Péna a Apotereri 26
26
Pôl saɓay a tûlé a mbɛl a mbây Agiripá
1Mbây Agiripá, sa hí̧ Pôl: «Mɔ e ka ŋgboro, ɓay a saɓay a tûló.» Dáy, Pôl uru a gbaŋ ndɔ̂ʼɛ, ka tí saɓay a sa: 2«Mbây Agiripá, sénɛ́ mi e ka lawrína, ɓay a saɓay a mbɔ́lɔ́ sé tûl hɛ̧ri̧ too ka Juyífri deɓay ka̧n nzáʼa ní. 3Ɓayhí̧lé, mɔ́ tu ɓá táŋáké, hɛ̧ niŋa a Juyífri rá̧ gáŋɓay manyɓay a kuriri too. Mi vú hí̧ mɔ́, mɔ́ ikilawɔ́, a mɔ́ lá mí.»
4«Juyífri too tu káwa a mǐ, tí a káwa kaban njuku a mǐ, kú tu báŋ káwa a mǐ, tí a títáʼaké a bazeŋ a njuku a mǐri̧ rá̧ ka Zerúzalɛ̂m. 5Kú tu mí ɗiɓaŋ dá, kú ma ɓay a sanáké a kú mí ziy. Mi kaw ɓá njuku ka e a ɓil mára̧, ka e ka sáŋna ŋgɛ́rɛ mambá, a kú ɗí ɓá Fariziyɛ̧́ri̧. 6Dáy, ŋgɛŋnɛ́, mi e a mbɛl walɓay, ɓayhí̧lé mi mbílaw sé tûl hí̧nzáʼa ka Gáŋvbôn sa hí̧ zîi a manárí̧. 7Nzáʼaká̧na bôo a sére, a njuku a manárí̧ too, mbílaw a kuriri ɓay a kó hí̧nzáʼaké nɔ́ ka e niŋáy, ka niŋ péna a ŋgɛ́rɛ a kuriri too hí̧ Gáŋvbôn sû̧ŋ ka sêe. Ɓay tûl mbílawké nɔ́, pé mbây Agiripá, nyîn ní Juyífri deɓay ka̧n nzáʼa ní! 8Ɓayhí̧rá̧, wǎyri Juyífri, i kɛrɛ ɓá Gáŋvbôn ma toma njukuri ka hûl yá lé? 9Ɗambɛlké, mi rúbére a ŋgɛ́rɛ mǐ too, ɓay a ɓew rɛŋ a Zezú a Nazarɛ́t. 10Ɓá hɛ̧, ka mi niŋ ka Zerúzalɛ̂m. Mi ziŋ ŋgboro ka gáŋnjuku nzáʼaká̧nari̧ hí̧ mí, nǎŋnɔ́, mí ɓá gun láɓulawri ɓá ŋgɛ̧́náké kɔ̧ vûn sɛl, gelka, kú kaw walɓay kɔ̧ tûl a kuriri, ɓay í kuriri, mi zibɔʼɔké kɔ́ kuu kuriri. 11Mi sé lá ɓil vûn gɔ́ŋ Gáŋvbônri̧ too, ka ŋgbá gun láɓulawri, a ɓá kuriri tɔ́ʼɔsêe, ɓay kú many rɛŋ a Zezú. Mi e ka hɛ́rɛ kuu kuriri, nǎŋnɔ́ mi ní kuriri a tɔ́ŋ kuriri sé ri ɓil pû a fékéri.»
Pôl saɓay a fere law a mɛ̌
(Pap 9:1-19; 22:6-16)
12«Ɓá nǎŋnɔ́, pé sêe há̧na, mi uru ɓay a sé gé ɓá Damas, gáŋnjuku nzáʼaká̧nari̧ hí̧ mí ŋgboro, ɓay a mi sé ŋgbá gun láɓulawri ka e a Damas. 13Mɔ́ lá mbây Agiripá, mi e ka tûl ŋgboro, a lawgel a sêe, mi kó hɔrɛ ka ɗere gí a nûnalê, táŋ ndé hɔrɛ sêe, gí táŋ ɗɔ́ŋ mí rá̧ njukuri ka sé kuu mǐ. 14Rú lé too kɔ̧ siri, dáy mi lá kɔ́ŋ a njuku ka saɓay hí̧ mí ka nzáʼa Aramɛyɛ̧́ri̧ ɓá: Sôl, Sôl, ɓayhí̧rá̧, mɔ́ ɓá mí tɔ́ʼɔsêe lé? Ɓǎŋ baa pé mɔ kpútûló, ɛ́ŋ nday ka kpútûlé ziŋ kâ̧w a bákáwa mɛ̌. 15Dáy, mi vbí ɓá: “Gáŋmbây, mɔ̌ ɓá gé lé?” Dáy Gáŋmbây, zi a sa: “Mi ɓá Zezú, ka mɔ ɓá nɛ́ tɔ́ʼɔsêey. 16Dáy a ŋgɛŋnɛ́, mɔ́ uru! Mi tɔ́ʼɔ mûn ní hí̧ mɔ́, ɓay a mi ten mɔ́ ɓá njukupéna a mǐ. Mɔ́ e kaw ɓá njuku nzáʼapéna a mǐ, ɓay a sa báŋké ka mɔ kó mí a sénɛ́, rá̧ hɛ̧ri̧ too ka mi e tɔ́ʼɔ mɔ́y. 17Mi e pé mɔ́ sé ɓil a Juyífri rá̧ njuku a fékéri ka zi tí ɓá Juyífri yáy. Mi e koro mɔ́ a mbɛl a kuriri. 18Mi pé mɔ́, ɓay a mɔ́ sé ŋgburu nûn a kuriri, ɓay a mɔ́ sé rerú kuriri a ɓil tirí̧ma gí gel a táŋáké, rá̧ mɔ́ ten kuriri a ɓil kpɔ́ŋa a Zábolo gí gel a Gáŋvbôn. Rá̧ kú mí láɓulaw hí̧ mǐ, Zezúy, Gáŋvbôn e turu ɓéké a kuriri, a hí̧ kuriri béla gelkáwa a bazeŋ a njuku a mɛ̌ri̧.”»
Pôl saɓay a péna a mɛ̌
19«Mbây Agiripá, nǎŋnɔ́ mi ma kpútûl ziŋ hɛ̧ ka mi kó gí a nûnalê yá. 20Dáy mí tí tɔ́ʼɔɓay a Gáŋvbôn a Damas, falké a Zerúzalɛ̂m, a tísiri a Judéri too rá̧ hí̧ njukuri ka zi tí ɓá Juyífri yá, ɓá kú fere káwa kuriri, a kú gí gel a Gáŋvbôn ka ŋgboro a niŋ hɛ̧ a béláké, ka tɔ́ʼɔ ɓá kú fere law a kuriri dáy. 21Ɓay tûlké nɔ́, pé Juyífri ŋgbá mí a ɓil vûn a Gáŋvbôn, pé a zi ɓay a kú í mí. 22Dáy, ka ŋgboro a kóra a Gáŋvbôn, pé mi pɔŋ saɓay a mɛ̌ a mbɛl a gun a léléri malé gáŋnjukuri yá ka̧ sénɛ́. Mi zi fere tûl ɓay a féké yá, ɓay ka porofɛ́tri rá̧ Mɔyíze sa sé tûl hɛ̧ri̧y ka e gínay, pé mi tɔ́ŋ rú̧y. 23Ɓayké nɔ́ sa ɓá: Kiris e tɔ́ʼɔsêe a ziŋ hûl, a kaw ɓá titíla njuku, ka e toma a bazeŋ hûlri. Ké e tɔ́ʼɔ ɓay a geltáŋa hí̧ maná Juyífri rá̧ njukuri ka zi tí ɓá Juyífri yáy.»
Pôl ɗí Agiripá ɓá ké láɓulaw
24Gelka Pôl kaw sa nǎŋnɔ́, mbây tûlkaw Fɛstús vbá̧nzáʼa ɓá gbénáké ɓá: «Pôl, mɔ́ kaw ɓá dɔ̂ʼɔ! Gáŋ hɛ̧túna a mɔ̌ e ɓá mɔ tɛ̧́ dɔ̂ʼɔ!» 25Dáy Pôl zi nzɛ́ʼɛ a sa: «Gáŋnjuku, mi zi tí ɓá dɔ̂ʼɔ yá. Ɓayri ka mi kaw sanáké, ɓá gbátɓay, ŋgboroké ná ɓá táŋáké. 26Mi tu ɓá mbây Agiripá ɛ́ ɓilké ɓá táŋáké, dáy mi zi tí ka wɔ́w saɓayké ka mbɔ́lɔ́ yá. Mi tu ɓá ɓay a há̧na ka mɔ́ yɛʼɛrɛ mbêw zi tí yá, ɓayhí̧lé, hɛ̧ké zi niŋ ɓá múnáké yá. 27Dáy, mbây Agiripá, mɔ láɓulaw hí̧ ɓay a porofɛ́tri ka say lé? Mi tu ɓá, mɔ láɓulaw sé tûlké!» 28Dáy, Agiripá sa hí̧ Pôl: «Mɔ́ kɛrɛ ɓá, mɔ́ e ɓá mi tɛ̧́ kɛrɛtiyɛn ɗɛ́ŋ nǎŋ lé?» 29Pôl zi a sa: «Zi lé ké ɓá ŋgɛŋnɛ́, zi lé ké ɓá ka fal, mi kaw gɔ́ŋ Gáŋvbôn, tí ɓá ɓay a mɔ̌ hɛʼɔ yá, njuku a fékéri too, a kaw lá mí a ŋgɛŋnɛ́y, í kaw ɓá báŋa mǐ, dáy, tí ɓá a ɓil sɛl ɓá báŋa nɛ́ nyá!»
30Mbây Agiripá, mbây tûlkaw Fɛstús, Berenís rá̧ njukuri ka e kuu kuriri, uru 31dáy, a kú kaw kála, a sa a bazeŋ a kuriri ɓá: «Njuku nɛ́, zi niŋ ɓékéhɛ̧ a há̧na ka ma hûl malé vûn sɛl yá.» 32Dáy, Agiripá sa hí̧ Fɛstús: «Njuku nɛ́ ma ɓá kú pɔŋ nɛ́, a ké mí zi vbí ɓá, ɓay a mɛ̌ ké sé gel a mbây a lúkí Sezar yáy.»
Currently Selected:
Péna a Apotereri 26: pnz
Highlight
Share
Copy

Want to have your highlights saved across all your devices? Sign up or sign in
© 2023 CABTAL