Juan 11

Muu go Lasaro

1Dai oidakatadai ïmo kïïrhi Lasaro tïgidukami dai ïmo imidagai oi kokodagai. Betaniïrï oidakamikatadai ïgai ïmadï Maria dai Maruta ix makïdï ïr susukurhidï Lasaro. 2Idi ïr go baaxi Maria ix makïdï gokiïrioma toi asaiti xigian ubadami ïïkasodï Suxi dai ïïgi gï kuupakïdï gakigi oigïdaitai.

3Dai go Maria ïmadï Maruta otoxi ñoki go Suxi daidi itïtïdai,

—Gïr Nukadakami, koko go Lasaro dai kïïga maatï aatïmï ix aapi oigïdai. Kaxkïdï gï otoxi aatïmï ñoki— itïtïdai.

4Ipïrhiditadai ïgai ix otoma imiagi Suxi gamoko dïï mai otoma jii ïgai dai bhaiyoma aidïxi máí ïgai ix koko go Lasaro mos potïtïdai ïgai ix makïdï ami darakatadai,

—Idi kokodagai ix makïdï oidi go Lasaro maiti ïr mukigamika agai. Idi mos ïr ïmo maaxidaragaika agai xïïxi ïr gïdukami Diuxi— itïtïdai. —Dai idi kokodagaikïdï maaxitudamu Diuxi xïïxi ïr gïdukami aanï ïpï Diuxi Maradïkatai aanï— itïtïdai.

5Dai Suxi kïïga oigïdaitadai go Maruta ïmadï Maria dai Lasaro. 6Dïï bïïxkïrï mai otoma jii ïgai Judeamu xako kaatïkatadai go Lasaro dai bhaiyoma amaxi bii xako dajatadai ïgai kia goka tasai.

7Dai ïpï goka tasaikïdï itïtïdai Suxi mamaatïrdamigadï,

—Timïda ïpamu Judeamu— itïtïdai.

8Daidi go mamaatïrdamigadï itïtïdai aidï go Suxi,

—Gïr mamaatïtuldiadamiga, ¿Kïïgakïrï pïx ïpamu imia ïrhidi gamoko?— itïtïdai. —Baasïkioma gï maikarsa ïrhiditadai go judidiu gamo óídakami di— itïtïdai.

9-10Dai Suxi aagidi ïmo maaxidaragai aatagi daidi itïtïdai,

—Gin aaduñi, odami kïïga biakana kiamoko abhiadïrï asta urunoko ukami ix oijadagi aaduindadï kia tïka dakatai tasai dïï bïïxkïrï gï agai ix kabami gïn aajagi ïgai sai mai aïna tukagi. Tasïrï tudu kïï maaxkana oidigi kaxkïdï kïï bhaiga ïmoko ix mai utubaitai aimïrdagi tasïrï. Dïï gia tukarï utubapïkïi ïmoko tukamukatai oidigi. Dai pomaaxi aanïkïdï ïpï. Daiñi, xibi kia tasïrï dukai ajiopai aatïmï gïn ïmadï dakatai aanï kia. Dïï gokiïrï ayimu tukagi ka imïkai aanï. Kaxkïdï bia aanï ix kabami gin aaga ibuadatai gin aaduindaga. Xibi kia tasïrï dukai oidaga aatïmï gïn ïmadï dakatai aanï dai bia aanï ix kabami gin aagagi dai natoagi gin aaduindaga. 11Kaxkïdï mïï nïida iñagai gïr aduñi Lasaro. Koso ïgai dai aanï mïï nïñituda iñagai— itïtïdai Suxi.

12Baidi go mamaatïrdami itïtïdai,

—Gïr maatïtuldiadamiga, aidï gia ix koso ïgai aidï gia gï toumadamu ïgai— itïtïdai.

13Go mamaatïrdami mai maatïkatadai ix agaitadai Suxi mukigami potïkai ïgai sai koso go Lasaro. 14Kaxkïdï Suxi kïï sïïrhi aagidi daidi itïtïdai,

—Ka muu go Lasaro— itïtïdai. 15—Dïï gia kïïga dui aapimï gïn bïïtarï mai dakatai aanï mïïka aidïxi muu ïgai. Podukai gia bamioma kïïga buaboitudamu aapimï xibi nïiditai ix tuma duñimu aanï— itïtïdai. Dai bhodïrï itïtïdai —Xibi gia tinda nïida go Lasaro— itïtïdai.

16Dai ami dajatadai ïmo mamaatïrdami Tomás tïgidukami, ix makïdï kuatai aagaiña odami. Dai potïtïdai ïgai go gaa mamaatïrdami,

—Timïda dai oida go Suxi dai ïmadï koiyagi xuduku muagi go Judeïrï óídakami go Suxi. Amïka óídakami sïïrhikïdï kïïdai gobai di— itïtïdai.

17Dai bhodïrï ayi Suxi ami Judeïrï xakoga Betaniïrï tïgidu ïmo kiiki. Dai ami ïmadutai aagidi ix ka pogïduitadai maako tasai ix yaasapi go Lasaro. 18Go Betania miadïrï bipiïyi Jerusalen, parï baika kilometro ïxi. 19Dai muidutai judidiu Judeañdïrï óídakami daibiditadai go Maruta ïmadï Maria sai podukai mai kabami soi gïn ïrhidiña ïgai. 20Dai aidïxi go Maruta máí ix ka miadïrï kïïkigitadai go Suxi otoma jii dai mïï buidïrï ayi. Dïï mos go Maria gia amaxi kiiyïrï bii.

21Dai go Maruta itïtïdai go Suxi mïï buidïrï aïkai,

—Aapi Gïr Nukadakami, ix tanai dakamudai aapi baasïkioma aidï gia mai mukimudai gin xiixi. 22Dïï tomax mai dakatadai aapi baasïki aanï bïïxkïrï kïï maatï sai Diuxi iduñimu bïïxi ix tumaxi tanïda aapi xibi— itïtïdai.

23Daidi Suxi itïtïdai aidï,

—Gï xiixi ïpamu duaka agai— itïtïdai.

24Dïï Maruta itïtïdai,

—Ïjï, kïïga maatï aanï sai ïpamu duaka agai gobai dïï asta xïxkadï bïïxi duduakagi koidadï ka ugitïkai oidigi— itïtïdai.

25Dai Suxi itïtïdai aidï,

—Aanï ïgai ix makïdï duduakatudai koidadï di. Dai aanïkïdï kïïgakïrï óídaga óídakami ïpï. Odami ix makïdï gin buaboitudai, tomaxi koi ïgai bïïxkïrï kïïgakïrï duduaka agai. 26Dai odami ix makïdï óídaga gin buaboidakai tomarhi ïmo imidagai mai koi agai ibhïgadï— itïtïdai. —¿Buaboitudai pïxi ixtumaxi gï aagidi aanï?— itïtïdai.

27—Ïjï, kïïga buaboitudai aanï sai aapi ïr go Ga Tïanïdami dai buaboitudai aanï sai aapi ïr Diuxi Maradï ix makïdï aatïmï nïnïratadai ïïki abhiadïrï— itïtïdai Maruta.

28Dai bhodïrï jii Maruta dai mïï aagidi go Maria. Ïkobai busaitu ïgai dai dudusurhi potïtïdai sai,

—Kaxi ti dibia gïr maatïtuldiadamiga dai gï nïida ïrhidi— itïtïdai.

29Dai otoma jii go Maria dai mïï nïidamu go Suxi. 30Mai kia baatadai go Suxi kiikiïrï aidï. Kia maigo ugidana dakatadai xako ayitadai ïkiapioma go Maruta. 31Dai go gaa ix makïdï ami kiiyïrï darajatadai ïmadï Maria tïï ix ïgai todian dukai kïkiba dai kidigana busai dai oidi ïpï pobïnïrhiditai sai go Maria mïï suakada agaitadai mïïka xako yaasapikatadai go Lasaro.

32Daidi ka aïkai go Maria xako dajatadai go Suxi gï totonakïdï kïkiba buidïrï daidi itïtïdai,

—Gïr Nukadakami, ix tami dakamudai aapi baasïki aidï gia mai mukimudai gin xiixi— itïtïdai.

33Daidi go Suxi kabami soi gï ïrhi nïiditai ix arhiï suanïi go Maria ïmadï go gaa judidiu ix makïdï oiditadai. 34Daidi potïtïdai ïgai,

—¿Bako yaasa aapimï?— itïtïdai.

Dai go gaa potïtïdai,

—Gimi aapi Gïr Nukadakami, dai nïida xako yaasapi gobai— itïtïdai.

35Baidi Suxi suakimi ïpï. 36Baidi ïïmoko go judidiu ikaitimi aidï,

—Daiñi xïï kïïga oigïdaitadai gobai— ikaitimi.

37Dïï gia jaa judidiu ikaitimi,

—¿Dukatai nïnïabatu gobai ïmo ix makïdï mai nïadatadai dai xibi ix tuixi mai soi gobai go Lasaro ix mai mukimudai ïgai?— ikaiti jaa.

Suxi bia gubukarhigai mukigami bui

38Dai bhodïrï ïpamu kabami soi gï ïrhidi Suxi dai ayi ïgai tïjobiana xako yaasapikatadai go Lasaro dai ïmo gïï odai ami taagiña dakatadai. 39Daidi itïtïdai Suxi go gaa,

—Maigobai abïr dasa go gïï odai— itïtïdai.

Daidi go Maruta itïtïdai aidï,

—¡Gïr Nukadakami, Maiti gï agai ix maigo dasagi go odai ïrhi aanï! Kaxi maakoba tasai pogïdui ix muu gobai dai ka garhi ubaimi ïrhi aanï gobai— itïtïdai.

40Daidi go Suxi itïtïdai,

—¿Maiti ix gï aagidi aanï sai nïidamu aapi xïïxi ïr gïdukami Diuxi buaboitudakai aapi?— itïtïdai.

41Dai go gaa maigobai yaara go odai aidï. Daidi Suxi tïbagiamakoga nïnïaba daidi itïtïdai Ogadï,

—Gin Oga, kïïga bhai gin ïrhidi aapikïdï gin maakaitai ix tumaxi gï tanïdagi aanï— itïtïdai. 42—Kïïga maatï aanï tudu sai aapi bïïxkïrï gin mamaakai ix tumaxi gï tanïdagi aanï dïï idi ix makïdï tami guka mai maatï ix kaxkïdï gï aagidi aanï tanai buitapi ïgai sai ïgai buaboitudana ix aapi ïgai dai gin otoi— itïtïdai.

43Dai bhodïrï gïgïrï ño go Suxi daidi ikaiti,

—Aapi Lasaro, busaiñi abhiadïrï— itïtïdai.

44Dai bhodïrï ix makïdï kaxi ïr mukiadïkatadai busai abhiadïrï xako yaasapikatadai. Dai kia kïïga bhibhixapitugai ïïkasodï dai modukai ïkadï. Dai kia bhixapitugai buibasodï ïpï ïmo pañituikïdï.

Baidi go Suxi potïtïdai go gaa,

—Upasdabïrai bai aimïraiña gobai— itïtïdai.

Go judidiu bhaitï gukakamigadï bhai dui ñoki sai mua agai go Suxi

45Dai muidutai go odami ix makïdï daibiditadai go Maria buabuitu nïiditai ix tumaxi iduitadai go Suxi. 46Dïï gia jaa mai buaboitu dai iji dai mïï aagidi go bhaitï gukakami ix makïdï ïr fariseos ix tumaxi iduitadai go Suxi.

47Daidi bhodïrï gïn ïmpagi go bhaitï gukakami ix makïdï ïr fariseos ïmadï go dadaxdadami bhaitï gukakamigadï daidi ikaiti,

—¿Tï dukatai duna go Suxi? Ibuayi gobai naana maaxi maaxidaragai di— ikaiti. 48—Maiti gï agai ix mos dagito aatïmï ix apia pobuadagi gobai. Daiñi ix apia buadagi gobai maaxidaragai podukai aidï gia bïïxi óídakami buaboituda antaada dai asta Reyïrï dasa gï ïrhiadagi pobïnïrhiditai ix gobai ïr ix makïdï nïnïra ïgai ïïki abhiadïrï. Ix Reyïrï dasagi ïgai aidï gia bhamu antaada go gïï dunukamigadï go romanos dai otosa antaada sandadarugadï ix ïgai xia duadamu gïr kiupaiga dai kodamu bïïxi gïr aaduñi— ikaiti.

49Dai ami ïmpaiñdaragïrï dajatadai go Tïanïdamigadï go daxdadami. Ïgai Kaifas tïgidu dai ïgai itïtïdai go gaa ami ïmpaiñdaragïrï,

—Gia pupuiruga aapimï— itïtïdai. —Mai maatï aapimï tomarhi ïmo ixtumaxi— itïtïdai. 50—Maiti gï agai ix bïïxi gïr aaduñi judidiu koiyagi. Daiñi go Suxi ïgiga dai gïr aaduñi sïïrhikïdï muidu. Gï agai ix mosïkaxi go Suxi mukiagi dai mai xu bïïxi gïr aaduñi. Xioma ïr kïïga gïr bïïtarï ix mukiagi ïgai mos ïmadugakatai bai podukai mai koiyagi bïïxi gïr aaduñi bhakoikai go romanos gïr bui— itïtïdai Kaifas.

51Mai ïïgi tïgibudadïkïdï ñokaitadai go Kaifas aidï. Ïgai ïr Tïanïdamikatadai go dadaxdadami aidï umiïrï bai kaxkïdï Diuxi maatadai tïgibudagai sai aagana ix mukia agaitadai go Suxi. Kaxkïdï ïkiaxdïrï ka aagidimitadai ïgai sai go Suxi muki agaitadai bïïxi go judidiu bïïtarï. 52Dai mai xu mosïkaxi go judidiu bïïtarï mukia agaitadai Suxi. Muki agaitadai bïïxkatai go gaa Diuxi maamaradï bïïtarï ïpï ix makïdï mïïmïkaxioma óídaga sai podukai mos ïr ïmo aadunumïkana ïgai ïmadï go judidiu ix makïdï ïr buaboitudadami ïpï.

53Dai aidï abhiadïrï ix potïi go Kaifas sai gï agaitadai ix mukiagi Suxi, aidï abhiadïrï go judidiu bhaitï gukakamigadï gaagaitadai ïgai ixdukatai muagi. 54Dai kaxkïdï ka mai aimïraiña Suxi xako nïijadagi go judidiu bhaitï gukakamigadï dai bhaiyoma maigobai jii xako Efrainïrï tïgidu oidigi. Ami Efrainïrï miadïrï kaatï ïmo gïï oidigi xako mai tipu óídakami. Dai ami Efrainïrï gïn urhi go Suxi ïmadï mamaatïrdamigadï.

55Aidïpïrï ka miadaimitadai go bagimigadï go judidiu ix makïdï Daibuñigïrï tïgidu. Dai mui aarhi kiikiañdïrï óídakami ka ijitadai Jerusalenamu mai kia aïkai go bagimi. Ami ibuadatadai ïgai naana maaxi xadutudaragai ix makïdï gïn biturhi ïgai dukami bakuanaragai maaxi sai podukai sai kïïgakïrï nïijadana Diuxi. Podukai bhai gïn buadana ïgai go bagimi bïïtarï. 56-57Dai go odami go gïï kiupiana darakana Jerusalenïrï daidi nïida ïrhidiña go Suxi dïï go bhaitï gukakami ix makïdï ïr fariseos ïmadï go dadaxdadami bhaitï gukakamigadï kaxi aagiditadai go óídakami sai xorai maatïkagi xako daja go Suxi sai aagana bai ïgai bhïiyi agaitadai. Ix kaxkïdï ikaitiña go odami,

—¿Bhai ix dibiamu bïïxkïrï go Suxi bagimiïrï?— ikaitiña nïida ïrhiditai.

Currently Selected:

Juan 11: NTP

Highlight

Copy