Lukâs 2

Ibyi i Yesù

(Matìyò 1.18-25)

1À kə də̀ sòʼò anə sòŋə fə ghè fə̀ Ùgustùs dòŋ kə Lûm kìy kə tsây fyi yə̂ lâŋ kìy nə̀ ghu taŋ tsîy yə̂ àghè àdzə̀m anə inaʼ i Lûm 2À kə yù də̀ soŋə fə səsə fiy awò ghu ani taŋ aghû anə soŋə fə, Kwìlinìyùs kə doʼò bə̂ nəniy tuw kə mbwòʼ ə̀ Silìyà kìy ate. 3Aghê àdzə̀m ə zè kə anə nàʼà tə̀ ghu kə fyi bə̂ nəniy ate ani zù twà àzəd ə ghu.

4Yùsə̂f ə ŋwò tsə sòʼò anə inaʼ i Nazalèt a mbwòʼ ə̀ Galìlî, zù anə inaʼ i Betlèhêm a mbwòʼ ə̀ Dzùdiyà, Devìd kə fyi nəniy ate, aŋwòə Yùsə̂f kə fyi anə tu kə Devìd. 5Ù kə zù awo ani zù twà na izəd i we, we nə̀ Mə̀li, ghu kə byay na nə̀ ù kì dyòʼò wìy we. A də̌ ghii nə̀ Mə̀li də nə̀ ùnìə̀ wìy. 6Anə ayiə yə ghu kə də nəniy awote, soŋə fiy kpe tsə awò Mə̀li ani byi. 7U byi bə̀ wà we ù səsə, ùŋəmə̀. U baŋ kə we anə ubə̀d u təndzwu nə̀ŋì na tsə we anə ukoŋ u tənyàm, aŋwòə loʼo kiy kə tsəb wày dzə awò ghu awote a ndàw yə aghê kə bwîy bê dyoʼò nəniy ate.

Tsə̀təndii tiy nàʼà yə̀ ìbyi i Yesù â àghè àbaʼa təndzwù yìy

8Nə̀ ntsukə tə ghè tə̀ aghê àbaʼa təndzwù yìy kə də sòʼò awo anə mbwòʼ ì ghè yə̀, ghu kə kyiŋə̀ nəniy ndzwù tə ghu tiy. 9Tsə̀ndì Mwe ə̀ Mbyi ə màŋ bù fyi kə kə a kə̀lə̀ ghu, imwây i Kəzə̀ ìsoŋə̀ yìy ə bù dzɛ̀mə̀ na tsìy mà kə ghu. Ghu ŋge tsəŋ. 10Tsə̀ndii yə dzày yə̀ a ghu nə, “Ghà kə tsəŋ dzə̀, mə bû nə̀ ntwùm ìdzòŋì awò ghà. Ntwùm ì ghè yə̀ kì nyə̀ dwiʼi kə̀ soŋə̀ kìy awò àghè àdzə̀m. 11Ghu mə byi wù wə̀ ù dziy bû bii fyi gha, ghu byi we zii, ù də Mwe ə̀ Mbyi Kə̀litò, anə inaʼ i Devìd. 12À yù də tsə̀e yə ghà kî kòʼò kyilə nəniy we ate, ghà kî kòʼò yə̀ wa ghu baŋ na nəniy anə ubə̀d u təndzwu, ù nə̀ŋì doʼò anə ukoŋ u tənyàm.”

13Ghab kiy kə̀ kâm fyi nəway, ndə̀mə̀ tsə̀təndii t-a-zə̀ tə̀liy tiy ə màŋ bù fyi kə a kə̀lə̀ tsə̀ndii ì Kə̀zə̀ yə̀. Ghu nyə̀ ukali awò Zə̀kìy dzìy tsə nə,

14“Ŋkwiʼi miy də awò Zə̀ kə̀ kə də a n-a-vələ!

Ibvay yiy də sòʼò azoŋə̀ aghù yə̀ ghu də nəniy fə an-a-mbvə̀dintsə ù dè nəniy ghu nə̀ fòŋə̀ ìdzòŋə̀ yìy.”

15Abù tsə̀təndii t-a-zə̀ tə̀ nyili maʼà tsə nəniy ghu, nyi kwoʼ yə̀ anə kəvələ, aghê àbaʼa təndzwù yə̀ə dzày tsə anə iwè i ghu nə̀, “A zû a Betlèhêm tə̀ a zû kôʼ ìyiə yə Mwe ə̀ Mbyi naʼà bə̂ nəniy awò ŋgàŋ nə̀ i fyi ŋwô awote.”

16Ghu zə̀àŋì bwìy yə̀, zù kòʼ tsə Mə̀li nə̀ Yùsə̂f nə̀ wa nə ù nə̀ŋì doʼò anə ukoŋ u tənyàm. 17Abù aghê àbaʼa tə̀ndzwù yə̀ zù kôʼ tsə nəniy we, ghu dzày yə̀ ayiə yə tsə̀ndii yə̀ kə dzây nəniy awò ghu kwùmə̀ yə̀ nə̀ wa nə. 18Aghê àdzə̀m ghu kə zuw nəniy ayiə yə aghê àbaʼa təndzwù yə dzîy nəniy, adzwə ə ŋge zwum ghu ate. 19Mə̀li tsə̀ŋ kwu kə ani myìŋì àyiə ghè yə̀, tsə̀ŋə̀ mòʼo kə ŋwò anə fôŋ. 20Aghê àbaʼa təndzwù yə ə dzwoŋi yə̀, nyə̀ yə̀ mə̀ŋkwiʼi nə̀ ùkali wiy â Zə̀kìy anə yiə yə àdzə̀m ghu kə zuw nəniy nə̀ à yu ghu zû kòʼ tsə soʼò ighəd anə yiə yə tsə̀ndii kə dzây nəniy awò ghu.

Ghu ə kwe tsə izəd i Yesù

21Abù ivən i kpe tsə nəniy, soŋə fiy kpe tsə awò ghu ani gwùmì wa nə, ghu kwe tsə izəd i we nə̀ à də̀ Yesù, twoŋə izəd yə tsə̀ndii kə dzây na nəniy awò ghu ani boŋ we.

Ghu zù dè yə̀ Yesù a ndàw Kə̀zə̀

22Abù soŋə fiy kpe tsə awò Yùsə̂f nə̀ Mə̀li ani zù sùw iwee ighu anə yiə yə lâŋ kə Musîs kìy kə dzîy nəniy, ghu ə nìy kwoʼ bə̀ we a Yèlusalèm ani zù dè we awò Mwe ə̀ mbyi, 23(Anə yiə yə i twâ doʼò anə làŋ kə Mwe ə̀ Mbyi nə̀, “Awa iŋə̀mə̀ a səsə àdzə̀m a kwu ani zù dè yə̀ ghu awò Mwe ə̀ Mbyi.”) 24Ghu kə zè sòʼò ani zù na lâŋ kə̀ kə də nəniy nə̀ abu ghu dziy bû sâ, ghu bù nə̀ ùbwubwumə wiy ùbè, abu ghu də kwu way, ghu bù kə nə̀ uŋwun wə ghu nyəli na, u fwunə ubwubwumə wiy.

25A sòŋə fə ghè fə̀, wù lìy kə muə anə inaʼ i Yèlusalèm, izəd i we yiy kə də nə̀ à də̀ Simìyòn. Ù kə də̌ wè tsitsi, tsəŋə sòʼò Kə̀zə̀. U mbvùŋə̀ lyimə sòʼò soŋə fə Zə̀kìy dziy bii fyi aghee Islàel ate. Zwàykə̀zwekiy kə də̌ azoŋə̀ we. 26Zwàykə̀zwekiy maa dzày na a we nə, ù kì pfə dzə̀ wày nə̀ ù kamə kə̀ kôʼ nəway wù wə̀ Mwe ə̀ mbyi sûw kyili naa an-a-dòŋ. 27Abù tè Yesù nə̀ zə̂ we ə nîy zû nəniy nə̀ Yesù a ndàw Kə̀zə̀ ani zù zəŋi ayiə yə lâŋ kə Musîs kìy kə dzîy nəniy nə̀ ghu kwu ani zəŋi nə̀ àwa asəsə yiy, Zwàykə̀zwekiy nìy nyi kwoʼ yə̀ nə̀ Simìyòn a ndàw Kə̀zə̀. 28Simìyòn ə bòʼò yə̀ wa nə anə awo, nyə̀ yə̀ ùkali â Zə̀kìy dzìy tsə nə̀,

29“A Mwe ə̀ Mbyi, i mə bù fyi anə yiə yə wò kə tɛb na nəniy,

Wò də̀ ani zəŋi tsə nyiə nə̀ wè ə̀ kə̀fàʼ yə̂ nyəli tsə mbyi anə ibvay.

30Mə mə kòʼ nə̀ ìsə yam yiy, ayiə yə wò fàʼ nəniy ani bii fyi aghû yə̂,

31Aghě mbyi yə àdzə̀m ki kòʼò sòʼò ŋwò ayiə yə wò byay na nəniy.

32U ki də kaʼì tìy awò àghù yə̀ ghu də wày aghee Dzû,

ù nî nìy bə̀ sòʼò mə̀ŋkwiʼi awò Islàel, aghû yiə̀.”

33Idzwə ə ŋge zwum tè wà nə̀ zə̂ wà anə ayiə yə Simìyòn kə dzây kwùmə̀ yə̀ nə̀ wa nə. 34Simìyòn ə dyaŋi lwì tsə ghu, dzày yə̀ awò Mə̀li, zə̂ wa nə, a we nə, “Kəli tsə nə̀ Zə̀kìy mə sày na wa nə, nə̀ ù nì zəŋə tsə aghè liy ghu bû doʼò aghè kə̀ŋkpə̂mkpə̀m, àliy ni bû doʼò à ghè soŋə̀ yìy anə inaʼ i Islàel. Ù nî dòʼò tsə sòʼò kə̀tsəe, kə ŋwô bə̂ nəniy â Zə̀kìy, ndə̀mə̀ àghù ni twe maʼà we, 35ani dè bə̀ àyiə yə aghê kwu nəniy anə mòʼ tə ghu. Wò nî fii yəə ghu nə̀ tsukə wô nə̀ kwàb ì twabə̀ yìy anə fôŋ.”

36A də̀ ghii nə̀ yəŋə̀ ntwùm ə̀ Kə̀zə̀ ù lìy wiy ghu kə tyoŋə we nə̀ à də̌ Anà. Ù kə də̌ wà Fanuèl, wè tu kə Ashà. Ù maa ŋge dzwə̀n sòʼò. Abù ù nìy yə̀ ŋəm, dòʼò tsə kə nə̀ ŋəm təŋəmə̀ ìsèmbe, 37ŋəm ə dyaŋi pfə. U dòʼò yə̀ yəŋə̀ mpfənsə. U kwoʼ kwùm tsə tə ŋəmə̀ mə̀vəm imfamə nə̀ ghe tiy kyàʼì nə̀ ù də̀ təŋ tsə̀ kə a ndàw Kə̀zə̀, fwùlə̀ Kə̀zə̀ nə̀ tsukə nə̀ ntsə̀ tìy, u gwùŋə̀, bamə sòʼò ìdzwə. 38Abù ghu bû nə̀ Yesù a ndàw Kə̀zə̀, u bù sòʼò anə soŋə fə ghè fə̀, bù nyə̀ tsə kəzòŋə̀ â Zə̀kìy. U dzày tsə sòʼò ayiə kwùmə̀ yə̀ nə̀ wa nə awò àghù yə̀ àdzə̀m ghu kə lyimə nəniy nə̀ Zə̀kìy bû kwûm fyi aghee Yèlusalèm.

Yùsə̂f nə̀ Mə̀li ə dzwoŋi zù a Nazalèt

39Abù Yùsə̂f nə̀ Mə̀li zəŋi mâ tsə ayiə yə àdzə̀m lâŋ kə Mwe ə̀ Mbyi kiy kə liə, ghu dzwoŋi zù anə inaʼ i Nazalèt a mbwòʼ ə̀ Galìlî. 40Wà ù ghè wə̀ ə nɛmə kə. Biy bə̀ anə Zwày k-a-zə̀. U tòʼò ŋge kwu utwab ù soŋə̀ wìy, Fòŋə̀ Kə̀zə̀ ìdzòŋə̀ yìy ə də̀ azoŋə̀ we.

Ghu nìy zù nə̀ Yesù a ndàw Kə̀zə̀

41Ŋəmə̀ tə̀dzə̀m, tè Yesù nə̀ zə̂ Yesù kə zè tsə̀ a Yèlusalèm ani zù nyi inyi i ŋkàmə̀tâzaʼà mìy.#2.41 Tsə̀ndii kə tàzaʼ yə̀ ùtuw təndàw u aghě Islàel anə inaʼ i Idzìp. 42Abù Yesù kwùm tsə ŋəmə̀ tìy ìvəm nə̀ ghe tiy ìbè, ghu nìy kə we, kwoʼ yə̀ nə̀ we a lòʼo kə inyi, anə byìə̀ kə ghu. 43Abù inyi yə̀ mày tsə̀ nəniy, tè Yesù nə̀ zə̂ Yesù ə ŋwò zù a ndaw, Yesù ə kwuni dòʼò səə tsə ibàm a Yèlusalèm. Tè we nə̀ zə̂ we ə kwuni kwu way nə̀ Yesù mə dòʼò səə awote. 44Ghu bwìy fə̀ ntsuk, mòʼò kə nə̀ Yesù də̀ dzəŋi nə̀ ghu anə uzə ughù. Ghu kaʼ tsə ani kaw tsə̀ we anə uzə u tɛ̀mə̀ tə ghu nə̀ àfwu yiy. 45Abù ghu də kə̀ kôʼ we, ghu dzwoŋi zù a Yèlusalèm ani zù kaw kòʼ we awote. 46Mə̀ntsukə inti nə̀ ghu khu kə we, ghu zù kòʼ yə̀ we a ndàw Kə̀zə̀, ù də dzəŋi nə̀ àghě Dzû à tyi dee. U zwələ àyiə yə ghu dzîy, bəbə ghu nə̀ àyiə yiy. 47Aghû yə̀ ghu kə zuw ayiə yə ù dzìy nəniy, adzwə ŋge zwum ghu anə ayiə yə ù zuw kyilə ghu ate nə̀ ìbə̀lì i we yiy. 48Abù tè we nə̀ zə̂ we kôʼ tsə nəniy we, adzwə ŋge zwum ghu. Zə̂ we dzày yə̀ a we nə, “A wa nam, à də̌ kìə̀ wò fàʼ a ghii nə̀ ghə̀d ə? Ghè fə̂ bwìy khu kyabə tsə̀ wò nə̀ fòŋ tə̀ byoŋə tiy, Miə nə̀ təli yə̂.”

49U bəb yə̀ a ghu nə̀, “Ghà miə khu kyabə tsə̀ iyîkìə̀, ghà kwu way nə̀ mə kwu ani dòʼò a ndàw təli wam ə̀?” 50Ghu kə̀ kwuni zuw kəli dzə̂ ayiə yə Yesù kə dzîy â ghu.

51U dyaŋi ŋwò tswi yə̀ a Nazalèt nə̀ ghu, zəŋə yə̀ ayiə yə ghu dziy nə̀ ù zəŋi. Zə̂ we ə kwuni tsə̀ŋə̀ mòʼò kə àyiə yə àdzə̀m a kə fyi nəniy. 52Yesù ə nɛmə fyi kə anə wû, kəli bə̀ utwab ù soŋə̀ wìy. Zə̀kìy liə we, aghee ə liə sòʼò we.

Currently Selected:

Lukâs 2: isu

Highlight

Copy