Hechos 6

Go ojotoxikami darai kubarakami soikïdami

1Amaxi tuigako bamioma muidaimitadai go buaboitudadami dai bïïx tasai gatakoidiña ïgai soiñi go bipiudu bïïtarï xorai tïgitokana. Dai ïmo imidagai go griego ñoki ñokadami buaboitudadami soi kaiti daidi ikaiti, —Mai kïïga ibuayi go Hebreo ñokadami. Mai kïïga oidi ïgai soiñi gïr aduñi bipiudu ix makïdï ïr griego ñokadami— ikaiti.

2Daidi go bhaibuxtama dan goka ojotoxikami aagidi go buaboitudadami sai gïn ïmpaidana dai bhodïrï potïtïdai,

—Arhiïxi gï agai ix apia aagiada aatïmï Diuxi ñokidï bïïx tasai. Maiti ipïrhidi aatïmï ix dagitoagi gobai mos bïïx tasai gatakoiditai soiñi. 3Kaïkabïrai tudu gïr aaduñi daidi gaaga kubarakami kïkïïrhi gïn saagidañdïrï ix makïdï kïï tutiakami duu nïidi odami dai ix makïdï Diuxi Ibhïadï tïanïi dai ix makïdï xioma kïï maatï aatabuadagi. Ïgai tïïgidamu aatïmï go soiñi xi ïgai takoidana bhaiyoma. 4Ix podukai aatïmï bamioma bhaigakamu xi gadaanïda Diuxi dai apia gamaakimu aatagi Diuxi ñokidïkïdï— ikaiti go bhaibuxtama dan goka ojotoxikami.

5Dai bïïxkatai go buaboitudadami bhai aa podukai dai ïko busaitu ïgai go Tibañi. Ïgai kïïga buaboida aimïraiña Diuxi dai Diuxi Ibhïadï tïanïiña ïgai. Dai ïko bubaitu ïgai go Pirhi ïpï, dai Prokoro, dai Nikanor, dai Timoñi, dai Parmenas, dai Nikolas. Antiokiañdïrï oidakami go Nikolas dai maiti ïr judiukatadai ïgai dai bhïiyi buaboidaragadï go judidiu. 6Mïtai bïïxkatai baidakai amïka xako darajatadai go ojotoxikami tai ïgai gadáí Diuxi go kïkïirhi bïïtarï dai daama darai gïn noonobi.

7Dai aidïpïrï odami bïïxi aipadïrï óídakami kaïkana Diuxi ñokidï. Jerusalenïrï bamioma muidaimi go buaboitudadami dai muidutai go dadaxdadami judidiu buaboitu ïpï.

Gï bhïitu go Tibañi

8Diuxi kïïga maakaiña gubukadagai go Tibañi xi ïgai ibuadana naana maaxi ixtumaxi odami buitapi ix makïdï ïïgi Diuxi ixtutuidi xi buadagi. 9Dïï bïïxkïrï mui odami bui ñokaitadai go Tibañi. Ïïmoko go kïkïïrhi ix makïdï bui ñokaitadai dada ïmo judidiu kiupaigadïañdïrï ix makïdï Libertados tïgidu kiupai. Cireniañdïrï dai Alejandreañdïrï oidakamikatadai ïgai. Dai jaa bui ñokadami Ciliciañdïrï dai Asiañdïrï oidakamikana. Bïïxkatai ïgai bui surhi go Tibañi. 10Dïï Diuxi Ibhïadï maa tïgibudagai go Tibañi xi kaxkïdï go gaa mai tïï ixdukatai maitiagi. 11Daidi go kïkïïrhi ix makïdï gabuidïrï ñokaitadai aa namïki jaa sai ïgai gïpiïrï buajana go Tibañi. Ïgai pokaiti sai go Tibañi soimaaxi ñokai Moiseskaru sïïrhikamigadï bui dai Diuxi bui ïpï. Mos gïpiïrï buaja ïrhidi ïgai go Tibañi daidi ikaiti. 12Dai podukai bhakoitu ïgai odami ïmadï dudunukami dai mamaatïtuldiadami sïïrhikami ïpï. Xi kaxkïdï ïgai bïïxkatai buidïrï surhi go Tibañi dai bhïiyi. Bhïkai ïgai dai baan kïi buidïrï go ix makïdï bïïxi adama ïr tïtïanïdamigadï judidiu. 13Dai ami báí ïgai jaa yaatabogami ïpï saidi ïgai itïïna aidï,

—Go Tibañi bïïxkïrï bui ñokaiña go gïï kiupai xako xadutudai aatïmï Diuxi. Dai bïïxkïrï buidïrï kaatïkana sïïrhikamigadï Moiseskaru ïpï. 14Kaï aatïmï ix kaititadai Tibañi sai Suxi go Nasaretañdïrï oidakami daituda agaitadai go gïï kiupai. Dai sai maigobai daituda agaitadai gïr bituldaraga ix makïdï gïr biturhi Moiseskaru— ikaiti yaatabogami.

15Dai bïïxkatai ix makïdï ami dunukamiïrï daraja tïgito nïidi buibasodï Tibañi xi ïpïamaaxi tiodi buibasodï ïmo Diuxi tïañikarudï.

Currently Selected:

Hechos 6: NTP

Highlight

Copy