Luk 16

Inayn maʼa da wa iwe nu yə mə iney u ghəy

1Yeso ghayn abú mbə məŋə-anó ma kwi, “Wa mbon moʼ mə awu ni wa awu nu umə inayn u ghəy ma. Wa moʼ ŋu ghayn abú wa mbon wu kwi, wa wu yə chigə uyey ma. 2Amaʼazənə wa mbon wu zəw nigə, yə tiya wa wu ibiri abú uŋwən kwi, ‘Amə anó ngiya amə zəw da ungwə? Num aŋwaʼanayn zaʼa tey umugə ngwə mə iney umbəŋ u ghəy. Cha ngwə mi mə gha ney ayə umbəŋ ughəy.’ 3Wa faʼa ŋunə yə mə iney u ghəy mbəŋ ghayn ungɨŋ fiŋ ma kwi, ‘A mə ŋu yini ngiya umugə uŋu mbaʼ afaʼa mə ŋu chi ma aŋu afaʼa? Cha ikay iniŋ amə ghəy atoŋ imbayn anigə indere atəw yi mə ghəy aŋu ibiy ghəy. 4Akinine mə kyay anó zənə ami ghəy! Boʼo amaʼazənə umbə chi aŋu afaʼa ayi mə nə uzi nu umi num aŋu a na uma anji chuŋ.’ 5Wə kono nigə i tiya ba mbənə mbə́ mə́ yimə mbaʼ afaʼa uma ni injugə ufeyn ufeyn. Wə biri abú uyi imbey kwi, ‘ngwə mə yimə uŋu mbaʼ afaʼa ni ngiya?’ 6Wa wu ywiri kwi, ‘Mə yimə uŋwən ni ukɨ ikaʼ ungəd olif. U ghayn abú uŋwən kwi num aŋwaʼanayn ichomo asey amaramad iŋwaʼanayn kwi itə́ ighumi itəŋ.’ 7Wə biri abú uchini kwi, ‘ngwə mə yimə ngiya?’ Wə ghayn kwi, ayə yimə tusen ubam ikwi, yə ghayn abú uŋwən kwi ‘num iŋwaʼanayn ukɨ feyn.’ 8Mbaʼ afaʼa wu yere wa kob ŋunə yə mə iney ughəy ma. Wə yere uŋwən damugə yə mə nə iwe. Mbə ghayn kwi ba akə ungɨŋ isəg mbə ni iwe ifaʼ ufaʼa uma chigə ma ifaʼ ufaʼa mbənə umə nə itəni.” 9Yeso ŋu imbey ighayn kwi, “Ayə ghayn inen kwi mbən num imbon iboŋ zənə imə́ inen akə isəg ighəy uzi awu damugə amaʼazənə ayi mə nibere cha imbon zigə, Nwiye yi num ngwən asin itəni. 10Wa ŋunə ukyay ifa unó kukuŋe ni fiŋ ma ujum yə kyay umugə ifa unó kyayn ni fiŋ ma ujum. Wa ŋunə cha ukyayn ma ifa unó kukuŋe ni fiŋ ma ujum, cha umi kyay ma umugə ifa unó kayn ni fiŋ ma ujum. 11Anigə mbən bə ki kyay ngwən umugə ifa anó ni fiŋ jum yimə imbon akə igun isəg amə ngwa mi si naʼ imbon asiʼ inen? 12Ngwə bə ki zi ayə fiŋ iney u ghəy wa chini, amə ngwa mi naʼ u mbigə kwi ungwə iney? 13#Mat 6.24Cha wa faʼa moʼ awu amə ghəy u ni faʼa abú mbaʼ faʼa ubigə mbə ghayn kwi u yi bana feyn iwuʼ uwi kə u yi mə faʼa nə fiŋ ujum abú feyn cha u mi mə faʼa nə fiŋ ujum abú uwi cha inji amə ghəy ngwə ni faʼa abú Nwiye ni nibə faʼa abú imbon.”

Inayn Yeso moʼ

(Mat 11.12, 13; 5.31, 32; Mak 10.11, 12)

14amaʼazənə ba Farasay zəw unó mbəŋ ujum, mbə́ chəgə úŋwən damugə mbə́ wuʼ ukab azəd. 15Yeso ghayn abú úŋwən kwi, “Mbən mə́ ba mbənə u tey ifigi ba kwi mbən yə ghəy unó ni ukoʼoro, amə Nwiye kyayn itən fiŋ. Unó mbənə ba mə iney kwi amə unó kyayn amə unó mbənə Nwiye mə iney kwi amə unó ibuw.”

16 # Mat 11.12, 13 “Ikɨy Mose nə unó mbənə ba ukən Nwiye aŋwaʼanayn mbə́ mə́ saʼa ba wu iŋú pey amaʼa Jon ŋunə yə mə naʼa une. I noʼ amaʼ wu, u mbə ghayn ukən uchuŋ da anó fon Nwiye. Anigə ba jum mbə kaba inyi ungɨŋ anó ufon wu nə ikay. 17#Mat 5.18Ayə zaba abú azobo nə isəg ichigə chigə ma umugə ŋwə̂ ghəy ŋwaʼanayn moʼ ungɨŋ ikɨy Nwiye mi nim. 18#Mat 5.32; 1Ko 7.10, 11Wa moʼ bə fuw uyey ma inəm uchini, yə neŋe uyey wa chini anigə wa ŋunə u nam ayey ŋunə uduw inama yə neŋe uyey wa.”

Wa ukab nə Nazarus

19“Wa imbon moʼ mə́ awu mə izi ndwi ukab mə ifumə ungɨŋ imbon uney ujum. 20Wa ukwaŋ moʼ mə nibə awu nu umə tiya akə Nazarus. Ikwa sugi inyo ma, yə mə ŋuw chomo ubunu wa imbon wu. 21Yə́ mə́ nəmə imə bɨŋe u ghəy jəgi mbənə umi mə fwayn igun agayi wa imbon wu ijəgə. Bəw mə ŋuw niya ikwa ma. 22Wa kwaŋ wu ku anigə angəd beʼe uŋwən ŋú siy iyad Abraham. Wa imbon wu nibi ku u twayn. 23Amaʼazənə yə́ mə́ abey uwu ba asin zənə yə́ mə́ zənə ingəʼ, amaʼazənə yə beʼere atəw, yə́ zən Abraham aghá sa nə Nazarus iyad ma. 24Wə zən nigə itiya ghayn kwi, ‘Uŋu mbaʼ Abraham! Kənə akə aŋu icha Nazarus u zi itugi ma ungɨŋ une izuti inyi neme damugə a yə zənə ingəʼ akə ungɨŋ uwəd!’ 25Anigə Abraham ghayn abú uŋwən kwi, ‘Uŋu ŋwə̂ kono amaʼazənə ngwə mi ikay, ngwə mə nə u ghəy chuŋ anigə Nazarus mə nə u ghəy iboŋ. Akinine, uŋwən yə́ ungɨŋ ichuŋ akəŋ anigə ngwə yə zəw ingəʼ. 26Ká di ka nigə, ubəg kyay u yə ungɨŋ ugha ni cha nji amə ghəy ba noʼ akəŋ kwenə zaʼa akaʼa kə amə ghəy ba noʼ akaʼa kwenə zaʼa akəŋ.’ 27Wa imbon wu zəw nigə ighayn kwi, ‘Mə mbaʼ boʼo ubugə inigə tom Nazarus a na uŋu mbaʼ, 28damugə ayə nə unya anom itəŋ. U ŋuw chere úŋwən da ka ú zaʼa uma akə asin ingəʼ zəŋ.’ 29Anigə Abraham ghayn abú uŋwən kwi, ‘Mose ni ba ukən Nwiye chini umbə awu umbə́ unya anom u zəw unó mbənə úŋwən ghayn.’ 30Wa imbon wu ghayn kwi, ‘Uŋu mbaʼ Abraham abə mə wa moʼ u zəmə iwu akaʼa ba mbənə u si ku iŋu abú úŋwən, umbi beŋe fiŋ uma.’ 31Abraham ghayn abú uŋwən kwi, ‘Ubə ki zəw uma unó mbənə Mose nə ba ukən Nwiye umə́ ghayn, Anigə ka nə wa moʼ bə zəmə iŋú ghayn abú úŋwən cha umi beni.’”

Currently Selected:

Luk 16: NGI

Highlight

Copy