Ifa 8

1Sol mə́ awu ibeni kwi ú zwere Stifin.

Sol mə́ nwini inya ghəw ba Kristo

Aba aney zənə mbə́ zwere Stifin mbə́ ti ki nwini inya ghəw ba Kristo a Yerusanem kwaʼa akə ingəʼ. Ba Kristo wu ujum saŋa iŋú ungɨŋ uba ubey mbənə umə Judeya foro Samariya ichigə akə ba tom nu mbə tənə a Yerusanem. 2Ba moʼ ni mbə́ beni Nwiye ni fiŋ ma ujum num awu Stifin ŋú twayn. Mbə́ dey uŋwən kwaʼa akə ingəʼ 3#Ifa 22.4, 5; 26.9-11Sol kaba nji iney ba Kristo. Anigə yə mə́ ŋúw ana feyn feyn yə chiyə ba mbənə u bəni Kristo, anóm nə ayey ŋúw zi adəŋ.

Filip ghayn ukən uchuŋ a Samariya#8.4 Filip amə wa feyn akaʼa ba mbənə mbə́ choʼo kwi uni ghaba u aghəy jəgi.

4Ba Kristo mbənə mbə́ saŋa mə́ yeŋ yə ghayn inayn Nwiye usin ujum. 5Filip swiʼi iŋú ungɨŋ asin moʼ aba abey a Samariya yə pey awu sə ghayn anó da wa ŋunə Nwiye zoʼo abú ba mbənə u mə asin wu. 6Amaʼazənə unóŋ ba zəw ni zən ayere anó zənə Filip aghəy mbə́ zi utəw ma ni zwaray unó mbənə yə mə ghayn 7uzugə iboŋ mə ika dey du ungɨŋ ba nanaʼ. Yə ghəy ba nu aba inyo ma feyn si ku foro buʼere ba nanaʼ uboro 8Anigə ighaʼa nanaʼ sugi ungɨŋ fiŋ ba mbənə mbə́ mə́ ungɨŋ aba abey wu 9Anom moʼ mə́ a Samariya ni ukum ma mə Sayimon. Sayimon wu mə́ aghəy ingaŋ ikwa. Ba ujum mbənə bə mə́ a Samariya mə yere unó mbənə yə mə ighəy. Yə mə ghayn kwi imə amede wa. 10Ba ujum ungɨŋ aba abey wu i ti akə igwaʼ kukuŋe iŋú peŋ akə ikyayn zi atəw akə unó mbənə yə mə aghəy. Mbə́ mə́ ghayn kwi, “Nwiye naʼa ika abú anóm uŋu kwi ukyay ighəy umede unó.” 11Ba mə zi utəw akə unó mbənə yə́ mə́ aghəy damugə yə si aghəy magik akə agha asa uni zən yere. 12Anigə Amaʼazənə mbə́ beni anó zənə Filip mə́ ghayn da ukən uchuŋ da anó ufon Nwiye foro da Yeso Kristo, mbə́ num une anóm nə ayey 13Sayimon wu beni Kristo. Amaʼazənə mbə naʼa une abú únwen yə ti ni ŋuw aboʼo Filip. Yə mə iməŋərə ma nə unwini unó foro uyere unó kyayn mbənə Filip mə aghəy nu u chigə ma akə uma. 14Amaʼazənə ba tom mbənə mbə mə Yerusanem zəw kwi ba mbənə umə á Samariya si beni inay Nwiye mbə tom Pita ni Jon abú úŋwən. 15Amaʼazənə mbə́ pey awu mbə chaʼara Nwiye abú uŋwən boʼo Azugə zayn zayn zaʼa igun uma. 16Cha Azugə zayn zayn di si zaʼa ma igun wa moʼ akaʼa úŋwən mbə si num aba une akə ukum Asɨyisəg Yeso 17Amaʼazənə Pita ni Jon niŋi ubugə igun ma Azugə zayn zayn zaʼa igun úŋwən. 18Amaʼazənə Sayimon zən kwi Azugə zayn zayn wu zaʼa igun ba umugə ba tom wu niŋi ubugə igun uma, yə́ naʼ ukab abú Pita ni Jon. 19Ighayn kwi, “Mbən naʼa ika wu ineŋ boʼo a bə niŋe umbəŋ ubugə igun wa moʼ Azugə zayn zayn zaʼa igun ma” 20Anigə Pita ywiri abú uŋwən kwi, “Ngwə nim ni ungwə ukab damugə ngwə koni kwi ngwə yi zon aghəy zənə Nwiye neʼe ba awu akə ukab. 21Cha ngwə mə ayə nə aba kə asin moʼ ungɨŋ afaʼa zəŋ damugə cha injə fiŋ koʼoro ama ifigi Nwiye. 22Anigə beŋe injə ifəŋ akə anó ibón zəŋ ichaʼara Asɨyisəg da u wa unó iboŋ mbənə ngwə mə kono ungɨŋ injə fiŋ. 23Mə zən kwi adey sugi ungɨŋ ingəʼ fiŋ anigə ngwə mə wa ndəŋ abú unó iboŋ.” 24Sayimon ywiri kwi, “Mbən chara Asɨyisəg ineŋ da ka anó moʼ akaʼa unó mbənə mbən aghayn a aghəy ma ineŋ.” 25Amaʼazənə Pita ni Jon si ghayn unó mbənə mbə kyay anigə ighayn inay Nwiye, mbə́ wene iŋú a Yerusanem, yeŋ yə ghayn ukən uchuŋ ungɨŋ usin nanaʼ a Samariya.

Filip nə wa kyayn Itiopiya

26Angəd Asɨyisəg ghayn abú Filip kwi, “Tana inji inyo noʼ ŋúw aba achuŋ anji zənə imə noʼo a Yerusanem iŋú Gaza. Nu amə inji zənə imə chigə ungɨŋ ambayn zomo.” 27Filip zəw nigə noʼ ki ŋúw umugə yə mə ŋú yə yi kuw anóm itiopiya moʼ. Anom wu mə wa kyayn mə isey ukab kandes abú ufon ayey ŋunə yə mə itiopiya nu mbə́ izaʼa. Anom wu ŋú wumini Nwiye á Yerusanem. 28Filip zən uŋwən Amaʼazənə yə́ mə́ wene ŋú unu ungɨŋ utu ŋunə amə ingey mə ghəw. Yə mə foŋo aŋwaʼanayn zənə wa ukən Nwiye Azaya yə ŋwaʼanayn. 29Azugə zayn zayn ghayn abú Filip kwi ŋúw ni yeŋ iyad utu uwiy. 30A nigə Filip noro ŋú iyad utu wu pey yi zəw umugə anóm wu mə foŋo aŋwaʼanayn zənə wa ukən Nwiye Azaya á ŋwaʼanayn. Yə zəw nigə ibiri abú uŋwən kwi, “Injə atəw mə zayn akə inay Nwiye zənə ngwə mə foŋo?” 31Wa kyayn wu ywiri kwi inyi atəw ami zayn ngiya nu cha wa moʼ i toʼoro inay wu ineŋ? Amaʼazənə yə ywiri nigə yə ghay abú Filip kwi u koʼ inyi chomo ungɨŋ utu aboʼo inji. 32Asin akə Aŋwaʼanayn Nwiye zənə yə́ mə́ foŋo ghayn kwi, “Uŋwən mə́ ni injəg ni unum iŋú kyeme ni ŋwə̂ injəg ŋunə u chuʼ izi Amaʼazənə u mə səgə inyoŋ ma anigə cha u fəʼə ma uchəw.” 33Mbə naʼ idere atəw abú uŋwən cha mbə saʼ uma usaʼa ma akə inji zənə yə kəʼə amə ngwə amə aghəy ughayn anó da aghaŋ ma? Anigə ba aki igun isəg zwere uŋwən. 34Wa kyayn wu biri abú Filip kwi, “Ghayn ineŋ wa ukən Nwiye uŋu umə ighayn anó zəŋ da ngwa? Amə da inyo ma kə amə da wa chini?” 35Filip a num asin aŋwaʼanayn wu ni ighayn ukən uchuŋ da Yeso abú uŋwən. 36Amaʼazənə mbə́ mə́ yeŋ iŋúw igun utu wu, mbə pey asin atum une mə awu. Anigə wa kyayn wu ghayn kwi, “Zən aney une mbəŋ amə ngiya ami aghəy kwi ka a num aŋu une?” 37[Filip ghayn abú unwen kwi, “Ngwə mbə beni Yeso Kristo ni injə fiŋ ujum ayi naʼ une inigə.”

Wa kyayn wu ywiri kwi, “Mə beni kwi Yeso Kristo mə Ŋwə̂ Nwiye.”]#8.37 Cha asin zəŋ ungɨŋ uŋwaʼanayn moʼ. 38Wa kyayn wu ghayn utu təm úŋwən uma bigə swiʼi iŋú inyi awu ungɨŋ atum Filip naʼ une abú uŋwən awu. 39Amaʼazənə mbə koʼ idu awu atum une, Azugə Asɨyisəg num Filip iŋu nə uŋwən cha wa kyayn awu di ni zən ma uŋwən anigə yə mə iyeŋ ŋúw wuʼe ma. 40Anigə Filip sə ŋú zən umə Azotus yə mə yeŋ yə ghayn ukən uchuŋ ungɨŋ usin ujum. Yə mə iyeŋ yə ghayn nigə iŋu pey kayisariya.

Currently Selected:

Ifa 8: NGI

Highlight

Copy