Rɔmɛri̧ 3

1A̧hí̧ ɓá nɛ́rɛ̧ kaw ɓá Juyíf lé? Malé nɛ́rɛ̧ ndá ganzá ɓayhí̧ lé? 2Katína, nɛ́rɛ̧ké erú ɓá hɔ̧́náké a ɓilké nɔ́ too. A títáʼaké, ɓá Juyífri pé Gáŋvbôn hí̧nzáʼa hí̧ kuriri. 3Katína, njuku a há̧narí̧ a bazeŋ a kuriri mí zi láɓulaw yá, a̧hí̧ láɓulaw yá a kuriri e de law mbêw a Gáŋvbôn lé? 4Ma niŋa nyá! Belɓá ná tu ɓá Gáŋvbôn sa gbátɓay, dáy njukuri kaw ɓá njuku kúŋɓayri, ɓá báŋké ka ɗé ka̧n ɓil Mbété ɓá:

«Belɓá kú tu mɔ́, ɓá njuku a ndáráké a ɓil ɓay sána a mɔ̌,

a mɔ́ ziŋ ndéna, a kú mí ɓá mɔ ew mbɛl walɓay.»

5Dáy, ɓéké ka ná niŋ, mí tɔ́ʼɔ káwa a ndáráké a Gáŋvbôn gé ɓá mbɛl, ná e sa ɓá hí̧ lé? Gáŋvbôn zi tí ɓá njuku a ndáráké yá, a ké mí vbá̧ manárí̧ a ɓil hɛ́rɛ a mɛ̌ lé? (Mi sa ɓá báŋa sána a njukuri.) 6Tí nǎŋnɔ́ nyá! Ɓayhí̧lé Gáŋvbôn mí zi tí ɓá njuku a ndáráké yáy, a̧ní rá̧, ké e walɓay kɔ̧ tûl a njuku a tísiriri lé?

7Dáy, kúŋɓay a mǐ, mí tɔ́ʼɔ gbátɓay a Gáŋvbôn ɓá táŋáké, a tɔ́ʼɔ hɔ̧́na a mɛ̌y, ɓayhí̧rá̧, njukuri e walɓay kɔ̧ tûl ní ɓá mi kaw ɓá ɓéké njuku lé? 8Mí ɓá nǎŋ, ɓayhí̧rá̧ ná zi sa ɓá: «Ná niŋ ɓéké, ɓay a ná ziŋ béla yáy lé»? Njuku a fékéri ɓay a ɓew ɓay a mǐ, sa ɓá, mǐ pé saɓay nɔ́rí̧. Njuku nɔ́rí̧, Gáŋvbôn e walɓay ŋgbá kuriri, ɓayhí̧lé kú marú̧.

Njuku a ndáráké mbêw zi tí yá

9Mí ɓá nǎŋ, manárí̧ Juyífri, ná ndé njuku a fékéri ka a̧hí̧ lé? Tí yá! Mi tí tɔ́ʼɔ ɓá Juyífri rá̧ njukuri ka zi tí ɓá Juyífri yáy too, e ka bɔʼɔ kpɔ́ŋa a ɓékéhɛ̧. 10Ná kɛ̧́ a ɓil Mbété ɓá:

«Njuku a ndáráké zi tí yá, tí mbêw yá!

11Njuku ka tuhɛ̧ mbêw zi tí yá,

njuku ɛ́ Gáŋvbôn mbêw zi tí yá!

12Kuriri too, kú pɔŋ tɔ́ŋ ŋgboro a béláké, a ɓɔ́l ŋgboro kuriri too.

Njuku niŋ hɛ̧ a béláké zi tí yá, tí mbêw yá!

13Ŋgboro kɔ́ŋ a kuriri, ɛ́ŋ ɓá lɔ̂ʼɔpâl a ŋgbúráké.

Ndísɛl a kuriri sa ɓá ɓay rɔ́ʼɔ njukuri.

Nzáʼa a kuriri tɛ̧́ ɓá pɔ̂m sôy.

14Nzáʼa a kuriri mbá ɓá ɓékéɓayri rá̧ ɓay sélaw.

15Bɔʼɔ kuriri ga, a í hûl.

16Hɛ̧ɓewa rá̧ ɓékéhɛ̧ri̧ too, e ka gel too a kú tá rúy,

17Kú zi tu ŋgboro a vónáké bɔʼɔ mbêw yá.

18Wɔ́w a Gáŋvbôn zi tí law a kuriri bɔʼɔ mbêw yá.»

19Dáy ná tu ɓá, hɛ̧ too ka sáŋna sáy, ké sa hí̧ njukuri ka tɔ́ŋ sáŋna rá̧ nzáʼa njukuri too ké tu, a njuku a tísiri too, kú tu ɓá kú kaw ɓá ɓéké njuku a mbɛl a Gáŋvbôn. 20Ɓayhí̧lé, njuku a há̧na mbêw ka e kaw ɓá njuku a ndáráké a mbɛl a Gáŋvbôn, ka ŋgboro a tɔ́ŋ sáŋna zi tí yá. Ɓayhí̧lé, sáŋna hí̧ nárí̧ ɓá ŋgboro tu ɓékéhɛ̧ ɓǎŋ.

Káwa a ndáráké ka ŋgboro a láɓulaw

21Dáy a ŋgɛŋnɛ́, Gáŋvbôn tɔ́ʼɔ nárí̧ ŋgboro a ké ɓá nárí̧ tɛ̧́ njuku a ndárákéri a mbɛlɛ́, táŋ sáŋna. Mbété a sáŋnari̧ rá̧ Mbété a porofɛ́tri tí saɓayké kɔ́: 22Gáŋvbôn, ɓá njukuri tɛ̧́ njuku a ndárákéri a mbɛlɛ́, ka ŋgboro a láɓulaw hí̧ Zezú Kiris, ké niŋ nǎŋ hí̧ njukuri too ka láɓulaw hí̧ Kiris. Ɓayhí̧lé, Gáŋvbôn kó njukuri too mambɛ̧́nɛ́ ka nûn nɛ́. 23Njukuri too niŋ ɓéké, nǎŋnɔ́ Gáŋvbôn de kuriri kó hɔ̧́na a mɛ̌. 24Dáy Gáŋvbôn, a ɓil lawbéla mɛ̌, ɓá kuriri tɛ̧́ njuku a ndárákéri baa, ka ŋgboro a Zezú Kiris ka ten kuriri a ɓil ɓékéhɛ̧. 25Ɓá mɛ̌ Zezú pé Gáŋvbôn mbí nɛ́, a hí̧ ɓá hɛ̧púna rá̧lǒo ka ŋgboro a hûl a mɛ̌, ké ziŋ vbá̧buma a ɓékéhɛ̧ a njukuri ka láɓulaw hí̧ nɛ́y. Nǎŋnɔ́ pé Gáŋvbôn tɔ́ʼɔ nárí̧ káwa a ndáráké a mɛ̌, ɓayhí̧lé ké zi niŋ ɓéké ziŋ njukuri ka niŋ ɓéké ɗambɛl, a ɓil nâm ikilaw a mɛ̌ nyá. 26Dáy a ŋgɛŋnɛ́, Gáŋvbôn tɔ́ʼɔ nárí̧ káwa a ndáráké a mɛ̌, a kó njukuri ɓá ndáráké a mbɛlɛ́ ka ŋgboro a láɓulaw hí̧ Zezú.

27Dáy, ŋgboro erú ɓáy, ɓay a njuku ké si kɔ́ŋɛ́ lé? Ŋgboro zi tí yá! Ɓayhí̧lé hɛ̧ ka Gáŋvbôn ziy, zi tí ɓá tɔ́ŋ sáŋna nyá, ɓá láɓulaw mbêw yáŋ. 28Ɓayhí̧lé, ná tu ɓá njuku ziŋ káwa a ndáráké a mbɛl a Gáŋvbôn, ka ŋgboro a láɓulaw a mɛ̌, a tí ɓá ka ŋgboro a tɔ́ŋ hɛ̧ ka sáŋna vbí yá. 29Malé, Gáŋvbôn, kaw ɓá Gáŋvbôn a Juyífri mbêw yáŋ, a tí ɓá Gáŋvbôn a njuku a fékéri yá lé? Katína, ké kaw ɓá Gáŋvbôn a njuku a fékéri kɔ́, 30ɓayhí̧lé Gáŋvbôn, ɓá mbêw yáŋ. Ɓá mɛ̌ pé e ɓá Juyífri kaw ɓá ndáráké a mbɛlɛ́, ka ŋgboro a láɓulaw rá̧ njukuri ka zi tí ɓá Juyífri yáy kɔ́, kaw ɓá ndáráké a mbɛlɛ́, ka ŋgboro a láɓulaw. 31Dáy, zi ɓay a sa ɓá, ka ŋgboro a láɓulaw, ná lú nɛ́rɛ̧ a sáŋna gefal lé? Háy, ná zi lú yá, ná hí̧ sáŋna gbát nɛ́rɛ̧ a mɛ̌ too.

Currently Selected:

Rɔmɛri̧ 3: pnz

Highlight

Copy