Hechos 4

Gïn buitu go Piduru ïmadï Juan

1Kia atagaitadai go Piduru dai Juan odami ïmadï dai ami dada chïki dadaxdadami judidiu ïmadï kapitañigadï go gïï kiupiïrï sandadaru ïmadï saduseos. 2Dai arhiï bhaakoi ïgai kaïkatai aatagidï Piduru ïmadï Juan. Pokaititadai Piduru ïmadï Juan sai Diuxi duakaturhi go Suxi dai sai bïïxi go koidadï biakamu gïn duakaragai.

3Dai gokïdï bui ïgai go Piduru ïmadï Juan. Ka uruitadai xi bui ïgai dai ka mai ajïakatadai ix bhai duñagi dudunukamiïrï dai kaxkïdï maamaixa ïgai asta xadiko. 4Dïï bïïxkïrï mui odami buaboida kaï aatagidï go Piduru ïmadï Juan. Dai ïgaikïdï ayi parï taan mirhi buaboitudadami, go ïï kïkïïrhi, dai ïkobïrakoga mui oki buaboitu ïpï.

5Dai xadiko gïn ïmpagi Jerusalenïrï bïïxi go dudunukamigadï go judidiu ïmadï kïkïrhiodami dai maatïtuldiadami Diuxi sïïrhikamigadï. 6Dai ami dakatadai ïpï go Amaxi. Ïgai ïr bhaitï kïakamigadï go dadaxdadami judidiu. Dai dakatadai ïpï go Kaifas ïmadï Juan dai Alejandro ïmadï jaa ïpï ix makïdï ïr aaduñdï go dadaxdadami bhaitï kïakamigadï. 7Baidi go dudunukami bai go Piduru ïmadï Juan daidi ïran tutui daidi gatïkakai,

—¿Borai gïn maa gubukadagai ïmadï sïïrhikami ix duadi aapimï go kokoadï mai aimïrdami?— itïtïdai ïgai.

8Daidi Diuxi Ibhïadï gatïanïitadai go Piduru aidï daidi Piduru itïtïdai go dudunukami,

—Aapimï dudunukami dai aapimï gïr bhaitï gukakami kïkïrhiodami, 9tami gïr tutui aapimï xibi dai gïr tïkakai ix dukatai soi aatïmï idi kïïrhi dai ix dukatai duayi gobai. 10Dai xibi aanï maaxiko aagai tami gïn buitapi dai bïïxi Israelïrï oidakami buitapi ïpï sai Suxi Kristo gubukadadïkïdï duayi idi kïïrhi ix makïdï tami kïïka gïn buitapi. Go Suxi ïr ïgai baaxi Nasaretañdïrï oidakami ix makïdï xixa aapimï kuruxiana dai mua dai ix makïdï Diuxi duakatu. 11Ïïki ka ojixikatadai sai dibiagaitadai Diuxi Otosadï Gïr Bhaitï Kïakamiga dai sai odami mai ïïgida kaïka agaitadai. Aapimï ïr ïpïan dukami bakitadami ix makïdï maigobai daitu ïmo odai mai ojoida nïiditai dai gokiïrï mai ïgai sai go odai bamioma gï agaitadai go baaki bïïtarï. 12Daiñi, Diuxi otoi go Suxi Kristo sai ïgai ïïgi biakana gubukadagai ix kïïgakïrï bubiadagi odami tomax xako oidakami. Mai tipu ïmai bïïxi oidigi daama —itïtïdai Piduru.

13Daidi go dudunukami gïn tïgito nïiditadai ix mai duadimukai ñokaitadai go Piduru ïmadï Juan tomaxi mai tïbïpi daraiba ïgai ojiïrï dai maiti ïr bhaitï gukakamikana ïgai. Daidi go dudunukami mai tïï ix tumaxi gïn tïtïgitoagi daidi ikaiti,

—Idi kïkïïrhi gia ïmadï ajiopaiña Suxi— ikaiti ïgai.

14Dai go kïïrhi ix makïdï mai aimïrdamikatadai dai ka duayi ami kïakatadai sonoana Piduru ïmadï Juan kaxkïdï go dudunukami mai bhaigakatadai ix bui ñokadagi toma lïïchi.

15Daidi go dudunukami ïïgi gaatagada ïrhiditadai dai maigobai otoi go ojotoxikami 16daidi bhodïrï ikaiti,

—¿Tïduna aidï go kïkïïrhi?— ikaiti —Kïï maatï bïïxi Jerusalenïrï oidakami xi duadi gobai go kokoadï dai xibi ka mai bhaiga aatïmï ix potïiyagi sai maiti ïr buaboi. 17Gï agai ix daidagi aatïmï ix ka mai aagada ïgai Suxi. Tï aagida sai gïgïbiaragai aatïmï ix aapia aagada ïgai— ikaiti. —Podukai ka mai dagito antaada aatïmï xi maigobioma aiyagi Suxi aatagidï— ikaiti go dudunukami.

18Dai bhodïrï go dudunukami báí go Piduru ïmadï Juan dai kabami daidi sai ka mai aagada ïgai bamioma go Suxi dai sai ka mai maatïtulda ïgai odami aagaitai Suxi. 19Dïï mos Piduru ïmadï Juan aa noragi ñokidï daidi itïtïdai,

—¿Dukatai nïidi aapimï, bhai xi ïr sïïrhi xi gïn ïïgiadagi aatïmï dai Diuxi gia ka mai ïïgiada aatïmï? 20Mai bhaiga aatïmï ix mai aagada ixtuma nïidi aatïmï dai kaï— ikaiti Piduru ïmadï Juan.

21-22Daidi go dudunukami ka mai tïtïgaitadai ixtukïdï gïpiïrï surhigiagi go Piduru ïmadï Juan dai mos aagidi sai soimaaxi taatatulda agai ix apia aagada ïgai go Suxi. Dïï aidïpïrï ïbhïiditadai ïgai ix soimaaxi duiñdagi. Pobïnïrhidi ïgai sai ñokada antaada go odami aidï. Bhaitoma bïïxi go odami kïïga ñokaitadai Diuxi bïïtarï nïiditai ix ka duayi go kokoadï ka biakatai ïgai bhaibitukami gokobhai umigi. Kaxkïdï go dudunukami mos ïbhïki go Piduru ïmadï Juan dai dagito sai iimïna.

Go buaboitudadami gadaanïi Diuxi sai soiñana sai mai duduadimukagi

23Bhodïrï bubuakïkai Piduru ïmadï Juan abhiadïrï gïn dagitokai go dudunukami sai sïïrhi iji ïgai mïïka xako darajatadai aaduñdï dai bïïxi aagidi ix kaititadai go bhaitï gukakïdï dadaxdadami judidiu ïmadï kïkïrhiodami bhaitï gukakami. 24Dai mos kaïkai go aatagi bïïxkatai go buaboitudadami ïmapi daanïi Diuxi biakatai mos ïmo tïgibudagai bïïxkatai daidi ikaiti aidï,

—Gïr Nukadakami, aapi ïr Diuxi dai idui aapi tïbagi dai dïbïrai dai go gïï sudagi dai bïïxi aïkatai. 25Ïki otoi aapi Gï Ibhïdaga abhana go Dabidkaru dai ñokiturhi aapi xi ïgai ikaiti,

¿Tuixidï bhakokorïi odami naana maaxi ñokadami Diuxi bui?

¿Dai tuixi tïtïitoi odami naana maaxi ixtumaxi mai kïkïïgadukami?

26 bïïxkatai go reyes oidigi daama oidakami ïmadï go gaa bhaitï gukakami gïn ïmpagi dai bui surhigi agai Gïr Nukadakami ïmadï Diuxi Otosadï Gïr Bhaitï Kïakamiga— ikaiti go Dabidkaru ïki.

27Dai go buaboitudadami apia daanïi Diuxi daidi ikaiti,

—Xibi ka buaboi busai ñokidï go Dabidkaru. Xibi tanai Jerusalenïrï gïn ïmpagi Erodïxi ïmadï Poncio Pilato ïmadï judidiu dai jaa ix makïdï maiti ïr judidiu ïpï. Ïgai buidïrï surhi gï maara Suxi tomaxi ïgai mos ïr ïïgidadami aapi Diuxi dai aapi dáí go Suxi saidi ïr Gïr Bhaitï Kïakamigakana. 28Go dudunukami idui ix makïdï aapi Diuxi ka ïkiaxdïrï gï tïgitotadai xi ïpïduñagi. 29Dai aapi Diuxi kïïga nïidi ix gïr bui bhakokorïi go dudunukami. Aatïmï ïr gï pipioñi kaxkïdï gïr maakañi gubukadagai xi mai duadimudagaikïdï aatagada gï ñoki— ikaiti go buaboitudadami gadaanïitai Diuxi.

30Daidi ikaiti ïgai ïpï,

—Gïr soiñañi xibi gï otosa Suxi Kristo gubukadadïkïdï daidi duayda aapi kokokoñiadï dai ibuada maaxidaragai maaxi ix makïdï ïïgi aapi ibuayi dai podukai gïr tïïgidañi ix xïï gubuka aapi— ikaiti buaboitudadami daanïitai Diuxi.

31Daidi mos nato daanïkai ïgai Diuxi sai gigiburhi baaki xako darakatadai ïgai dai Diuxi Ibhïadï tïanïitadai bïïxkatai ïgai dai podukai mai duadimudagaikïdï aagaiña ïgai Diuxi ñokidï.

Aipako gïn soikïiña go buaboitudadami

32Dai ka muidukana buaboitudadami dai bïïxkatai biakatadai ïmo tïgibudagai aidï.

—Ix makïdï bia aatïmï gïr buxtuidaga bïïxkatai gïr aaduñi ïr tuidadï gobai— gïn ïrhidiña ïgai.

33Daidi go ojotoxikami gïïpi bhïiyi gubukarhigai dai aagidiña ïgai go odami sai Suxi ka duakatu. Dai Diuxi sïïrhikïdï kïïgakïrï tïï go buaboitudadami dai kïïga oigïdaitai urhiñdi gubukadadï.

34Aidïpïrï mai tipukatadai xorai biïgakagi ixtumaxi. Bïïxkatai ix makïdï biakana dïdïbïrai dai bhaabhaki ïpï gaagaraiña 35dai maakaiña ïgai go ojotoxikami go tuminxi. Baidi go ojotoxikami takoidana xorai tïgitokagi. Ix ïmadutai bamioma tïgitokagi bamioma mamaakaiña ïgai xi podukai bïïxkatai biakana ixtumaxi tïgitokagi. 36Dai ïmo buaboitudadami Jose tïgidukatadai. Ïgai ïr pipiixaradï Lebikaru dai Chipreañdïrï oidakami ïgai. Dai go ojotoxikami Bernabe agaiña ïgai. Go Bernabe tïtiaradï itïiya ïrhidi ïmo abïnakiadami. 37Dai ïgai gagaara ïmo dïbïrai dai tïïgi go tuminxi go ojotoxikami gagarakai.

Currently Selected:

Hechos 4: NTP

Highlight

Copy