Lukas 21

Suxi aagai ïmo oki biudu ix makïdï go gïï kiupiana dáí ïmo oidaragai

1Dai kia ami go gïï kiupiana dakatadai go Suxi aidï dai tïï ïgai odami gïn bipidakami sai tuajimi tuminxi go kajoñiïrï xako gï ïmpaidi tuminxi Diuxi aaduindadï bïïtarï. 2Dai tïï ïgai ïmo oki biudu soitigami xi ami tua goka arhi tuminxi mai xii namïakami.

3Daidi potïtïdai Suxi go ix makïdï ami darajatadai,

—Gïn aagidamu aanï ïmo ixtumaxi dai kïïga ïr buaboi— itïtïdai. —Daiñi, go biudu soitigami bamioma dáí xi bhai bïïxkatai go gaa. 4Go gaa darai ix makïdï ka bhaibitukatadai tudu dai go oki soitigami gia dáí bïïxi ixtumaxi biakatadai— itïtïdai.

Suxi aagai ixtumaxi daibuña agai gokiïrioma

5 Dai ami go gïï kiupiana gaatagataidai mamaatïrdamigadï Suxi daidi ikaititadai,

—Agia xigiamaaxi go gïï kiupai— ikaititadai. —Xïï xigiamaaxi go ojodai ixtukïdï duñixi gobai dai go naana maaxi oidaragai xigiamaaxkami ix makïdï maa óídakami ix tukïdï xigiamaaxtudi go kiupai— ikaiti go mamaatïrdami gaatagaitai.

Daidi Suxi potïtïdai,

6—Ayimu ixtuigako bïïxi xia gï duñimu gobai ix makïdï nïnïidimi aapimï. Xia gï duña agai go gïï kiupai tudu. Aidï mai bimu tomarhi ojodai gokoadaama, bïïxi naato xia gï duadakai gobai— itïtïdai.

7Dai go mamaatïrdamiga potïtïdai,

—Gïr mamaatïtuldiadamiga, ¿Xïxkadï po gï duñimu gobai? ¿Dai dukatai maatïkamu aatïmï xïxkadï ka aijimi gobai?— itïtïdai.

8Dai Suxi potïtïdai,

—Mui dadimu kia jaa ix makïdï pokaitadamu sai bia gin sïïrhikamiga. Pokaitadamu ïgai saidi ïr Diuxi otosadï gabhaitïkïakami tudu. Dïï aapimï gï agai xi gïn nukadakagi sai maiti gïn bupuirumadagi ïgai. Jaa pokaitadamu sai ka aijimi Diuxi otosadï ïpï dïï maiti abïr buaboitudada ïgai. 9Daiñi, kajiomakamu aapimï sai mui iimïi kokodi dai go odami gïn bupui susurhigimu aipakoga dïï maiti abïr duduadikuda gokïdï. Gobai mai itïiya ïrhidi sai ka ayi xi xia gï duñagi bïïxi ixtumaxi nïidi aapimï kia— itïtïdai.

10Dai bhodïrï apia aatagidi Suxi go mamaatïrdamigadï daidi potïtïdai,

—Naana maaxi oidakamu kokodi kia oidigi daama. Óídakami ïïmo maaxi ñokadami bui surhigimu jaa óídakami ix makïdï ïma maaxi ñokai dai kokodamu tudu. Gïn bupui kokodamu go dudunukami aipakoga tudu. 11Aidï ïïmapïkïrï gigibukïdamu oidigi kabami dai aipakoga oidakamu bhiugigai dai kokodagai. Dai tïbagiana maaxkamu duadimudaraka mamaaxkami maaxidaragai— astïdai.

12—Podukai daibuñimu tudu dïï gia ïpïgioma muidutai aapimï ix makïdï ïr gin mamaatïrdamiga gïn buitudamu dai soimaaxi gïn taatatuldamu jaa. Baan gïn tutusamu ïgai kiupaigadïrï judidiu dai gïpiïrï gïn bupadamu dai gïn maixatudamu gin buaboidaitai aapimï. Baan gïn tutusamu ïgai reyes buidïrï dai jaa dudunukamiïrï ïpï. 13Dai ami xako baan gïn tutusagi ïgai bhaigakamu aapimï xi ñokadagi gin bïïtarï. 14Dai aanï gïn soiñamu aidï. Kaxkïdï abïr mai buamï ïnïrhiada xi ïkiaxdïrï bhai buadagi ix dukatai ñokadagi ami. 15Aanï gïn maakimu tïgibudagai ixtukïdï ñokadagi aapimï aidï. Dai ix makïdï gïpiïrï gïn bupadagi ka mai tïigimu ixdukatai gïn aa noraidagi ñoki gïn soikïitai aanï— itïtïdai.

16-17—Dïï gia gï agai xi maatïkagi aapimï sai bïïxi óídakami gïn kïïdada agai dai asta gïn dïïdï dai gïn susukurhi dai gïn xixïgi gïn tïïgida agai gïn buidïrï bïïtïkamiga. Dai ïïmadutai aapimï ix makïdï ïr gin mamaatïrdamiga gïn kodituda agai. 18Dïï maiti abïr duduadikuda. Mai xïduñimu gïn ibhïdaga toma lachi. 19Soimaaxi gïn taatamituldamu jaa tudu dïï aapimï abïr gïn kabakada go soi ïrhiaragai buidïrï dai kïïgakïrï bubuakimu aapimï— itïtïdai.

20Dai Suxi oi aatagidï daidi potïtïdai mamaatïrdamigadï,

—Ïpï ïmo ixtumaxi gïn aagidamu aanï. Daiñi, xïxkadï nïijadagi aapimï mui sandadaru xi bïï xikorhi gukagi go Jerusalen bui surhigi agaitai, aidï gï agai xi maatïkagi aapimï sai ka aijimi xi xia gï duñagi go Jerusalen. 21Kïï maatï aapimï sai go Jerusalen Judeana bipiïyi xi kaxkïdï xïxkadï kaxi xia gï duña agadagi go Jerusalen go odami ix makïdï Judeana darakagi gï agai bopiagi gigidi amakoga. Xorai go Jerusalenïrï darakagi gï agai xi bubuakiagi abhiadïrï. Dai ix makïdï oidigana ajiopadagi aidï gï agai xi mai bapakïna ïgai Jerusalenïrï— itïtïdai.

22—Aidï kaxi gï sïïrhiñdamu Diuxi soimaaxi ibuadami ïmadï tudu bai gï iduñagi bïïxi ixtumaxi ojixi Diuxi ñokidïrï. 23Dai sogigi oki ix makïdï nonoakagi aidï dai ix makïdï xiitudai arhi. Kaxkïdï tudu kabami oidakamu soimaaxi taataragai tami Judeïrï aidï gïgïbiditai Diuxi go óídakami tami. 24Ïïmoko go Judeïrï óídakami gïn kodituda agai kokodiïrï. Dai go xibhïadïrï óídakami maamaixamu jaa dai bïïxi aipako bukamu mïïmïkaxi oidigi daama xako óídaga go ix makïdï maiti ïr judidiu. Dai bhodïrï tami Jerusalenïrï gatïanïdamu go ix makïdï maiti ïr judidiu asta xïïxkadï ukami maakiagi oigaragai Diuxi— itïtïdai Suxi.

25—Amaxi gï maaxitudamu mamaaxdaragai#21:25 Mataibo 24:29 tasïrï dai masadiïrï dai xixabugiïrï ïpï. Dai xigarhi duñimu go gïgïr susudagi oidigi daama. Gïgïr xixiokadamu gobai kabami oiñitai aipakoga. Xi go óídakami oidigi daama kabami duduadikuda agai dai mai tïigimu ixtumaxi gïn tïgitokagi nïiditai. 26Susuikituda agai óídakami duduadimukatai. Kaxkïdï tudu asta go xixabugai gigibukïda agai aidï. Dai duduadikuda agai óídakami mai maatïkatai ixtumaxi daibuña agai kia ïpï. 27Aidï gia gin tïïgimu óídakami aanï ix makïdï ïr otosadï Diuxi dai ïmo kïïrhi busai. Gin tïigimu ïgai xi ïmo ikomai saagida dibiamu aanï kïïga biakatai aanï gubukarhigai dai xadutudaragai.

28Daiñi— itïtïdai. —Xïxkadï utudama pobuimi bïïxi ixtumaxi gïn aagidi aanï gobai itïiya ïrhidi sai ka miadaimi ix kïïgakïrï bubuakiagi aapimï. Kaxkïdï xïxkadï po gï duñagi gobai aapimï ix makïdï ïr gin mamaatïtuldiadamiga abïr kabakan dukai gukada dai abïr bhai gïn ïrhiada— itïtïdai.

Suxi aagai ïmo maaxidaragai aagaitai xïxkadï ka miadaidagi ix gatïanïda agai Diuxi

29Dai bhodïrï Suxi aagai ïmo maaxidaragai aatagi daidi potïtïdai mamaatïrdamigadï,

30—Bïïxi gobai ix makïdï gïn aagidi aanï ïr maaxidaragai sai maatïkana aapimï xïxkadï kaxi gatïanïda agai Diuxi. Gïn tïgitobïrai ix maaxi ibuayi ïmo igoxi dïïdï, xiïpï ïmai tomax makïdï uxi. Daiñi, kïï maatï aapimï sai xïïxkadï ka ipoadagi aagadï sai kaxi gï maatïkana sai ka miadaidagi tako. 31Dai podukai ïpï xïïxkadï nïijadagi aapimï sai ka daibuñimi bïïxi go maaxidaragai ix makïdï gïn aagidi aanï gï agai xi maatïkagi aapimï sai ka miadaimi ixtuigako gatïanïda agai Diuxi— itïtïdai.

32—Dai gïn aagidamu aanï ïpï ïmo ixtumaxi dai kïïga ïr buaboi. Daiñi, aanï aagai sai mai kia kokai aapimï ix makïdï óídaga xibi sai daibuña agai bïïxi gobai ix makïdï gïn aagidi aanï. 33Ka podukai aagai aanï xi kaxkïdï kïïga gï maatï sai pobï gï duñimu gobai. Daiñi, go tïbagi dai go oidigi gia ugitimu dïï gia gin ñoki gia ïr buaboikamu bïïxkïrï bïïtarï— itïtïdai.

34-35Dai apia gamamaakai aatagi go Suxi daidi potïtïdai ïgai mamaatïrdamigadï,

—Gin aaduñi, todian dukai ayimu xi gamaaxitudagi aanï xi ïr Tïanïdami aanï. Odami mai maatï dai mai nïnïraka xi po duñagi aanï dai todian dukai ayimu gobai bïïxi óídakami ïmo trampa dukai ix makïdï kukupai todian dukai. Gïn nukadabïrai aapimï tudu tadu mai nïnïasïrhiakagi aapimï tïtïitoitai iidagai dai buirudagai xiïpï kabami buamï gïn ïrhiditai gïn oidakaragakïdï tami idi oidigi daama. Maiti abïr gïn dagito tudu xi pomaaxiïrï gïn tïgito ajiopadagi aapimï xïïxkadï todian dukai gin maaxitudagi aanï xi ïr Tïanïdami aanï— itïtïdai.

36—Kïïga abïr nïnïasïrhiakami dukai óídaka bïïx tasai tudu. Dai bïïxkïrï abïr daanïda Diuxi sai podukai buiya aapimï gubukarhigai. Podukai kïïgakïrï bubuakimu aapimï go soi ïrhiaragaiñdïrï ix makïdï daibuña agai tami oidigi daama. Podukai kïïga mai xaïraitai gukakamu aapimï gin buitapi. Aanï in buitapi tudu ix makïdï ïr otosadï Diuxi dai ïmo kïïrhi busai— itïtïdai Suxi go mamaatïrdami gamaakaitai ñoki.

37Aidï bïïx tasai gamamaakaiña ñoki go Suxi go gïï kiupiïrï Jerusalenïrï. Dai tukarï aimïraiña ïgai go gidi Oliboana dai ami gï urhiñiña. 38Dai ïïki kiamoko daibuiña mui odami go gïï kiupiamu kaïka ïrhiditai ixtumaxi aagaiña go Suxi.

Currently Selected:

Lukas 21: NTP

Highlight

Copy