Mâk 16

Izɛmə̀ dzwoŋi i Yesù

(Matìyò 28.1-8; Lukâs 24.1-12; Dzwan 20.1-10)

1Abù utsuk ù zwaa wiy tsîy tsə nəniy, Mə̀li wə ù kə ŋwô bə̂ nəniy a Magdalà, nə̀ Mə̀li zə̂ Dzɛ̂m, nə̀ Sàlumè, ghu zwe kə ufyiə ùlymə wiy ani zù kyili anə ivə̀n i Yesù. 2A ntsuk fə səsə fiy anə ivən, ghu bəd ŋwò zù anə isày i Yesù nə̀ ìnyi yiy nyiə̀ fyiə kwoʼo bə̀ ŋwò. 3Abù Iyəŋi yə̀ zè nəniy anə dzəd, ghu bəbə anə iwè ighu nə̀, “À kì sì byiŋə ŋwò tsə ndìə̀ itay yə anə idzwə isày ə?” 4Abù ghu kâm fwə̀d yə̂ nəniy, ghu kòʼ yə̀ nə̀ ghu mə byiŋi ŋwò faŋkwoʼ kə itay kə ghà kə̀. 5Abù ghu tsîy nyi kwoʼ yə̂ awo anə isày, ghu kòʼ Wà fə̀ghàŋ, ù də nəniy anə ukwe ùnyiə wiy, nə̀ sàŋ ì fəmə̀ yìy anə uwè. Ghu tàtsəŋ.

6Wà fə̀ghàŋ wə̀ mee a ghu nə, “Ghà kə tsəŋ dzə̀, mə kwu ŋwô nə̀ ghà khu bə̀ Yesù wè ìnaʼ i Nazalèt wə̀ ghu kə baa nəniy anə kàʼ fə təzəd. Ù kàm wày dzə fəə ù mə zɛ̀mə̀ ŋwò dzwoŋi! Kòʼo yə̀ nənìy, à kìy də̀ loʼo kə ghu kə nəŋì na nyi yə we ate. 7Zù nənìy, ghà zû dzây yə̂ awò tsə̀təndii tə we tiy.” Ba dzay yə̀ â Pità, a ghu nə, “Yesù mə ŋwò yə̀ isə, ù zè anə inaʼ i Galìlî. Ghà kî kòʼò kə we awote, anə yiə yə ù kə tɛb na â ghà.”

8Iyəŋi yə ŋwò fyi yə̀ anə isày yə̀ nə̀ ghu nyəŋə ŋwò, ghu tsəŋə təŋə nə̀ fôŋ tìy mə ghu fyi. Ghu ə kə̀ dzây ìyiə ìliy yiy â wù lìy wìy aŋwòə ghu kə ndzə̀mə̀ ŋge tsəŋə sòʼo ŋwò.

Ùŋwàʼà ù wiy ùliy wiy kûm na ntùm ì dzòŋə̀ yə̀ Mâk kə twâ

(Mâk 16.9-20; Matìyò 28.9,10; Dzwan 20.11-18)

9Abù Yesù zɛmə̀ dzwoŋi bə̂ anə ipfə nə̀ bələ̀bə̀lə̀ tìy a ntsuk fə səsə fiy anə ivən, u zù dè yə̀ uwe isə â Mə̀li wə u kə ŋwô bə̂ anə inaʼ i Magdalà, Yesù kə dzwûm fyi nəniy nsìy mə̀bɛbə̀ mìy ìnsèmbe azoŋə̀ we. 10Mə̀li zù dzày yə̀ awò àghù yə̀ ghu kə də tsə nəniy nə̀ Yesù. A də̌ nə̀ ghu namə mwe ŋwò, dìy sòʼò. 11Abù ghu zuw tsə nə̀ Yesù də̌ ùtaw wìy nə̀ Mə̀li mə̂ we kôʼ, ghu kə̀ ndwâm bɛmə nəway.

Yesù ə dè uwe â tsə̀təndii ibè

(Lukâs 24.13-35)

12Yesù ə kàm dè sòʼò uwe anə dzə̀d ìlìy yìy â tsə̀təndii tə we tə̀liy tiy ìbè, nə̀ ghu ŋwô fyiə yə̀ anə inaʼ. 13Ghu ŋwò dzwoŋi bə̀ bù dzày bə̀ â àghè liy yə. Ghu ə kə̀ nam bɛmə dzə̂ soʼò.

Yesù ə dè uwe â tsə̀təndi tə we ivəm nə̀ ìghe yiy mòʼ

(Matìyò 28.16-20; Lukâs 24.36-49; Dzwan 20.19-23; Kə̀fàʼ 1.6-8)

14Yesù ə kàm bù dè uwe â tsə̀təndii tə we ìvəm nə̀ tsə̀ndii imòʼ nə̀ ghu nyiə ŋwò. U kwà ghu aŋwòə ghu kə kwu way ibɛmə yiy nə̀ yiə yə ghu kə twe myaʼà təŋə dzə̂ tə aghù yə̀ ghu kə kôʼ nəniy we nə̀ ù mə zɛ̀mə̀ dzwoŋi ani pfə. 15U dzày yə̀ a ghu nə, “Ghà zû anə mbyi idzə̀m, ghà naʼà yə̂ ntwùm ìdzòŋə̀ yə̀ awò àghè àdzə̀m. 16Wù wə̀ ù bɛmə dzə̂ nəniy â mìə̀, nìy sòʼò mwi m-à-zə̀, Zə̀kìy ki bii fyi we. Wù wə̀ ù də kə̀ kwuni bɛmə, Zə̀kìy kî saʼa wiy ŋwòə we. 17Aghû yə̀ ghu bɛmə nəniy â mìə̀, ghu ki də ani zəŋi mali tə yiə. Ghu ki dzwûm fyi nsìy mə̀bɛbə̀ mìy anə izəd yam, ghu dzəŋì soʼò dzə̀ŋì tə̀ fyiə tiy. 18Abu ghu kumi kə zwə tiy anə awo, moo ghu nyi kə nɛb, ì kì wày ani zəŋi dzə̀ ghu nə̀ ìyiə ìliy yiy. Ghu ki gaʼa yəə awo ghu yiy azoŋə̀ àghè àdzaŋə yiy, ghu si taw.”

Yesù ə ŋwò kwoʼ dzwoŋi idoŋ

(Lukâs 24.50-53; Kə̀fàʼ 1.9-11)

19Abù Mwe ə̀ Mbyi Yesù dzə̀ŋì mà tsə nə̀ ghu, Zə̀kìy ə zəŋi tsə u ŋwò kwoʼ kə idoŋ. U zù dòʼò tsə anə ukwe u Kəzə̀ ù nyiə wiy. 20Tsə̀təndii tə̀ ŋwò fyì zù nàʼà yə̀ ŋwo ntwùm ə̀ ìdzòŋə̀ yə̀ loʼo tədzə̀m. Mwe ə̀ Mbyi ə də̌ nə̀ ghu, u nyə̀ ghu nə̀ daʼa kiy nə̀ ghu fâʼ mali tə yiə ani dè tsə nə̀ ntwùm ə̀ ghu kə də ìsòŋə̀ yìy.

Dzə̀d ìlìy yiy ŋwàʼà kə Mâk kiy mây nəniy ate#16.21 Ùŋwàʼà ùwiy ù liy wiy kwu ŋwô kə̂m kə 9–20

(16.9-10)

21Iyəŋə yə̀ zù akə̀lə̀ Pità nə̀ àfələ we yiy, zù dzày ayiə yə àdzə̀m ghu kə dzây â ghu 22Abù ayiə yə̀ fyi tsîy dzə̂, Yesù nə̀ uwee u we wiy twum fyi yə̀ tsə̀təndii tə we anə mbyi idzə̀m nə̀ ghu naʼa yə̂ ntwùm ìdzòŋə̀ yìy. Ntwùm ìdzòŋə̀ yə̀ zwe ŋwò, kwunə sòʼò wày. À də̌ ntwùm ə̀ ìdzòŋì kwùmə̀ yə̀ nə̀ ìmùə̀ yə̀ i doʼò təŋ nəniy.

Currently Selected:

Mâk 16: isu

Highlight

Copy