Moises ïïgida kaï ñokidï Gïr Nukadakami dai otoi bhaitï gukakamigadï go Israelitas abhiadïrï oidigañdïrï xako Paran tïgidu xi nïnïabana ïgai oidigi xi maaxi Kanaanïrï.
17Go Moises otosa agai go bhaitï gukakami sai mïï nïidana xi maaxi go oidigi Kanaanïrï dai itïtïdai,
—Gamo sïïrhi xako gïï kaatï oidigi Negeb tïgidukïdï xako mai tipu uxi bhaitoma, ami sïïrhi abïr iimïda. Dai bhodïrï abïr tïïtïigi xako gigidaga oidigi. 18Tïgito abïr nïida ami oidigïrï aipakoga. Gï agai xi nïidagi aapimï sa bhai bia óídakami xi dukatai gïn soiñagi kokodiïrï. Dukami óídakami abïr nïida sai bhai gupukakan maaxi dai xïï kabami muidu ïgai. 19Dai gïn tïgito abïr nïida bhaabhakidï sa bhai kaapaka maaxi xiïpï xi mos ïr ikuxi bhaabhaki ïgai. Daidi abïr nïida ix bhai mai kaakaburhi guka. Dai ix kaakaburhi gukakagi abïr nïida sa bhai mai kuukupi gïïgïr ojodai kurarai ixtukïdï sobhidagi ix makïdï buidïrï aiyagi kokodiïrï. Dai dïdïbïradï ïpï abïr nïida xi bhai kïïkïgadu. 20Xi bhai kïï gï duñada maaxi ami ïjïxikami dai xi bhai kïï guka uxi ïpï. Abïr guputuda gïn iibïdaga daidi ibuada bïïxi ix makïdï gïn aagidi aanï. Daidi abïr mïïkadïrï buapa uxi ibhiadï ïpï ix makïdï bhai gï buayi ami xi nïijada aatïmï ix maaxi— itïtïdai Moises go bhaitï gukakami.
Aidïpïrï utudami ayitadai yoobaragai uba ami Kanaanïrï. 21Daidi ka iji go bhaitï gukakami dai nïidamu go oidigi sur amaakoga xi maaxi Sinïrï. Dai bïïxi nïnïidi ïgai norte amaakoga ïpï Rehob kiiki ukami. Go Rehob kaatï ugidïrï xako Hamat tïgidu oidigi.
25-26Bhodïrï ka iimïkai ïgai gokobhai tasaikïdï dada ïgai ïpamu xako daakatadai go Moises ïmadï Aaron dai go gaa Israelitas. Kadesïrï darajatadai ïgai xako Paranïrï tïgidu oidigi. Dai go bhaitï gukakami aagidi go Moises ïmadï go gaa ixtuma tïï ïgai Kanaanïrï dai tïïgi ïgai ibhiadï uxi ix makïdï mïkadïrï bua ïgai.
27Daidi itïtïdai ïgai go Moises aidï,
—Kaxi aatï dada mïkadïrï xako gïr otoi aapi— itïtïdai. —Kïï oidaga naana maaxi kïïkïgadukami dai dïdïbïrai kïïkïgaduka maaxi ïxidagai bïïtarï ïpï. Daiñi, ix maxi ibhiadï— itïtïdai.
Dai tïïgi ibhiadï ix makïdï bua ïgai.
28—Kïïkïgadu go dïdïbïrai dïï go óídakami arhi gupuka dai kaburhi guka bhaabhakidï. Bïïxi xikorhi guka gïïgïr ojodai kurarai ixtukïdï gïn soiñagi ïgai kokodiïrï. Dai ïkobïrako nïidi aatïmï go gïïgïr kïkïïrhi ix makïdï ïr piipixaradï go gïgïr kïïrhi Anak tïgidukïdï. 29Xako Negeb tïgidu oidigi óídaga go Amalekitas agaikïdï óídakami. Dai xako gigidiga oidaga go Hititas ïmadï go Jebuseos danï go Amoreos. Dai go gïï sudagi amakoga, sonoana go Jordan aki, ami óídaga go Kananeos agaikïdï ïpï— ikaiti go bhaitï gukakami agaitai ix maaxi oidigi Kanaanïrï.
30Dai naana kaiti odami kaïkai aatagidï go bhaitï gukakami.
Dai bhodïrï go Kaleb dodorhitu go odami ami xako daakatadai Moises. Daidi ïmo kïïrhi Kaleb tïgidukami ïr ïmoko go bhaibuxtama dan goka bhaitï gukakami ix makïdï Kanaanañdïrï nonoratadai ïpï. Dai Kaleb aabïnakidimi odami xi buaboitudada ïgai Diuxi daidi potïtïdai,
—Timïda dai bui surhigi go Kanaanïrï óídakami ix dukai gïr aagidi Diuxi. Kïï bhaiga aatïmï xi maitiagi dai bopoidagi dïdïbïradï— itïtïdai ïgai go odami.
31Dïï go gaa bhaitï gukakamigadï Israelitas ix makïdï oiditadai go Kaleb aidïxi Kanaanañdïrï nonora, ïgai taagiña gukiba dai sobhidadan buimi. Daidi itïtïdai ïgai go odami,
—Cho— itïtïdai. —Xadïrï ixtuidïna aatïmï go Kanaanïrï óídakami bui. Bamioma ïr gupukami ïgai xi aatïmï— ikaitimi go bhaitï gukakami.
32Maiti ipïrhidi ïgai xi odami kaïkagi Kaleb daidi ikaitimi,
—Maita kïïgadu oidigi gamo Kanaanïrï oidakaragai bïïtarï. Arhiïxi omarhiga ami óídakami. Dudatai gïn kodai ïgai aipakoga— ikaitimi. —Dai go kïkïïrhi tïïtïbïdu ïpï dai oomarhiga maaxi. 33Gïr kaïkabïrai aapimï gïr aaduñi. Tïï aatïmï go gïïgïr kïkïïrhi ïpï ix makïdï ïr piipixaradï Anak. Dai aatïmï mos sosoyi dukai taadaga nïiditai. Dai ïgai sosoyi dukai gïr tïï ïpï— ikaitimi ïgai.
Currently Selected:
Numeros 13: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida
