Matəw 21

Yeso nyi a Yerusanem ni ufon

(Mak 11.1-11; Luk 19.28-40; Jon 12.12-19)

1Amaʼazənə Yeso nə mbə məŋə-anó ma mə sə baʼa ŋu pey Yerusanem, mbə pey Betefage igun Ugum Olif. Yeso cha mbə məŋə-anó ubigə, 2ighayn abú úŋwən kwi, “Mbən ŋuw ungɨŋ abey zənə amə imbey inen, aba umugə mbən mə nyi wu, mbən yi zən jakas nu u tiŋe, nə ŋwə̂ jakas awu iyad, mbən za num zaʼa naʼ iniŋ. 3Wa moʼ mbə biri anó moʼ inen, mbən ghayn kwi Asɨyisəg yə kaba, aba ighara awu u yi sayn mbən num izaʼa.”

4Anó zənə num usin da anó zənə wa ukən Nwiye ghayn adu akə asiʼ kwi,

5Mbən ghayn abú ba Ziyon,

“Zən, ungwə ufon yə zaʼa inen kwi,

yə num inyo ma asəy anigə u yə yeŋ igun jakas,

foro igun ŋwə̂ jakas.”

6Mbə məŋə-anó wu ŋu aghəy aba anji zənə Yeso ghayn abú úŋwən. 7Mbə́ ŋu nə jakas wu foro ŋwə̂ jakas pey yi zere ndwi uma igun jakas wu anigə Yeso koʼ chomo igun. 8Akama ba nanaʼ zere ndwi uma igun inji, u chini ŋu səg itab uzad ŋu zere igun inji. 9Akama ba zənə yə mə yeŋ ŋuw imbey foro u mbənə mbə́ mə́ yeŋ zaʼa anjim mə́ yeŋ yə kyay ghayn kwi,

“Mba yere ŋwə̂ ufon Dafid,

Nwiye zi aborobod igun wa ŋunə u zaʼa akə ukum Asɨyisəg,

Mba yere Nwiye.”

10Amaʼazənə Yeso nyi a Yerusanem, ba kyay ighəy asin wu ujum anom, anigə ba biri kwi, “Wa ŋunə amə ngwa?”

11Akama ba wu ghayn kwi, “Uŋwən amə Yeso ŋunə amə wa ukən Nwiye. Yə noʼo Nazared á Galeli.”

Yeso ŋu nyi ambəŋ Nwiye

(Mak 11.15-19; Luk 19.45-48; Jon 2.13-22)

12Yeso ŋu nyi ungɨŋ imbəŋ Nwiye pey yi fuw ba mbənə mbə́ mə́ fənə u aghəy awu foro u mbənə mbə́ mə́ zono. Yə gha ugayi abú ba mbənə mbə́ mə́ koboro ukab nibi igha utən abú ba mbənə mbə́ mə́ fənə ubuŋ ikəbərə asey. 13Yə ghayn abú úŋwən kwi, “Ayə ungɨŋ Aŋwaʼanayn Nwiye kwi, u mbi sə tiya inyi na kwi ‘ina ichaʼara Nwiye’ anigə mbən num beŋe akə asin nu iji mə paʼa awu.”

14Ifəg nə ubuʼiri ba ŋu abú uŋwən ungɨŋ imbəŋ Nwiye anigə yə́ zwey úŋwən. 15Asɨmə, Amaʼazənə ba ukyayn ambəŋ Nwiye foro ba mbənə umə taʼa ba akə unoʼo zəw uyere unó mbənə yə́ mə́ aghəy, nibi zəw umugə buŋ kuŋe mə kyay ungɨŋ imbəŋ Nwiye ghayn kwi, “Mba yere ŋwə̂ ufon Dafid.” Mbə́ sɨy itəm.

16Anigə mbə́ biri abú Yeso kwi, “Ngwə zəw anó zənə buŋ mbəŋ mə ghayn?”

Yeso ywiri abú úŋwən kwi, “Aŋ ayə zəw. Cha mbən di si foŋ ngwən unɨŋ Aŋwaʼanayn Nwiye kwi,

mbə si taʼa buŋ kuŋe

mbən nibi taʼa buŋ ubó kwi u yere aŋu.”

17Amaʼazənə yə ghayn nigə, yə noʼ sayn úŋwən idu ungɨŋ asin wu iŋuw Betani pey yi ney awu.

Yeso naʼa indon abú azad fig

(Mak 11.12-14, 20-24)

18Asə afəfəb, Amaʼazənə Yeso mə wene ŋuw Yerusanem, injəy mə zaŋa abú uŋwən. 19Yə zən azad fig, iyad inji anigə yə ŋu iney. Cha yə di zən ma utɨŋi moʼ awu, yə zən abəma ifuʼ. Anigə yə ghayn abú azad fig wu kwi, “Cha ngwə mi noʼo gha ikuw ayə itɨŋi.” Aba ighari wu, azad fig wu zom.

20Amaʼazənə mbə́ məŋə-anó ma zən nigə, mbə́ yere anigə ibiri kwi, “Azad fig zəŋ si zom aba ighari feyn ni ngiya?”

21 # Mat 17.20; 1Ko 13.2 Yeso ywiri abú úŋwən kwi, “Ayə ghayn asiʼ inen kwi, mbən bə mə ni ibeni fiŋ nu cha mbən mə məŋərə ngwən nji cha mbən mi aghəy ngwən aba anó zənə aghəy abú azad fig zəŋ. Asɨmə mbən yi ghayn kaba abú ugum uŋu kwi ‘Ŋuw fwayn ungɨŋ iba’ Uyi aghəy nigə. 22Mbən bə mə ni ibeni fiŋ nji Nwiye yi naʼ u aghəy ujum mbənə mbən chaʼara uŋwən ibiri abú uŋwen.”

Ibiri da asin zənə ikay Yeso mə noʼo akuŋ

(Mak 11.27-33; Luk 20.1-8)

23Amaʼazənə Yeso ŋu nyi ungɨŋ imbəŋ Nwiye, ba ukyayn ambəŋ Nwiye ni ba ukyayn ungɨŋ abey ŋu abú uŋwən Amaʼazənə yə́ mə́ itey unó. Mbə́ pey yi biri abú uŋwən kwi, “Amə ukudu ikay ngiya ngwə mə aghəy unó mbəŋ awu? Amə ngwa naʼa ikay wu inigə?”

24Yeso ywiri abú úŋwən kwi, “A yi biri anó feyn inen, mbən bə ywiri aŋu, ayi nibi ghayn asin zənə a num ikay wu ki sə aghəy unó mbəŋ. 25Amə Nwiye yə́ naʼa ikay abú Jon kwi uni naʼa une kə amə ba?”

Mbə́ zəw nigə ti ni taŋa uma uma ghayn kwi, “Mba bə ghayn kwi amə Nwiye nji uyi biri ina kwi, ‘Yə bə mə nigə mbən si ki beni ngwən uŋwən da ngiya?’ 26Mba bə ghayn kwi, ‘Amə ba.’ Mba yə goro akama ba zəŋ damugə úŋwən u ma ujum beni kwi Jon mə́ wa ukən Nwiye.”

27Anigə mbə́ ywiri abú Yeso kwi, “Cha mba di kyay.”

Yə́ nibi ghayn abú úŋwən kwi, “Cha ami nibi ghayn aŋu wa ŋunə u naʼa ikay iniŋ kwi aghəy unó mbəŋ.”

Inayn maʼa da buŋ anom ubigə

28Yeso imbəy ghayn abú úŋwən kwi, mbən kono injən kwi ngiya? Anom moʼ mə ni buŋ ma ubigə. Yə ŋu abú uyi imbey pey yi ghayn abú uŋwən kwi, “Ŋwə̂, ŋuw faʼ ungɨŋ imbayn fayin akə̂choŋ.” 29Ŋwə̂ wu ywiri abú uŋwən kwi, “Cha ami ŋu.” Asɨmə yə beŋe fiŋ ma iŋu.

30Wa wu ŋu abú ŋwə̂ anom wiy pey yi ghayn abú uŋwən aba ichin ichin. Yə́ ywiri kwi, “Aŋ, mbaʼ ayi ŋu.” Asɨmə cha yə ŋuw ma.

31Amə ngwa akaʼa buŋ anom mbəŋ ubigə yə́ aghəy anó zənə mbaʼ uma kaba?

Mbə́ ywiri kwi, “Amə uyi imbey.”

Anigə Yeso ghayn abú úŋwən kwi, “Ayə ghayn asiʼ inen kwi, mbə fere ukab tag foro mbə ney isəg u mbi dey nyi ungɨŋ anó ufon Nwiye ki umbən.” 32#Luk 3.12; 7.29, 30Ayə ghayn nigə damugə, Jon ŋunə yə́ mə́ naʼa une zaʼa inen itey inji zənə ikoʼoro asɨmə cha mbən di beni ngwən anó zənə yə́ ghayn. Amə mbə́ fere ukab tag foro mbə ney isəg mbə beni anó zənə yə́ ghayn. Ka ba Amaʼazənə mbən zən anó zəŋ, cha mbən di beŋe ngwən itən fiŋ ibeni anó zənə yə́ mə́ ghayn.

Inayn maʼa da ba mbə́ num imbayn fayin

(Mak 12.1-12; Luk 20.9-19)

33Yeso ghayn abú úŋwən kwi, “Mbən zəw inayn maʼa chini, wa mbayn moʼ kon imbayn fayin. Yə kod ukam ighab imbayn wu, itoŋ ubəg nu u mə tana unoʼ fayin awu ungɨŋ. Chim ina anəŋ nu umə təmə akuŋ ni nəmə imbayn wu. Yə aghəy nigə inaʼ imbayn wu abú ba moʼ kwi uni faʼa ungɨŋ. Yə naʼ nigə noʼ ŋu abey chini. 34Amaʼazənə mbə́ mə́ ika itɨŋi fayin akoʼ, anigə wa wu tom ba faʼa ma kwi u ŋuw i num a ma mə aba akə itɨŋi fayin wu.

35Ba mbənə mbə́ mə́ faʼa ungɨŋ imbayn ibiya ba faʼa wu isom ufeyn, zwere u feyn, itum u feyn akə atey. 36Wa mbayn wu tom ba faʼa chini nu u naʼa chigə umbi imbey. Ba wu ibiya úŋwən ighəy aba ichin ichin abú úŋwən. 37Wa wu si nwi itom ajoŋ ma abú úŋwən. Yə tom nigə ghayn kwi, ‘Umbi wumini inyi ajoŋ.’

38Asɨmə amaʼazənə ba mbənə mbə mə faʼa awu ungɨŋ imbayn zən ajoŋ ma, mbə́ ghayn uma uma kwi, ‘Amə ajəgə iku ma uŋu, mbən zaʼa mba zwere uŋwən da ijəgə u ghəy ma.’ 39Mbə ghayn nigə ibiya uŋwən imaʼ anjim ukam ambayn fayin wu, izwere uŋwən.”

40Yeso si nwi ibiri abú úŋwən kwi, “Amaʼazənə wa akə imbayn wu bə zaʼa, umi yini ngiya abú ba mbənə umə faʼa ungɨŋ imbayn wu?”

41Mbə ywiri kwi, “U yi zwere izəŋ ba wu akə inji iboŋ, si naʼ imbayn wu abú ba chini mbənə umi mə naʼa a ma mə aba akə itɨŋi wu akə Amaʼazənə akoʼoro.”

42Yeso ghayn abú úŋwən kwi, “Cha mbən di si foŋ ngwən anó zənə amə ungɨŋ Aŋwaʼanayn Nwiye nu a ghayn kwi,

itəy zənə mbə buŋe na tono

si beŋe akə itəy ijugi na,

anó zəŋ amə Asɨyisəg aghəy,

amə ayere anó ina.”

43Anigə ayə ghayn inen kwi, “Nwiye yi num anó ufon ma inen si naʼ abú ba mbənə umi mə aghəy unó mbənə u kaba. 44[Wa ŋunə u gow igun itəy wu uyi saʼa akə uba uba. Itəy wu ba fwayn igun wa moʼ, iyi woʼo uŋwən.”]

45Amaʼazənə ba ukyay ambəŋ Nwiye foro ba Farasay zəw inayn maʼa ma, mbə kyay kwi uyə ghayn unó mbəŋ da úŋwən. 46Anigə mbə́ kaba ibiya uŋwən, asɨmə mbə́ mə́ goro akama ba damugə mbə́ beni kwi Yeso mə wa ukən Nwiye.

Currently Selected:

Matəw 21: NGI

Highlight

Copy