Mâk 14

Ghu byay ani wiy Yesù

(Matìyò 26.1-5; Lukâs 22.1,2; Dzwan 11.45-53)

1À kə dòʼò səə kə ntsuk imbè â ghu ani nyi inyi i ŋkàmə̀tâzaʼà mìy nə̀ ba kə ghu də kə̀ kwe nəway mbùŋ ate. Ŋgəd tə aghè àlwaʼa tiy nə̀ aghè tyi de ulàŋ wìy, ghu khu tsə̀ dzəd ani kwi wiy Yesù. 2Ghu səay tsə nə̀ “A kə kwi dzə̀ ə we anə soŋə fə inyi, aŋwòə aghê də ani bù ŋgàŋ nə̀ ŋgə̀d kìy.”

Wìyəŋi kyili mbvu mə̀ ivən ì taw yiy azoŋə̀ Yesù

(Matìyò 26.6-13; Dzwan 12.1-8)

3Abù Yesù nyiə nəniy a Betanì a ndàw simùn wə̀ ù kə boʼ dzàŋ tsə̂ nəniy ùŋkə̀m wìy, wìyəŋi ù lìy ə zù bù awote nə̀ sòʼò mbvu mə̀lyimə̀ mìy ivən yiy kə ŋgee taw ate, ghu kə zəŋi nəniy anə zù kə̀ ghu twoŋə nəniy nə̀ à də̀ nâd. U fwiy kə sòʼ yə̀, fə̀lì yə̀ mbvu mə anə tuw kə Yesù. 4Fôŋ tìy ə ŋə̀m yə̀ àghè liy ghu kə də nəniy awote, ghu kaʼ kə ani dzày anə iwè nə̀, “Ù ghî mbvu mə̀ nyàb màʼà anə iyî kìə̀? 5Mbvu mə̀ mə̀ də̀ ŋwô yə a ni fê anə ndə̀mə̀ ùkhiy a fây yə̂ àghè la yiy ate” idzəŋi tswi tsə anə tuw kə wìyəŋi wə.

6Yesù kwuni dzày yə̀ a ghu nə, “Kə̀ nə we fyimi, ghǎ we dzəŋə̀ ani iyîkìə̀? Ù zəŋi iyiə ìdzoŋì â mìə̀.” 7Aghee la yiy nî mày kòʼ wày anə fwumi kəli, ghà ki fii yə ghu anə sòŋə fə ghà tsə̀m tsə. Abû mìə̀, mə nî wày dzə nə̀ ghà anə sòŋi i dzə̀m. 8Ù mə fàʼ àyiə yə ù mə̀ liə nəniy ani fàʼ awò mìə̀, ù kyili na təŋ nəniy miə ani byay na tsə yəə ghu kî kyələ miə ate 9Mə ndzəmə̀ dzìy bə̀ ŋwò â ghà nə̀, loʼo tə tə̀dzə̀m ghu nî nìʼà ntwùm ə̀ Kə̀zə̀ yə̀ ate fə anə mbyi, ghu nî dzìy sòʼò ŋwò ìyiə yə ù zəŋi nəniy, ani myiŋə tsə we ate.

Dzudà ə bɛmə kə ani fè fyi Yesù

(Matìyò 26.14-16; Lukâs 22.3-6)

10Tsə̀ndi imòʼ anə tsə̀təndii tə ìvəm nə̀ ghe tiy ibè ghu kə twoŋə nəniy nə̀ à də̀ Dzudàs Ìsə̀kalòt ə ŋwò tsə zù akə̀lə̀ ŋgəd tə aghè àlwaʼa yiy ani zù fè fyi Yesù â ghu. 11Ghu dwiʼi ani zuw ayiə yə ù kə dzây nəniy, ghu tɛb na yə̀ ani nyə̀ we nə̀ ukhiy wiy. Dzudà ə dyaŋi kaʼ kə ani kaw dzəd ani nyə̀ tsìy yə̀ Yesù â ghu.

Yesù nə̀ tsə̀təndii tə we tiy nyi inyi i ŋkàmə̀tâzaʼà mìy

(Matìyò 26.17-25; Lukâs 22.7-14,21-23; Dzwan 13.21-30)

12A ntsuk fə səsə fə anə inyi i ŋkàmə̀tâzaʼà mìy, ntsuk fə ghu kə see tsə̂ nəniy ndzwù tə ŋkàmə̀tâzaʼà mìy, tsə̀təndii tə bəb yə̀ â Yesù a we nə, “Wò liə nə̀ ghè zû byay na yə ufânyiə u inyi i ŋkàmə̀tâzaʼà mə̀ ə?”

13Yesù ə twum tsə tsə̀təndii tə we ìbè dzày yə̀ a ghu nə “Ghà zû anə inaʼi Yèlusalèm, ghà ki kpwe yə̂ nə̀ wù lìy wìy ù bòʼò kəli nəniy ntwà mwi, ghà ki dzwumì yə̂ we. 14Ndàw yə ù kì tsîy nyiə yə̂ ate, ghà ki dzwumì nyi kwoʼ yə̂ we awote ghà bəb tsə nə â mwe ndàw ù ghè wə̀ nə̀, ‘Àtyi dè bəbə nə̀, idzwə i ndaw yə mə kwu ani nyi inyi i ŋkàmə̀tâzaʼà mìy ate nə̀ tsə̀təndii tam tiy də yə?’ 15Ù kî dè bə̀ ghà nə̀ ìdzwə i ndaw ì nê yìy anə ndàw ì kwoʼò dyaŋə̀ yìy, nə̀ ghu mə kwe na ufyiə udzə̀m ate. Ghà ki byay na tsə ufyiə udzə̀m awote.”

16Tsə̀təndii tə ghè tə̌ ŋwò tsə zù awo anə inaʼ i Yèlusalèm zù kòʼ tsə ayiə àdzə̀m Yesù tyi awò ghu, ghu dyaŋi byay na tsə sòʼò ùfyiə inyi i ŋkàmə̀tâzaʼà mìy awote.

17Abù nə̀ nyinkwubì tìy, Yesù bù nə̀ tsə̀təndii tə we tə ìvəm nə̀ ghe tiy ibè. 18Yəə ghu nyiə nəniy, Yesù ə dzày tsə a ghu nə̀, “Mə ndzəmə̀ dzìy bə̀ ŋwò â ghà nə̀ wù ùlìy də̀ anə uzə ghi ù nyiə fwumə nə̀ mìə̀, ù kì fyìè fyiə nəniy miə.”

19Iyiə i ghè yə̀ ə ŋge fyimi này yə̀ tsə̀təndii tə we ghii, ghu kaʼ ani bəb, wù ùmoʼ umòʼ nə̀ “A Yesù à də̀ miə ə̀?”

20Yesù ə bə̀lì kə nə̀, “À də̌ wù wə̀ wo kam kiy kî dzəŋə nyiə tswi tsə anə kəkaŋ nə̀ kə kiy we. 21Wà Wù kì pfə ŋwò anə yiə yə ŋwàʼà k-a-zə̀ kìy dzây nəniy. Àkwuni də̀ kə nə̀ i kî fyà ŋwò â wù wə̀ ù kì fyìè nəniy Wà Wù. I kə ba dzwàb nə̀ ghu kə we bôʼ byi dzə̀.”

Ba kə Mwe ə̀ Mbyi

(Matìyò 26.26-30; Lukâs 22.14-23; 1 Kolìn 11.23-25)

22Abù Yesù nyiə nə̀ tsə̀təndii tə we tiy, Yesù ə nìy kə kəba boʼ tsə, nyə̀ yə̀ kə̀zòŋə̀ ate awò Zə̀kìy, nyə̀ yə̀ ba kə awò tsə̀təndii tə we tiy, dzày tsə nə̀. “Nìy nənìy, À yù də̀ uwe nam.”

23U nìy kə bwam nyə̀ tsə sòʼò kə̀zòŋə̀ ate awò zə̀kìy, dyaŋi nyə̀ tsìy yə̀ awò tsə̀təndii tə we tiy, dzày tsə a ghu nə, “Ghà moʼ mu tsîy kpwe yə̂,” ghu mu tsìy yə̀ sòʼò àdzə̀m. 24U dzày yə̀ a ghu nə, “À yù də̀ kâŋ tam mə nyii ŋkà mìy ate anə utuw ndə̀mə̀ àghù. 25Mə ndzəmə̀ dzìy bə̀ ŋwò â ghà nə̀ mə kî kàm mu dzə̀ way nlwù mə̀ nə̀ ghà, à ki may kə mə̀ fyiə̀ mə̀ mə kî muə a lòʼo kə Zə̀kìy saʼa ate.”

26Ghu ə dyaŋi zɛm tsə ndzàŋ ani fwùlì Kə̀zə̀ dyaŋi ŋwò kwoʼ yə̀ anə ukàʼ ŋkàʼ mə̀ Olìf.

Yesù ə dzìy nə̀ Pità kì twe myàʼà ŋwò ighe

(Matìyò 26.31-35; Lukâs 22.31-34; Dzwan 13.36-38)

27Yesù ə dzày yə̀ â tsə̀təndii tə we tiy a ghu nə, “Ghà kî twe myàʼà ŋwò miə gha adzə̀m, aŋwòə i twâ dòʼò anə ŋwàʼà k-a-zə̀ nə̀, ‘Zə̀kìy kî wiy myàʼà tsə àbàʼàtə̀ndzù, ndzwù tìy ki ŋwô tu saŋə̀ tsə.’ 28A ki buu Zə̀kìy zɛmə̀ dzwoŋi kə miə anə ipfə, mə ki zû a Galìlî isəə azoŋə̀ ghà.”

29Pità ə ŋwò dzày fyi kə nə̀, “Abu aghê àdzə̀mə̀ twe maʼà nəniy wô, mə kî twe màʼà kòʼ wày wô!”

30Yesù ə dzày yə̀ â Pità a we nə, “Mə ndzəmə̀ dzìy bə̀ ŋwò â wò nə̀, â mwaʼ kiy ani tuŋ sòŋə imbè nə̀ zwù k-u-tsuk kiy, à ki də nə̀ wò mə dzày fyi sòŋə inti nə̀ wò kwu dzə̀ way miə.”

31Pità ə bə̀lì kə a we nə, “Bəə mə kwu kə ani pfə dzəŋi nə̀ wò, mə kî twe màʼà dzə̀ wày wô!”

Aghê àliy yə àdzə̀m ə dzày kə ì moʼo yiy.

Yesù gwùŋə̀ a Gèsemanì

(Matìyò 26.36-46; Lukâs 22.39-46)

32Yesù ə zù nə̀ tsə̀təndii tə we tiy a lòʼò kə ghu tyoŋə nə̀ à də̌ Gèsemanì. U dzày tsə a ghu nə, “Ghà doʼò tsə fəə mə zê a lòʼo kə̀ gwuŋə kiy.” 33Yesù ə zù dzəŋi nə̀ Pità, we nə̀ Dzɛ̂m, nə̀ Dzwan. U kə mwe ŋwò, fòŋə fyimə sòʼò we. 34U dzày yə̀ a ghu nə, “Mə ŋge mwe ŋwò anə fôŋ, də̀ sòʼò te mə ni pfə. Dòʼo tsə nənìy fəə, ghà ki lia yəə loʼo tiy.”

35U dzə̀ soŋ koŋə yə̀ isə, nyaʼa yə̀ ambvə̀d kaʼ yə̀ ani gwùŋì nə̀, abu dzəd mə̀ də ani dòʼò nə̀ ù kə kôʼ dzə̀ ə mfəm yə. 36U gwùŋì tsə nə̀, “A tà, təli wam! Wò də̀ ŋwô ani zə̀ŋi ayiə dzə̀m. Nîy ŋwòə ŋgoʼ yə awò mìə̀, anə ayiə yə wò liə nəniy, à wày dzə anə ayiə yə mə liə nəniy.”

37U dzwoŋi zù, zù kòʼ yə̀ tsə̀təndii tə we tə ìti tə bvənə nəniy. U dzày yə̀ â Pità a we nə, “A Simùn, ghà bvənə ŋwò yə̀? Ghàa mə̀ wày ani lyebi dòʼò tsə kə idoŋ anə ufwa iwùŋ ìmòʼ yə̀?” 38U dzày yə̀ a ghu nə, Ghà ki lia yəə asə yiy, gwùŋə̀ yə̀ nə̀ abu ghà bvə̂ nyi tswi tsə anə imwàmkòʼ, kəə ghà ə nə̀ zəŋə iyiə ìbɛbə yiy. Ghà liə ŋwô ani fàʼ ìyiə yə i də nəniy tsitsi, àkwuni də̀ kə nə̀ iwè nəli yiy lay ŋwò.

39U ŋwò fəli yə̀ sòʼò, nam zù gwùŋì kə ìyiə ìmoʼo yiy. 40U kàm dzwoŋi fwuli bə̀ bù nə̀ tsə̀təndii tə we tiy bvənə ŋwò, aŋwòə mbwuni tiy kə ŋge də̀ anə asə ə ghu. Ghu kàm kwu way iyiə ìdziiy yiy â we.

41Abù ù zù bù nəniy ani zəŋi yə̀ nsòŋə inti, u bəb yə̀ a ghu nə, “Ghà namə zwà kə ŋwò bvunə sòʼò ə̀? Mbwuni tiy mə kpe nyiə, kòʼò nənìy, ghu nyiə̀ fyìè fyiə Wà Wù â àghè àbɛbə yiy. 42Ghà ŋwô kə idoŋ ŋgà ŋwô. Kòʼo wù wə̀ ù fè fyi nəniy miə, ù nyìə̀ bè ŋwò.”

Ghu fè fyi Yesù

(Matìyò 26.47-56; Lukâs 22.47-53; Dzwan 18.3-12)

43Abù Yesù namə dzəŋə̀, Dzudàs wə̀ ù kə də soʼo tsə̀ndii anə tsə̀təndii tə Yesù tə̀ ìvəm nə̀ ghe tiy ibè, u zù bù nə̀ ŋwàâ kə ghù kìy ghu kwu nəniy mbàŋ tìy nə̀ kwab tə tsam tiy. À kə ghu twum bə̀ ŋgəd tə aghè àlwaʼa tiy, nə̀ ŋgəd tə inaʼ tiy, nə̀ àghè àtyi dee ulàŋ wìy. 44Wù wə̀ ù kə fê Yesù ù kə dè na tsə tsə̀e yə ù kì bè dè nəniy Yesù ate â ghu. U kə dzày na nə̀, wù wə̀ mə kî myaŋə kyilə yə̂ nəniy we, à də̌ wù wə̀ ghà kî kwi, ghà ŋwoə̀ nə̀ we nə̀ ghà kyiŋə̀ yə̀ ŋwò.

45Abù Dzudà dyaŋi bû nəniy, u zù dyaŋi a kə̀lə̀ Yesù zù dzày tsə nə̀, “A àtyi dè, myaŋi kəli bə̀ miə” 46Aghee ghà yə̌ dyaŋi bù kwi taw tsə Yesù ŋwò nə̀ we. 47Wù ùmòʼ anə ghù yə̀ ghu ke tiy nəniy awote dyaŋi sòŋ kə kwab, tswa màʼà bə̀ tswuŋi kə wè kə̀fàʼ ə̀ wù ùlwaʼà ùnè wìy. 48Yesù ə bəb yə̀ â ŋwàâ kə aghu nə, “À fyi kìə̀ ghà sî zù bùu nə̀ mbàŋ tìy nə̀ kwab tiy ə? Mə də wù ù tsoŋə̀ wìy ə̀? 49Mə kə zəŋə mali tə yiə nə̀ ghà ntsuk ə indzə̀m, tyi dè àyiə â ghù a ndàw Kə̀zə̀, ghǎ kə̀ kwi nəway miə. I də kə nə̀ ayiə yə a twâ dòʼò anə ŋwàʼà k-a-zə̀ a kwu ni bù fyi ghi.”

50Tsə̀təndii tə we tə̀dzə̀m ə tu nasə tsə we.

51Wà fə̀ghàŋ ùŋəmə̀ ùlìy wìy ù kə dzəŋì kəli lyiə fə ndzwu fiy dzwùmì bə̀ Yesù. Abù ghu dziy kwi we, 52u tu yə̀ nə̀ ùwe ùzwum wiy, nasə yə̀ ndzwu tə we ibàb.

Ghu zù nə̀ Yesù a ndàw isaʼà yìy

(Matìyò 26.57-68; Lukâs 22.54-55,63-71; Dzwan 18.13-14,19-24)

53Ghu nìy zù nə̀ Yesù a ndàw wù ù lwaʼà ùnè wìy, a lòʼo kə ŋgəd tə aghè àlwaʼa yiy nə̀ ŋgəd tə inaʼ tiy, nə̀ àghè tyi dee ulàŋ wìy kə zoŋə̀ doʼò ate. 54Pità ə dzwùmə̀ bə̀ we nàdiikiy, bù nyi kwoʼ yə̀ anə ntòʼ ə̀ wù ùlwaʼà ùnè wìy, u dòʼò dzəŋi yə̀ nə̀ àghè kyiŋə, zwa we nə̀ ùvələ wiy. 55Ŋgəd tə aghè àlwaʼa tiy nə̀ dzəŋə kə ghù kə̀ ghu kə tyoŋə nə̀ à də̌ Sànhedìn ghu khu ìyiə yə ghu də ani guw na yə̀ azoŋə̀ Yesù tə̀ ghu wiy maʼà we. Ghu kaw kè tsə. 56Ndə̀mə̀ àghě bè tyimə dzìy àyiə à guw yiy azoŋə̀ Yesù. Dzə̂ tə ghu tiy dzəŋə byemə fwumə way.

57Aghê àliy yiy ŋwò təmi kə dzày tsə ayiə à guw yiy azoŋə̀ Yesù nə̀, 58“Ghè kə zuw we ù dzìy nəniy nə̀, mə kî byìlə̀ myàʼà tsə ndàw Kə̀zə̀ yə̀ aghê byiə na, mə byiə dzwoŋi kə ì ŋwò yìy anə mə ntsuk inti. Nə̀ à kə̀ byiə dzə̂ aghû yìy.” 59Ghu kə bòʼ wày dyaŋi ani zəŋi nə̀ ayiə ghu à dziiy yiy si byemə dzəŋə.

60Wù ùlwaʼà wìy ə təmi kə anə səkə ghu àdzə̀m, bəb yə̀ â Yesù nə̀, “Wò byìlə̀ wày ayiə yə ghu dzîy nəniy ə̀? Ayiə yə aghê dzîy anə tuw kiə̀, à də̀ ayiə àsòŋə̀ yìy ə?”

61Yesù ə də̀ kə moŋ kə̀ bəlì nəway. Wù ùlwaʼà ùnè wə̀ ə kàm bəb fəli yə̀ â we nə̀, “À də̀ wo ə Kə̀litò, Wà Kə̀zə̀ ghu nyiə̀ nəniy we nə̀ ŋkwiʼi miy ə̀?”

62Yesù ə bə̀li kə nə̀, “À də̌ miə. Ghà kî koʼò Wà Wù ù də̀ nəniy anə ukwe u Kəzə̀ ù nyiə wiy. Ù nì bè anə təmbàʼ t-a-byiwuŋ nə̀ daʼa kə̀soŋə̀ kìy.”

63Wù ùlwaʼà ùnè wə̀ ə saa màʼà tsə ndzwu tə we anə uwè, nə̀ fòŋ mə̂ we ŋə̂m, bəb tsə nə̀, “Ŋgà kamə̀ khu zələ tsəe kə kìə̀? 64Ghà zuw yəə ù nyàʼà nəniy Zə̀kìy, ghà nyiə̀ səa nə̀ìndiə ə? Ghu dzəŋi saʼ wiy yə̀ we, dzìy nə̀ ù kpe ŋwô ani pfə.”

65Aghê àliy yiy kaʼ yə̀ ani tsə ntyiə azoŋə̀ we. Ghu bwàm na tsə asə ə we tswàbə̀ nyiə yə̀ we, bəbə yə̀ awe nə, “Dzǎy bə wù wə̀ ù bwad nəniy wô?” Aghê à kyiŋə yə nìy kə we tsə̀ŋ kwu kə ani bwad we.

Pità ə twe màʼà Yesù

(Matìyò 26.69-75; Lukâs 22.56-62; Dzwan 18.15-18,25-27)

66Abù Pità də nəniy anə kəbe, wà ùyəŋi ù lìy wìy ù kə faʼà nəniy nə̀ Wù ùlwaʼà ùnè wə̀, u bù awote. 67Abù ù kòʼ yə̂ Pità zwa uvələ wiy, u tòʼ fwə̀d dzwàb tsə we, dzày yə̀ a we nə̀, “Wò kə də sòʼo nə̀ Yesù wù Nazalèt wə̀.”

68Pità ə twe, dzìy nə̀, “Mə kwu dzə̀ way ayiə yə wò dzìy nəniy, zuw kyilə sòʼò wày.” U ŋwò yə̀ zù təmi dòʼò yə̀ anə ufə̀b u mbà, mwaʼ kiy dyaŋi tuŋ tsə.

69Abù wà ùyəŋì kə̀fàʼ wə̀ bàŋ kòʼ yə̂ nəniy we u dzày fəli yə̀ â àghù yə̀ ghu kə də nəniy awò ghu nə̀, “Wù wə̀ kə də̀ sòʼò nə̀ Yesù.” 70Pità ə nam twe fəli tsə. Ghab kiy kə̀ kâm fyi, aghû yə̀ ghu tsîy kyabə nəniy awote, ghu dzìy â Pità a we nə, “Wò ndzə̀m də̀ ŋwoə wè ghu aŋwòə wò də̌ wè Galìlî.”

71Pità ə kaʼ kə ani kyày ayiə, tswàmə̀ dyaŋə yə̀ uwe u we ate dzìy yə̀ a ghu nə, “Mə kwu way wù wə̀ ghà baa dzîy nəniy ayiə yiy fəə.”

72Mwaʼ kiy dyaŋi tuŋ kwùnì tsə. Pità ə tàmìŋì tsə ayiə yə Yesù kə dzây a we nə, “Â mwaʼkiy ani tuŋ sòŋə imbè, à ki də nə̀ wò mə̀ mìə̀ twe màʼà sòŋə inti.” U bvə̀ bə̀ a mbvə̀d, kaʼ kə ani kyemi dìy.

Currently Selected:

Mâk 14: isu

Highlight

Copy