Matəw 20
20
Inayn maʼa da ba faʼa ungɨŋ imbayn fayin
1Yeso ghayn abú mbə məŋə-anó ma kwi, anó ufon azobo chomo numugə wa mbayn duw afəfəb iŋu kaba ba faʼa kwi uŋuw faʼ ungɨŋ imbayn fayin ma. 2Amaʼazənə yə si tana ni ba faʼa wu kwi iyi tu uŋwən akə ukab afaʼa aney feyn, yə cha úŋwən ungɨŋ imbayn.
3Yə gha duw akə unyama ibəw iŋu asin iyuŋ pey yi zən ba chini awu nu mbə təm cha umə ghəy ma aghəy moʼ. 4Anigə yə ghayn abú úŋwən kwi, “Mbə nibi ŋu faʼ ungɨŋ inyi imbayn fayin ayə naʼ aghəy zənə akoʼoro inen.” 5Mbə zəw nigə inoʼ ŋu.
Yə gha du amaʼazənə ingom ka, foro akə unyama uta angom anigə ighey aba ichin ichin. 6Akə unyama itɨŋ angom, yə gha du yi zən ba chini nu ugha itəm iyad iyad. Yə́ biri abú úŋwən kwi, aton zənə mbə zaʼa itəm akəŋ mə chiŋe injən anəy feyn feyn ibuw amə da ngiya?
7Mbə ywiri abú uŋwən kwi, “Amə da mugə cha wa moʼ num ngwa kwi ba ŋuw ifaʼ abú uŋwən.”
Amaʼazənə mbə ywiri nigə, yə ghayn abú úŋwən kwi, “Mbən nibi ŋu faʼ ungɨŋ inyi imbayn fayin.”
8“Amaʼazənə injəʼ si chig, wa akə imbayn ghayn abú wa ŋunə umə iney afaʼa ma kwi, ‘Tiya ba faʼa itu úŋwən,’ ti akə u mbənə mə nwi inum ki sə ŋuw akə u mbənə mbə dey zaʼa.”
9“Amaʼazənə ba faʼa mbənə mbə num úŋwən akə unyama itɨŋ anjaʼ ŋu kwi utuʼ úŋwən, mbə́ naʼ ukab afaʼa aney feyn abú wa feyn feyn akaʼa úŋwən.” 10Amaʼazənə ba mbənə mbə́ ti afaʼa afəfəb ŋu kwi utuʼ uŋwən, mbə kono kwi umbi num ukab nanaʼ. Asɨmə mbə naʼ aba ukab afaʼa aney feyn abú wa feyn feyn akaʼa úŋwən. 11Amaʼazənə mbə́ num ukab wu, mbə ti ni zuʼe wa mbayn wu, 12ghayn kwi, “Anom mbənə mbə nwi zaʼa faʼ abə ma akə awa feyn anigə yə itu úŋwən ichin ichin nə uma mbənə ma zi zi akə afaʼa achugi zuʼe ngwa.”
13“Yə ghayn abú anóm moʼ akaʼa anóm wu kwi, ‘Inyi azi zəw! Cha adi gow aŋu anó moʼ inen. Aka mba beni kwi ayi tu ngwən ukab afaʼa aney feyn? 14Mbən num úŋwən ukab iŋu.’ Ayə kaba itu ba mbənə mbə́ nwi zaʼa akə unun ukab ŋənə atu ngwən. 15Cha ikay iniŋ ighəy unó zənə akabay nə uŋu ukab? Kə mbən waʼa kuwə imbəw da mugə amə fiʼi ubugə?”
16 #
Mat 19.30; Mak 10.31; Luk 13.30 Yeso nwi ghayn kwi, “Anigə ba mbənə usi nwi ayi sə ba imbey. Umbənə mbə mi imbey umbi si nwi.”
Yeso ghayn ano da iwu ma iŋu pey akə ighari ta
17Amaʼazənə Yeso nə mbə məŋə-anó ma foro ba chini mə koʼo ŋuw á Yerusanem, umugə mbə mə iyeŋ ŋuw, yə num mə məŋə-anó ma ighum cho bigə u ŋu iyad anigə ughayn abú úŋwən kwi, 18“Mbən zəw! Mba yə koʼo ŋuw á Yerusanem, mba yi mbə pey awu, umbi yimə Ŋwə̂ Wa naʼ abú ba kyayn ambəŋ Nwiye foro abú ba mbənə umə taʼa ba akə unoʼo. Ba wu umbi sob kwi uzwere uŋwən. 19Umbi ghey nigə inaʼ uŋwən abú ba mbənə akama ba Jû kwi ubaʼara uŋwən swayn uŋwən akə igwayn, anigə ikom uŋwən azad abaʼaray. Igun unəy uta, Nwiye yi zəmə uŋwən.”
Ingo buŋ Zebedi ŋu biri anó moʼ abú Yeso
20Ingo buŋ Zebedi ŋu abú Yeso nə buŋ ma. Yə pey yi zum utəw nwi ifigi ma ibiri anó moʼ abú uŋwən.
21Yeso biri abú uŋwən kwi, “Ngwə mə kaba kwi faʼa ngiya inigə?”
Yə wyiri abú uŋwən kwi, “Beni kwi umbəŋ buŋ mbənə ubigə umbi chomo aboʼo injigə ungɨŋ injə anó ufon. Ufeyn chomo aba bugə jəgi ufeyn chomo aba bugə kyabay.”
22Yeso ghayn abú úŋwən kwi, “Cha mbən kyay ngwən anó zənə mbən mə biri, mbən mi kyay zəw ukudu ingəʼ ŋənə ami zəw?”
Mbə́ ywiri kwi, “Mba yi kyay zəw.”
23Yeso ghayn abú úŋwən kwi, “Mbən yi kyay zəw ukudu ingəʼ ŋunə ami zəw asɨmə akama inyi asin ichoʼ wa ŋunə umi chomo inyi abugə jəgi akə abugə ikyabay. Usin mbəŋ amə umbi ba mbənə uŋu Mbaʼ si tana isiy abú úŋwən.”
24Amaʼazənə mbə məŋə-anó mbi ighum zəw anó zəŋ, mbə sey itəm nə unya anóm wu ubigə. 25#Luk 22.25, 26Yeso tiya úŋwən uma ujum asin feyn ghayn kwi, “Mbən kyay kwi ba mbənə umə tumə ba mbənə akama ba Jû umbə́ paʼa anó igun ma, ba kyayn uma mbə tumə úŋwən ni ikay. 26#Mat 23.11; Mak 9.35; Luk 22.26Cha mi mə ma nigə nə umbən, wa ŋunə umə kaba imə ukyayn injən kaʼa, u mə wa faʼa abú ba umbi ujum. 27Wa ŋunə u kaba mi mə imbey u mə sob abú ba mbi ujum. 28Cha Ŋwə̂ Wa di zaʼa ma kwi u faʼa abú uŋwən, yə zaʼa ifaʼ abú ba anigə inaʼ itəni ma iziya utəw ba nanaʼ.”
Yeso zwey anom ubigə nu mbə figə
29Amaʼazənə Yeso nə mbə məŋə-anó ma mə duw á Jeriko akama ba niŋe anjim uma. 30Anom ubigə moʼ nu amə ifəg chomo iyad inji. Amaʼazənə mbə zəw kwi Yeso yə chigə, mbə́ kyayn akə ikay ghayn kwi, “Asɨyisəg, Ŋwə̂ Dafid, diri ngwa!”
31Akama ba wu kyay abú úŋwən ghayn kwi mbə chuʼ izi. Asɨmə mbə́ mə́ tana kyay ghayn kwi, “Asɨyisəg Ŋwə̂ Dafid diri ngwa!”
32Yeso təm itiya úŋwən ibiri kwi, “Mbən mə kaba kwi aghəy anó ngiya inen?”
33Mbə ywiri abú uŋwən kwi, “Asɨyisəg, mba yə kaba kwi ngwə aghəy mba zən usin.”
34Yeso kənə akə úŋwən, anigə yə bira aghɨ uma. Aba ighari wu, mbə ti ni zən usin. Mbə noʼ iniŋe anjim ma.
Currently Selected:
Matəw 20: NGI
Highlight
Share
Copy
Want to have your highlights saved across all your devices? Sign up or sign in
© 2023 CABTAL
