Matəw 18

Wa ŋunə ukwey chigə ungɨŋ anó ufon Nwiye

1 # Luk 22.24 Akə Amaʼazənə Yeso nə mbə məŋə-anó ma mə Kapenahom, mbə məŋə-anó ma ŋu abú uŋwən pey yi biri kwi, “Amə ngwa kwey chigə ba mbi ungɨŋ anó ufon azobo?”

2Amaʼazənə Yeso zəw ibiri wu, yə tiya ŋwə̂ kuŋe moʼ ghəy u təm ifigi uma. 3#Mak 10.15; Luk 18.17Anigə ighayn kwi, “Ayə ghayn asiʼ inen kwi, nigə mbən beŋe chomo ni ŋwə̂ kuŋe uŋu cha mbən mi nyi ungɨŋ anó ufon azobo. 4Anigə, wa ŋunə u swiʼiri inyo ma asey ni ŋwə̂ kuŋe ŋunə yə kwey chigə ba ujum ungɨŋ anó ufon azobo. 5Anigə wa ŋunə u num ŋwə̂ kuŋe moʼ ni ŋwə̂ uŋu anji chuŋ akə uŋú ukum yə num aŋu anji chuŋ.”

Anó da ighəy kwi wa aghəy anó iboŋ

6Yeso ŋú imbey imə ghayn abú mbə məŋə-anó ma kwi, “Wa moʼ injən akaʼa bə aghəy kwi ŋwə̂ moʼ akaʼa u mbənə u beni aŋu aghəy anó iboŋ, nji yə mi boŋ kwi itiŋe itəy ingəŋ kyayn adoʼ ma ŋu maʼa uŋwən ungɨŋ iba sa. 7Ingəʼ yi nyi ungɨŋ isəg da unó mbənə umə aghəy kwi ba aghəy unó iboŋ! Unó mbənə umə aghəy kwi ba aghəy unó iboŋ umbi zaʼa. Asɨmə ingəʼ yi nyi igun wa ŋunə unó wu mi chigə anjim ma zaʼa! 8#Mat 5.30A bə mə kwi injə abugə kə injə ghəw bə mə aghəy kwi ngwə aghəy anó iboŋ, səg wa. Yə iboŋ ngwə jəg itəni nu cha abugə feyn kə nu cha aghəw feyn chigə umugə ngwə mi mə nə ubugə ujum kə ughəw ujum Nwiye maʼa ayə ungɨŋ uwəd nu cha umi noʼo nimə. 9#Mat 5.29Anigə, injə ighɨ bə mə aghəy kwi ngwə aghəy anó iboŋ, chiyə wa! Yə boŋ kwi ngwə jəg itəni ni ighɨ feyn chigə umugə ngwə mi mə nə aghɨ bigə Nwiye maʼa ayə ungɨŋ asin ingəʼ nu cha uwəd mi noʼo nimə.”

Inayn maʼa da injəg nu yə nimi

10 # Luk 19.10 Yeso ŋu imbey ghayn abú mbə məŋə-anó ma kwi, “Mbən zən kwi, ka mbən tebe ŋwən ŋwə̂ moʼ akaʼa buŋ mbənə u beni aŋu. Ayə ghayn inen kwi, mbə́ angəd uma mbənə umə azobo mbə zən ifəg uŋu Mbaʼ ŋunə umə azobo ighari ujum.” 11[Ŋwə̂ Wa zaʼa ichi ba mbənə u nimi angəʼ].#18.11 Cha asin aŋwaʼanayn zəŋ ungɨŋ uŋwaʼanayn moʼ

12“Mbən kono kwi ngiya? Wa moʼ bə mə nə ukɨ injəg anigə ifeyn du nim, a ka umi sayn iti ighumə abəw cho abəw igun ugum iŋu kaba izənə yə nimi? 13Ayə ghayn asiʼ inen kwi ubə zən, u yi wuʼe ma nə injəg wu feyn zənə yə́ nimi chigə umugə umə wuʼi ma nə ighumə abəw cho abəw tənə cha tə di nim. 14Amə ichin ichin numugə ungwən Mbaʼ ŋunə umə azobo cha mə kaba ma kwi ŋwə̂ moʼ akaʼa buŋ mbəŋ unim.”

Wa gow anó iboŋ

15 # Luk 17.3 Yeso ŋu imbey ni ghayn abú mbə məŋə-anó ma kwi, “Ungwə unya bi aghəy anó iboŋ inigə, ŋu ghayn anó zənə uŋwən gow abú uŋwən aba umbən bigə. U bə zwaray anó zənə ngwə mə ghayn beni, ngwə si gha num uŋwən injən akaʼa. 16Asɨmə ubə ki zəw ma anó zənə ngwə ghayn, num wa chini feyn kə ba chini ubigə mbən ŋuw nə úŋwən, da uzənə ubigə kə uta mi beni unó mbənə ngwə ghayn da uŋwən. 17Uŋwən bi ton izwaray abú úŋwən, Ghayn anó wu abú ufere ba Kristo. Uŋwən bi ton izwaray abú ufere ba Kristo, ni ghey abú uŋwən nu mugə ngwə mə aghəy abú wa ŋunə cha udi kyayn ma Nwiye kə numugə ngwə mə aghəy abú mbə fere ukab tag.”

Anó zənə ba beni nə anó zənə ba ton

18 # Mat 16.19; Jon 20.23 Yeso ŋu imbey ni ghayn abú mbə məŋə-anó ma kwi, “A yə ghayn asiʼ inen kwi, anó zənə mbən beni aki igun isəg, Nwiye yi nibi beni azobo, anó zənə mbən ton akə igun isəg Nwiye yi nibi ton azobo.”

19“Anigə ayə ghayn inen kwi, umbən ubigə bi beni anó moʼ aki igun isəg anigə ibiri abú uŋu Mbaʼ, uŋu Mbaʼ ŋunə umə azobo yi aghəy anó wu inen. 20Damugə, asin zənə ba ubigə kə ba uta fere awu akə uŋu ukum, ayi mə akaʼa uma.”

Inayn maʼa da wa faʼa ŋunə cha yə waʼa ma unó iboŋ wa chini

21 # Luk 17.3, 4 Pita ŋu abú Yeso pey yi biri abú uŋwən kwi, “Asɨyisəg, uŋu unya anóm bə aghəy anó iboŋ iniŋ, ami wa unó iboŋ ma ighari səʼe? A waʼ iŋu pey akə ighari isambigə?”

22Yeso ywiri kwi, “Ayə ghayn inigə kwi, akə ma ighari isambigə asɨmə waʼ ighari ighumi isambigə cho sambigə.”

23“Aton zənə aghayn iney amə kwi, anó ufon azobo chomo ni ufon moʼ yə kab inwini ukab ba afaʼa ma.” 24Amaʼazənə yə ti mə nwini ukab wu, mbə́ num wa afaʼa moʼ ŋu abú uŋwən nu u yimi uŋwən ichuʼ miriyon ighum. 25Umugə amə cha ma ukab abú uŋwən iwiy, mbaʼ afaʼa wu ghayn kwi, “U fənə uŋwən nə uyey ma nə buŋ ma foro u aghəy mbənə umə abú uŋwən ujum da iwiy injugə wu.” 26Ŋwə̂ afaʼa wu zum utəw nwi asəy boʼo ubugə abú uŋwən ghayn kwi, “Masa yimə fiŋ a yi wiy ukab wu ujum. 27Ufon wu kənə akə uŋwən sayn, anigə ghayn kwi ka ugha iwiy ma injugə wu.”

28“Asɨmə amaʼazənə ŋwə̂ afaʼa wu duw, yə zən ŋwə̂ afaʼa chini nu yə yimi uŋwən ichuʼ ukɨ feyn. Yə ibiya uŋwən adoʼ iyimi paʼ ghayn kwi, ‘Naʼa ghəy zənə ngwə mə yimə aŋu.’

29Ŋwə̂ afaʼa wu zum utəw nwi asəy boʼo ubugə abú uŋwən ghayn kwi, ‘Yimə fiŋ ayi iwiy ungwə ukab.’ 30Yə ton anigə num uŋwən ŋu zi andəŋ kwi uchomo awu pey Amaʼazənə umi iwiy injúgə wu. 31Amaʼazənə buŋ afaʼa chini zən anó zəŋ, yə ibɨy úŋwən anigə uŋu ghayn anó zənə yə aghəy abú ufon wu. 32Ufon wu tiya ŋwə̂ faʼa ŋunə yə mə yimə uŋwən ighayn abú uŋwən kwi, ‘Ngwə mə ŋwə̂ afaʼa uzəg, mə sayn injugə zənə ngwə mə yimə aŋu awu ujum damugə ngwə boʼo ubugə iniŋ. 33Nji ngwə mi kaŋa diri ungwə unya anji zənə mə diri ayə.’ 34Ufon wu isɨy itəm ghayn u num uŋwən ŋu zi andəŋ kwi u ni nyiyə uŋwən pey Amaʼazənə umi iwiy injúgə wu.”

35“Amə nigə uŋu mbaʼ azobo mi aghəy abú wa feyn feyn injən akaʼa Amaʼazənə cha u waʼa ma unó iboŋ unya ma nə fiŋ ma ujum.”

Currently Selected:

Matəw 18: NGI

Highlight

Copy