Lukâs 7
7
Yesù ə zəŋi taw kə wè kə̀fàʼ ə̀ dòŋ kə Təsǔgôʼ
(Matìyò 8.5-13; Dzwan 4.43-54)
1Abù Yesù tyi dê mà tsə nəniy ayiə yiy awò àghě ghà yə̀, u ŋwò zù a Kàpanùm. 2Dòŋ kə təsǔgôʼ kìy kə də̀ awote anə inaʼ, u kwu wè kə̀fàʼ ə̀ we ù ŋge liə nəniy we. Wè kə̀fàʼ wə̀ ə dzaŋə̀, a də̌ nə̀ ù mə dòʼò mà bə̀ ani pfə. 3Abù dòŋ kə təsǔgôʼ kə̀ zuw tsə ayiə yə aghê kə dzîy, kwùmə̀ yə̀ nə̀ Yesù, u twum tsə ŋgəd tə ghě Dzû tə̀liy tiy nə̀ ghu zû dzây yə̂ nə̀ Yesù bù zəŋi tsə wè kə̀fàʼ ə̀ we taw kə. 4Ŋgəd tə ghà tə̀ ə zù akə̀lə̀ Yesù, ŋge bwoʼ we nə̀ wokiy nə̀ ù lyebi fày kə ghu. Ghu dzày tsə nə̀ i mə̀ ndzə̀mə̀ dzwàbə̀ ŋwò nə̀ wò fây we. 5Aŋwòə dòŋ kə təsǔgôʼ kə̀ ndzə̀m liə ŋwô ìnaʼ ghələ yiy, ù mə byiə nyə̀ ghə̀d nə̀ ndàw dzəŋə kə ghě Dzû.
6Yesù ə ŋwò dzəŋi yə̀ nə̀ ghu. Abù yəə ù nìà myâ yə̂ nəniy awote a ndaw, dòŋ kə təsǔgôʼ kə̀ ə kàm twum yə̀ àfələ we nə̀ ghu zû dzây yə̂ â Yesù a we nə, “A Mwe mə də ndiə yəə wò nə bû a ndaw yam, mə liə kə nə̀ wò mâŋ dzây tsə iyiə tə̀ wè kə̀fàʼ wam wə̀ taw kə 7à yù də̀ ighe mə də kə̀ bû a kə̀lə̀ wò. Mə liə kə nə̀ wò mâŋ dzây tsə iyiə tə̀ wè kə̀fàʼ wam wə̀ taw kə. 8Mə kwu aghê nê mə faʼà a təŋə̀ ghu, mə kwu soʼo nəniy sǔgôʼ tìy ghu faʼà nəniy a təŋə̀ mìə̀, mə kwu nəniy daʼa kiy ani dzày yə̀ â umòʼ a we nə, ‘Ŋwòə!’ Ù kî ŋwò yə̀, mə də ani dzày yə̀ sòʼò â ù lìy a we nə, ‘Bù!’ U bù sòʼo. Mə də ani dzày tsə â wù kə̀fàʼ wam a we nə, ‘Zəŋi yə ghii!’ U zəŋi yə̀ sòʼò.”
9Abù Yesù zuw tsə ayiə yə ghii, idzwə yiy ŋge zwum yə̀ we ate. U kyèmì tsìy yə̀, dzày yə̀ awò ŋwàâ kə ghù kə̀ kə kə dzwumə̀ bə̂ nəniy we a ghu nə, “Mə ndzəmə̀ dzìy bə̀ ŋwò â ghà, Mə kamə kə̀ kôʼ kôʼ dzəə wù lìy wìy fəə anə aghě inaʼ i Islàel ù kwu nəniy dzòʼò ìbɛmə yə wù wə̀ kwu nəniy!”
10Abù afələ dòŋ kə təsǔgôʼ yə̀ dzwoŋi zû nəniy a ndaw, ghu zù kòʼ yə̀ nə̀ wè kə̀fàʼ ə̀ dòŋ kə təsǔgôʼ wə̀ mə taw.
Yesù ə zɛ̀mə̀ ŋwò bə̀ wà yəŋə̀ mpfənsə ùŋə̀mə̀ anə ipfə
11Ghab kiy kə̀ kâm fyi,#7.11 Uŋwàʼà ù liwiy dzîy nə̀ (Abù tsutsu wə̀). Yesù ə ŋwò zù anə inaʼ ìliy yiy ghu tyoŋə nə̀ à də̌ Nên, tsə̀təndii tə we, nə̀ ŋwàâ kə ghù kìy ə zù nə̀ we. 12Abù ù kwùmə̀ myà yə̂ anə ufə̀b u bà ìnaʼ i ghà yə̀, ghu kòʼ aghê byoʼò fyiə bə̂ nəniy ivən i wà ùlìy wìy, zə̂ kə bvami kwu kə nəniy we, nə̀ zə̂ bòʼ də̀ sòʼo yəŋə̀ mpfənsə. Ndə̀mə̀ àghè inaʼ i ghà yə̀ ə də̀ dzəŋi nə̀ we. 13Abù Mwe ə̀ Mbyi kôʼ yə̂ nəniy wìyəŋi wə, u kwoʼ nə̀ mwuli kiy azoŋə̀ we. U dzày yə̀ a we nə, “Kə̀ dîy sòʼò.” 14Yesù ə tsìy zù mwàm tsə tata kə ghè kə̀, aghû yə̀ ghu kə boʼò kəli nəniy tata kə ghè kə̀ ə təmi tsə. Yesù ə dzày tsə nə̀, “A wà fə̀ghàŋ, Mə dzîy nə̀ wò zɛmə̀ kə!” 15Wà ù pfə̂ wə̀ ə ŋwò dòʼò kə idoŋ, kaʼ yə̀ ani dzə̀ŋì. Yesù ə dyaŋi nìy nyə̀ dzwoŋi yə̀ we awò Zə̂ we.
16Itsəŋi ə kwi yə̀ aghê àdzə̀m, ghu kali Kəzə̀ ghu dzìy nə̀, “Wè ntwùm ə̀ Kə̀zə̀ ù sòŋə̀ wìy də fə nə̀ ŋgàŋ! Zə̀kìy mə bù ani fày fyi aghee we.”
17Izəd i Yesù yìy ə foŋ tsìy yə̀ mbwòʼ ə̀ Dzùdiyà ìdzə̀m, nə̀ loʼo tə̀ liy tə tə doʼò nìày tsə nəniy.
Dzwan wə ù kə nyiə̀ nəniy mwi m-à-zə̀ mìy
(Matìyò 11.1-19)
18Tsə̀təndii tə Dzwan tiy dzày yə̀ àyiə Yesù àdzə̀m â Dzwan, u twoŋə tsə tsə̀təndii tə we ì bè, 19twum zù ghu akə̀lə̀ Mwe ə̀ Mbyi dzìy nə̀ ghu zû bəb yə̂ a we nə, “À də̀ wô wù wə̀ Dzwan kə dzây zìì na nəniy nə̀ ù bè ŋwò, moo ghè kwu ani nam ləmə wù ù ŋwò wìy ə?”
20Abù ghu bû nəniy a kə̀lə̀ Yesù, ghu dzày yə̀ a we nə Dzwan wə ù nyə̀ nəniy mwi m-à-zə̀ mìy, ù twum bə̀ ghə̀d nə̀ ghè bəb kôʼ tsə nə̀ wò də̌ wù wə̀ Zə̀kìy kə dzîy nə̀ ghe twumə bə̀ ŋwò, moo ghè kwu ani ləmə tsə wù ù ŋwò wìy ə?
21Anə soŋə fə ghà fə̀ Yesù kə zəŋi taw kə ndə̀mə̀ àghè ghu kə dzaŋə̀ nəniy le tə tədzàŋ tə̀ bɛbə tiy nə̀ àghù yə̀ nsìy mə̀bɛbə̀ mìy kə də anə iwè ighu. U zəŋi sòʼò ndə̀mə̀ àghù yə̀ ghu kə fɛ̂b doʼò nəniy ghu kaʼ ani kòʼ tə̀ loʼo. 22U bə̀lì yə̀ tsə̀təndii tə Dzwan tə a ghu nə, “Ghà dzwoŋi zû dzây yə̂ àyiə yə ghà kôʼ nəniy, nə̀ à yu ghà zuw nəniy â Dzwan. Aghê à fɛbə nyiə̀ kòʼò tə̀ loʼo, aghû yə̀ ghu zəmə̀ bwîy ghu nyiə̀ bwìy dzwàbə̀ ŋwò, aghee ùŋkə̀m wìy mə taw dòʼò bə̀, à yuu ghu kə kwôʼ doʼò nəniy, ghu nyiə̀ zuw ŋwò, à yuu ghu kə pfə doʼò nəniy, ghu mə zɛ̀mə̀ dzwoŋi bə̀. Aghê à la yiy mə kəli ntwùm ì dzòŋə̀ yìy yəə ghu niʼà yə̂ awò ghu. 23Zə̀kìy dyoʼo nə̀ wù wə̀ ù də byemə kə dzə̀ wày miə kàmə̀ twe tsə anə nsoŋə mə̀ lìy mìy.”
24Abù tsə̀təndii tə Dzwan tiy ŋwô yə̂ nəniy, Yesù ə kaʼ ani dzày àyiə Dzwan awò ŋwàâ kə ghù kə̀ a ghu nə, “Ghà kə zù akə̀lə̀ Dzwan a mbvə̀n ə̀ kə̀sisi, ghà kə mòʼò nə̀ gha kî kòʼò kìə̀ awote? Ghà kə zù ani zù kòʼ ghè kə̀dabə kiy ŋgwùŋì kìy təŋə tsə̂ ə̀? 25Ghà kə zù ani zù kòʼ kìə̀? Ghà kə zè ani zù kòʼ wù lìy wìy ù dzə̀ŋì kəli nəniy ndzwu tə̀ dzoŋə̀ tìy ə̀? Aghû yə̀ ghu dzəŋə̀ nəniy ndzwu tə ivən ì taw yiy, ghu zuw tsə̂ kədzôŋ, mùə̀ sòʼò anə ntoʼ! 26Ghà dzây bə̂ â mìə̀, ghà kə ŋwò fyi zù ani zù kòʼ kìə̀? Ghà kə kòʼ wè ntwùm ə̀ Kə̀zə̀ ə̀? Ndzə̀m ndzə̀m, a kə tsəb də̌ wè ntwùm ə̀ Kə̀zə̀! Mə ndzəmə̀ dzìy bə̀ ŋwò â ghà nə̀ ù maa tsìy fyi wè ntwùm ə̀ Kə̀zə̀. 27Dzwan də wù wə̀ ŋwàʼà k-a-zə̀kìy kə myiŋə̀ nəniy anə lòʼo kə kə dzîy nəniy nə̀, ‘Zəkìy kə dzày tsə nə̀, mə kî twumə bə̀ wè ntwum wam anə sə kiə̀ tə̀ ù kì byay na tsə dzəd yiə̀.’ 28Yesù ə dzày kwe fəli tsə nə̀, mə dzîy bə̂ â ghà nə̀, anə ghù yə̀ ghu byi kôʼ dzə̂ nəniy fə an-a-mbvə̀dintsə, wù lìy wìy wày dzə ù tsìy fyi nəniy Dzwan. Yəə i bôʼ də kə ghi, wù wə̀ ù tɛb tsîy fyi nəniy a lòʼo kə Zə̀kìy saʼa nəniy ate, u mə tsìy fyi Dzwan.”
29Aghê àdzə̀m maa zuw ayiə yə Dzwan kə dzây nəniy. Aghê à khii ŋwàʼà kə̀tsuwkiy ə kaʼ yə̀ ani zuw awò Zə̀kìy, zəŋi sòʼò ìyiə yə i kə də nəniy tsitsi, aŋwòə Dzwan kə nyə̀ ghu nə̀ mwi m-à-zə̀ mìy. 30Aghee Falàsî nə̀ ghè tyi dee ulàŋ wìy kə kwuni twe ani nìy mwi m-à-zə̀ awò Dzwan.
31Yesù ə nam dzày fəli tsə nə̀, “Mə də ani tyi tsə nə̀ aghû yə̀ nyiə nə̀ ŋə̀mə̀ tə̀ də̌ mə̀yə? Ghu də yəə à də̌ kìə̀? 32Ghu də yəə à də̀ anîsə̂, ghu də nəniy anə bekivən màŋə̀ bvoʼə tsə̀ mə̀mbòŋ dzìy yə̀ â àwizə̂ à liy yə a ghu nə, ‘Ghè kə toŋə tə̀mbwələ, ghǎ kə̀ bən nəway, ghě zɛm ndzàŋə tə ipfə, ghǎ kə̀ dîy nəway!’ 33Dzwan wə ù nyə̀ nəniy mwi m-à-zə̀ mìy kə bù ŋwò, u də bày nyiə way, muə sòʼò way nlwù mìy, ghǎ kaʼ ani dzày nə̀, ‘Ù kwu usîy ùbɛbə wiy anə uwè.’ 34Wà Wù kwuni bû nəniy nyiə, mwuə sòʼò mə̀nlwù. Ghǎ kaʼ ani dzày nə̀, ‘Ù ŋge nyiə ŋwò də sòʼò wù ù kê wìy, ù də sòʼò ufwu nə̀ àghè à khii ŋwàʼà kə̀ tsuw kiy, nə̀ àghè àbɛbə yiy soʼo.’ 35Iyiə yə i də nəniy i ghe yiy, wù wə̀ Zə̀kìy nyiə̀ nəniy we nə̀ ùtwab wiy, ù kì kòʼò kyilə tsə ŋwò nə̀ àyiə yə Dzwan kə zəŋi nə̀ à yuu mə zəŋə a də tsitsi.”
Yesù ə nìyzə̀ bɛb tə wìyəŋi ù lìy
36Wè Falàsî ù lìy wìy ə dzày yə̀ nə̀ Yesù bù nyi dzəŋi nə̀ we. Yesù ə zù sòʼò a ndàw wù wə̀ zù dòʼò tswi tsə ani nyi 37Wìyəŋi ù lìy wìy kə də̀ awote anə inaʼ nə̀ ù mùə̀ imuə̀ ìbɛbə yiy. Abù ù zuw tsə nə̀ Yesù nyiə a ndàw wè Falàsî, u zù zwe bə̀ sòʼò mbvu mə̀lyimə̀ mìy, 38bù təmi dòʼò bə̀ adzəmə̀ Yesù, dìy a təŋə ifwe i Yesù. U dìy, nsə mə̀ we miy tsɛmə tswi tsə anə awèe Yesù. U zə̀d màʼà tsə nsə mə nə̀ ŋwù t-a-tuw tə we tiy. Wìyəŋi wə zə̀lə̀ tsə̂ awee Yesù, u swe kə nə̀ u ghî nyə̀ we nə̀ ŋkwiʼi miy, dyaŋi kyili yə̀ mbvu mə anə awee Yesù. 39Abù wè Falàsî wə̀ kòʼ tsə ghi u dzày tsə anə foŋ ə̀ we nə̀, “Abu wù wə̀ mə̀ ndzə̀m də̀ wè ntwùm ə̀ Kə̀zə̀, ù mə̀ dzǐy kyilə ŋwò ə ndzòʼò wìyəŋi wə ù zə̀lə̀ nəniy we! Ù mə̀ kwu ani kəli ndzòʼò ìmùə̀ ìbɛbə yə wìyəŋi wə̀ muə nəniy.”
40Yesù ə dzày yə̀ â wè ə̀ Falàsî wə̀ a we nə, “A Simùn, Mə kwu iyiə ani dzày awò wò.” Simùn ə bə̀lì kə nə̀, “A àtyi dè, à də̌ kìə̀?”
41Yesù ə dzày yə̀ a we nə̀, “Aghê à bè kə kwu wù lìy nə̀ ndàŋ kìy, ù kə fwî nyə̀ nəniy ghu nə̀ ùkhiy wiy. 42Wù lìy wìy kə kwu wù wə̀ nə̀ kaam tiy mə̀vəm intà, wù lìy wə̀ ə kwu we nə̀ kaam tiy ità. Abù ghu dzəŋə dəmə̀ kè nəniy ani tsə dzwoŋi we, wù wə̀ ù kə fwî nyə̀ nəniy ghu nə̀ ùkhiy wə, u dzày yə̀ a ghu nə̀ ghu kə kâm tsə dzə̀ fyiə kə̀ likiy. À də̌ wù ù ghâ wìy anə uzə u ghù yə̀ ù kì ŋge liə nəniy wù wə̀ ù kə fwîy nyiə̀ nəniy ghu nə̀ ukhiy wiy ə?”
43Simùn ə bə̀lì kə nə̀, “Mə kwu nə̀ à kì də̌ wù wə̀ ù kə kwu nəniy ndàŋ kə̀ nê kə̀.”
Yesù ə dzày yə̀ a we nə, “Wù mə dzày dzwàb.” 44Yesù ə dyaŋi kyèmì tsìy yə̀ a kə̀lə̀ wìyəŋi wə, dzày yə̀ â Simùn a we nə, “Wò mə kòʼo wìyəŋi wə ə̀? Mə bû a ndaw yə̂ wò də kə̀ nyiə̀ nəway miə nə̀ mwi â mìə̀ ani sùw màʼà ìfwe yam ate, Wìyəŋi wə̀ kwuni sûw màʼà tsə ifwe yam yiy anə nsə mə̀ we, zə̀d màʼà tsə anə ŋwù t-a-tuw tə we. 45Wò mə̀ kə̀ bôʼ nyəŋ myaŋi kəli miə anə yiə yə Mə mə̀ bû nəniy, wìyəŋi wə̀ fə̀ kwiʼi kə miə, tsə̀ŋə̀ zə̀lə̀ kə ifwe yam anə yiə yə Mə mə̀ nyi kwoʼ bə̂ fə a ndaw. 46Wò mə̀ kə̀ bôʼ kyili mbvu miy anə tuw kam, ù mə kwuni bù kyili mbvu mə̀ lyimə̀ mìy anə awù yam. 47Mə dzîy bə̀ â wò nə̀, iliə ìsoŋə̀ yə̀ wìyəŋi wə̀ dè nəniy à ghî də̀ anə yiə yə mə nîyzə̀ dzə̂ ayiə we àbɛbə yiy. Wù wə̀ ghu kwuni nîyzə̀ nəniy nyàŋə fə bɛb tə we tiy, ù kwu kə nyàŋə fə iliə soʼo.” 48Yesù ə dyaŋi dzày yə̀ â wìyəŋi wə we nə, “Mə mə nìyzə̀ bɛb tiə̀ tìy.”
49Aghê à lìy yə, ghu kə bwîy bû awo a ndaw, ghu kaʼ kə ani dzày anə iwè ighu nə̀, “À yù də̌ ndiə ù nìyzə̀ dyaŋə soʼò bɛb tə ghù tìy ə?”
50Yesù ə dzày yə̀ â wìyəŋi wə we nə̀, “Ibɛmə yiə̀ yìy mə wò bii fyi. Zù anə ibvay.”
Currently Selected:
Lukâs 7: isu
Highlight
Share
Copy
Want to have your highlights saved across all your devices? Sign up or sign in
© CABTAL 2023
