Matəw 23

Uchide da mbə taʼa ba akə unoʼo foro da ba Farasay

(Mak 12.38, 39; Luk 11.43, 46; 20.45, 46)

1Yeso nayn abú akama ba foro abú mbə́ məŋə-anó ma kwi, 2“Mbə taʼa ba akə unoʼo foro ba Farasay amə ba mbənə u num asin Mose imə toʼoro unoʼo Nwiye. 3Anigə mbən ni wumine úŋwən nibə aghəy unó ujum mbənə umə ghayn inen. Asɨmə mbən mə aghəy ngwən unó mbənə umə aghəy damugə cha úŋwən mə aghəy uma unó mbənə úŋwən mə ghayn. 4U mbə koro u aghəy nu udere izi atəw ba chini asɨmə cha umə cha uma ka ba itugə iywere úŋwən kwi anyaʼa izab.”

5 # Mat 6.1 “Umbə aghəy unó ujum da ba zən úŋwən. Umbə tana ukubi mbənə umə ŋwaʼanayn inayn Nwiye zi ungɨŋ tiŋe ijene ukwey, umbə ita iti mə ndwi uma tənə umə zi gha iyad isá. 6Mbə wuʼ usin iwumini Amaʼazənə u kaʼa ufere. Mbə nibi wuʼ ni chomo igun utən mbənə umə imbey ungɨŋ na ibomi ba Jû. 7Mbən wuʼ kwi ba ki chaʼara úŋwən ungɨŋ iyuŋ nə iwumini, mbə nibi wuʼ kwi ba ki tiya úŋwən kwi ‘ataʼa ba.’”

8“Ka mbən beni ngwən kwi ba ki tiya ngwən kwi, ‘Ataʼa ba’ Damugə umbən ujum mbən mə unya anóm anigə mbən yə abá nə ataʼa ba feyn. 9Ka mbən tiya ngwən wa moʼ aki igun isəg kwi ‘Mbaʼ’ Damugə mbən yə abá nə mbaʼ feyn uŋwən yə azobo. 10Ka mbən beni ngwən kwi ba tiya ngwən kwi ‘Masa’ Damugə mbən yə aba nə masa feyn uŋwən mə Kristo. 11#Mat 20.26, 27; Mak 9.35; 10.43, 44; Luk 22.26Wa ŋunə amə u kyayn injən akaʼa a yi mə wa faʼa inen. 12#Luk 14.11; 18.14Wa moʼ ŋunə u beʼere inyo, Nwiye yi swiʼiri uŋwən. Wa ŋunə u swiʼiri inyo, Nwiye yi beʼere uŋwən.”

Yeso ton umugə mbə taʼa ba akə unoʼo nə ba Farasay mə figə unó

(Mak 12.40; Luk 11.39-42, 44, 52; 20.47)

13Yeso ghayn abú úŋwən “Ingəʼ kyayn yi nyi igun inen u mbən ataʼa ba akə unoʼo, nibi nyi igun inen u mbən ba Farasay. U mbən ba figə unó! Iyi nyi damugə mbən ghəbə uchəw ukam anó ufon azobo kwi ka ba nyi uma ungɨŋ, asɨmə cha mbən mi nyi. Cha mbən di sayn kwi ba mbənə umə kaba inyi u nyi.” 14[Ingəʼ kyayn yi nyi igun inen u mbən ataʼa ba akə unoʼo, nibi nyi igun inen u mbən ba Farasay, umbən ba figə unó! Mbən yə tama ayey uti inum u aghəy uma. Mbən bə aghəy nigə, mbən si chaʼara Nwiye akə agha sá, Nwiye yi zi u saʼa nu u chigə abugə igun inen].

15“Ingəʼ kyayn yi nyi igun inen u mbən ataʼa ba akə unoʼo, nibi nyi igun inen u mbən ba Farasay, umbən ba figə unó. U yi zi damugə mbən bə kwene iba, nibə yeŋ ubey ujum da ibeŋe wa moʼ kwi u beni anó Nwiye. Amaʼazənə u beni, mbən aghəy kwi u nyi asin ingəʼ chigə ngwən ighari bigə.”

16“Ingəʼ kyayn yi nyi igun inen u mbən ifəg nu mbən mə tey inji abú ba.” Mbən yə ghayn kwi, “Wa moʼ bə meʼe ma tiya imbəŋ Nwiye, ayi chigə ma ibuw asɨmə ubə meʼe ma tiya gol ŋunə amə ungɨŋ imbəŋ Nwiye, u yi aghəy anó zənə yə meʼe ma igun. 17Mbən mə ifəg nibə amə uneŋ! Aghəy zənə achigə ghəy zi amə zayn? Amə gol kə amə imbəŋ Nwiye, nu amə aŋwən ghəy kwi gol wu mə ghəy zayn zayn? 18Mbən yə nibə ghayn kwi, ‘Wa moʼ bə meʼe ma igun adiŋi ifá, ayi chigə ibuw asɨmə u bə meʼe ma igun u aghəy mbənə u mə siyə igun adiŋi ifá, u yi aghəy anó zənə yə meʼe ma igun.’ 19Mbən mə kwaʼa ifəg! Ghəy zənə a chigə zi amə zayn? Amə aghəy ifá kə adiŋi zənə amə aghəy kwi aghəy ifá amə aghəy Nwiye? 20Mbən kyayn kwi, wa bə meʼe ma igun adiŋi ifá, anigə yə meʼe ma igun adiŋi wu nibi meʼe ma igun u aghəy ujum mbənə umə igun adiŋi wu. 21Mbən nibi kyay kwi, wa bə məʼe ma tiya imbəŋ Nwiye, anigə yə məʼe imbəŋ wu nibi məʼe wa ŋunə umə chomo ungɨŋ imbəŋ Nwiye wu. 22#Mat 5.34Wa bə meʼe ma tiya azobo, yə meʼe atən ufon Nwiye nibi meʼe wa ŋunə umə chomo igun.”

23“Ingəʼ kyayn yi nyi igun inen u mbən ataʼa ba akə unoʼo nibi nyi igun inen u mbən ba Farasay. Umbən ba figə unó! Iyi nyi damugə mbən yə ghaba u aghəy mbənə mbən mə tiya akə mint, dill foro kumin akə uba ighum anigə inaʼ aba feyn abú Nwiye. Asɨmə mbən yə waʼa unó kyayn mbənə umə ungɨŋ unoʼo ni anó imə aghəy unó mbənə u koʼoro ifigi Nwiye, imə idiri ba foro imə aghəy unó akə asəʼ. Yə boŋ kwi mbən aghəy unó mbəŋ ujum mbən waʼ ngwən umoʼ. 24Mbən mə ifəg nu imə tey inji abú ba chini! Mbən yə kaŋa chiyə ajiy ungɨŋ unoʼ asɨmə mbən yə miya ifuŋ.

25Ingəʼ kyayn yi nyi igun inen u mbən ataʼa ba akə unoʼo nibi nyi igun inen u mbən ba Farasay, umbən ba figə unó! Iyi nyi damugə mbən yə səw injim itoʼ nibə səw injim ukaŋ asɨmə u aghəy mbənə usugi ungɨŋ u aghəy mbəŋ amə u aghəy nu mbən feyn akə ikay nə u aghəy nu mə num akə adoʼ. 26U mbən ba Farasay, mbən mə kaŋa ifəg, mbən bə səw ungɨŋ itoʼ, mbən nibi səw ungɨŋ akaŋ anigə injim yi nibi zayn fən.

27 # Ifa 23.3 Ingəʼ kyayn yi nyi igun inen u mbən ataʼa ba akə unoʼo nibi nyi igun inen u mbən ba Farasay, u mbən ba figə unó. Iyi nyi damugə mbən chomo ni utəw isəg mbənə u zoʼo akə imbəm. Itə məŋərə aba isəg asɨmə ungɨŋ sugi nə uwə̂ uwu ba foro nə ighəy iboŋ chini. 28Aba isəg, mbən chomo ni ba mbənə umə aghəy unó mbənə ukoʼoro asɨmə aba ungɨŋ, unó figi nə unó iboŋ si sugi ungɨŋ inen.

29Ingəʼ kyay yi nyi igun inen u mbən ataʼa ba akə unoʼo nibi nyi igun inen u mbən ba Farasay, u mbən ba figə unó. Iyi nyi damugə mbən yi buŋe utəw isəy ba ukən Nwiye nibə ŋwaʼ utəw isəg ba mbənə unó ma koʼoro. 30Mbən bə aghəy nigə, mbən ghayn kwi, ‘Mbən di mə amaʼ umbən umbaʼ imbey, nji cha mbən mi bumə ngwən ubugə nə úŋwən izwere ba ukən Nwiye.’ 31Mbən bə mə ghayn nigə, nji mbən si beni kwi mbən mə buŋ akə aghaŋ ba mbənə mbə́ zwere ba ukən Nwiye. 32Mbən ŋuw imbey imara afaʼa zənə umbən mbaʼ imbey ti. 33#Mat 3.7; 12.34; Luk 3.7Mbən mə jugə, mbən mə kwaʼa jugə iboŋ! Mbən mi nod idu asin ingəʼ zənə ngiya? 34Ayə ghayn inen kwi, ayi tom ba ukən, itom ba iwe nibi tom mbə taʼa ba akə unoʼo inen. Mbən yi zwere umoʼ, komo umoʼ azad baʼara, swayn umoʼ akə igwayn ungɨŋ na bumi ba Jû, inwini inya ughəw moʼ ungɨŋ asin feyn iŋu pey ungɨŋ asin chini. 35Anəm ba ujum mbənə umə aghəy unó mbənə ukoʼoro igun isəg, a nyi igun inen. Iti akə anəm Abel ŋunə yə mə aghəy unó mbənə ukoʼoro iŋu pey akə Zakariya ŋunə amə ŋwə̂ Berekiya, ŋunə mbən zwere ungɨŋ ugha asin iwumini nə adiŋi ifá. 36Ayə ghayn asiʼ inen kwi, unó mbəŋ ujum umbi aghəy igun ba mbəŋ akinine.

Yeso wuʼ Yerusanem

(Luk 13.34, 35)

37Yerusanem Yerusanem! Ngwə zwere ba ukən Nwiye nibi itum u mbənə Nwiye tom inen akə atəy. Amə ighari səʼe nu asi kaŋa kaʼ kwi nji mə fere umbə buŋ numugə ingo ingɨ mə fere buŋ ma ungɨŋ iba ma, asɨmə cha ngwə di beni ayə kwi ghəy nigə. 38Zən Nwiye si sayn injən na ifuʼere. 39Ayə ghayn inigə kwi, cha ngwə mi noʼ gha zən aŋu pey Amaʼazənə ngwə mi ghayn kwi, ‘Nwiye zi aborobod igun wa ŋunə u zaʼa akə ukum Asɨyisəg.’”

Currently Selected:

Matəw 23: NGI

Highlight

Copy