Juan 18

Gï bhïitu go Suxi

1Daidi nato daanïkai Suxi Diuxi jii ïgai ïmadï mamaatïrdamigadï dai mïï mokoradïrï go dïkagi Cedrón tïgidukïdï dïgabusai. Ami kaatïkatadai ïmo ïxikami xakoga ïxiga mui olibo dïïdïdï dai ami uxi saagida baapa ïgai. 2Baidi go Udaxi ix makïdï gatïïgida agaitadai go Suxi, kïïga maatïkatadai go ïxikami ïgai. Maatïkatadai ïgai ix go Suxi ami dudatai gï ïmapidiña ïmadï go mamaatïrdamigadï. 3Daidi go Udaxi gamoko baidakai sandadarugadï go adaama bhaitï kïakïdï dadaxdadami. Dai baidakai fariseos ïpï ïmadï jaa mui sandadarugadï go Romanos. Bhïï iimïi ïgai kukudakarui dai kïïga mamaaxtaitugai ïpï.

4Dai Suxi kïïga maatïkatadai ix tumaxiïrï iimïitadai go sandadaru daidi mïï buidïrï ayi daidi itïtïdai,

—¿Borai gaagai aapimï?— itïtïdai.

5Daidi go sandadaru itïtïdai,

—Gaagaimi aatïmï Suxi go Nasaretïrï oidakami— itïtïdai.

Dai Suxi itïtïdai,

—Aanï an ïgai— itïtïdai.

Daidi go Udaxi ix makïdï gatïïgi go Suxi ami kïakatadai ïpï.

6Dai mos potïkai go Suxi sai ïgai ïr ïgai, baidi go sandadaru gokiamako iji dai táí surhi. 7Baidi go Suxi itïtïdai ïpamu,

—¿Borai gaagaimi aapimï?— itïtïdai.

Daidi go sandadaru itïtïdai,

—Gaagaimi aatïmï Suxi go Nasaretïrï oidakami— itïtïdai.

8Daidi Suxi itïtïdai,

—Kaxi gïn aagidi aanï saidi aanï ïr ïgai— itïtïdai. —Ix aanï gin gaagai aapimï aidï gia abïr dagito idi gin mamaatïrdamiga sai nonoigïna— itïtïdai Suxi.

9Potïtïdai Suxi sai dagitona sai iimïna go mamaatïrdamigadï sai podukai ïpï duna ixdukatai Suxi aagiditadai Ogadï ïkioma aidïxi potïtïdai ïgai,

—Diuxi gin Oga, mai dagito aanï ix kuga imiagi tomarhi ïmoko ix makïdï gin nukaturhi aapi— itïtïdai Suxi.

10Dai ami kïakatadai Ximuñi Piduru dai ïgai busaitu maxtaigadï dai ïgaikïdï gïitï naakadï ikitï ïmo kïïrhi Malko tïgidukami. Guikuta ïgai naakadï sïïrhixapadïrï. Go makïdï gï ikitï ïr pioñigadïkatadai go tïanïdamigadï go gadaxdadami.

11Baidi Suxi daidi go Piduru daidi itïtïdai.

—Bhai itïïka go maxtai— itïtïdai. —¿Maiti pïx tudu maatï sai gï agai ix taata aanï go soi ïrhiaragai ix makïdï gin aagidi gin Oga sai gï agai ix taata aanï?— itïtïdai.

Suxi gï baan kïsatu buidïrï go adaama bhaitï kïakïdï gadaxdadami

12Dai bhodïrï go sandadaru Romanos ïmadï komandantegadï dai ïmadï jaa ix makïdï ïr bhaitï gukakamigadï go judidiu bïïxkatai ïmapai bhïiyi go Suxi dai buu ïkadï. 13Dai bhïkai dai mïïka kïi buidïrï ïmo kïïrhi Anás tïgidukami. Go Anás ïr bhaitï kïakïdï daxdadamikatadai ïkioma dai ïr tubhadï go Kaifas. Dai xibi go Kaifas ïgai daidi ïr go bhaitï kïakïdï daxdadamikatadai. 14Idi Kaifas ïr ïgai ix makïdï ïkioma aatagaitadai go judidiu ïmadï daidi itïtïdaitadai sai,

—Xioma ïr kïïga gïr aaduñi bïïtarï ix mos arhi ïmo kïïrhi mukiagi bai podukai gïr aaduñi mai bïïxkatai koiyagi— itïtïdaitadai Kaifas go judidiu.

Dai xibi tubhadï kiidïrï gï baan kïsatu go Suxi, kiidïrï Anás tudu.

Pokaiti Piduru sai mai maatï go Suxi

15Daidi Piduru oitadai go Suxi asta mïï kiidïrï go Anás ukami aidïxi gï bhïitutadai go Suxi. Dai ami kiidïrï go Anás xako gï kïsatu go Suxi kïïga kuraxdikami go tuixiki. Dai ïmai mamaatïrdamigadï Suxi oi ïpï ix makïdï kïïga maatïkatadai Anás dai ïgai tuixikana ukami baa Suxi ïmadï. 16Dïï go Piduru kidigana bii kuuparagai abhana. Daidi go gïmai mamaatïrdami ix makïdï kïïga maatïkatadai go Anás busai dai ïmadï gaataga go oki ix makïdï nukadakatadai go kuuparagai dai aidï gia baa go Piduru ïpï.

17Daidi go oki ix makïdï nukadakatadai go kuuparagai itïtïdai go Piduru,

—¿Aapi pïx maiti ïr ïmo mamaatïrdamigadï go maixapikïdï ïpï?— itïtïdai.

Daidi go Piduru itïtïdai,

—Cho. Aanï maiti ïr mamaatïrdamigadï go Suxi— itïtïdai.

18Dai ïpidikatadai oidigi aidï baidi go pipioñigadï Anás ïmadï sandadarugadï naadakatadai dai gïn ukadai táí. Dai bhodïrï baa go Piduru dai ami gasaagida kïkiba dai gï ukadai táí ïpï.

Go adaama bhaitï kïakïdï dadaxdadami naana maaxi tïkakai go Suxi

19Daidi go ix makïdï ïr bhaitï kïakïdï daxdadamikatadai ïkioma, go Anás tïgidukïdï tudu, naana maaxi tïkakai go Suxi. Tïkakai ïgai as xorai ïr mamaatïrdamigadï dai as tumaxi gamamaatïturhiña ïgai go óídakami.

20Daidi go Suxi itïtïdai,

—Aanï gamamaakaiña ñoki buitapi bïïxi óídakami. Ga mamaakaiña aanï ñoki go gïï kiupiïrï Jerusalenïrï dai gamamaakaiña aanï ñoki ïpï jaa kikiupiïrï xako gïn ïmpaidiña bïïxi go judidiu. Mai ïxtotai aagidi aanï tomarhi ïmo ñoki tudu— itïtïdai. 21—¿Tui pïxi gin tïkakai aidï ix tumaxi gamaatïturhiña aanï? ¿Tui pïxi mai bhaiyoma tïkakai go odami ix makïdï kaïkana gin ñoki ix gobai kïïga gïn aagidamudai? Gobai kïïga maatï ix tumaxi gamamaatïturhiña aanï di— itïtïdai.

22Dai ami kïakatadai ïmo sandarugadï go adaama bhaitï kïakïdï dadaxdadami dai ïgai mos kaïkai ix kaiti Suxi kapiji buibasodï daidi itïtïdai,

—Maiti bui ñokiada go bhaitï kïakïdï daxdadami podukai— itïtïdai.

23Daidi go Suxi itïtïdai,

—Mai soimaaxi ñokai aanï— itïtïdai. —Gin aagidañi tami ix tumaxi mai kïïga ñokai aanï xi kaxkïdï gin kapiji aapi. Gin aagidañi go gaa buitapi sai kaïkana ïgai— itïtïdai.

24Dai bhodïrï go Anás gatïjai mïsai bupurana ïkadï go Suxi ïpamu dai sai baidakana dai mïï Kaifas buidïrï kïïsana. Go Kaifas tudu ïr bhaitï kïakïdï daxdadamikatadai aidï.

Piduru ïpïpï pokaiti sai mai maatï go Suxi

25Daidi go Piduru kia ami taikobai kïakatadai aidï daidi go gaa ix makïdï ami gukatadai itïtïdai,

—¿Aapi pïx maiti ïr ïmo mamaatïrdamigadï go Suxi?— itïtïdai.

Saidi go Piduru itïtïdai,

—Cho. Aanï gia cho— itïtïdai.

26Daidi ami kïakatadai ïmo pioñigadï go bhaitï kïakïdï daxdadami. Ïgai ïr ïmo aduñdïkatadai go ix makïdï Piduru guikuta naakadï. Daidi ïgai potïtïdai,

—¿Maiti ix gï nïidi aanï ïkiapo? Amïka aimïraitadai aapi go Suxi ïmadï xako ïxiga mui olibo ïrhi aanï— itïtïdai.

27Daidi go Piduru ïpïpï potïtïdai sai maiti ïr buaboi. Dai mos potïi ïgai tai kujui ïmo takuku kïrhiadï.

Baan gï kïsatu go Suxi buidïrï go kaigi Pilato

28Daidi ïki kiamoko go judidiu sandadarugadï baidaja go Suxi kiidïrï go kaigi dai ami go kaigi buidïrï kïsa agai. Pilato tïgidukatadai go kaigi. Dïï aidïpïrï ka miadimitadai go Kïïgakïrï Bubaidaragai Bagimi dai go judidiu bïïtarï daidarxikatadai ix bapakïda ami kiidïrï go kaigi mai judiukatai go kaigi. Ix baakiagi ïmo judiu podukai kiidïrï ïmo ix makïdï maiti ïr judiu saidi as tukurakami dukai bipiïyiña dai ka maiti ixtutuidiña ix kuadagi go bagimiïrï kuadagai. Dai kaxkïdï mai baapa ïrhiditadai go sandadaru ami kiidïrï go kaigi.

29Daidi go kaigi bhaiyoma busai kidigana dai aataga ïmadï go judidiu daidi potïtïdai.

—¿Tumaxikïdï gïpiïrï bupai aapimï go Suxi?— itïtïdai.

30Daidi go judidiu itïtïdai aidï,

—Ix maiti ïr soimaaxi dukamikamudai gobai aidï gia xadïrï gï buidïrï kïsamudai aatïmï— itïtïdai.

31Daidi go kaigi itïtïdai,

—Bhïkabïrai bhaiyoma aapimï dai ïïgi gïn sïïrhikamigakïdï aaga ix tuma gïgïbidaragai maakiagai— itïtïdai.

Daidi go judidiu itïtïdai,

—Aapimï Romanos maiti gïr maakai sïïrhikami ix kodada aatïmï soimaaxi buadami. ¿Kaxkïdï dukatai maakana aatïmï gïgïbidaragai? Gï agai xi aapimï Romanos muagi bhaiyoma— itïtïdai.

32Dai podukai ka bhai gï dui sai go romanos koda agaitadai go Suxi kuruxiana. Podukai kodaiña ïgai soimaaxi ibuadami kaxkïdï. Dai ïïgi ka podukai agaitadai go Suxi ïkiaxdïrï ïpï sai kuruxiana muki agai.

33Daidi bhodïrï ïpamu baa go kaigi Pilato tukabi dai gatïjai mïsai ami buapana go Suxi. Daidi itïtïdai ïgai go Suxi,

—¿Aapi pïx tudu ïr Reygadï go judidiu?— itïtïdai.

34Daidi go Suxi potïtïdai,

—¿Ïïgi pïx gï tïgito dai podukai gin tïkakai? ¿Ïmai ix gï aagidi aa?— itïtïdai.

35Daidi go kaigi itïtïdai,

—Xadïrï ïïgi aagaiña aanï— itïtïdai. —Aanï maiti ïr judiu di. Daiñi, ïïgi aapi gï aaduñi ïmadï go bhaitï gukakami dadaxdadami ïgai dai tami gï bua— itïtïdai. —¿Gin aagidañi pïx tuma soimaaxkami idukami aapi aidï ix tami gï bua ïgai?— itïtïdai.

36Dai Suxi itïtïdai,

—Aanï gin gubukadaga mai ïpïamaaxi go gaa Reyes ix makïdï oidaga tami oidigi daama. Ix pomaaxi gatïanïdamudai aanï ix maaxi gatïanïi ïgai aidï gia gin mamaatïrdamiga maiti dagitomudai ix gin bhïiyagi go sandadaru dai bhaiyoma bui surhigimudai. Dïï gia aanï gin gubukadaga ïma maaxi. Mai ïpïamaaxi gatïanïi aanï go gaa Reyes ix makïdï oidaga tami idi oidigi daama— itïtïdai.

37Daidi go kaigi itïtïdai,

—¿Aidï gia ïr buaboi saidi ïr ïmo Rey aapi?— itïtïdai.

Dai go Suxi itïtïdai,

—Ïjï, kïïga aagai aapi saidi ïr Rey aanï. Go maa bïïtarï tudu dibia aanï tami idi oidigi daama Rey iñagaitai— itïtïdai. —Ga maatïtulda iñagai aanï ix tumaxi ïr buaboi dai dibia. Dai odami ix makïdï ïïgida ïrhidiña ixtumaxi ïr buaboi kïïga ïïgida kaïkana gin ñoki— itïtïdai Suxi.

38Daidi go kaigi poïrhiditadai ix odami mai bhaigakatadai ix kïïga maatïkagi ix tumaxi ïr buaboi ix kaxkïdï itïtïdai ïgai go Suxi,

—Pokaiti aapi sai oidaga ix tumaxi ïr buaboi. Xorai maatï ix tumaxi gobai— itïtïdai.

Mos potïi go kaigi dai bhodïrï busai maigobai kidigana daidi ïmadï aataga go judidiu daidi itïtïdai,

—Aanï mai tïï ix ixtukïdï ïr soimaaxi ibuadami idi kïïrhi.

39Dïï bïïxkïrï oidaga ix dukatai duñagi aatïmï. Daiñi, aapimï podukai gïn bida sai bïïxi umigiïrï Daibuñigïrï daadagitoiña aanï ïmo maixapikami sai busaiña mïï maixakaruañdïrï— itïtïdai. —¿Ipïrhidi mïxi ix dagito aanï gobai ix makïdï Reygadï go Judidiu aagai aapimï?— itïtïdai.

40Daidi kaïkai go odami bïïxkatai ijiña daidi ikaitimi,

—¡Cho! ¡Gobai gia cho!— ikaiti —¡Dagitoñi bhaiyoma go Barabás!— ikaiti.

Dai go Barabás gia ïr ïmo omarhigamikatadai.

Currently Selected:

Juan 18: NTP

Highlight

Copy