YouVersion Logo
Search Icon

Péna a Apotereri 25

25
Pôl a mbɛl a mbây tûlkaw Fɛstús
1Nâm sáy a fal ka̧na a mbây tûlkaw Fɛstús a ɓil kawké, ké uru gɔ́rɔ́ a Sezaré gí Zerúzalɛ̂m. 2A goló, gáŋnjuku nzáʼaká̧nari̧ rá̧ gáŋnjuku a pûri, gí mbɛlɛ́ a gí kalmany a Pôl hí̧ nɛ́. Kú vú hí̧ nɛ́ 3ɓá ké pɔŋ ŋgboro hí̧ kuriri, a kú ɓá Pôl regí Zerúzalɛ̂m, ɓayhí̧lé kú láhá̧narí̧, a zi ɓay a í nɛ́ ka ŋgboro. 4Dáy mbây tûlkaw Fɛstús sa hí̧ kuriri ɓá, Pôl e ka vûn sɛl a Sezaré, mǐ kɔ́ nâm kpay nɛ́, mí e rekála. 5A resa hí̧ kuriri ɓáy: «Mi zi ɓá, mbây a wǎyri, kú sé kuu mǐ sé Sezaré, a kú gé sa ka sá̧, a̧hí̧ njuku nɔ́ niŋ ɓá hɛ̧ a belyáké lé.»
6Mbây tûlkaw Fɛstús gé niŋ ɓá nâm zíndɔ̂ʼɔsére, malé nâm bôo a gel a kuriri, dáy a rekála gí Sezaré. Típélé a féké, ké sé kaw ɓil vûn walɓay, a hí̧nzáʼa ɓá kú ɗa Pôl gírú. 7Gelka, kú ɗa Pôl gí ká̧y, Juyíf a há̧narí̧ ka gí ka Zerúzalɛ̂m, gé ki ɗɔ́ŋ nɛ́, a tí deɓayri ɓá ŋgɛ̧́náké kɔ̧ nzáʼa a Pôl, ŋgɛ́rɛ ɓayri, a kú ma ɓay a tɔ́ʼɔ hɛ̧ké yáy. 8Dáy Pôl mbí ɓay a sa: «Mi zi niŋ ɓékéhɛ̧ a há̧na sé ŋgboro a sáŋna a Juyífri, malé ziŋ vûn a Gáŋvbôn, malé ziŋ mbây a lúkí a tísiri a Rɔmɛ́ nyá.»
9Mbây tûlkaw Fɛstús, ka zi ɓay a niŋ hɛ̧ ka e ri law a Juyífri, vbí Pôl ɓá: «Mɔ́ zibɔʼɔké ɓay a sé Zerúzalɛ̂m, a kú gé walɓayké a mbɛl ní a sá̧ lé?» 10Pôl sa: «Ɓá gel walɓay a mbây a lúkí a Rɔm, pé kú e walɓay a mǐ. Mi zi niŋ ɓékéhɛ̧ a há̧na ziŋ Juyífri yá, ɓá báŋké nɔ́ ka mɔ́ tuy. 11Mǐ, mí niŋ ɓékéhɛ̧ a há̧na ka ma hûl, mi zi many, ɓay a ziŋ hûl yá. Dáy, gbátɓay mí zi tí a ɓil ɓayri, a kú sa sé tûl ní nyáy, njuku a há̧na mbêw, zi tí ka ŋgboro ɓay ɓá mi hí̧ kuriri yá. Mi vbí ɓá mbây a lúkí a tísiri Rɔmɛ́, Sezar, ké walɓay a mǐ!» 12Dáy mbây tûlkaw Fɛstús, fal láhá̧narí̧ kuu gáŋnjuku walɓayri, ké rerú a sa hí̧ Pôl ɓá: «A mɔ́ vbí sé gel a mbây a lúkí a Rɔm, mɔ e sé gé lé.»
Mbây tûlkaw Fɛstús saɓay a Pôl hí̧ mbây Agiripá rá̧ Berenís
13Nâm kpay a falké, mbây Agiripá rá̧ Berenís gí ka̧ Sezaré ɓay a gí nyá bɔʼɔ a mbây tûlkaw Fɛstús. 14A kú gé niŋ nâm ɓá ŋgɛ̧́náké kpay kuu mbây tûlkaw Fɛstús, Fɛstús gé sa hí̧ mbây, ɓay a Pôl, a sa: «Njuku a há̧na e a gelé, ka Felíkse pɔŋ nɛ́ ka̧n vûn sɛl. 15Gelka, mi sé Zerúzalɛ̂m, gáŋnjuku nzáʼaká̧nari̧ rá̧ gáŋnjuku a pû a Juyífri, gé kalmany a mɛ̌ hí̧ mí, a vbí mí ɓá mí walɓay ŋgbá nɛ́. 16Dáy, mi sa hí̧ kuriri ɓá, tí ɓá péna niŋa ɓurú Rɔmɛri̧, ɓá rú ŋgbá njuku a í nɛ́ táŋ hí̧ nɛ́ ŋgboro sa nzɛ́ʼɛ a mbɛl a njukuri ka deɓay ka̧n nzɛ́ʼɛ yá. 17Dáy gelka kú gí ka̧ geléy, mi zi ɛ̧ nyá. Típélé a féké, mi kaw vûn walɓay, dáy a pé ɗí, ɓá kú ɓá Pôl gí. 18Njuku kalmany a mɛ̌ri̧ gí ka̧, a gí saɓay, kɛrɛ a mǐ ɓá, kú e sa ɓékéhɛ̧ a há̧na sé tûlé lé. 19Dáy mi kó lé, ɓá manyɓay a bazeŋ a kuriri, sé tûl mára̧ a láɓulaw a kuriri, rá̧ ɓay a njuku a há̧na, a kú ɗí nɛ́ ɓá Zezú, ka ziŋ hûl, ka mɛ̌ Pôl sa ɓá, ké toma ka hûl. 20Dáy mǐ, mi zi tu ŋgboro wal ɓil ɓayké yá. Ɓaykénɔ́, pé mi vbí Pôl ɓá ké sé Zerúzalɛ̂m, a kú sé walɓayké ka sá̧. 21Dáy Pôl sa ɓá: Ɓay a mɛ̌, ké sé gel a mbây a lúkí Sezar. Nǎŋnɔ́, pé mi sa kú pɔŋ nɛ́ ka̧n vûn sɛl, ka̧ sêe ka mi e pé nɛ́ sé gel a mbây a lúkí, Sezar.» 22Dáy mbây Agiripá sa hí̧ mbây tûlkaw Fɛstús: «Mi zi ɓay a mi lá njuku nɔ́.» Dáy Fɛstús sa: «Típélé, mɔ́ e lá nɛ́.»
23Típéléké, mbây Agiripá rá̧ Berenís ka̧ kuu njukuri, a ɓil záymûn ɓá ŋgɛ̧́náké. Kú gí ri ɓil vûn walɓay, kuu gáŋnjuku a ŋgawbéreri rá̧ gáŋnjuku pûri. Dáy mbây tûlkaw Fɛstús hí̧nzáʼa, ɓá kú ɓá Pôl gí. 24Dáy a sa: «Mbây Agiripá rá̧ wǎyri too ka e a gelé kuu ɓurú, i kó njuku nɛ́: Juyífri too gí kalmany a mɛ̌ hí̧ mí, ka mi sé Zerúzalɛ̂m rá̧ falké ka mi regí gelé kɔ́, ka vbá̧nzáʼa ɓá ké ma hûl! 25Gelka mi kó ɓil ɓayké, mi zi ziŋ ɓékéhɛ̧ a há̧na a gel a njuku nɛ́, a ma hûl yá, dáy mɛ̌ Pôlké, ké sa ɓá, ɓay a mɛ̌ ké gé ɓá gel a mbây a lúkí Sezar. Dáy mi ŋgá̧nzáʼa, ɓay a pé nɛ́ sé gel a mbây a lúkí Sezar. 26Dáy, mi zi tu a̧hí̧ mi e ɗénáké sé tûlké, hí̧ mbây a lúkí Sezar yá, ɓaykénɔ́, pé mi ɓá nɛ́ gí mbɛl a wǎyri, ɗambɛlké mɔ̌, mbây Agiripá rá̧ mɔ́ vbí nɛ́ ɓay, há̧na mi e ziŋ hɛ̧ a há̧na, ka mi e ɗénáké lé. 27Ɓayhí̧lé zi ná ka ŋgboroké hí̧ mí, ɓay a pé njuku vûn sɛl sé Rɔm, táŋ sa táŋa ɓay a kú de ka̧n nzɛ́ʼɛy yá.»

Currently Selected:

Péna a Apotereri 25: pnz

Highlight

Share

Copy

None

Want to have your highlights saved across all your devices? Sign up or sign in