Hechos 7

Tibañi dudunukamiïrï kïïka dai aagai ixdukatai Diuxi gï maaxitu Abraam buitapi

1Daidi go bhaitï kïakami daxdadami itïtïdai go Tibañi aidï,

—¿Buaboi xi ix duu aagai gobai?— itïtïdai.

2Dai Tibañi itïtïdai,

—Gin kaïkabïrai aapimï gin aaduñi dai aapimï gïr bhaitï gukakamiga. Daiñi, Diuxi bamioma bia gubukadagai xi bhai toma xorai. Dai gï maaxitu ïgai gïr aaduñi Abraamkaru buitapi aidïxi kia Mesopotamiïrï oidakatadai ïgai mai kia imïkai ïgai Aranamu. 3Dai Diuxi itïtïdai aidï,

Dagitoñi gï dïbïraga dai gï aaduñi dai imi dai aanï gï tïïgidamu oidigi pïxako oidakagi, itïtïdai Diuxi go Abraamkaru.

4Daidi go Abraam busai aidï Kaldeañdïrï dai jii Araanamu dai ami oidaka agai. Dai gokiïrï muu aidï ogadï. Bhodïrï Diuxi bua go Abraam tami oidigïrï xako óídaga aapimï xibi gin aaduñi. 5Dai tami mai oi ïgai Abraam toma lachi dïbïrai, mai oi ïgai tomarhi xako kïixagi ïgai. Dïï gia Diuxi aagidi sai gokiïrï maaki agai idi dïbïrai saidi ïr tuidadïkana ïgai dai bhodïrï sai piipixaradï tuidadï ka agai ïpï xïxkadï ka ugitiagi ïgai. Potïtïdai Diuxi tomaxi mai kia maamara go Abraam aidï.

6Dai Diuxi potïtïdai go Abraam,

Ïpï chïki umigikïdï gï piipixara iimimu tabhiadïrï dai no xibhï óídaka agai ïmai oidigïrï. Mïïkaxdïrï óídakami dukai óídakamu ïgai ami. Dai ami óídakami sosoigadï dukai nïijadamu gï piipixara dai aaduintuldamu. Soi dukai óídakamu ïgai maako ciento umigi, itïtïdai.

7Dai Diuxi apia aatagidi Abraam daidi itïtïdai,

Daitudamu aanï gïgïbidaragai abhana go odami ix makïdï soimaaxi taatatulda agai gï piipixara ami xako óídaka agai ïgai xako mai buaboikïdï ïr kiidï. Dai gokiïrï bubuakimu gï piipixara abhiadïrï dai gin xadutuadamu ïgai tanai xako daraja aatïmï xibi, itïtïdai Diuxi.

8Diuxi bhai dui ïmo ñoki go Abraamkaru ïmadï tudu— ikaiti Tibañi oiditai aatagidï ami dudunukamiïrï kïakatai.

—Diuxi tïjai sai gï circuncidandoagi go Abraamkaru ïmadï gï maamara kïkïïrhi. Podukai mamaaxidi ïgai saidi ïr gïn bïïtarïkana go ñoki ix makïdï bhai duitadai Diuxi Abraam ïmadï. Kaxkïdï gokiïrï busaikai Isaak go Abraam maradï, bhobai mamaakoba tasaikïdï Abraam circuncido go Isaak, dai podukai idui ïpï go Isaak gï maara Jakobo dai Jakobo poduñi ïpï go bhaibuxtama dan goka maamaradï kïkïïrhi ix makïdï ïr bhaitï gukakamikana ïïki. Ïgaiñdïrï tudu bubuaja bïïxkatai aatïmï judidiu— itïtïdai Tibañi.

Tibañi oi gï aatagi dai aagai ixdukatai Ejiptuïrï óídatu go Israelitas

9—Gokiïrï go bhaitï gukakami ïgai ïgamu sukurhidï. Ïgamu ïgai go Jose tudu dai gagaarhi ïgai xibhïakoga óídakami bai ïgai bhïkai go Jose Ejiptuamu. Dïï bïïxkïrï Diuxi ïmadï dajatadai go Jose 10dai tomaxi kabami taata ïgai soi ïrhiaragai, Diuxi soi dai maigo daitu ïgai go soi ïrhiaradï. Maa ïgai kïïgadukami tïgibudagai go Jose daidi go Faraon kïïgakïrï tïï. Dai sonoïrï kïakami dáí ïgai aidï go Jose dai asta nukaturhi ïgai kiidï mos ïï kïï ïïmadatai.

11Bhodïrï ami Ejiptuïrï dibia ïmo gïïdukami bhiugigai dai sïïrhikïdï soimaaxi taata Ejiptuïrï óídakami ïmadï Kanaanïrï óídakami. Dai Jose aaduñdï Kanaanïrï óídakïdï ka mai tïtïgaitadai ixtuma ugiagi. 12Aidïpïrï Jose Ejiptuïrï bhai tuakatadai mui tïrhigi dai aidïxi máí Jakobokaru gamoko otoi ïgai maamaradï. Aatïmï gïr aaduñikaru ïïkidadï ïgai aidï. Dai tomarhi ïmo imidagai mai kia ajiopaitadai ïgai Ejiptuamu. 13Dai gokiïrï Jakobokaru ïpamu otoi maamaradï Ejiptuamu dai go Jose aagidi xi ïr sukurhidïkatadai ïgai. Daidi go Faraon máí Jose aaduñdï ïpï.

14Bhodïrï Jose otoxi ñoki go Jakobo sai dibiana ïgai dai baidatikana gï aaduñi. Baikobhai dan Bhaibuxtama dan taamadukana Jose aaduñdï aidï dai bïïxkatai dada ami Ejipituana. 15Podukai go Jakobo ïmadï bïïxi aaduñdï Ejiptuïrï óídatu. Dai gokiïrï mobaaxi muu go Jakobo ïmadï go gaa gïr aaduñi ïïkidadï. 16Dai gokiïrioma aaduñdï Jakobo bukai odï Xikemamu dai yaasa ïmo tïjobiïrï. Ïkioñdïrï go Abraam ka sabïrhitadai go tïjobai maamaradï ïmo kïïrhi Hamor tïgidukami.

17Daidi kabami muida aidï gïr aaduñi ami Ejiptuïrï óídakatai. Dai Diuxi ka aagiditadai aidï go Abraam sai oida agaitadai piipixaradï dïbïrai xako óídakagi ïgai. Dai aidïpïrï ka miadaimitadai ixtuigako maaki agaitadai ïgai. 18Dai aidïpïrï ugidagai go Faraon ix makïdï kïï ïmadakatadai go Jose dai bhodïrï baa ïmai Faraon mobai Ejiptuïrï dai ïgai mai maatïkatadai go Jose. 19Dai idi Faraon naana dukai bupuirumada ïrhiditadai gïr aduñi dai sïïrhikïdï soimaaxi buididitadai. Gatïjai ïgai gïr aaduñi xi ïgai kiidana dagitona gïn maamara sai ïgai kona, ix makïdï ïr kïkïïrhi utudama bubuakiadï— ikaiti Tibañi.

Dibia Moises oidigi daama dai Diuxi nukada ïgai

20—Aidï tudu xi gatïanïitadai go Faraon mai kïï tuigakïdï, aidïpïrï busai go Moises. Sïïrhikïdï kïï tiodikami xïïñikatadai ïgai dai dïïdïdï nukagi ïgai kiidïrï baika masadai aïkami.

21Bhodïrï ka maiti ixtui dïïdïdï ix dukatai ïxto nukadakagi dai kiidana busaitu dai mïï bia. Daidi ïmo Faraon maradï oki bhïiyi dai gïïrhitu ïgai ïïgi maradï dukai. 22Bai podukai gïrakai go Moises bïïxi máítadai ïgai aaduindadï go Ejipituana óídakami. Dai kïï saitudagakana ñokaragai bïïtarï dai aaduindagai bïïtarï ïpï. 23Ïmo imidagai aidïxi Moises ka biakatadai gokobhai umigi bhïiyi ïgai tïgibudagai ix dibidagi aaduñdï. Go Israel piipixaradï tudu ïr aaduñdï ïgai. 24Dai ami tïï go Moises ïmo Kïïrhi Ejiptuïrï oidakami dai soi buadatadai ïgai ïmo aaduñdï Moises. Dai Moises soiña ïrhiditadai ïgai dai mua go Ejiptuïrï oidakami—.

25—Xibi gia maatïkamu gin aaduñi xi aanï ïr Diuxi otosadï dai bubaida gin aagai gin aaduñi tabhaidïrï Ejiptuañdïrï— as ïrhiditadai Moises, muakai go Ejiptuïrï oidakami.

Dïï mos go aaduñdï mai podukai gïn tïgito. 26Dai xadiko no aimïraitadai Moises dai tïï goka kïkïïrhi, aaduñdï ïgai Moises, dai gïn kokodaitadai. Dai go Moises bhai ïrhiatuda ïrhiditadai daidi itïtïdai,

—¿Tuimïxi soi gïn buayi aapimï? Aaduñi aapimï di— itïtïdai.

27Dai ix makïdï soi buayi go gïmai nïituka Moises daidi itïtïdai,

—¿Borï gï dáí aapi ïmo tïanïdami dukai dai ïmo dunukami dukai aatïmï gïr bïïtarï? 28¿Gin mua pïx agai ïpï ix dukai mua aapi takabo go Ejiptuïrï oidakami?— itïtïdai.

29Dai mïï aidï go Moises kaïkai ix kaititadai go kïïrhi. Dai busai aidï Ejiptuañdïrï dai mïkaxi jii xako Madianamu tïgidu oidigi. Dai ami oidatu mïkaxdïrï oidakami dukai. Dai ami maamara ïgai goka— ikaiti Tibañi.

Diuxi otoi go Moises sai bubaidana go Israelitas Ejiptuañdïrï

30—Dai bhodïrï ka daibunukai gokobhai umigi, oidigana aimïraitadai Moises miadïrï ïmo gidi Sinaí tïgidukami. Ami ïmo Diuxi tïañikarudï gï maaxitu Moises buitapi. Ïmo uxi ipuadïrï mïïkatadai dai ami taiyïrï gï maaxitu ïgai . 31Daidi go Moises mai tïï ix dukatai gï tïgitoagi tïïgakai. Dai bhodïrï mianïrioma kïkiba ïgai dai nïida agai dai kaï Diuxi ñokidï daidi ikaiti,

32 Diuxi aanï dai aanï gin buaboidaiña go Abraamkaru ïmadï Isaakaru ïmadï Jakobokaru, itïtïdai Diuxi.

Daidi go Moises mos gigibukïi duadimukatai. Ïbhïidi ïgai xi bui nïnïabagi go tai. 33Daidi Diuxi itïtïdai aidï,

Upasañi gï sususaka dai podukai gin xadutuada. Bhobai pïxako kïïka aapi ïr dïbïrai xadutudikami gin tuidagatai gobai, itïtïdai. 34Daiñi, aanï kïï maatï xïï soimaaxi taatamaimi gin maamara Ejiptuïrï óídakatai. Kaïkana aanï xïïxi aajagïiña ïgai dai tïbai aanï dai kïïgakïrï bubaida gin agai. Imiñi tudu, aapi Moises. Gï otosamu aanï Ejiptuamu ïpamu, itïtïdai Diuxi.

Go Israelitas mai ïïgidi Moises

35Dai go Tibañi apia oi gï aatagi daidi ikaiti,

—Aaduñdï go Moises mai ïïgida kaï go Moises ñokidï daidi potïtïdai,

¿Xorai dunukami dai tïanïdami dukai gï dáí aapi Moises? itïtïdai.

Dïï tomaxi go Moises aaduñdï mai kïïgakïrï nïiditadai ïgai, Diuxi bïïxkïrï otoi ïmo tïañikarudï dai ïgai aagidi go Moises sai Diuxi otosa agaitadai Ejiptuamu. Aagidi ïpï sai ïgai tïanïna aaduñdï dai sai kïïgakïrï bubaidana. 36Dai gokiïrï go Moises bubaitu gïr aaduñikaru Ejiptuañdïrï dai idui naana maaxi maaxidaragai Diuxi gubukadadïkïdï. Naana maaxi idui ïgai Ejipituana ix makïdï ïïgi Diuxi bhaiga xi ibuadagi dai go gïï sudagi bïgikïdïana ïpï. Dai gokiïrï apia kia pobuadana ïgai gokobhai umigi ajiopaitai gïr aaduñi oidigana xako mai tipu óídakami. 37Dai Moises ïgai dai aagidi aaduñdï daidi itïtïdai,

Diuxi otosa agai ïmadutai gïr aaduñi xi ïgai gin ïpïandukami ïr aagadamika agai Diuxi ñokidï itïtïdai Moises.

38Go Moises tudu ïgai dai oidigana aimïraitadai gïr aaduñi ïmadï. Dai go Moises ïmadï dajatadai go Diuxi tïañikarudï dai kaï ñokidï amïka Sinaí tubidakïrï. Diuxi maa ñoki go Moises ixtukïdï kïïgakïrï oidakagi ïmoko dai Moises gïr biturhi go ñoki gobai.

39Dïï gïr aaduñi mai ïïgidi go Moises dai bhaiyoma gajiadïrï bipiayi ñokidï. Mos nonoigia ïrhiditadai ïgai Ejiptuamu ïpamu bhaiyoma. 40Dai aagidi ïgai go Aaron daidi potïtïdai,

Gïr duiñdañi sasanto bai gïr nukatika ïgai boiyamu. Go Moises gïr bubaitu Ejiptuañdïrï dai xibi ka mai maatï aatïmï xi gï dui ïgai, ikaiti gïr aaduñi ïïki.

41Daidi bhodïrï idui ïgai ïmo arhi baaka maara maaxkami ubixi, dai kodaiña buxtaki dai bui dadaxdiña go baaka maara ubixi ix makïdï iduitadai ïgai dai diuxigadï aagaiña. Dai bhai gïn ïrhidiña ïgai nïiditai go ubixi ix makïdï ïïgi iduitadai ïïgi gïn noonobikïdï. 42Dai gokïdï Diuxi dagito gïr aaduñi dai ka mai soi. Dagito ïgai xi adaimïiña ïgai jaa ix makïdï gïn didiuxiga agaiña ïgai dukami go tasai ïmadï go xixabugai. Dai ïmo aagadami Diuxi ñokidï oja ix kaiti Diuxi dai adukai oja,

Aapimï judidiu mui koi buxtaki gokobhai umigikïdï oidigana ajiopaitai, dïï maiti gin daaxi aapimï tomarhi ïmoko. Ïmai xadutudaitadai aapimï bhaiyoma dai dadaxdi buxtaki. 43Bhïï ajiopaiña aapimï gïn diuxiga ix makïdï Molok tïgidu. Dai ïmo ikuxi bakiïrï kïkïsaiña aapimï. Dai idui aapimï ïmo ubixi, xabugai maaxkami dai Refán agaiña. Ïgai ïr didiuxi ix makïdï ïïgi idui aapimï dai xadutudaiña. Kaxkïdï maigobai gïn dïbïragañdïrï gïn bubaidamu aanï dai gïn otosamu aanï mïkaxi Babilonia bhaitïki, ikaiti Diuxi. Podukai oja go ñokituldiadami Diuxi ïïki tudu— itïtïdai go Tibañi.

Go Israelitas kusu ajiopaiña go ikuxi kiupai

44Dai bhodïrï Tibañi oi aatagadï daidi ikaiti,

—Gïr aaduñikaru kusu ajiopaiña ïmo ikuxi kiupai oidigana xako ajiopaiña ïgai dai ami kiupiïrï didibaiña Diuxi. Diuxi tïïgi go Moises ixdukatai duñagi go ikuxi kiupai dai mos podukai idui ïgai. 45Dai gokiïrï mui umigikïdï aidïxi kaxi gatïanïitadai go Josuekaru bai gïr aaduñi apia kia kusu ajiopaiña go ikuxi kiupai. Aidïpïrï gïr aaduñi bui surhi go aa ïma maa ñokadami ix makïdï tanai óídakatadai dai popoki tanai oidigi. Diuxi gubudakïdï bubaitu go ïkidï óídakami tabhaidïrï tudu dai maa ïgai tami oidigi gïr aaduñi sai tami óídakana ïgai. Dai gï aaduñi ïïki bhaigobai bua go ikuxi baki dai ami xadutudaiña Diuxi asta aidïxi dibia go Rey Dabidkaru.

46Diuxi kïïgakïrï nïidiña go Dabid tudu. Daidi go Dabid ikaiti ïïki sai,

—Go Jakobokaru kïï buaboitudaiña Diuxi dai xibi aanï buaboitudai ïpï. Iduña in ïrhidi ïmo kïïgadukami kiupai Diuxi bïïtarï— ikaiti.

47Dïï bïïxkïrï maiti idui ïgai aidï. Ïmo maradï ïgai, dai bhaiyoma go Salomón tïgidukami ïgai daidi idui Diuxi kiupaigadï. 48Dïï Diuxi bïïxi adama ïr gabhaitïkïakami dai mai oidaga ïgai kikiupiïrï ix makïdï odami ibuayi. Ïmo maaxi aagadami Diuxi ñokidï ka podukai oja ïïki di.

Dai oja ïgai sai Diuxi ikaiti sai,

49 Aanï ïgai dai gatïanïi go tïbagi dai bïïxi go oidigi ïpï. Mos kïixora daja aanï oidigi tudu.

¿Bhai ix ixtuidana odami xi gin duiñdagi ïmo kiupai xi ïr kïïgadukagi aanï in bïïtarï?

Aanï mai tïgito xako gin ibhïxtagi di.

50 ¿Mai ix ïïgi idui aanï bïïxi aïkatai? po tudu ikaiti Diuxi— itïtïdai Tibañi.

Tibañi mai tïtïïkaidakami aagai go Israelitas

51Daidi go Tibañi apia ñokidi go bhaitï gukakami judidiu daidi itïtïdai,

—Gia mai tïtïkaidaga aapimï. Ïpïan dukami aapimï odami ix makïdï mai buaboitudai Diuxi. Axñiñitu gïn dukami aapimï dai ïpïan tutuiga aapimï gïn aaduñikaru. Mos buidïrï bïïtïkana aapimï Diuxi Ibhïadï tudu. 52Daiñi, go ñiñokituldiadamgadï Diuxi ïïki pokaitiña sai dibiagai Diuxi otosadï ix makïdï gia kïïga ïïgidi Diuxi. Dai gïn aaduñikaru soimaaxi taataturhi go ñiñokituldiadamgadï Diuxi ïgai bïïxkatai dai asta koi. Dai dibiakai Diuxi otosadï aapimï mos gatïïgi mïsai muana. 53Kaïkabïrai aapimï bhaitï gukakami judidiu. Daiñi, Diuxi otoi gï tïtïañikaruga dai ïgaikïdï gïn maa gï sïïrhikamiga dïï tomax dukai aapimï maiti ipïrhi xi ïïgiadagi— itïtïdai Tibañi.

Gï muatu go Tibañi

54Daidi sïïrhikïdï bhakoi go bhaitï gukakami aidï kaïkai ñokidï Tibañi. Mos kïkïrïndimi taatamudï bhakoikai. 55Dïï Diuxi Ibhïadï gatïanïitadai go Tibañi dai tïbagiamakoga nïnïaba ïgai dai tïï Diuxi ix bamioma kukudarïi xi go tasai. Dai tïï ïgai go Suxi xi Diuxi sïïrhixapadïrï kïïka ïpï. 56Daidi Tibañi ikaiti,

—Daiñi nïidi aanï tïbagi bai kupiokiñi dai ami nïidi aanï Diuxi Otosadï Gïr Bhaitï Kïakamiga xi Diuxi sïïrhixapadïrï kïïka— ikaiti Tibañi.

57Daidi go ix makïdï ami guka kuu gïn naanaka mai kaïka ïrhiditai ñokidï Tibañi. Dai bïïxkatai gïgïrï iñakimi dai bui boopoi go Tibañi. 58Dai bhïiyi ïgai dai busaitu ami Jerusalenañdïrï maigobai dai maikakarai. Dai go ix makïdï gamaixai nukaturhi gïn bapasaraga ïmo gïrhi Saulo tïgidukami. 59Kia maixaitadai go odami baidi go Tibañi daanïgi go Suxi daidi ikaiti,

—Aapi Suxi gin Nukadakami, bhïkañi gin ibhïdaga— ikaiti.

60Dai bhodïrï totonakïdï kïkiba dai gïgïrï iiña daidi ikaiti,

—Gin Nukadakami, maiti gïpiïrï bupada go odami idi soimaaxkamikïdï— ikaiti.

Dai mos potïi ïgai dai muu.

Currently Selected:

Hechos 7: NTP

Highlight

Copy