Ifa 6

Mbə choʼo anom sambigə kwi uni ywere ba tom

1Ungɨŋ unəy wu, umugə unun ba ŋunə u beni Kristo mə ikwey ŋu imbey, ba Jû mbənə umə nayn inayn Grik mə́ zuʼe kwi cha ba Jû mbənə u mə nayn inayn Hibru mə́ iney uma ayey uti ma anji chuŋ amaʼazənə umə ghaba u ghəy jəgi igun aney. 2Anigə ba tom wu ighum cho bigə fere ba jum mbənə u beni Kristo ighayn kwi, “cha di koʼ kwi mba sayn anó imə ghayn inayn Nwiye da imə ghaba ijəg. 3Anigə unya anom, mbən choʼ anom isambigə injən akaʼa u mbənə ba mə wumine úŋwən umə nə iwe nu Azugə zayn zayn sugi ungɨŋ ma anigə mba yi zi úŋwən u ni ghaba u ghəy jəgi. 4Ami ina, mba yi naʼa inja maʼ ujum imə chaʼara Nwiye nibi ghayn inayn Nwiye” 5Anó zəŋ boŋ abú unuŋ ba wu ujum. Anigə mbə́ choʼo Stifin nu yə́ mə́ nə ibeni fiŋ kaka, Azugə zayn zayn sugi ungɨŋ ma, mbə́ nibi choʼo Filip, Prokorus, Nikanó, Timon, Pramənas, foro Nikolas wa Antiyok nu yə beŋe fiŋ ma beni anó Nwiye ba Jû 6Ba mbəŋ ŋu təm ifigi ba tom wu, mbə chaʼara Nwiye abú úŋwən iniŋe ubugə ma igun ma. 7Anigə inayn Nwiye mə saŋa iŋuw imbey. Unun ba ŋunə u beni Kristo Yerusanem mə́ kwey ŋuw aba imbey anigə ba mbənə mbə́ mə́ faʼa ambəŋ Nwiye u nanaʼ beni Kristo.

Mbə́ ibiya Stifin

8Nwiye ghəy ichuŋ abú Stifin nibi naʼ ika abú uŋwən. Anigə yə́ ghəy uyere unó nibi ghəy unwini unó kyayn akaʼa uma. 9Anigə ba moʼ ungɨŋ na bumi ba Jû mbənə u duw akə sob, anji zənə umə tiya na bumi wu, ti ni taŋa nə Stifin. Ba Jû mbənə mbə́ mə́ awu mə ba Jû Syrene foro Alezandriya. Mbə́ bumə ni ba Jû Silisiya foro Esiya. 10Asɨmə Azugə zayn zayn naʼa iwe abú Stifin akə ji zənə umbə́ nayn cha umi kyay ywiri. 11Anigə mbə́ komo ba moʼ anjim anjim kwi ughayn kwi, “Mba zəw uŋwən umə inayn jimə Mose nibə inayn jimə Nwiye.” 12Amaʼazənə mbə́ ghayn nigə, mbə́ toyi fiŋ ba mbənə mbə́ mə́ awu, i toyi fiŋ ba kyayn ungɨŋ abey, i toyi fiŋ ba mbənə mbə́ mə́ taʼa ba akə unoʼo. Anigə mbə́ ibiya Stifin num ŋu abú mbə saʼa abey. 13Amaʼazənə mbə́ pey awu, mbə́ ghəy ba moʼ figə unó da uŋwən ighayn kwi, “Anom ŋunə yə ghayn inayn iboŋ da ina ibuni na Jû zayn zayn zəŋ foro da unoʼo Mose. 14Mba zəw uŋwən umə ghayn kwi Yeso wa Nazared yi saʼ imbəŋ Nwiye nibi kyabay unoʼo mbənə Mose naʼa ina.” 15Ba jum mbənə mbə́ chomo awu na usaʼa toŋ ighɨ inyo Stifin zən kwi ifigi ma chomo nə amə ifigi angəd.

Currently Selected:

Ifa 6: NGI

Highlight

Copy