Lukâs 3

Dzwan wə ù kə nyiə mwi m-à-zə̀ mìy kaʼ tsə ani nàʼà ntwùm ə̀ Kə̀zə̀

(Matìyò 3.1-12; Mâk 1.1-8; Dzwan 1.19-28)

1À kə də nə̀ Tìbelùs dyòʼo kwoʼo yə̀ dòŋ kə̀ soŋə̀ kìy anə inaʼi Lûm anə təŋə̀mə̀ ìvəm nə̀ ghe tiy ità, Anə soŋə fə ghà fə̀ kə, ntwùm ə̀ Kə̀zə̀ ə bù â Dzwan, wà Zàkàliyà a mbvə̀n ə̀ kə̀sisi. Pontus Paylèt ə də̀ kətuw a mbwòʼ ə̀ Dzùdiyà, Helòd ə də̀ kətuw a mbwòʼ ə̀ Galìlî, àzə̀ ə̀ we Filîp ə saʼa inaʼ i Ìtulìyà nə̀ ìnaʼ i Tàkonitìs yìy, Lìsanìyà ə saʼa inaʼ i Àbilenè. 2Anàs we nə̀ Kaʼifàs, ghu kə də̀ tsə̀ aghê àlwaʼa à nê yìy anə sòŋə fə Zə̀kìy kə nîy dzəŋì bə̂ nə̀ Dzwan, wà Zàkàliyà nə̀ ù də̀ a mbvə̀nə̀ kə̀sisi 3Dzwan ə kaʼ tsə ani nàʼà ntwùm ə̀ Kə̀zə̀ a mbwòʼ ə̀ Dzudàn dzìy tsə nə̀, “Ghà kyemì ŋwô bə̂ anə ayiə ghii àbɛbə yiy, ghà nîy soʼò mwi m-à-zə̀, tə̀ Zə̀kiy nîyzə̂ bɛb təli.” 4I kə bvwami də̀ anə iyiə yə i twâ doʼò nəniy anə ŋwàʼà kə wè ntwùm ə̀ Kə̀zə̀, Ìzayà nə̀,

“Wù lìy wìy də̀ a mbvə̀nə̀ kə̀sisi ù bwoʼo bôŋ kìy dzìy tsə nə̀,

‘Ghà byay na tsə dzəd awò Mwe ə̀ Mbyi!

Zəŋi tsə nə loʼo tə̀ ŋgwalə tə tə zû tsitsi awò we ani bwìy.

5Ghà kwu ani gə̀mə̀ tə̀wad

Ghà kwu ani təm màʼà təkàʼà nə̀ doŋə tiy

Ghà kwu ani zəŋi tsə ŋkwali tə təlòʼo tə tə doʼò tsə tsitsi,

Gha kwu ani gə̀mə̀ ùbwòʼ wò u də nəniy anə dzəd tə̀ ì dzwàb tsə.

6Aghê àdzə̀m anə mbyi ghu kî kòʼò ŋwò yəə Zə̀kìy dziy bii fyi aghû ate.’ ”

7Ŋwàâ kə ghù kìy ə bù nə̀ Dzwan nyiə̀ ghu nə̀ mwi m-à-zə̀ mìy. U kwuni dzày yə̀ awò ghu nə̀, “Gha yə ghà bəbə yə à də̀ zwə tə̀ bɛbə tiy, à tswù ndìə̀ gha nə̀ ghà tu ŋwò fyi anə fòŋə̀ Kə̀zə̀ ìŋəmə̀ yìy ə? 8Ghà ki zəŋə yə ayiə yə a dê nəniy nə̀ ghà mə kyèmì ŋwò bə̀ anə bɛb təli. Ghà kə zə̂ dzə̀ ndzòʼ, dzìy nə̀ ghà də awiwa Ablàhâm. Mə ndzəmə̀ dzìy bə̀ ŋwò â ghà nə̀, Zə̀kìy də ani bwad fə̀d kə atay yə anə awiwa Ablàhâm. 9Ifuw yiy mə dòʼò təŋ bə̀ ani fòŋ màʼà ŋkàʼ anə təghàŋə. Abu à də kə kâʼ fə̀ ghaa fiy fə də muə way utam ù dzoŋə̀ wìy ghu kî fòŋə̀ myaʼà ŋwò kâʼ fə ghà fə̀ ghu piə̀ maʼà kə anə uvə̀lə̀.”

10Ŋwàâ kə ghù kə ə bəb yə̀ â Dzwan a we nə, “Ghè də ani zəŋi mə̀yə?”

11Dzwan ə bə̀lì kə nə̀, “Wù wə̀ ù kwu nəniy ndzwu tiy ibè ù nyiə̀ yə̂ ìmòʼ awò wù wə̀ ù làʼà nəniy ndzwu tiy, wù wə̀ ù kwu nəniy ufânyiə wiy u dzàw yə̀ nə̀ wù wə̀ ù də kwu way ufânyiə wiy.”

12Aghê à khii ŋwàʼà kə̀tsuw kiy kə bù sòʼò nə̀ Dzwan nyiə̀ ghu nə̀ mwi m-à-zə̀ mìy, ghu ə bəb yə̀ â Dzwan a we nə, “A àtyi dè! Ghè də ani zəŋi mə̀yə?”

13Dzwan ə bə̀li kə aghù nə̀ “Kəə ghaa nə̀ nîy dzə̂ ùkhiy wìy â wù tsìy fyi ukhiy wə ghà kwu ani nìy.”

14Sǔgôʼ tə̀ liy tiy ə bəb yə̀ sòʼo a we nə, “Abû ghə̀d yeey! Ghè də ani zəŋi məyiə?” U dzày yə̀ a ghu nə, “Kəə gha nì də̀mə̀ nìy fyiə kiy â wù lìy a n-a-daʼa, kəə ghà a nì guw nia soʼò àyiə anə tuw kə wû nə̀ ghà liə kə ani kəli kəfyiə. Ghà si dwoʼo nə̀ ùkhiy wə ghu tsəə nəniy gha ate.”

15Aghê àdzə̀m ə lya kə Dzwan, ghu dzìy kə anə fòŋ tə ghu nə̀ “Dzwan sî də wù wə̀ Zə̀kìy sûwkili naa an-a-dòŋ moo” 16Dzwan ə dzày yə̀ a ghu nə, “Mə gha nyiə̀ nə̀ mwi m-à-zə̀ mìy, wù lìy kwunə bè ŋwò abidzəmə̀ mìə̀ ù tsìy fyi nəniy miə, mə kə̀ boʼò kwoʼ kpe dzə̂ ani zè màʼà ùbaʼ u təgùw u we, ù kì nyə̀ ghà nə̀ Zwàykə̀zwekiy, ù saʼ aghě bɛbə yə, ù nyə̀ sòʼò ghu nə̀ mfəm anə uvə̀lə̀. 17Ù bè təŋə nə̀ nəli kə we kiy ani bù fyɛbi màʼà fyi zwiy tə asaŋ anə asaŋ, ù kî nìy na yə̀ àsaŋ a ghà yə̀ anə uta, ù kwuni nìy pìə̀ màʼà kə zwiy tə anə uvə̀lə̀ wə̀ u də nəmə kòʼò dzə̀ wày.”

18Dzwan kə nàʼà ntwumə̀ ìdzòŋi awò ghu anə ndə̀mə tə̀dzədlə anə zəŋi tsə tə̀ ghu kyemì ŋwô fyi bə̂ anə bɛb tə ghu. 19Dzwan ə kwuni kwà yə̀ Helòd a we nə, ù mə zəŋi iyiə ìbɛbə yiy, anə yiə yə ù kàm tyìmì nîy kə Hèlodìàs nə̀ à də̌ wìy àzə̀ we, nə̀ ayiə àbɛbə àliy yə ù kə zəŋə nəniy, 20Helòd ə ba zəŋi fələ yə̀ ìyiə ìbɛ̂bɛbə yiy, nìy kwe yə̀ Dzwan a ndàw ntsaʼ.

Yesù ə nìy mwi m-à-zə̀

(Matìyò 3.13-17; Mâk 1.9-11)

21Abù aghê àdzə̀mə̀ nîy kə nəniy mwi m-à-zə̀ mìy, Yesù ə bù nìy kə sòʼò mwi m-à-zə̀. Abù ù sì gwùŋə̀ nəniy, vələ kiy fwiy tsə. 22Zwàykə̀zwekiy fyi tswi bə̀ yəə à də̀ kəbubumə, bù ma tsə azoŋə̀ we. Dzə̀ ə foŋ fyi tswi bə̀ anə kəvələ nə̀, “Wò də̌ wa nam ùtsukə̀ wìy, wò zəŋə miə, mə ŋgee dyoʼo.”

Nə̀ tèe Yesù ə səsə yiy

(Matìyò 1.1-17)

23Yesù kə də̀ tə ŋəmə̀ mə̀mvəm inti anə soŋə fə ù kə kaʼ tsə nəniy fàʼ k-a-zə̀ kìy ate. Yesù kə də̌ wà Yùsə̂f anə yiə yə aghê kə kwu tsə nəniy. Yùsə̂f kə də wà Hèli, 24Hèli kə də̌ wà Matàt wə̀ ù kə də nəniy wà Levì, Levì kə də̌ wà Melkì wə̀ ù kə də nəniy wà Dzànay, Dzànay kə də̌ wà Yùsə̂f, 25Yùsə̂f kə də̌ wà Màtàtayàs wə̀ ù kə də nəniy wà Ɛmòs, Ɛmòs kə də wà Nahùm, Nahùm kə də wà Eslì, Eslì kə də̌ wà Nagày, 26Nagày kə də̌ wà Mât wə̀ ù kə də nəniy wà Màtàtayàs, Màtàtayàs kə də̌ wà Semìn wə̀ ù kə də wà Dzosèk, Dzosèk kə də̌ wà Dzodà, 27Dzodà kə də̌ wà Dzòwanàn wə̀ ù kə də nəniy wà Lesà, Lesà ə də̌ wà Zèlubabèl wə̀ ù kə də nəniy wa Shiltìyèl, Shiltìyèl kə də̌ wà Nelì, 28Nelì kə də̌ wà Melkì wə̀ ù kə də nəniy wà Adì, Adì kə də̌ wà Kosam wə ù kə də nəniy wà Elmadàm, Elmadàm kə də̌ wà El wə̀ ù kə də nəniy 29wà Dzoshà, Dzoshà kə də̌ wà Èlezà wə̀ ù kə də nəniy wà Dzolìm, Dzolìm kə də̌ wà Matàt wə̀ ù kə də nəniy wà Levì, 30Levì kə də̌ wà Simìyòn wə̀ ù kə də nəniy wà Dzudà, Dzudà kə də̌ wà Yùsə̂f wə̀ ù kə də nəniy wà Dzonàm, Dzonàm kə də̌ wà Èlaykìm wə̀ ù kə də 31wà Meliyà, Meliyà kə də̌ wà Menà wə̀ ù kə də wà Matàtà, Matàtà kə də̌ wà Natàn wə̀ ù kə də wà Devìd, Devìd kə də̌ 32wà Dzesì wə̀ ù kə də wà Obèd, Obèd kə də̌ wà Bowàs wə̀ ù kə də wà Salà, Salà kə də̌ wà Nashòn wə̀ ù kə də wà Aminadàb, 33Àminadàb kə də̌ wà Admin, Admin kə də wà Anì, Anì wə̀ ù kə də wà Hezlòn, Hezlòn kə də̌ wà Pèlez wə̀ ù kə də wà Dzudà, Dzudà kə də 34wà Dzàkôb wə̀ ù kə də wà Ayzìk, Ayzìk kə də̌ wà Ablàhâm wə̀ ù kə də wà Telàh, Telàh kə də̌ wà Nahò 35Nahò kə də̌ wà Selùg wə̀ ù kə də wà Leu, Leu kə də̌ wà Pelèg wə̀ u kə də wà Ebà, Ebà kə də̌ wà Shelàh wə̀ ù kə də 36wà Kenàn, Kenàn kə də̌ wà Alfazàd wə̀ ù kə də wà Shêm, Shêm kə də̌ wà Nuwà wə̀ ù kə də wà Lamèk 37Lamèk kə də wà Mètuselà wə̀ ù kə də wà Enòk, Enòk kə də̌ wà Dzalèd wə̀ ù kə də wà Màhalalè, Màhalalè kə də̌ wà Kenàn 38wə ù kə də wà Enòsh, Enòsh kə də̌ wà Sêt wə̀ ù kə də wà Adàm, Adàm kə də̌ wà Kə̀zə̀.

Currently Selected:

Lukâs 3: isu

Highlight

Copy