Lukas 20

Go dudunukami gïpiïrï daituda ïrhiditadai go Suxi dai gatïkakai ix tuma sïïrhikami biakami ïgai

1Dai ïmo imidagai sai go Suxi gatïtïïgiditadai ñoki odami ami go gïï kiupiana. Ga aiturhitadai ïgai go bhai ïrhiaragai aatagi tudu. Bai go tïtïanïdamigadï go dadaxdadami ïmadï go tïtïgiadami sïïrhikami ïmadï bhaitï gukakamigadï go judidiu ami ayi buidïrï go Suxi 2daidi potïtïdai,

—¿Tuma sïïrhikami bia aapi dai pomaaxi aatabuayi?— itïtïdai. —¿Borai gï maa sïïrhikami xi pobuadagi aapi tudu?— itïtïdai.

3Dai Suxi potïtïdai,

—Aanï ïpï gïn tïkakamu ixtumaxi bïrai gin aagida. 4¿Borai maa sïïrhikami go Juan sai bapakonana odami? ¿Diuxi? ¿Odami xio?— itïtïdai.

5Dai mai tïtïgaitadai ïgai ix dukatai aa noraidagi daidi gïn aatagidimi aipakoga daidi ikaitimi,

—Ix tïdagi aatïmï sai Diuxi maa sïïrhikami go Juan aidï gia gïr tïkakamu Suxi ix tuixi mai buaboitu aatïmï go Juan. 6Dïï gia xi tïdagi aatïmï sai go Juan maiti ïr ñokituldiadamigadï Diuxi dai sai mosïkaxi odami ïgai dai maa sïïrhikami go Juan aidï gia gïr bui bhakoko antaada óídakami dai gïr maikarsa antaada dai gïr kodagi. Kïïga buaboitudai odami saidi go Juan ïr ñokituldiadamigadï Diuxi di— ikaitimi go bhaitï gukakami.

7Mai tïtïgaitadai ïgai ixdukatai aa noraidagi go Suxi tudu dai potïtïdai,

—Mai maatï aatïmï xajadïrï bhïiyi sïïrhikami go Juan— itïtïdai.

8Dai go Suxi potïtïdai,

—Aidï gia aanï maiti gïn aagidamu ïpï ix tuma sïïrhikami bia aanï dai aatabuayi— itïtïdai.

Suxi aagai ïmo maaxidaragai aatagi aagaitai nunukadakami ïxikami mai kïï tutiakami

9Dai bhodïrï aagidi Suxi ïmo maaxidaragai aatagi go odami daidi potïtïdai,

—Ïmo imidagai oidakatadai ïmo kïïrhi dai ïi mui tutukami uba dïbïradïana. Dai bhodïrï tajukamikïdï nukaturhi ïgai go ïxikami jaa dai mïkaxi jii xibhïakoga dai tïbïpi daka agai. 10Dai ka aïkai yoobaragai sai otoi ïgai ïmo pioñi sai tanïna xïïxi ajïakatadai yoobaradï. Dïï mos go ix makïdï tajukamikïdï nukadatadai go ïxikami gïikakarai go pioñi dai soi dodai dai apia dukai ajako otoi mai maakakai ixtumaxi. 11Dai bhodïrï go tuidakami go dïbïrai otoi ïpï ïmo pioñi sai tanïna lachi yoobaradï. Bai go ix makïdï nukadai ïxikamigadï gïikakarai ïgai ïpï dai mos parui dai maigobai otoi ïpï mai maakakai ixtumaxi. 12Dai go tuidakami otoi ïpï ïmoko bai go gaa muragi dai adaji abhiadïrï.

13—¿Dukatai iduna aanï xibi?— gï ïrhidi go tuidakami go dïbïrai. —Xibi otosamu aanï gin maara ix makïdï oigïdai aanï. Ïgai gia xadïrï mai xadutuadana ïgai— gï ïrhidi. Dai otoi.

14Dïï gia tïïgakai go gaa ix dibiatadai maradï go tuidakami go dïbïrai sai gïn aatagidi ïïgi ïgai dai pobai gïn tïtïdai ïïgi,

—Daiñi, gobai ïr tuidakamika agai go dïbïrai. Gï agai tïx muagi sai aatïmï gïr bïïtarï biyagi gobai— ikaiti.

15Dai aadaki ïgai maradï go tuidakami go dïbïrai abhiadïrï ïxikamiañdïrï dai mua.

Dai oi Suxi aatagidï daidi ikaiti,

—¿Ix duñimu go tuidakami go dïbïrai go aatabuadami galtutiakïdï? 16Aanï agai sai dibimu ïgai dai naato kodamu go aatabuadami dai maakimu go dïbïrai jaa— itïtïdai Suxi go odami.

—Agia maiti gï agai xi podukai daibuñagi ix makïdï aagai aapi— ikaiti go odami kaïkai aatagidï.

17Daidi Suxi sïïrhi buijako nïnïaba go odami daidi potïtïdai,

—Ka podukai aagai aapimï sai maiti ipïrhidi sai podukai daibuñagi ix dukai idui go aatabuadami galtutiakïdï. Dïï, ¿maiti ix ka podukai daibuskimi? ¿Maiti ix podukai ikaidaga Diuxi ñokidïrï? Ami ikaiti sai,

—Diuxi otosadï gabhaitïkïakami ïr ïmo kïïgadukami odai dukai kïïsaragai bïïtarï baaki. Dai pipioñi pupuirugami kïïsa agai baaki dai maigobai daitu go odai mai kïïgadukami dukai nïiditai. Dïï gia Diuxi ojoida bhïiyi go galbaaxi odai dai dáí daagïka bïïtarï xiixodï baaki ix makïdï kïsaimi ïgai— itïtïdai Suxi.

18—Daiñi— itïtïdai. —Aanï ïr Diuxi otosadï gabhaitïkïakami dai aanï ïr go odai duu ix makïdï aagai go ojai. Dai xorai maiti gin buaboitudagi ïr ïpïan dukami ïmo odami ix makïdï utubagi go odiana dai bïïxi laalachi bii gïsïkai. Dai ïpïamaaxi ïgai odami ix makïdï go odai gïxiagi daama dai boixagi ïpï. Pomaaxi odami ix makïdï maiti in buaboitudai. Diuxi otosadï aanï tudu kaxkïdï— itïtïdai.

19Dai go tïtïgiadami sïïrhikami ïmadï go dadaxdadami bhaitï gukakamigadï maatïkatadai sai ïgai agaitadai go Suxi. Kaxkïdï gaagaitadai ïgai ix dukatai bhïiyagi go Suxi dïï duadiko ïgai go odami dai mai bhïiyi kia.

Suxi aagai sa bhai bia ïmoko xi tïïgidagi kuota go gïï dunukami César tïgidukami

20Dai go tïtïgiadami sïïrhikami ïmadï go dadaxdadami bhaitï gukakamigadï kïïga nukadatadai go Suxi gaagaitadai ixtukïdï gïpiïrï daitudagi. Ïxtotai aa namïki ïgai kïkïïrhi sai kïï tutiakami gïn buadagi ïgai dai mïï tïkakagi naana maaxi ixtumaxi go Suxi. Gaagaitadai ïgai ixtukïdï gïpiïrï buajagi go kaigiïrï tudu sai ïgai gamaixana. 21Dai go kïkïïrhi ïgai potïtïdai go Suxi,

—Aapi gïr mamaatïtuldiadamiga, kïï maatï aatïmï sai aapi kïïga gatïtïïgidi aatagi aagaitai aapi ixtumaxi ïr sïïrhi. Aapi gia ïmadugan dukai nïidi bïïxi odami tudu dai sïïrhi tïtïgidi aapi Diuxi tïgibudadï go odami toma xoraikagi ïgai. 22Kaxkïdï ipïrhidi aatïmï pïxi gïr aagidagi, ¿Kïïgadu xi ix tïïgidagi aatïmï kuota go gïï dunukami romano César agaikïdï? ¿Cho xia?— itïtïdai.

23Dïï gia go Suxi máí sai ïgai buirumada ïrhiditadai daidi potïtïdai,

24—Gin tïïgidabïrai ïmo tuminxi romano— itïtïdai.

Bai go kïkïïrhi tïïgi ïmoko. Dai Suxi potïtïdai,

—¿Borai modï dai tïtiaradï tami go tuminxiïrï daka?— itïtïdai.

Bai go kïkïïrhi potïtïdai,

—Go gïï dunukami César aba— itïtïdai.

25—Ïjï— itïtïdai Suxi. —Kaxkïdï gï maatï sai ïgai tuidadï gobai di. Maakabïrai go gïï dunukami ixtumaxi ïr tuidadï ïgai tudu. Dai maakabïrai Diuxi ixtumaxi ïr tuidadï ïpï— itïtïdai.

26Kïïga aa noraidi Suxi go kïkïïrhi ami go odami buitapi tudu dai ka maiti ixtui ïgai ix dukatai buirumadagi dai gïpiïrï daitudagi. Xi kaxkïdï ka mai tïtïgaitadai go kïkïïrhi ixtumaxi gïn tïtïgitoagi dai ka dodorhi bii.

Chïki kïkïïrhi Saduseo maaxituda ïrhiditadai sai mai tipu duakaragai koidadï bïïtarï dai tïkakai ixtumaxi Suxi

27Daidi ami dada chïki Saduseo. Ïgai mai buaboitudai sai oidaga duakaragai koidadï bïïtarï. Dai kaxkïdï tïkaka ïgai go Suxi dai potïtïdai,

28—Gïr maatïtuldiadamiga— itïtïdai. —Go Moiseskaru gïr biturhi ojai xako ikaiti sai, xi ïmo kïïrhi mukiagi mai kia mamaatakai oñigadï abhana sai gï agai xi sukurhidï go imiadï ïmadï biyagi go biudu dai mamaatadagi abhana xïgidï bïïtarï— itïtïdai. 29—Gï aagidamu aatïmï ix dukatai daibusai ïmo imidagai pai gïr aagida aapi ix dukatai maaxkamu xïxkadï duduakatuldagi koidadï ïpamu— itïtïdai. —Їmo imidagai oidakatadai kubarakami ïmo xixïgïmï. Dai go gaxiïgi ïmadï bii ïmo oki dïï mos muu ïgai mai kia maratakai abhana. 30Dai bhodïrï go ix makïdï oidi ïmadï bii go biudu dai muu ïpï mai kia maratakai. 31Dai gokiïrï go gïmai ix makïdï oidi ïmadï bii go galbaaxi oki ïpï dai muu ïpï mai kia mamaatakai. Podui bïï kubarakami go kïkïïrhi dai bïïxi koi mai kia maratakai tomarhi ïmadutai ïgai. 32Dai gokiïrï muu go oki ïpï. 33Xibi gïr aagidañi, ¿Borai oñigadï ka agai go oki xïïxkadï duduakatudagi koidadï ïpamu? Bïï kubarakami kïkïïrhi ïmadï bitadai ïgai di— itïtïdai.

34Dai Suxi potïtïdai,

—Xibi óídakami tami oidigi daama gia gaïmadï bipiïyi tudu. 35Dïï gia gokiïrï go gïmai oidigïrï ka mai pobuadamu óídakami. Ïgai ïr ix makïdï Diuxi maakai oigaragai xi duduakatudagi ïpamu dai xi óídakagi go gïmai oidigïrï. Ïgai ka mai gaïmadï bipiïyi dai tomarhi mai mamaakai maamaradï sai gaïmadï bipiïdagi ïpï. 36Ka duduaka ïgai ïpamu dai kaxkïdï ïpïan dukamikamu ïgai Diuxi tïtïañikarudï. Ka mai koimu ïgai tudu maamaradïkatai ïgai Diuxi.

37Kïïga duduakarïi koidadï ïpamu tudu. Daiñi, go Moiseskaru oja ïmo ojai ïïki aagaitai go uparai xako saagida mïjïitadai táí dai ami gïr maaxiturhi sai oidaga duduakaragai koidadï bïïtarï. Ami aagai ïgai sai go Abraamkaru ïmadï Isaakaru dai Jakobokaru buaboitudai Diuxi. Ka mui umigi ïr koidadïkatadai go Abraamkaru ïmadï Isaakaru dai Jakobokaru aidïxi poduu oja go Moises sai buaboitudai ïgai Diuxi tudu. Dai gobai itïiya ïrhidi sai tomax ka koitadai ïgai bïïxkïrï kia duduakatadai iibhïadï. Ïma dukai dukatai buaboitudaiña ïgai Diuxi di. 38Diuxi ïr Diuxigadï go duduakakami tudu. Mai xu xi ïr Diuxigadï ïgai koidadï. Kaxkïdï maatiga maaxi sai duduakarïi koidadï. Bïïxi odami ix makïdï buaboitudai ïr duduakakami Diuxi bïïtarï tudu— itïtïdai Suxi go Saduseos.

39-40Dai ami darajatadai chïki tïtïgiadami sïïrhikami ïpï dai kaï ïgai xïï kïïga aa noraidi Suxi go tïkakaragai ix makïdï aagidi go Saduseos xi kaxkïdï ka maiti ipïrhi ïgai ix tïkakagi bamioma. Dai bhaiyoma potïtïdai ïgai,

—Aa gia kïï aagai aapi gïr mamaatïtuldiadamiga— itïtïdai.

41Dai Suxi potïtïdai,

—¿Ix tuixi pokaitiña odami sai Diuxi otosadï gatïanïdami ïr go Dabidkaru pipiixaradï? 42Daiñi, go Dabidkaru oja ïmo ñoki ïïki go Salmo librogadïrï aagaitai Diuxi otosadï dai ami oja ïgai sai,

Diuxi Gïr Nukadakami aagidi ïmo ñoki ïgai ix makïdï ïr gin Tïanïdamiga daidi potïtïdai,

Dakañi gin sïïrhixapadïrï 43asta xïïxkadï gï maitïtulda aanï bïïxi gï buidïrï bïïtïkamiga, itïtïdai Diuxi ïgai ix makïdï ïr gin Tïanïdamiga. Podukai tudu oja go Dabidkaru ïïki.

44Ami go ojiïrï pokaiti go Dabidkaru sai Diuxi otosadï ïr Tïanïdamigadï. ¿Ix ïr Tïanïdamigadïka ïgai go Dabidkaru aidï gia dukatai ïr pipiixaradïkana ïgai ïpï?— itïtïdai Suxi go tïtïgiadami sïïrhikami.

45Dai bhodïrï Suxi maa ïmo ñoki mamaatïrdamigadï dai bïïxi go odami ix makïdï ami daraka kaï. 46Suxi potïtïdai,

—Gïn nukadabïrai go tïtïgiadami sïïrhikami. Mai kïï tutuiga ïgai di. Daiñi, ïgai kïïga ojoidi xi kïkïïgadukami yukuxi gïn aadatikagi sai odami po gïn ïrhiadagi sai ïgai ïr gïgïrdukïdï. Ojoidi ïgai xi kaiyana ajiopadagi saidi odami kïïga xadutudaitai biaturhiadana. Dai ojoidi ïgai xi kïkïïgadukamioma daraikaruana dadarïdagi kiupiana xiïpï bagimiana. 47Ïgai mai xaïraitai gaïxidiña kiikidї bipiudu dai tïtïbïdukami aagaiña daañigai Diuxi sai odami po gïn ïrhiada sai kïï tutuiga ïgai. Ïgai gia kïï bïtïkami biakamu gïgïbidaragai— itïtïdai Suxi.

Currently Selected:

Lukas 20: NTP

Highlight

Copy