Matəw 24

Yeso ghayn damugə umi saʼa imbəŋ Nwiye

(Mak 13.1, 2; Luk 21.5, 6)

1Yeso du ungɨŋ imbəŋ Nwiye sə ŋu ma. Aməŋə-anó ma ŋu abú uŋwən itey ina tənə tə mə ambəŋ Nwiye abú uŋwən. 2Yə ywiri abú uŋwən kwi, “Mbən zən u aghəy mbəŋ ujum? Ayə ghayn asiʼ inen kwi, cha itəy moʼ mi chomo ma igun itəy chini. Umbi tini atəy zəŋ ujum asəy.”

Mbə́ məŋə-anó Yeso umbi zəw ingəʼ u nwini inya ughəw ma

(Mak 13.3-13; Luk 21.7-19)

3Amaʼazənə Yeso chomo asəy igun Ugum Olif, mbə məŋə-anó ma ŋu abú uŋwən aba uma uma pey yi biri abú uŋwən kwi, “Ghayn ina, anó zəŋ ami aghəy aney ngiya? Anwini zənə ami itey kwi ngwə yə zaʼa foro kwi isəg yi nwi amə ngiya?”

4Yeso ywiri abú úŋwən kwi, “Mbən num azom da ka wa moʼ aghəy ma kwi mbən faba. 5Ayə ghayn ney damugə ba nanaʼ umbi zaʼa anigə inum uŋu ukum yeŋ yə ghayn kwi, ‘Umbugə amə wa ŋunə Nwiye zoʼo.’ Umbi ghayn nigə itama ba nanaʼ. 6Mbən mbə zəw kwi ubey mbə maʼa bêd nibi zəw inayn da mugə ubey mə kaba imaʼa bêd, mbən tumə ngwən inyo. Unó mbəŋ ujum umbi mə awu asɨmə kwi cha inwi di si zaʼa ma. 7Ubəy mbi maʼa bêd nə ubey chini. Ubey mbənə ifon mə tumə umbi maʼa bêd nə ubey chini mbənə ifon mə tumə. Ajəgə yi mə awu. Usin mbi mə nyiʼere usin nanaʼ. 8Unó mbəŋ ujum umbi chomo numugə ayey mə zəw ubuʼ Amaʼazənə umə ŋu iti imə ibə́.

9 # Mat 10.22 Amaʼ wu bə koʼo, umbən ba bana umbi ibiya ngwən naʼ kwi u nyi ngwən zwere ngwən. Isəg ujum yi bana ngwən da aŋu. 10Akə amaʼ wu, ibeni fiŋ ba nanaʼ iyi bó. Ba umbi fənə unya uma nibə bana unya uma. 11Ba ukən Nwiye a figə unó nanaʼ umbi du anigə itama ba nanaʼ. 12Umugə ikyugə mi mə ŋuw imbey, cha ba nanaʼ mi wuʼ uma uchini anji zənə mbə́ wuʼi. 13#Mat 10.22Asɨmə wa ŋunə u yimi fiŋ iŋu pey akə inwi, Nwiye yi chi uŋwən angəʼ. 14Ba mbi ghayn ukən uchuŋ uŋu da anó ufon azobo ungɨŋ isəg ujum da ubey ujum zəw. Ubə aghəy nigə, inwi isəg yi zaʼa.”

Ghəy zənə a aghəy kwi ba tebe imbəŋ Nwiye

(Mak 13.14-23; Luk 21.20-24)

15Yeso ŋu imbey ni ghayn abú mbə məŋə-anó kwi, “Amaʼazənə mbən zən anyimi aghəy zənə aghəy kwi ba tebe imbəŋ Nwiye nu Danel wa ukən Nwiye ghayn da aŋwən nu atəm ungɨŋ asin zayn zayn (atəw abú wa ŋunə ufoŋo azayn). 16Ba mbənə umə Judeya u noro ikoʼ iŋu igun igum. 17#Luk 17.31Ka wa moʼ ŋunə umə idəm na swiʼi ma inyi num ughəy mbənə umə ungɨŋ na ma. 18Ka wa ŋunə u mə ambayn wene ŋu ma inum ndwi ma. 19Ungɨŋ uney awu, ingəʼ yi nyi igun ayey mbənə umə ni ibum, iyi nibi nyi igun ayey mbənə umə inoy buŋ. 20Mbən chaʼara Nwiye kwi ka Amaʼazənə mbən mi mə noro duw ma akə amaʼa uchi nu imbayn mə zuwə kə kama aney akuw ba Jû. 21#Nwi 7.14Ayə ghayn ney damugə ba mbi zəw ingəʼ akə amaʼa wu chigə ingəʼ ujum tənə isi noʼo du iti Amaʼazənə Nwiye tana isəg izaʼa pey akinine. Cha ukudu ingəʼ chini umi gha du ni ukudu ingəʼ wu. 22Adi mə kwi cha Nwiye si soboro ma unun uney wu, nji cha wa moʼ mi du angəʼ. Yə soboro unun uney wu da ba mbənə u si choʼo. 23Anigə, wa moʼ bə ghayn inigə akə amaʼa wu kwi, ‘Mbən zən aney wa ŋunə Nwiye zoʼo,’ Kə kwi, ‘Aney uŋwən uwiy ka mbən beni ngwən.’ 24Ayə ghayn ney damugə, ba figə unó mbənə Nwiye zoʼo foro ba ukən Nwiye figə unó umbi du anigə ighəy unwini unó kaka anigə ighəy uyere unó da inji mə awu, ú tama kaba ba mbənə Nwiye choʼo. 25Mbən zəw, mə si ghayn unó mbəŋ ujum inen ki amaʼa wu sə koʼo. 26#Luk 17.23, 24Kə wa moʼ bə ghayn inen kwi, ‘Mbən zən uŋwən yə ungɨŋ imbayn zomo, ka mbən ŋuw ngwən awu,’ Kə kwi, ‘Mbən zən uŋwən yə ungɨŋ atəw na, ka mbə beni ngwən.’ 27Anji zənə imbə́ŋ mə ŋwaʼa aba zənə nyama chugi mə duw awu ŋu pey aba zənə nyama chugi mə nyi, amə nigə Ŋwə̂ Wa mi zaʼa.” 28#Luk 17.37Asin zənə awu aghəy mə akuŋ, aniʼi mbə ŋuw fere akuŋ.

Amaʼazənə Ŋwə̂ Wa mi zaʼa

(Mak 13.24-27; Luk 21.25-28)

29 # Nwi 6.12; Nwi 6.13 Yeso ŋu imbey ni ghayn abú mbə məŋə-anó ma kwi, “Unəy ingəʼ wu mbi bə mey,

Nyamachugi yi fid.

Cha uməg ni bigə,

Itəni ti noʼ azobo ifwayn asəy,

Ughəy mbənə umə azobo umbi nyiʼere.

30 # Nwi 1.7 Amaʼa wu bə koʼo, anwini zənə ami tey kwi Ŋwə̂ Wa yə zaʼa ayi du aton azobo. Anigə ba ungɨŋ inebey ujum igun isəg umbi idey. Umbi zən Ŋwə̂ Wa umə zaʼa ungɨŋ ipaʼ, izən ikay zənə imə abú uŋwən nibi zən iwumini kyayn zənə imə abú uŋwən. 31Itaŋa yi gham azobo. Uyi tom mbə angəd ma uba isəg ikyugə kwi ufere ba uma mbənə u choʼo iti akə aba isəg feyn iŋu pey akə chini.”

Anó zənə mba kweme akə azad fig

(Mak 13.28-31; Luk 21.29-33)

32Yeso ŋu imbey ni ghayn abú mbə məŋə-anó ma kwi, “Mbən kweme anó moʼ abú azad fig. Amaʼazənə itab bó mə chiʼe ifuʼ sə́ duw, mbən kyay kwi imbə́ŋ chebe yə sə zaʼa.” 33Amə ichin ichin kwi mbən bə zən unó mbəŋ ujum, mbən kyay kwi ama zənə Ŋwə̂ Wa mi wene zaʼa si tinə, anigə yə si məŋə uchəw ukam. 34Ayə ghayn asiʼ inen kwi, unó mbəŋ ujum umbi du ki ingwaʼ zəŋ si chigə. 35Azobo ni isəg yi chigə, asɨmə cha inyi inayn mi noʼ chigə ma ibuw.

Cha wa moʼ kyay ma anəy kə Amaʼazənə unó mbəŋ mi num usin

(Mak 13.32-37; Luk 17.26-30, 34-36)

36Yeso ŋu imbey ni ghayn abú mbə məŋə-anó ma kwi, “Cha wa moʼ kyay ma anəy kə Amaʼazənə unó mbəŋ mi du, kaba mbə angəd mbənə umə azobo kə di mə Ŋwə̂ aba mbaʼ ma zeʼe u kyay. 37Anó zənə yə́ aghəy amaʼa Noah, amə nibə a zənə ami aghəy akə maʼ zənə Ŋwə̂ Wa mi wene zaʼa. 38Akə Amaʼazənə ki Nwiye si aghəy kwi imbə́ŋ choʼo une kəbərə usin, ba mə jəgə inugə. Ba mə nama uni bə nama buŋ uma. Mbə́ mə́ aghəy nigə iŋu pey Amaʼazənə Noah nyi ungɨŋ abaŋ ugwi zənə Nwiye ghayn abú uŋwən kwi u tana. 39Cha úŋwən di kyay uma anó zənə yə́ mə́ chigə pey Amaʼazənə imbə́ŋ wu choʼo une kəbərə usin chigə yi num úŋwən uma ujum. Amə nigə ami məŋi Amaʼazənə Ŋwə̂ Wa mi zaʼa. 40Akə amaʼa wu, anóm ubigə mbi mə faʼa ambayn Ŋwə̂ Wa yi num wa feyn isayn wa feyn. 41Ayey ubigə u mbi ŋu woʼo ikywi Ŋwə̂ Wa yi num wa feyn isayn wa feyn. 42Anigə mbən chomo kyiʼi damugə cha mbən kyay ngwən anəy zənə u ngwən Asɨyisəg mi wene zaʼa. 43#Luk 12.39, 40Mbən kyay kwi wa na di bi kyay Amaʼazənə uji mə zaʼa, inji uyi chomo ikyiʼi ki nəmə ina ma da ka uji toʼo ma ina wu. 44Anigə umbən fən, mbən tana inyo damugə Ŋwə̂ Wa yi zaʼa akə amaʼazənə cha mbən mə nəmə uŋwən.”

Wa ŋunə umə faʼa akə fiŋ ujum nə wa ŋunə cha umə faʼa akə fiŋ ujum

(Luk 12.41-48)

45Yeso ŋu imbey ni ghayn abú mbə məŋə-anó ma kwi, “Wa faʼa ŋunə umə faʼa akə fiŋ ujum nibi mə nə iwe nu mbaʼ faʼa ma siy kwi uni ney ba faʼa mbi mbənə umə ungɨŋ na aka umə naʼa ughəy jəgi abú úŋwən akə Amaʼazənə a koʼoro? 46Nwiye yi zi aborobod igun wa ŋunə mbaʼ faʼa ma mbə wene zaʼa, u pey yi zən uŋwən akə faʼa zənə yə́ naʼa abú uŋwən kwi u faʼa.” 47Ayə ghayn asiʼ inen kwi, mbaʼ afaʼa wu yi siy uŋwən kwi uni ney u ghəy ma ujum. 48Abə mə wa faʼa ŋunə cha umə faʼa ma ni fiŋ ujum, uyi ghayn ungɨŋ fiŋ ma kwi uŋu mbaʼ afaʼa yi tiŋe ki zaʼa. 49Anigə u yi ti ni som ba faʼa umbi, ni jəgə nibə nigə nə ubigə unoʼ. 50Mbaʼ faʼa ma yi wene zaʼa anəy zənə cha yə mə nəmə uŋwən foro akə ama nu cha umi kyay. 51U yi pey yi zi ingəʼ atəw ma anigə aghəy u zəw ingəʼ numugə ba figə unó mə zəw asin umi mə idey koro asoŋ.

Currently Selected:

Matəw 24: NGI

Highlight

Copy