Matəw 17

Yeso mbeŋe sə məŋərə

1Amaʼazənə unəy chigə ifəw inoʼ Amaʼazənə Yeso ghayn anó da iwu ma, yə num Pita, Jems foro Jon nu amə unya anóm Jems. Yə́ num nigə ukoʼ iŋu igun ugum sa moʼ asin nu aba úŋwən mə awu. 2Amaʼazənə mbə́ pey awu, inyo ma kyaba ifigi uma. Ifigi ma mə məŋərə ni nyamachugi, ndwi ma ni fuw peŋ. 3U sə ŋu zən Mose nə Elayija du ifigi ma, mbə du nigə ni nayn nə Yeso.

4Pita zən nigə ighayn abú Yeso kwi, “Asɨyisəg, yə boŋ kwi mba yə akəŋ. Ngwə mbə wuʼ, mba yi chimə usɨgə uta akəŋ, afeyn inigə, afeyn abú Mose, afeyn abú Elayija.”

5 # Mat 3.17; 12.18; Mak 1.11; Luk 3.22 Amaʼazənə yə mə́ bugə inayn nigə, ipaʼ nu yə fuw zaʼa kəbərə úŋwən uma ujum. Igəg moʼ nayn wu ungɨŋ ipaʼ ghayn kwi, “Amə uŋu ŋwə̂ ŋunə a wuʼ azəd, inyi fiŋ yə wuʼe ma nə uŋwən. Mbən zəw anó zənə uŋwən mə ghayn!”

6Amaʼazənə mbə məŋə-anó zəw igəg wu, mbə́ gəd kwaʼa ingəʼ anigə igow kəbəre ifigi asey. 7Yeso ŋu bira úŋwən ghayn kwi, “Mbən noʼo atey, mbən mə goro ngwən.” 8Amaʼazənə mbə́ noʼo atey, cha mbə di ni zən uma wa chini chigə akə Yeso ma zeʼe.

9Amaʼazənə mbə́ mə swiʼe awu igun ugum, Yeso chere úŋwən ghayn kwi, “Ka mbən ghayn ngwən ukaŋ ŋunə mbə zən abú wa moʼ pey Amaʼazənə Nwiye mi zəmə Ŋwə̂ Wa.”

10Mbə məŋə-anó wu biri abú uŋwən kwi, “Aton zən mbə taʼa ba akə unoʼo ghayn kwi Elayija yi dey zaʼa amə da ngiya?”

11Yeso ywiri kwi, “Elayija yi dey zaʼa da itana unó ujum anji zənə umi məŋi. 12#Mat 11.14Asɨmə ayə ghayn inen kwi, Elayija si zaʼa anigə cha ba kyayn uma uŋwən. Mbə aghəy abú uŋwən anji zənə yə́ boŋo abú úŋwən. Amə ichin ichin anji zənə Ŋwə̂ Wa mi zəw ingəʼ ubugə ma.” 13Amaʼazənə yə ghayn nigə, utəw mbə məŋə-anó wu zayn kwi u yə inayn abú úŋwən da Jon ŋunə yə́ mə́ naʼa une.

Yeso zwey ŋwə̂ anóm moʼ nu uzugə iboŋ mə ungɨŋ inyo ma

14Amaʼazənə Yeso nə mbə́ məŋə-anó wu wene ŋu kuw akama ba wu, wa moʼ ŋu abú Yeso pey yi zum utəw anwi ifigi ma ghayn kwi, 15“Masa, dire uŋu ŋwə̂! U yə gow afiri, u yə kwaʼa zəw ingəʼ. U yə saʼa gow ungɨŋ uwəd nibə saʼa gow ungɨŋ une. 16Mə num uŋwən zaʼa abú umbə məŋə-anó asɨmə cha u di kyay izwey uŋwən.”

17Amaʼazənə yə ghayn nigə, Yeso wyiri kwi, “Cha umbən ba kinine mə ngwən ni ibeni fiŋ, mbən yə aghəy unó ni cha udi koʼoro. Amə unun amaʼ ngiya ami chomo nə umbən? Ami yimi fiŋ nu mbəŋ akə unun amaʼ ngiya? Mbən num ŋwə̂ anom yugə zaʼa naʼ iniŋ.” 18Amaʼazənə mbə num ŋwə̂ anóm wu ŋu naʼ abú uŋwən, yə nayn abú azugə iboŋ wu, anigə yə du inyo ŋwə̂ wu. Aba ighara wu ŋwə̂ wu boro.

19Mbə məŋə-anó Yeso ŋu abú uŋwən anjim anjim pey yi biri kwi, “Aton zənə cha mba di kyay ichi azugə iboŋ zəŋ amə da ngiya?”

20 # Mat 21.21; Mak 11.23; 1Ko 13.2 Yə ywiri abú úŋwən kwi, “Amə da mugə injən ibeni fiŋ yə keʼe. Ayə ghayn asiʼ inen kwi, mbən bə mə nə ibeni fiŋ kanə imə keʼe ni ŋwə̂ utɨŋi aghəy, mbən mbə ghayn abú ugum uwiy kwi, ‘Noʼ akəŋ iŋu akiy!’ Uyi ŋu. Cha anú moʼ mi chigə ma ngwən ighəy.” 21[Aba imə chaʼara Nwiye ijiyə injəy amə aghəy wa fuw ukudu azugə iboŋ uŋu cha anó chini].#17.21 Cha asin aŋwaʼanayn zəŋ ungɨŋ uŋwaʼanayn moʼ.

Yeso ghayn anó da iwu ma ighari chini

22Amaʼazənə mbə məŋə-anó wu ŋú fere á Galeli, Yeso ghayn abú úŋwən kwi, “U mbi fənə Ŋwə̂ Wa abú ba. 23Ba wu umbi zwere uŋwən, asɨmə igun unəy ta, Nwiye yi zəmə uŋwən.” Amaʼazənə mbə məŋə-anó ma zəw anó zəŋ, akənə sugi ungɨŋ fiŋ uma.

Yeso naʼa ukab tag ambəŋ Nwiye

24Amaʼazənə Yeso nə mbə məŋə-anó ma pey Kapenahom, ba mbənə umə fere ukab tag ambəŋ Nwiye ŋu abú Pita pey yi biri abú uŋwən kwi, “Ungwən taʼa ba mə naʼa ukab tag ambəŋ Nwiye?”

25Pita beni kwi, “Aŋ, uyə naʼa.”

Amaʼazənə Pita nyi ŋu ungɨŋ na, Yeso dey inayn abú uŋwən ibiri kwi, “Sayimon ngwə kono kwi ngwa? Ifon tənə imə akə igun isəg imə num ukab iyuŋ kə utag abú mbi ngwa? Úmə num abú ba abey ma kə abú ba isoʼ?”

26Pita ywiri kwi, “Umbə num abú ba isoʼ.” Yeso ghayn abú uŋwən kwi, “Yə tey kwi cha ba abey ma mi naʼa uma. 27Asɨmə ka mba aghəy ngwa kwi fiŋ ba mbəŋ ibɨ, anigə ŋuw akə animini imaʼ ungwə uniʼ ŋunə umə ibiya su awu. Ghəw su zənə ngwə mi idey ibiya. Fiʼe uchəw ma ngwə yi zən ukab təni awu ungɨŋ uyi koʼ akə uŋu tag nə ungwə. Chiyə ukab wu ŋu na abú úŋwən akə uŋu tag nə ungwə.”

Currently Selected:

Matəw 17: NGI

Highlight

Copy