Juan 3

Bïïxi Odami gï agai ix ïpamu utudui bubuakiagi

1-2Ïmo imidagai tukarï ïmo kïïrhi Nikodemo tïgidukami gadibiji go Suxi. Ïmo Tïanïdamigadïkatadai ïgai go judidiu dai buaboitudai ïgai ïmo buaboidaragai ix makïdï fariseo buaboidaradï tïgidu. Maatia ïrhiditadai ïgai ix maaxi tïanïi Diuxi daidi potïtïdai ïgai go Suxi,

—Aapi Mamaatïtuldiadami— itïtïdai. —Kïï maatï aatïmï sai Diuxi gï otoi sai gïr maatïtuldana kaxkïdï kïïga ibuayi aapi maaxidaragai gïgïrdukami gï ïmadï dakatai Diuxi. Ix maiti gï ïmadï dakamudai ïgai xadïrï ibuadana aapi go maaxi— itïtïdai ïgai.

3Daidi Suxi itïtïdai,

—Kïïga tïgito kaïka idi ñoki. Daiñi, mosïkaxi odami ix makïdï ïpamu utudui bubuakïi biaka agai oigaragai ix Diuxi tïanïdagi, go gaa gia cho— itïtïdai.

4Daidi go Nikodemo itïtïdai,

—¿Dukatai ixtutuidiña ïmoko ix ïpamu utudui busiagi ka kïrhitukai?— itïtïdai. —Xadïrï baakïna ïmoko dïïdï ïrana dai ïpamu busaiña— itïtïdai.

5-6Dai Suxi itïtïdai,

—Kïïga gï tïgito kaïka idi ñoki. Daiñi, gï aagai ix ïpamu utudui bubuakiagi odami saidi gïn tïanïna Diuxi. Ïma dukai xadïrï biakana oigaragai ix Diuxi tïanïdagi. Daiñi, odami ix makïdï mosïkaxi dïïdïañdïrï bubuaka ix dukai bubuakai bïïxi odami mos ïr odami ïpïan dukami tomaxorai dai mai bia oigaragai ix Diuxi tïanïdagi. Mosïkaxi ïgai ix makïdï Diuxi Ibhïgadï gubukarhigadïkïdï ka ïpamu utudui bubuakïi gia. Mosïkaxi ïgai bia oigaragai ix Diuxi tïanïdagi— itïtïdai.

7—¿Tuipïxi mai maatï kaï ix tumaxi gï aagidi aanï?— itïtïdai. 8—Gï aagidamu aanï ix maaxi gobai. Daiñi, aatïmï mai maatïkana xajadïrï daibuña agai go ïbïrhi. ¿Maiti ix ïr buaboi gobai? Lachi ïmapadïrï daibuskïi gobai dai laachkïdï ïmapadïrï dai aatïmï mai maatïkana ix dukatai pobuayi gobai. Mos nïidiña aatïmï dai kaïkana xudu nïituskudan buadana gobai ixtumaxi. Potudu maaxi odami ïpï ix makïdï utudui bubuakïi Diuxi Ibhïgadï gubukarhigakïdï. Mai nïidiña aatïmï ix dukatai aatabuayi Diuxi Ibhïadï ïgaikïdï sai utudui bubuakïna ïgai dïï gia nïidiña aatïmï ix ka ïmapïdui odami ibhïadï— itïtïdai Suxi.

9Daidi Nikodemo itïtïdai,

—Mai xii kïï maatï kaï aanï gï aatagi aapi Suxi. ¿Dukatai gï utudutuldana ïmo odami ibhïadï?— itïtïdai.

10Dai Suxi itïtïdai aidï,

—¿Maiti ix ïr ïmo mamaatïtuldiadami aapi go Israelitas bïïtarï? ¿Dukatai mai maatï kaï aapi? 11Kïïga gï tïgito kaïka tudu ix makïdï gï aagidamu aanï. Daiñi, aanï ïmadï gin mamaatïrdamiga gïn aagidi ixtumaxi kïïga nïidi aatïmï dai kïïga maatï dïï tomax dukai aapimï mai buaboida kaïkana gïr ñoki— itïtïdai Suxi. 12—Mai buaboitudai aapimï tomaxi gïn aagidi aanï ixtumaxi daibuskïi tami oidigi daama dai ix gïn aagidagi ixtumaxi daibuskïi tïbagiana aidï gia bamioma maiti gin buaboituda antaada aapimï. 13Mai tipu ïmai xorai tïsai mïï daana tïbagiana tudu, mosïkaxi ïïgi aanï— itïtïdai. —Aanï tudu ïgai dai tïbai mïï daana tïbagiañdïrï dai kïïgakïrï odami busai. Kaxkïdï aanï gia maatï ixtumaxi daibuskïi tïbagiana.

14Gï aagidamu aanï ixdukatai daibuñimu aanïkïdï ix makïdï kïïgakïrï odami busai. Daiñi, ïïki aidïxi oidigana ajiopatadai gïr piipixara, soimaaxi idui ïgai dai Diuxi otoi kookoyi sai kïïna. Dai go Moiseskaru ïmo uxiana bañigi ïmo baiñomi kooyi sai mai mukuna xorai nïijadagi. Podukai ïpï gï agadamu ix aanï gin bañigituda ïmo kuruxiana, ïmo uxiana tudu. 15Dai podukai ix dukai kïïgakïrï bubuakai odami nïiditai go baiñom kooyi podukai ïpï odami ix makïdï gin buaboitudagi kïïgakïrï oidaka agai bïïxkïrï bïïtarï— itïtïdai Suxi.

16—Diuxi sïïrhikïdï kïïga oigïdai bïïxi oidigi daama óídakami dai kaxkïdï gin otoi ïgai aanï ix makïdï ïr Maradï ïmadugakïdï. Gin otoi ïgai an sai mukuna bai mai kona ix makïdï gin buaboitudagi dai bhaiyoma bïïxkïrï bïïtarï óídakana.

17Diuxi gin otoi oidigi daama mai xu sai aagana aanï ix tuma gïgïbituldaragai ajïga óídakami. Gin otoi ïgai bhaiyoma an sai kïïgakïrï bubaidana óídakami— itïtïdai Suxi.

18—Aanï tudu ïr Diuxi Maradï ïmadugakïdï dai tipu gïgïbidaragai odami bïïtarï ix makïdï gin buaboitudai. Dïï gia Diuxi ka aagai ix tuma gïgïbidaragai ajiagai odami ix makïdï maiti gin buaboitudai. Maiti ipïrhidi ïgai ix buaboitudagi tomaxi aanï ïr Diuxi Maradï ïmadugakïdï kaxkïdï— itïtïdai. 19—Aanï ïr kudagi gï dukami tïtïgiditai odami ix tumaxi ïr buaboi. Dai ayi aanï tami oidigi daama dïï odami ibuadana soimaaxkami dai xioma ojoidiña ix ïxto biagi gïn soimaaxkamiga tukapiïrï dukai oidakatai. Mai ojoidi ïgai ix gï kudaidagi go soimaaxi ix makïdï ibuadana ïgai sai maaxikana. Bhaiyoma ïxto biaka ïrhidi ïgai gïn soimaaxkamiga. Kaxkïdï Diuxi gïgïbitulda agai ïgai. 20Odami mai ojoidi go kudagi dai tomarhi mai ojoidi ix miadïrï darakagi ïgai. Go kudagikïdï kïï maaxikana go soimaaxkami ix makïdï ibuayi ïgai kaxkïdï. 21Dïï gia odami ix makïdï ïïgidi Diuxi ïgai gia oigïdai go kudagi. Kïï ojoidi ïgai ix kudidakagi go kudagi sai kïï maaxkana sai ka bïïna daraka ïgai Diuxi dai kïïga ibuayi. Kaxkïdï ojoidi ïgai go kudagi— itïtïdai Suxi go Nikodemo.

Go Juan kïïga xadutudai go Suxi

22Gokiïrï jii Suxi Judeamu dai oi mamaatïrdamigadï ïpï dai ami gabapakonaitadai ïgai odami. 23Aidïpïrï go Juan gabapakonaitadai odami ïpï xako Enón tïgidu oidigi, miadïrï Salim. Gïïpigatadai sudagi ami dai mui daibuiña odami sai Juan bapakonana kaxkïdï gabapakonaitadai ïgai ami. 24Aidïpïrï mai kia gï maixatu go Juan tudu.

25Daidi aidïpïrï gïn bupui ñokaitadai ïmo judiu ïmadï mamaatïrdamigadï Juan. Agaitadai ïgai ixdukatai gï agai ix gï bakuanadagi ïmoko sai Diuxi kïïgakïrï nïijadana. 26Dai mamaatïrdamigadï Juan iji dai mïï aagidi daidi itïtïdai,

—Aapi Juan, go kïïrhi Suxi ix makïdï agaitadai aapi baasïki mïï go gïï aki Jordan basadïrï, gobai gabapakonai odami dai bhaiton bïïxi óídakami uurapïkïi xibi— itïtïdai.

27Dai Juan itïtïdai,

—Diuxi ïgai dai podukai maa gubukadagai go Suxi ix kaxkïdï mui odami uurapïkïi. Xadïrï bhïna gubukadagai podukai ïmo odami ix Diuxi maiti ipïldagi di— itïtïdai. 28—Kïïga gin kaï aapimï aidïxi gïn aagidi aanï baasïkioma sai aanï maiti ïr Ga Tïanïdami. Dai bhaiyoma mos ïr ïmo otoxikami aanï bhaitïki ïgai ix makïdï gia ïr Ga Tïanïdamika agai— itïtïdai. 29—Aanï gin bïïtarï mos ïr ïmo bhai ïrhiaragai nïiditai ix bamioma mui odami uurapïkïi ïgai ix bhai ix makïdï aanï gin uurapïkïi— itïtïdai. —Gïn aagidamu aanï ïmo maatïtuldaragai xibi ix maatïka aapimï ix maaxi gobai— itïtïdai. —Daiñi, xïxkadï oidakagi ïmo kunataragai saidi go nobia gï agai ix oijadagi go nobio. Dai kompañerogadï go nobio makïdï kïï oigïdai ïgai bhai gï ïrhidiña kaïkatai ñokidï go nobio kompañerogadïkatai ïgai. ¿Mai ix pomaaxi gobai? Daiñi, Diuxi Maradï kompañerogadï duu aanï dai kïïga oigïdai aanï ïgai. Dai go odami ïr nobiagadï gïn dukami ïgai ïpï. Kaxkïdï kïï bhai gin ïrhidi aanï ix oijadagi odami ïgai. 30Gï agai tudu ix bïïx tasai tïkabioma tïkabioma namïakagi Diuxi Maradï nai aanï bïïx tasai dumarhioma dumarhioma biyagi. Ïmo bhai ïrhiaragai gobai aanï gin bïïtarï tudu— itïtïdai Juan.

31Dai Juan oi aatagidï daidi ikaiti,

—Diuxi Maradï tïbagiañdïrï dibia kaxkïdï bamioma namïga ix toma xorai. Aatïmï mos ïr tami oidigi daama óídakami dai bïïxi gobai gïr tïgibudaga mos ïr odami tïgibudadï ix makïdï bia aatïmï. Dïï gia Diuxi Maradï tïbagiañdïrï dibia. 32Ïgai aagai mosïkaxi ixtumaxi kïïga nïidi dai ixtumaxi kïïga kaï dïï tomax dukai bhaitoma mai tipu xorai buaboitudai ñokidï. 33Dïï gia oidaga ïïmoko dai kïïga buaboitudai dai ïgai mos buaboidaitai gamamaaxidi Diuxi ix mai yaatagïi ïgai. 34Diuxi aagidi Maradï ix tuma ñoki aituldana ïgai óídakami dai mïkadïrï otoi maakakai bïïxi Diuxi Ibhïgadï gubukarhigadï. Dai Diuxi Maradï mai aagaiña ïma maaxi, mosïkaxi gobai ix makïdï Diuxi aagidi. Kaxkïdï gï maatï saidi ïr buaboi ñokidï aagaitai ïgai go baaxi ñoki ix makïdï Diuxi aagidi. 35Dai Diuxi gïr Oga sïïrhikïdï oigïdai Maradï dai maa gubukadagai ix tïanïna bïïxi aïkatai. 36Dai bïïxkatai ix makïdï buaboitudagi Diuxi Maradï kïïgakïrï óídaka agai bïïxkïrï bïïtarï. Dïï gia xorai mai ïïgiadagi ïgai mai buaboitudaitai mai kïïgakïrï óídaka agai dai taata agai gïgïbidaragai Diuxiañdïrï bïïxkïrï bïïtarï bhaiyoma— itïtïdai Juan go mamaatïrdamigadï.

Currently Selected:

Juan 3: NTP

Highlight

Copy