Mâk 15

Ghu ə nìy bə̀ Yesù a kə̀lə̀ Paylèt

(Matìyò 27.1,2,11-14; Lukâs 23.1-5; Dzwan 18.28-38)

1Nə̀ zwù k-u-tsuk kiy, ŋgəd tə aghè àlwaʼa tiy, nə̀ ŋgəd tə inaʼ tiy, nə̀ aghè ə̀ tyi dě ulàŋ wìy, nə̀ aghè ə saʼa tənsaʼ yiy, ghu dzəŋə bə̀ ani səay tsə ayiə yə ghu də ani ba zəŋi nə̀ Yesù. Ghu kwi tsə we nìy zù nə̀ we akə̀lə̀ Paylèt. 2Paylèt ə bəb yə̀ a Yesù nə̀, “Wò də dòŋ kə ghě Dzû ə?” Yesù ə bə̀lì kə̀ we nə̀, “Wò mə dzày.” 3Ŋgəd tə aghè àlwaʼa yə dzày tsə ndə̀mə̀ àyiə à guw yiy anə tuw kə Yesù 4Paylèt ə bəb fəli yə̀ a we nə “Wò dzìy wày ìyiə yiy anə ndə̀mə̀ àyiə yə ghu dzîy nəniy anə tuw kiə̀ yə̀?” 5Yesù ə də kə moŋ, idzwə i zwum dyaŋi yə̀ sòʼò Paylèt ate.

Ghu dzìy nə̀ Yesù kwu ani pfə

(Matìyò 27.15-26; Lukâs 23.13-25; Dzwan 18.39–19.16)

6Biə kiy kə də̌ nə̀ abu ghu dziy dwiʼi ntsuk fə inyi i ŋkàmə̀tâzaʼà mìy, Paylèt ə dzwə̀ màʼà fyi bə̀ wù ùmòʼ a ndàw ntsaʼ aghê bɛmə dzə̂ nəniy. 7Anə sòŋə fə ghè fə̀, wù lìy kə də̌ a ndàw ntsaʼ ghu kə tyoŋə nə̀ à də̌ Bàlabàs. Ù kə də̀ a ndaw ntsaʼ aŋwòə ù kə kaw utswə̂d anə inaʼ i Lûm, ù kə wiy màʼà àghù. 8Ŋwàâ kə ghù kìy zù dzày yə̀ â Paylèt nə̀ ù nyəli màʼà fyi bə̀ wù ùmoʼ anə byìə̀ kə ghu. 9Paylèt ə bəb tsə ghu nə, “Ghà liə nə̀ mə nîy ŋwǒ fyi bə̂ dòŋ kə ghě Dzû kə̀?” 10Paylèt kə kwu ŋwô nə̀ aghê àlwaʼa yə̀ kə̂ Yesù akə̀lə̀ ighe nîy bə̀ nə̀ ghu ghoʼò ŋwòə we. 11Aghê àlwaʼa yə kwuni fə̀d ŋwùmì fyi kə ŋwàâ kə ghù kə̀ nə̀ ghu dzây yə̂ â Paylèt nə̀ ù dzwə̀ màʼà fyi bə̀ Bàlabàs a ndàw ntsaʼ. 12Paylèt ə bəb fəli yə̀ a ghu nə, “Ghà liə nə̀ mə̀ zəŋi yə̂ mə̀yə nə̀ wù wə̀ ghà twoŋə nə̀ à də̀ dòŋ kə ghě Dzû ə?” 13Ghu dzày fyi kə anə dzə̀ tə̀ taw tiy nə̀, “Baa we anə kàʼ fə təzəd.” 14Paylèt ə bəb a ghu nə, “Ù byɛbi màʼà kìə̀?” Ghu bày bvəʼi fyi kə məmbòŋ nə̀, “Baa we anə kàʼ fə təzəd.” 15Paylèt ə liə ani zəŋi tsə nə̀ fôŋ tə ghù yə̀ dzwâb tsə, u dzwə̀ màʼà fyi bə̀ Bàlabàs a ndàw ntsaʼ, nyə̀ tsə kəlâŋ â Sǔgôʼ tə we nə̀ ghu bwad Yesù, ghu baa soʼò we anə kàʼ fə təzəd.

Sǔgôʼ tìy ə tsoʼ Yesù

(Matìyò 27.27-30; Dzwan 19.2,3)

16Sǔgôʼ tə̀ ə nìy nyi yə̀ nə̀ Yesù anə mbà kə̀dòŋ. Ghu twoŋə nyi bə̀ sòʼò sǔgôʼ tə̀ liy tə awote anə ntoʼ. Ghu toŋə bə̀ sǔgôʼ tə̀liy tə. 17Ghu dzə̀ŋì tsə we nə̀ sàŋ ìmwâ yìy, ì fwunə nəniy sàŋ yə̀ ùdòŋ wìy kə dzəŋə̀ tsə̂ nəniy. Ghu byili kə kəntyàŋì anə təfàb, dzə̀ŋì na tsə anə tuw kə we. 18Ghu ŋwamə zəŋi dzìy ghu twoŋə zuw we dzìy tsə nə̀, “A dòŋ kə aghě Dzû kìy, ghè nyiə̀ wò nə̀ ŋkwiʼi miy.” 19Ghu səŋ we nə̀ mbàŋ an-a-tuw. Ghu tsə màʼà ntyiə a zòŋə̀ we, nyaʼa yə̀ a təŋə̀ we swə̀ʼə̀ we dzìy ghu fwulə̀ we. 20Yəə sǔgôʼ tə̀ swìʼì kpe tsə dzəə Yesù, ghu tsoʼ ŋwò fyi kə sàŋ yə̀ anə uwè u we, dzə̀ŋì na dzwoŋi tsə ndzwu tə we, nìy zù nə̀ we ani zu baa we anə kàʼ fə təzəd.

Ghu baa Yesù anə kàʼ fə təzəd

(Matìyò 27.31-44; Lukâs 23.27-43; Dzwan 19.17-27)

21Ghu kpe bə̀ nə̀ Simùn, ù kə də nəniy tè Àlèzandà, də̀ sòʼò tè Lufùs. Ù kə də̌ wè ìnaʼ i Sìlên, u màŋə̀ tsìy nyiə bə̀ anə inaʼ, ghu tyiŋi tsə we nə̀ ù bòʼò kə kâʼ fə təzəd fə Yesù kə boʼò kəli nəniy. 22Ghu bù nyi tsə nə̀ Yesù a lòʼo kə̀ liy kiy ghu tyoŋə nə̀ à dəə Golgotà, Gokotà myiŋə “lòʼò kə uvəb u kətuw.” 23Ghu nyə̀ we nə̀ nlwù mìy nə̀ ghu mə kwe na utyiə ù liy wiy ate, ghu twoŋə nə à də̌ mə̂l, u twe ani mwu. 24Sǔgôʼ tə̀ ə dyaŋi baa yə̀ we anə kaʼ fə təzəd, dzàw tsə ndzwu tə we dzày tsə nə̀ a təm tsə bòʼ tə̀ a kôʼ wù wə̀ ù kìy nyiə ŋwò nəniy. 25À kə də̌ anə fwatəwùŋ ìbwùkə nə̀ bələ̀bə̀lə̀ tìy ghu kə baa nəniy we. 26Ghu twà na kə ayiə idoŋ anə kàʼ fə təzəd nə̀ “Dòŋ kə aghě Dzû.” Tsəe kə ghè kə̀ kə dè sələ kə iyiə kə ghu kə baa nəniy we ate. 27-28Sǔgôʼ tə̀ ə baa kə sòʼò aghè tsoŋə yiy abè, ghu nìy kə ùmòʼ na yə̀ anə ukwe u Yesù ù nyiə wiy, ghu nìy kə ù liy wə̀ na yə̀ a bə̀d kə ukwe ùkwə̂ wìy.#15.27-28 Ùŋwàʼà ù liy wiy kwu ŋwoə ŋkə̀mə̀ 28. Ŋwàʼà K-a-zə̀kiy maa dzày nə̀ ini bè fyiə ghi, i bu fyi kə sòʼò ghi ghu niy təm dzəŋi yə Yesù nə ghù yə̀ ghu kə də zuw wai â Zə̀kîy. 29Aghû yə̀ ghu kə tsîy nəniy anə dzəd, ghu bè kòʼò dàŋə̀ tsə̀ we, ghu moʼo ùtuw nyàʼà Yesù dzìy nə̀, “Wò kə dzìy nə̀ wò kì sàʼà tsə ndàw Kə̀zə̀ wò biə dzwoŋi kə an-i-bàm i ntsukə inti.” 30Wò sì də kə̀ bii fyi tswi bə̂ ùwee niə̀ wìy fiy anə kàʼ fə təzəd. 31Ŋgəd tə aghè àlwaʼa tə nə̀ àghè tyi dee ulàŋ wìy ə tsoʼ sòʼò Yesù, dzìy tsə̀ anə iwè nə̀, “Ù kə fày fyi aghê liy, kwuni wày ani fày fyi uwu u we. 32Abu à də nə̀ ù ndzə̀m də̌ wù wə̀ zə̀kìy sûw kyili na nə̀ ù dòʼò kə̀dòŋ, dòŋ kə Islàel, u fyi tswi bə̀ nyìə̀ anə kàʼ fə təzəd, tə̀ ŋgà kôʼ, a ki bɛmə̀ sòʼò â we”. Aghû yə̀ àbè ghu kə baa na dzəŋi ghu nə̀ Yesù, ghu nyàʼì sòʼò Yesù.

Ipfə i Yesù

(Matìyò 27.45-56; Lukâs 23.44-49; Dzwan 19.28-30)

33Nə̀ fòŋə̀ ntsə̀ tìy, ləm kiy kəd bə̀ loʼo tədzə̀m. Ləm kiy dòʼò anə fwatəwùŋ iti. 34Abù fwatəwùŋ ìti kpe tsə nəniy, Yesù ə bwoʼ fyi kə kəbôŋ idoŋ dzìy tsə nə̀, “Èlwa, Èlwa, lama sàbatani.” I myìŋə̀ nəniy nə̀ “Zə̀ kam kiy, Zə̀ kam kiy, wə̀ na nə̀ìndiə miə nə̀ noŋə̀ mìə̀ ə?” 35Aghê liy ghu kə tsîy nəniy awote, ghu zuw yəə ù dzìy nəniy. Ghu kaʼ tsə ani dzày nə̀, “Zuw, ù nyə̀ ghii dzìy nə̀ Èlaydzà bù fày we.” 36Wù lìy anə uzə u ghu ə nyəŋ zù nìy kə usâ, kwe nyi tsə anə nlwù mə̀ tâw mìy, nìy tsuk kə anə mbàŋ, nyə̀ kwoʼ yə̀ nə̀ Yesù nə̀ ù nə̀ də nəniy ani mu, u dzày tsə nə “Ŋgà ə təmi tsə tə a koʼ nə̀ Èlaydzà kî bè nìy ŋwò tswi bə̀ ŋwòə we fə anə kàʼ fə təzəd fə ə̀” 37Yesù ə dyaŋi bwoʼ fyi fwuli kə kəbôŋ idoŋ dyaŋi pfə ŋwò. 38Bə̂d kə ndzwu kə kə kə də̀ nəniy a ndàw Kə̀zə̀, kə ŋwò saa fyi kwoʼ yə̀ anə ubə̀d ùbè, kaʼ tsə idoŋ tswi kwùm tsə itəŋ. 39Abù wè tə̀sǔgôʼ ùnè wə̀ ù kə tiy nəniy anə səkə Yesù, kòʼ yəə ayiə yə Yesù pfə nəniy ate,#15.39 Pfə U zuw tsə nəniy idîy i Yesù yiy koʼ sòʼò yəə Yesù pfə nəniy ate. u ŋwò dzày tsə nə̀ “À də̀ ìsoŋə̀ yìy nə̀ wù wə̀ kə̀ də̌ Wà Kə̀zə̀.” 40Iyəŋi àliy kə də̀ awote ghu lia bə̀ àyiə ghè yə̀ nàdiikiy. Mə̀li wə ù kə ŋwô bə̂ anə inaʼi Magdalà, u də̀ sòʼò awote, nə̀ Mə̀li wə ù kə də̀ nəniy zə̂ Dzɛ̂m ùsə̀ə̀ wə̀, nə̀ Yùsə̂f. Sàlumè kə də sòʼò awote. 41Iyəŋi yə̀ kə bwìy tsə̀ sòʼò nə̀ Yesù, bà tsə̀ ani fày sòʼò we anə sòŋə fə̀ ù kə də a Galìlî. Ndə̀mə̀ iyəŋi àliy kə də̀ sòʼo awote, ghu kə ŋwô kwoʼ dzəŋi bə̂ nə̀ Yesù a Yèlusalèm.

Ghu kələ Yesù

(Matìyò 27.57-61; Lukâs 23.50-56; Dzwan 19.38-42)

42À kə də̌ nə̀ ìnyinkwubì tìy a ntsuk fə aghee Islàel kə bya nia ufyiə wiy yəə tsutsu wə̀ kə də ntsuk fə̀ zwaa fiy#15.42 Ntsuk fə aghě Islàel fə̀ zwaa fiy kə də̀ ntsuk fə ghu kə myiŋə tsə̂ nəniy ayiə yə Zə̀kìy kə dzây na nəniy nə̀ ghu si fwulə we ate.. 43Wè ìnaʼ i Àlimàtiyà ù lìy wìy ghu kə tyoŋə nəniy we nə̀ à də̌ Yùsə̂f. Ù kə də̌ ŋgə̀d ə̀ àghè Islàel ìsòŋə̀ yìy, u kə lyimə sòʼò nə̀ soŋə fiy kpe tsə â Zə̀kìy ani saʼ aghe we. U kwù tsə fòŋ zù a kə̀lə̀ Paylèt, zù ŋwa yə̀ ivəən i Yesù. 44Idzwə yiy zwum Paylèt ani zuw nə̀ Yesù mə ghaʼi pfə. U twoŋə tsə wè tə̀sǔgôʼ ù nè wə̀, bəb yə̀ â we nə̀ Yesù mə ghaʼi pfə ə̀? 45Abù Paylèt zwuli mâ tsə ayiə yə dòŋ kə təsǔgôʼ kə̀ dzày nəniy, Paylèt ə bɛmə̀ yə̀ nə̀ Yùsə̂f zù nìy kə ivəən i Yesù. 46Yùsə̂f ə zù zwe kə bə̂d kəndzwu kə̀ fəmə kiy. U nìy fyi tswi bə̀ ìvəən i Yesù anə kàʼ fə təzəd, baŋ kə we anə bə̀d kə ndzwu kə, zù kələ yə̀ Yesù anə isày yə̀ aghee kəfàʼ ə we kə təm nyi yə̂ nəniy anə kəna. U dyaŋi byiŋi bə̀ itay ì nê yìy fè na bə̀ ìdzwə i sày ate 47Mə̀li wə ù kə ŋwô bə̂ anə inaʼi Magdalà nə̀ Mə̀li wə ù də nəniy zə̂ Yùsə̂f ə kòʼ na yə̀ lòʼò kə Yùsə̂f kə na ivəən i Yesù yìy ate.

Currently Selected:

Mâk 15: isu

Highlight

Copy