Juan 2

Suxi idui ïmo bino sudagikïdï

1Bhodïrï abhiadïrï baika tasaikïdï oidatu ïmo kunataragai ïmo arhi kiikiïrï xako Kana tïgidu. Go Kana Galileïrï bipiïyi. Dai Maria, Suxi dïïdï, jii gamoko go kunataragai bïïtarï. 2Dai Suxi ïmadï go bhaibuxtama dan goka mamaatïrdamigadï bapaidarxikatadai dai iji ïpï.

3Kunataragiana darakatadai ïgai sai ugidagai go bino sai go Suxi dïïdï itïtïdai,

—Ka ugidagai go bino— itïtïdai.

4Daidi Suxi itïtïdai,

—¿Gin daada, tuipïxi gin baasa ïrhidi gobiïrï?— itïtïdai. —Mai kia ayi ix tuigako gï aaga gin aaduindaga di— itïtïdai.

5Saidi Suxi dïïdï potïtïdai go baxibhadami go bino,

—Ïïgiadabïrai bïïxi aïkatai ix tumaxi gïn tïanïda go Suxi— itïtïdai.

6 Bai darajatadai naadami ojodai ajayi gïgïrdukami xakoga gïn ikomaiña go judidiu ix duu gïn biturhi ïgai buaboidaradï. Dai go ajayi parï ïmo ciento litro sudagi ajïi ïïmoko.

7Daidi Suxi potïtïdai go baxibhadami aidï,

—Susudadabïrai kïïga go ajayi sudagi— itïtïdai.

Saidi go baxibhadami kïïga ïïgidi dai kïïga susudagi bïïxi go ajayi. 8Dai gokiïrï potïtïdai Suxi,

—Baxidabïrai lachi go tïanïdami go bagimi— itïtïdai.

Bai go baxibhadami kïïga ïïgidi dai podui ixdukatai aagidi ïgai.

9-10Daidi go tïanïdami go bagimi kïïga bïïñiakami dïï go bino daidi otoma báí ïgai go ix makïdï onta agai daidi potïtïdai ïgai,

—¿Tuixi ïpïgioma gïr baxidi aapi go bino bamioma soimaaxkïdï dai gokiïrioma gïr baxidamu aapi go bïïñiakïdï karhioga kugaidakai go bagimi?— itïtïdai. —¿Mai ix gï agaitadai ix ïpïgioma iiyagi aatïmï go bïïñiakïdï dai gokiïrioma kaxi gaiikai odami bhai gïïpi aidï gia iiyagi ix makïdï mai xii bïïñiga?— itïtïdai.

Go tïanïdami go bagimiana mai maatïkatadai xajadïrï dibia go bino dai ikaiti. Dïï gia go baxibhadami kïïga maatïkatadai. 11Idi tudu ïr tukamidïrï maaxidaragai ix makïdï idui go Suxi Kristo dai gokïdï mamaaxitudai ïgai xïïxi ïr gïdukami dai xïïxi ïr gubuakami. Daidi mamaatïrdamigadï buaboitu aidï nïiditai go maaxidaragai ix makïdï idui Suxi. Dai go arhi kiiki xako pogïdui gobai Kana tïgidu. Go Kana Galileïrï bipiïyi.

12Bhodïrï jii Suxi abhiadïrï ïmadï dïïdï dai susukurhidï dai go mamaatïrdamigadï ïpï. Iji ïgai ïmo ciudadana xako Kapernaum tïgidu dai ami bii ïgai chïki tasai.

Suxi bubaitu gaagaradami go gïï kiupiañdïrï ix makïdï Jerusalenana kïïka

13 Daidi bhodïrï bïïxi umiïrï ka tuigako go judidiu ibuayi ïmo gïï bagimi ix makïdï Daibuñigïrï tïgidu. Dai xibi ka karhioga ayitadai gobai ix kaxkïdï jii go Suxi Jerusalenamu go bagimi bïïtarï. 14Dai ka aïkai Jerusalenïrï baa ïgai go gïï kiupiïrï dai ami tïï mui gaagaradami naana maaxi buxtaki daxdaragai bïïtarï. Ami kiupiana gagaratadai ïgai tuturu dai kañiñiru dai tutugu. Dai darakatadai jaa ïpï ix makïdï gakambiandoi xibhïadïrï óídakami tuminxigadï. 15Daidi turobiñdikïdï idui ïgai ïmo ikixanai dai ïgaikïdï bubaitu ïgai go gaagaradami ami kiupiañdïrï ïmadï modukai sosoigadï tuturu dai kañiñiru. Dai bhodïrï bïïxi aipako surhi ïgai tuminxigadï ïmadï modukai memesagadï ix makïdï ami kambhiandoi tuminxi ïpï. 16Dai darakatadai gaagaradami tutugu ïpï dai Suxi bhagaidi ïgai daidi potïtïdai,

—Bubaidabïrai gïn aaduindaga tabhiadïrï— itïtïdai. —Maiti abïr ïmo gagarakaru dukai nïida kiidï gin Oga— itïtïdai.

17Daidi mamaatïrdamigadï Suxi nïiditai ix dui ïgai gïn tïgito ix kaiti ïmo ojai xako ikaiti,

Aapi gin Diuxi, aanï kïïga oigïdai gï kii dai sïïrhikïdï gin tïgito aimïrai aanï ix dukatai nukada gobai, ikaiti go ojai.

18Daidi go judidiu ñokidi go Suxi daidi itïtïdai,

—¿Tuma sïïrhikami bia aapi dai pomaaxi gatïanïdan buayi aapi go gïï kiupiïrï?— itïtïdai. —Gïr tïïgidañi ïmo maaxidaragai ix maatïka aatïmï ix bhai Diuxi gï maa sïïrhikami ix pomaaxi buadagi— itïtïdai.

19Dai Suxi potïtïdai aidï,

—Gï daitudamu idi Diuxi baakidï dai aanï baika tasaikïdï ïpamu bañigidamu— itïtïdai.

20Daidi go judidiu potïtïdai Suxi,

—¡Xadïrï ixtuidana aapi ix bañigidagi baika tasaikïdï! ¡Gokobhai dan naadami umigi gïn aaga go bañigidadami dai idui di! ¿Dukatai bañigidana aapi mos arhi baika tasaikïdï aidï?— itïtïdai.

21Dïï aidïxi aagaitadai Suxi sai bañigida agai Diuxi baakidï, mai aagaitadai ïgai go gïï Jerusalenana kïakïdï kiupai. Bhaiyoma agaitadai ïïgi tukugadï saidi ïr Diuxi bakidï gï dukami dai sai gï muatuda agaitadai dai bhodïrï baika tasaikïdï gï bañida agaitadai ïpamu. 22Kaxkïdï gokiïrï aidïxi ka mutadai go Suxi dai ïpamu duakatu bai go mamaatïrdamigadï gïn tïgito ix kaititadai ïgai ïkiaxdïrï. Dai kïïga buaboitu ïgai Diuxi ñokidï ïmadï atagidï Suxi. Kïïga buaboitu ïgai gïn tïgitokai ix Suxi ïkiaxdïrï aagidi go judidiu sai muki agai dai ïpamu duaka agai.

23Dai mui óídakami buaboitu go Suxi nïiditai naana maaxi maaxidaragai ix makïdï idui ïgai ami Jerusalenïrï aidï Kïïgakïrï Bubaidaragai Bagimiana. 24Dïï mai buaboitu Suxi go odami kïïga maatïkatai go odami tïgibudadï. 25Suxi kïïga maatï bïïxi aïkatai kaxkïdï tudu mai agai ïgai xorai aagidagi tïgibudadï odami.

Currently Selected:

Juan 2: NTP

Highlight

Copy