Ifa 7

Inayn Stifin abú mbə saʼa abey

1Atəw kyayn abú ba mbənə umə faʼa ambəŋ Nwiye biri abú Stifin kwi, “Unó mbəŋ umə ghayn da ungwə amə asiʼe?” 2Stifin ywiri kwi, “Umbəŋ unya anom nə umbəŋ umbaʼ mbən zwaray Nwiye ŋunə mba mə wumini buw ifigi ungwa mbaʼ Abraham amaʼazənə yə́ mə́ bugə Mesopotamiya ki u si noʼ ŋu Haran, 3yə buw nigə ighayn abú uŋwən kwi, ‘Noʼo sayn injə abey nibi sayn ungwə unebey iŋu ungɨŋ abey zənə ami tey inigə.’ 4Anigə yə noʼ ungɨŋ abey Chaldiya ŋu chomo Haran. Amaʼazənə mbaʼ ma ku, Nwiye chi uŋwən ungɨŋ abey wu cha akə asin zəŋ mbən mə chomo awu akinine. 5Cha Nwiye di isey ma u ghəy moʼ abú uŋwən cha yə di isey ma kaba di mə ŋwə̂ asin moʼ abú uŋwən asɨmə Nwiye kaʼa uŋwən nə buŋ aghaŋ ma kwi umbi mə nə asin zəŋ. Amaʼazənə Nwiye naʼa akaʼa zəŋ abú uŋwən amə cha ŋwə̂ moʼ abú Abraham. 6Nwiye ghayn abú uŋwən kwi, buŋ akə injə aghaŋ umbi chomo ungɨŋ abey chini, úŋwən mbi mə isob anigə umbi mə nyi uŋwən. Umbi chomo awu akə atuʼ akɨ kyugə. 7Ayi saʼa abey zənə umi mə faʼa sob awu. Amaʼ moʼ bə si chigə, umbi du ungɨŋ abey wu izaʼa wumini aŋu akə asin zəŋ. 8Nwiye ghayn nigə isəŋ uso nə Abraham kwi u ney buŋ anom. Anigə Abraham bə́ Azik iney uŋwən amaʼazənə ika koʼo; Azik bə́ Yakob anigə Yakob bə́ mbaʼ mbənə mbə́ ghəy inebey ba Izre ighum cho bigə.

9Umbaʼ inebey wu mə ghəy adey da Josef, anigə mbə́ fənə uŋwən ni sob u num iŋu Ijip. Asɨmə Nwiye mə nə Josef 10anigə ichi uŋwən ungɨŋ ingəʼ ujum tənə tə́ duw. Nwiye naʼa iwe abú uŋwən u ghəy Fero ŋunə amə ufon Ijip u wuʼ uŋwən. Fero ghəy uŋwən akə gobuna igun Ijip foro igun inebey ujum. 11Anigə ajəgə nyi ungɨŋ abey Ijip ujum foro ungɨŋ abey Kana nu yə ghəy ba ni zəw ingəʼ. Anigə cha umba mbaʼ imbey di mə uma nə aghəy jəgi. 12Anigə amaʼazənə Yakob zəw kwi ughəy jəgi mbə́ Ijip, yə tom umba mbaʼ imbey awu akə ighari imbey. 13Amaʼazənə mbə́ gha ŋuw iŋu pey akə ighari bigə, Josep ghəy unya anom ma kyay uŋwən. Anigə Fero kyay unebey Josef. 14Josef cha kwi u tiya mbaʼ ma Yakob foro unebey ujum kwi u swiʼi zaʼa Ijip. Unun ba ŋunə yə mə awu ungɨŋ unebey amə ba ighumi sambigə cho itəŋ. 15Anigə Yakob swiʼi ŋu Ijip asin zənə uŋwən nə umba mbaʼ imbey ku akuŋ. 16Amaʼazənə mbə́ ku, mbə beʼe uwu ma iŋu Sechem pey yi zi ungɨŋ isey nu Abraham zono akə unun ukab moʼ abú buŋ Hamo nu umə Sechem.”

17Amaʼazənə amaʼ mə sə tinə abú Nwiye kwi u ghəy anó zənə yə́ kaʼa abú Abraham, unun umba ba mbənə mbə́ mə́ ungɨŋ Ijip mə naʼa ŋuw imbey. 18Ufon chini nu cha yə́ di kyay ma Josep koʼ imə tumə Ijip. 19Ufon wu ti ni tana uni igun umba ba anigə ni kyúgə inyo ma. Yə mə tinə umba mbaʼ imbey kwi uni waʼa buŋ ubó isəg da umi ku. 20Amə amaʼa wu mbə́ bə́ Mose. Amə aməde ŋwə̂. Mbə́ mə ney uŋwən ungɨŋ na mbaʼ ma akə aməg ta. 21Amaʼazənə mbə́ chi uŋwən ungɨŋ aku cha isəg, ŋwə̂ ayey Fero num uŋwən ibeŋe akə ŋwə̂ ma. 22Mose kweme iwe ujum tənə imə abú ba mbənə umə ungɨŋ Ijip anigə amə́ aməde wa akə inayn foro akə unó ujum mbənə yə́ mə́ ighəy.

23Amaʼazənə Mose mə atuʼ ighumi kyugə, yə tey ungɨŋ fiŋ ma kwi u ŋuw chaʼara ba ma ba Izre. 24Yə pey yi zən umugə wa Ijip moʼ mə somo wa Izre anigə yə ŋu ywere wa Izre wu. Iwiy, yə zwere wa Ijip wu. 25Mose kono kwi ba ma mbi kyay kwi Nwiye yi chigə anjim ma i chi úŋwən angəʼ asɨmə cha mbə́ di kyay. 26Aney akuŋ Mose zən ba Izre ubigə nu umə zoŋo. Yə kaba kwi isaʼara úŋwən anigə ughayn abú úŋwən kwi, “Anom mbən mə inya anom mbən si mə zoŋo ngiya? 27Asɨmə wa ŋunə yə mə somo wa wiy tini Mose iyad biri abú uŋwən kwi, ‘Amə ngwa sey ayə kwi ngwə ki tumə ngwa nibə saʼa ngwa?’ 28Ngwə waʼa kaba izwere aŋu umugə ngwə zwere wa Ijip iyugə?” 29Amaʼazənə Mose zəw anó zəŋ, yə du bugə ungɨŋ Ijip iŋu chomo Midian ni wa isoʼ. Yə chomo awu inam bə́ buŋ anom ubigə.

30Amaʼazənə Mose si chomo awu akə atuʼ ighumi kyugə chigə, angəd Nwiye buw ifigi abú uŋwən ni ineme uwəd ungɨŋ atud ungɨŋ imbayn zomo iyad ugum sinai. 31Amaʼazənə Mose zən nigə, yə chigə uŋwən anigə yə mə tinə ma ŋuw itana iney. Yə zəw igəg Asɨyisəg ighayn abú uŋwən kwi, 32“Amə Nwiye umbə mbaʼ imbey, Nwiye Abraham Azik nə Yakob.” Igoro ibiya Mose anigə amə cha inji abú uŋwən igha iney uwəd wu. 33Asɨyisəg ghayn abú uŋwən kwi, Chi mbə tabay damugə asin zənə ngwə təmə awu amə asin zayn zayn. 34Mə si zən inji zənə umə nyi umbəŋ ba ungɨŋ Ijip. Mə si zəw umugə úŋwən mə zwuʼe anigə mə si swiʼi zaʼa ichi úŋwən angəʼ. Akinine zaʼa a yə ŋu cha ayə ungɨŋ Ijip.

35Amə Mose wu ŋunə mbə tono uŋwən ighayn kwi, amə ngwa ghəy ayə akə wa imə tumə ngwa nibə saʼa ngwa? Amə uŋwən ŋunə Nwiye tom kwi u tumə ba Izre foro kwi u chi úŋwən angəʼ anjim angəd ŋunə yə duw ifigi abú uŋwən ungɨŋ atud. 36Yə chi úŋwən ungɨŋ Ijip amaʼazənə yə́ sí ghəy uyere unó nə unwini unó ungɨŋ Ijip, ungɨŋ iba ibaŋa foro amaʼazənə mbə́ mə́ ungɨŋ imbayn zomo akə atuʼ ighumi kyugə. 37Amə Mose wu ŋunə yə ghayn abú ba Izre kwi, “Nwiye yə cho wa ukən akaʼa ba ma anji zənə yə choʼo aŋu.” 38Amə Mose wu ŋunə yə́ mə́ nə ba Izre ungɨŋ imbayn zomo, yə́ mə́ nə angəd ŋunə yə́ nayn abú uŋwən igun ugum Sinai, yə́ mə́ nibi nə umba mbaʼ imbey. Yə num ukən ŋunə umi ghəy kwi ba jəg itəni zaʼa naʼ ina.

39Asɨmə umba mbaʼ imbey ton iwumini uŋwən. Mbə́ tini uŋwən cha iyad kaba inji kwi di mbə́ gha wene iŋu ungɨŋ Ijip. 40Anigə mbə́ ghayn abú Aron kwi, “Tana nwiye ina nu umi chigə imbey iŋu cha ngwa. Amə da Mose ŋunə yə chi ngwa ungɨŋ Ijip, cha ba kyay ngwa anó zənə ghəy nə uŋwən. 41Amə akə maʼa wu zənə mbə́ tana Nwiye buw buw nu u məŋe ni ŋwə̂ ipoŋ. Anigə ina u ghəy ifa abú uŋwən. Mbə kaʼa ufere da afaʼa zənə úŋwən faʼa nə ubugə ma.” 42Anigə Nwiye gha injim ma naʼ abú úŋwən. Yə gha nigə sayn kwi úŋwən ki wumini nyamachugi, uməg, foro nə itənə. Zəŋ du numugə uŋwaʼanayn ungɨŋ aŋwaʼanayn ba ukən Nwiye kwi, “Ba Izre akə ma iniŋ nu mbən kyeme nyə̂ nibi na ughəy ifa ambayn zomo ungɨŋ atuʼ ighumi kyugə.”

43Mbən beʼe asɨgə zənə umə tiya akə Molek nibi beʼe itəni ungwən nwiye nu umə tiya akə Refan amə unwiye mbənə mbən tana imə wumini. Anigə ayi cha ngwən ambayn isoʼ tənə umə chigə Babilon iŋuw. 44Umba mbaʼ imbey mə yə beʼe na Nwiye abú úŋwən amaʼazənə mbə́ mə́ ambayn zomo. Mbə chim asɨgə wu akə inji zənə Nwiye tey abú Mose kwi u chimə. Mbə chim akə nji zənə Nwiye məgə abú Mose. 45Amaʼazənə maʼa moʼ chigi, úŋwən ni Josua beʼe asɨgə wu zaʼa inyi ungɨŋ abey zənə Nwiye fuw ba awu. Asɨgə chomo ungɨŋ abey wu ŋu pey amaʼazənə Dafid mə ufon. 46Nwiye ghəy ichuŋ abú Dafid anigə Dafid ghayn abú uŋwən kwi u sayn u chimə asin chomo abú uŋwən ŋunə amə Nwiye Yakob. 47Asɨmə amə ufon Solomon yə chim ina wu abú uŋwən.

48Asɨmə cha achigə isəg mə chomo ma ungɨŋ na nu ba chimi. Wa ukən Nwiye ghayn kwi, 49Asɨyisəg ghayn kwi, “Azobo mə inyi atən ufon isey amə asin zənə amə niŋe umbəŋ ughəw igun. Amə ukudu na ngiya mbən mi chim iniŋe? Asin zənə ami izwere akuŋ azayn? 50Awaʼa ka umbəŋ ubugə u tana ughəy mbəŋ u ujum ə? 51Umbən ba ka atəw, itən fiŋ nə umbən utoŋ si tu izəw inayn Nwiye. Cha mbən mə wumine ngwən Azugə zayn zayn. Mbən yə ghəy nə umbən mbaʼ imbey, mbən yə ghəy aba numugə mbə mə ighəy. 52Wa ukən Nwiye moʼ mə wu nu u mbən mbaʼ imbey ki nwini ma inya ughəw ma? Mbə zwere ba mbənə mbə ghayn nu ukwey si sá kwi wa ŋunə umə ghəy unó mbənə u koʼo uyi zaʼa. Akinine mbən si fənə uŋwən u zwere. 53Mbən num unoʼo mbənə mbə́ angəd naʼa anigə cha mbən mə isey ngwən unoʼo wu.”

Mbə́ tum Stifin akə atey

54amaʼazənə mbə́ saʼa abey zəw anó zənə Stifin ghayn, mbə́ siy itəm. Mbə́ siy nigə ti ni koro asoŋ uma. 55Asɨmə Stifin nu Azugə zayn zayn sugi ungɨŋ ma ney azobo izən uzayn zayn Nwiye nibi zən Yeso nu u təm aba bugə jəji Nwiye. 56Yə zən nigə ghayn kwi, “Mbən zən! Mə zən azobo fiʼe. Mə nibi zən Ŋwə̂ Wa u təm aba bugə jəgi Nwiye.”

57Mbə saʼa abey zəw nigə ikyayn akə ika kəbərə utoŋ ma akə ubugə ma fure ŋu koʼo ma inyo ma, 58num uŋwən iŋu maʼ anjim isəg itum akə atey. Ba mbənə mbə́ mə́ tumə uŋwən siy ndwi uma iyad ughəw ajoŋ moʼ umə tiya akə Sol. 59Umugə mbə́ mə́ tumə Stifin nigə, yə chaʼara Nwiye ghayn kwi, “Asɨyisəg Yeso num inyi Azugə.” 60Amaʼazənə yə ghayn nigə, yə zum utəw nywi asey kyayn akə ika ighayn kwi, “Asɨyisəg i yimə yə úŋwən ungɨŋ fiŋ da anó iboŋ zəŋ umə ghəy.” Amaʼazənə yə ghay ney, yə mene.

Currently Selected:

Ifa 7: NGI

Highlight

Copy