Matəw 22

Inayn maʼa da inama

1Yeso nibi ighayn inay maʼa abú ba ukyay ungɨŋ imbəŋ Nwiye foro abú ba ukyay ungɨŋ abey kwi, 2“Anó ufon azobo yə chomo numugə ufon moʼ kaʼ inama abú ajoŋ ma. 3Yə tom ba faʼa ma kwi u ŋu tiya ba mbənə yə́ kaʼa akə inama wu. Ba faʼa wu ŋu tiya anigə cha mbə́ di zaʼa.”

4Yə tom ba faʼa chini ghayn kwi, “Mbən ŋu ghayn abú ba mbənə wə́ kaʼa úŋwən kwi amaʼ si koʼ, mə si tana u aghəy ujum. Mə si wa unom ipoŋ ŋunə uzaʼa nibi wa nyə̂ nu ujəyi ikwey koŋo anji chuŋ. U aghəy ujum si siyə awu. Mbən zaʼa ijəg inama.”

5Ba wu zəw anó zəŋ, anigə cha mbə num uma akə anó moʼ. Mbə du uma, umoʼ ŋu ma ambayn, uchini ŋu ma usin iyuŋ uma. 6Uchini ibiya ba faʼa wu isom úŋwən akə inji iboŋ zwere. 7Ufon wu sɨy itəm anigə icha usogwi ma kwi mbən ŋuw zwere ba mbənə mbə zwere umbəŋ ba faʼa ituŋ abey ma.

8“Anigə yə́ ghayn abú ba faʼa ma kwi, ‘Amaʼ ijəg inama zəŋ si koʼ, asɨmə cha ba mbənə mə kaʼa koʼo uma ijəg inama zəŋ.’ 9Mbən ŋuw ijugi inji itiya ba jum mbənə mbən zən ə boʼo u zaʼa ijəg inama zəŋ.” 10Anigə ba faʼa wu du ŋu ijugi inji pey yi fere ba ujum mbənə mbə́ zən ə, u mbənə umə aghəy unó mbənə ukoʼoro foro u mbənə umə aghəy unó iboŋ. Ba wu ujum nyi ungɨŋ na inanaʼ wu isugi.

11“Amaʼazənə ufon wu ŋu nyi ungɨŋ na inama wu, yə ney ba mbənə u zaʼa akə inama wu. Yə zən anóm moʼ nu cha yə zi ma ndwi inama, 12anigə yə́ biri abú uŋwən kwi, ‘Inyi azi, ngwə chigə ngiya nyi akəŋ nu cha ngwə zi ayə ndwi inama?’ Amə́ chama anó moʼ abú anóm wu ighayn.”

13 # Mat 8.12; 25.30; Luk 13.28 Anigə, ufon wu ghayn abú ba faʼa ma kwi, “Mbən kod ubugə ma nibi kod ughəw ma ŋu maʼ uŋwən isəg asin imbiri nu amə asin zənə ba mi mə idey ikoro asoŋ.”

14Nwiye yə tiya ba nanaʼ asɨmə u yə choʼo aba ba kerekere.

Ibiri da anó ni mə naʼa ukab tag

(Mak 12.13-17; Luk 20.20-26)

15Ba Farasay du ŋu tana umugə umi zi atam abú Yeso akə inayn ma. 16Anigə mbə tom mbə məŋə-anó uma ni ba mbənə mbə́ mə́ aba ufon Herod abú uŋwən kwi u ŋuw ghayn abú uŋwən kwi, “Ataʼa ba mba kyay kwi ngwə yə ghayn asiʼ foro kwi ngwə yə itey asiʼ da inji zənə Nwiye mə kaba kwi ba chomo. Cha ngwə mə goro ayə wa kə amə wa ukyayn cha ngwə mə aghəy ayə aghɨ. 17Ghayn inen akinine, ngwə kono kwi ngiya? Noʼo mə tey kwi mba naʼa tag abú Kayisa kə ka mba naʼa ngwa?”

18Yeso kyay uniy ŋunə mbə́ mə́ itə́ anigə yə́ ghayn kwi, “Umbən ba figə unó! Mbən mə kaba ikwaʼara aŋu da ngiya? 19Mbən tey ukab ŋunə mbən mə tu tag awu iniŋ” 20Amaʼazənə mbə́ tey abú uŋwən, yə́ biri abú úŋwən kwi, “Ifigi zəŋ nə ukum ŋunə amə uyi ngwa?”

21Mbə́ ywiri kwi, “A mə iyi Kayisa.” Anigə yə́ ghayn abú úŋwən kwi, “Mbən naʼa u aghəy Kayisa abú Kayisa nibi naʼa u aghəy Nwiye abú Nwiye.”

22Amaʼazənə mbə́ zəw anó zəŋ, mbə́ yere anigə isayn uŋwən iŋu uma.

Ibiri da anó ni zəmə

(Mak 12.18-27; Luk 20.27-40)

23 # Ifa 23.8 Aba anəy zənə Yeso ghayn anó da inaʼ u aghəy Kayisa abú Kayisa, ba Sadusi moʼ nu umə ghayn kwi cha ba mi zəmə ŋu abú Yeso pey yi biri kwi, 24“Ataʼa ba, Mose ghayn kwi, ‘Anom bə ku ni cha u bə́ ma buŋ, unya anóm ma yi nam ayey ŋunə ukuw iwa da ibə́ buŋ nə uŋwən nu ayi mə buŋ unya anóm ma ŋunə yə kuw.’ 25Akinine unya anóm isambigə moʼ mə akaʼa inja, uyi imbey nam iku nu cha ubə́ ma buŋ, anigə unya anóm ma nam ayey uti wu. 26Unya anóm wu nibi ku nu cha ubə ma buŋ, unya anóm iŋu pey akə uta nibi nam ayey wu cha u bə́ ma buŋ. Yə́ aghəy aba nigə iŋu pey akə unya anóm wu isambigə. 27Ayey wu nibi nwi ku. 28Amaʼazənə ba mi zənə, ayey wu mi mə uyey ngwa akaʼa unya anóm wu isambigə numugə úŋwən uma ujum nam uŋwən?”

29Yeso ywiri abú úŋwən kwi, “Mbən si faba damugə cha mbən kyay anó zənə amə ungɨŋ Aŋwaʼanayn Nwiye kə ikyay ikay Nwiye. 30Amaʼazənə ba mi zəmə, cha umi nam kə cha buŋ ana inama, umbi chomo nə angəd mbənə umə azobo. 31Amə da anó izəmə, cha mbən di si kaŋa foŋ anó zənə Nwiye ghayn inen? Yə ghayn kwi, 32‘Amə Nwiye Abraham, Nwiye Azik foro Nwiye Yakob.’ Cha uŋwən mə ma Nwiye uwu ba, amə Nwiye ba mbənə umə ikay.”

33Amaʼazənə akama ba wu zəw unó mbəŋ, mbə́ yere unó mbənə yə́ mə́ itey.

Noʼo ŋunə uchigi unoʼo mbi ujum

(Mak 12.28-34; Luk 10.25-28)

34Amaʼazənə ba Farasay zəw kwi Yeso si kəbərə uchəw ba Sadusi, Mbə́ ŋu fere iŋu abú uŋwən. 35Wa moʼ akaʼa úŋwən nu amə ataʼa ba akə unoʼo biri inayn abú uŋwən da izi atam abú uŋwən. Yə biri kwi, 36“Ataʼa ba, noʼo ŋunə uchigə unoʼo mbi ujum amə ŋwayn?”

37Yeso ywiri abú uŋwən kwi, “Ngwə wuʼ Asɨyisəg Nwiye akə fiŋ ujum, akə azugə ujum foro akə iti kono ujum. 38Noʼo ŋunə amə uŋwən u chigi unoʼo mbi ujum. 39Uŋunə uniŋe akuŋ nu umə chini chin amə kwi, ‘Ngwə wuʼ wa ŋunə umə tinə ma inji iyad numugə ngwə wuʼe inji inyo.’ 40#Luk 10.25-28Unoʼo ujum nə unó ujum mbənə ba ukən Nwiye ŋwaʼanayn umbə chi ungɨŋ unoʼo mbəŋ ubigə.”

Ibiri da wa ŋunə Nwiye zoʼo

(Mak 12.35-37; Luk 20.41-44)

41Amaʼazənə ba Farasay fere asin feyn, Yeso biri abú úŋwən kwi, 42“Mbən mə kono kwi ngiya da wa ŋunə Nwiye zoʼo?” Amə ajoŋ ngwa?

Mbə́ ywiri kwi, “Amə ŋwə̂ akə aghaŋ ufon Dafid.”

43Yeso biri abú úŋwən kwi, “Yə sí chigə ngiya Azugə Nwiye aghəy Dafid tiya uŋwən akə Asɨyisəg?” Ufon Dafid ghayn kwi,

44“Asɨyisəg ghayn abú uŋu Asɨyisəg kwi,

‘Chomo akəŋ inyi aba bugə jəgi

Pey Amaʼazənə ami zi umbə ba bana

Injə aton aghəw.’

45Ufon Dafid mbə tiya uŋwən akə Asɨyisəg uŋwən si mə ŋwə̂ akə aghaŋ ufon Dafid ngiya?” 46Cha wa moʼ di kyay iywiri anó zənə yə́ biri. Iti aney wu, cha wa moʼ awu nu yə́ kyay iyimə fiŋ ibiri anó moʼ abú uŋwən.

Currently Selected:

Matəw 22: NGI

Highlight

Copy