Exodo 1
1
1-4Idi ojai agai ix tïtïïgidu go kïkïïrhi maamaradï Israel ix makïdï Jakobo ïmadï ayi Ejipituana. Ïmoko Rubén tïgidu dai ïmai Simeón dai ïmai Lebi dai ïmai Juda dai ïmai Isakar dai ïmai Zabulón dai ïmai Benjamin dai ïmai Dan dai ïmai Neftarhi dai ïmai Gad dai ïmai Aser. Baidaja ïgai aaduñdï dai bïïxkatai oi go Jakobo dai Ejiptuamu dudui dai amïka ayi. 5Baikobhai dan bhaibuxtamadukana maamaradï ïmadï bopoxikadï Jakobo. Bïïxkatai oi ïgai go Jakobo. Dai ïkobïrakoga Jose ka Ejipituana dakatadai. Go Jose ïr maradï Jakobo ïpï.
6Tïbïpikïdï Jose ugidagai ïmadï modukai xixïgidï dai sukurhidï ïmadï bïïxi go ix makïdï Jakobo ïmadï dadatadai kanaanañdïrï. 7Mosïkaxi piipixaradï Jakobo bii. Dïï kïïga mamaatïrhiga ïgai. Dai Israelitas gïn aagaiña ïgai. Mos ïmo odamikana ïgai dai kabami muida ïgai ami xako óídakatadai ïgai Ejipituana.
8Go gïï Rey ix makïdï dunukamiïrï dáí go Jose ami Ejipituana kïï oigïdai go Jose dai kïï soikïiña ïgai Jose aaduñdï. Dïï gokiïrï aidïxi ka mutadai ïgai Rey ïmadï go Jose abhiadïrï mui umigikïdï baa ïmai Rey utudukami ami Ejipituana dai ïgai mai soi aaduñdï go Josekaru.
Dai go Rey ïgai itïtïdai aaduñdï ix makïdï tïanïi ïgai,
9—Arhiïxi ïr ïbhïidaragai xi bamioma muidagi go Israelitas dai bamioma gupukagi xi bhai aatïmï— itïtïdai. 10—Gï agaitïxi gaagagi ix dukatai mai muidagi ïgai bamioma. Ix duñada daibuñagi kokodi dai go Israelitas soikidagi ix makïdï gïr buidïrï bïïtïkagi dai gokiïrï dïgabuna bopiagi— itïtïdai.
11Kaxkïdï go Ejipituana dudunukami ikaiti,
—Gï agai tïxi kabami aaduintulda go Israelitas. Maatï xi podukai mai muidagi ïgai— ikaiti.
Dai bhodïrï darai ïgai kïkïïrhi tïtïanïdami xi ïgai kabami aaduintulhdana go Israelitas. Gatïjai ïgai gokapïrï tutusaragai gïïgïr kiiki xako Pitonïrï dai Ramseïrï tïtïgidu gïïgïr kiiki. Amïï go Rey bhai darasaiña ixtumaxi bhai darasa ïrhiada ïgai, dukami papaiñomi maaxi ixtukïdï gakokoadagi. 12Podukai go Ejiptuïrï óídakami soi taataturhi go Israelitas mai ipïrhiditai xi bamioma muidagi. Dïï ix xïïxi bamioma soi taatamiturhi ïgai go Israelitas po kaki bamioma muidimi ïgai bhaiyoma. Xi gokïdï go Ejiptuïrï oidakami ka ïbhïimi xi go Israelitas bamioma gupukagi xi bhai ïgai mos ïï muidukatai.
13Daidi kabami aaduintuldi ïgai go Israelitas axñiñitu dukai. 14Tïanïiña ïgai aaduindagai dukami upastaragai maaxi dai nukadaragai ïxikami dai buxtaki. Bïï mai taata tïanïiña ïgai. 15Dai ïkobïrakoga oidakana goka oki ix makïdï soikïiña ooñigadï Israelitas xudu mamaata agadagi ïgai. Sifra dai Fua as tïtïgidu oki ïgai.
Daidi potïtïdai go Ejipituana Rey go oki ïgai aidï,
16—Mïx xudu soikïda agadagi go Hebreo oki abïr tïgito nïida ixtuma maarai ïgai. Xi arhi okikagi ïgai abïr dagito. Xi ïr kïïrhikagi abïr koda— itïtïdai.
17Dïï go Sifra ïmadï Fua xadutudai Diuxi dai mai ïïgidi go Ejipituana Rey. Bhaiyoma dagito ïgai go arhi gïgïrhi.
18Daidi go Ejipituana Rey bhagaimi go oki ïgai daidi itïtïdai,
—Tuimïxi duduakakami bia go arhi gïgïrhi— itïtïdai.
19Dai go Sifra ïmadï Fua duduadimu dai itïtïdai go Rey,
—Go oki Israelitas ix makïdï Hebreokïdï ñokai mai ïpïamaaxi aapi gï aaduñi oki. Ïgai mai aagai duduadadami xudu mamaata agadagi ïgai. Mai kia aïkai aatïmï mamaatai ïgai. Kaxkïdï mai kodai aatïmï maamaradï— itïtïdai Sifra ïmadï Fua.
20-21Sifra ïmadï Fua ïbhïimi xi Diuxi gïgïbidagi dai kaxkïdï mai koi ïgai go aarhi gïgïrhi. Xi kaxkïdï Diuxi kïï buididi ïgai. Maa ïgai mui maamaradï abhana dai maigobai go Israelitas mui maa ïgai maamaradï ïpï xi kaban muidana ïgai dai mos taiyako iji go Israelitas.
22Dïï go Rey apia kia koda ïrhiditadai go aarhi gïgïrhi dai itïtïdai bïïxi go Ejipituana óídakami,
—Xudu kïkïïrhi mamaatagi go Hebreos abïr gïï akiana surhiga. Dïï gia xi ïr okikagi abïr dagito— itïtïdai.
Currently Selected:
Exodo 1: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida
