Ifa 5

Ano da Ananiyas nə Safira

1Anom moʼ nə ukum ma mə Ananiyas nə uyey ma nə ukum ma Safira fənə asin nu amə iyi uma. 2Asɨmə umugə mbə fənə nigə, Ananiyas tana nə uyey ma u siy aba ukab wu inum aba pey yi siy ifigi ba tom. 3Amaʼazənə yə niŋi nigə, Pita biri abú uŋwən kwi, “Ananiyas Aton zənə ugwə sayn satan nyi ungɨŋ injə fiŋ aghəy kwi ngwə figə unó abú Azugə zayn zayn isiy aba akə ukab ŋunə ngwə fənə asin wu awu amə da ngiya? 4Ki ngwə sə ŋu fənə asin isey wu amə injigə amaʼazənə ngwə si fənə ukab wu amə ungwə. Aton zənə ngwə si kono ighəy ukudu unó ŋunə amə da ngiya? Cha ngwə di figə yə unó amə abú ba ngwə figə amə abú Nwiye.” 5Amaʼazənə Ananiyas zəw anó zəŋ, yə gow asey iku. Ba ujum mbənə mbə́ zəw anó zəŋ mbə́ gəd kwaʼa akə ingəʼ. 6Ingwaʼ anóm ŋú fid awu ma beʼe du ŋu twayn. 7Amaʼazənə awa chigə ka uta, uyey ma ŋu inyi cha ukyay ma anó zənə a duw. 8Pita biri abú uŋwən kwi, “ghayn iniŋ amə unun ukab wu ŋunə nu ungwə nə ungwə anom mbən fənə asin asey wu awu?” Yə ywiri kwi “Aŋ amə unun awu uyugə.” 9Anigə Pita ghayn abú uŋwən kwi, “Amə ngiya aghəy kwi mbən beni ikwaʼara Azugə Asɨyisəg? Zəw! Ba mbənə u twayn ungwə unom umə ubunuʼ u bi nibi beʼe ayə num ŋu isəg.” 10Aba ighari wu, yə gow iyad ughəw Pita iku. Amaʼazənə ingwaʼ ba wene zaʼa yi zən kwi yə ku, mbə́ beʼe uŋwən ŋu twayn iyad unóm ma. 11Ufere ba Kristo nə ba ujum mbənə mbə́ zəw anó zəŋ mbə́ gəd azəd.

Ba-tom zwey ba nanaʼ

12Ba-tom Kristo aghəy unwini unó nə uyere unó nanaʼ akaʼa ba wu. Anigə ba mbənə mbə́ beni Kristo ŋu fere abəŋe na zənə mbə́ mə́ tiya akə ina solomon. 13Cha wa chini isəg di ni yimi ma fiŋ i bumə úŋwən. Anigə mbə́ mə́ ighayn unó chuŋ da úŋwən azəd. 14Ka ba nigə, anóm nə mbə ayey nanaʼ beni Asɨyisəg Yeso Kristo anigə ibumi unóŋ ma uni kwey ŋu imbey. 15Uyere unó mbənə ba tom mə aghəy áaghəy kwi ba beʼe ba isɨgə uma iŋu neŋi igun ukon for igun ubaʼa iyad inji da Amaʼazənə Pita mi mə chigə, azəŋ ma yi chigə igun u moʼ izwey úŋwən. 16Unoŋ ba nu yə noʼo ungɨŋ usin mbənə u kad Yerusanem ŋu nə ba isɨgə uma foro ni ba mbənə uzugə iboŋ mə ungɨŋ uma anigə ba tom wu zwey úŋwən uma ujum.

Mbə nwini inya ughəw ba tom wu

17Anigə adey sugi ungɨŋ fiŋ atəw kyayn abú ba mbənə umə faʼa ambəŋ Nwiye nibi sugi ungɨŋ fiŋ ba mbənə mbə́ mə́ nə uŋwən nu amə ba ungɨŋ ufere Sadusi 18Mbə́ ibiya ba tom wu iŋu zi ungɨŋ ina andəŋ zənə mbə́ mə́ zi ba awu. 19Asə awu afəb, angəd Asɨyisəg ŋu fiʼi ubunu ana indəŋ wu ichi úŋwən sayn ighayn abú úŋwən kwi, 20“Mbən ŋuw itəm ungɨŋ imbəŋ Nwiye ighayn unó ujum da inji zənə amə aghəy ba itəni fey zəŋ.” 21Amaʼazənə isəg kyiʼi, mbə ŋu inyi ungɨŋ imbəŋ Nwiye iti ni tey unó anji zənə angəd wu ghayn abú úŋwən.

Amaʼazənə atəw abú ba mbənə umə faʼa mbəŋ Nwiye nə ba mbənə mbə́ mə́ nə uŋwən pey, mbə́ tiya mbə́ saʼa abey ujum nə ba kyayn ujum abú ba Jû kwi u ŋuw fere. Amaʼazənə mbə́ ŋu fere, mbə́ cha ba kwi u ŋuw num ba tom mbənə umə ana indəŋ izaʼa nə úŋwən. 22Asɨmə amaʼazənə usogwi ŋu ana indəŋ, cha mbə zən ma ba tom awu ana indəŋ. Anigə mbə́ wene iŋu ghayn kwi, 23“Mba pey yi zən ina indəŋ nu u fiy anji chuŋ nibi zən usogwi mbənə umə nəmə usin u təm iyad ubunu. Anigə amaʼazənə mba fiʼi ina indəŋ wu, cha mba zən ngwa wa moʼ awu ungɨŋ.” 24Amaʼazənə atəw abú usogwi mbənə umə nəmə mbəŋ Nwiye foro nə utəw abú ba mbənə umə faʼa mbəŋ Nwiye zəw znó zəŋ, yə chigə úŋwən. Mbə́ məŋərə kwi anó ngiya amə ŋu duw. 25Anigə wa moʼ nyi yi ghayn abú úŋwən kwi, “Mbən zən! Anóm mbənə mbən zi andəŋ, umbə́ ambəŋ Nwiye taʼa ba.” 26Amaʼazənə mbə́ zəw nigə, atəw abú usogwi ŋu nə usogwi ma iŋu num ba tom wu. Cha mbə́ di mə num ma úŋwən amə akə ika damugə mbə́ mə́ gərə kwi ba mbi tum úŋwən akə atey.

27Mbə num úŋwən pey yi aghəy kwi u təm ifigi mbə́ saʼa abey. Anigə atəw abú ba mbənə umə faʼa ambəŋ Nwiye biri abú úŋwən kwi, 28#Mat 27.25“Ka mba chere ngwen kwi ka mbən tey gwen anó moʼ akə ukum uŋu, anigə mbən si saŋa unó mbənə mbən mə tey ungɨŋ Yerusanem ujum anigə mbən kaba aghəy kwi indon nyi igun ina ni kwi amə mba zwere uŋwən.” 29Anigə Pita nə ba tom Kristo mbi ywiri kwi, “Mba yi wumine amə Nwiye akama ba. 30Nwiye umba mbaʼ imbey zəmə Yeso ŋunə mbən kom azaʼa abaʼaray izwere. 31Nwiye num uŋwən isiy aba bugə jəgi ma kwi u chomo nə atəw abú ba foro ni wa ŋunə umi chi ba angəʼ da ighəy kwi ba Izre waʼ unó iboŋ ma Nwiye nyaba unó iboŋ ma. 32Umba nə Azugə zayn zayn zənə Nwiye naʼa abú ba mbənə umə wumine uŋwən mə uzənə akə unó mbəŋ.” 33Amaʼazənə mbə́ saʼa abey zəw anó zəŋ, mbə́ siy itəm kwaʼa ingəʼ anigə mbə kab kwi nji mbə́ zwere úŋwən. 34Asɨmə wa Farasay moʼ nu ukum ma mə Gamaliel yə́ mə́ aboʼo mbə saʼa abey wu. Yə́ mə́ taʼa ba akə unoʼo anigə ba jum mə wumine uŋwən. Yə́ noʼ təm atey akaʼa mbə saʼa abey wu ghayn kwi, u cha ba tom wu isəg akə ŋwə̂ amaʼ moʼ. 35Amaʼazənə mbə́ ŋu isəg, yə ghayn abú mbə saʼa abey wu kwi, “umbəŋ ba Izre, mbən tana ikono anó zənə mbən mə kaba aghəy abú anóm mbəŋ. 36Mbən kyay kwi amə akə amaʼa moʼ anóm moʼ ŋunə mbə́ mə́ tiya uŋwən akə Tiyodas noʼ ghayn kwi imə amede wa, anigə ba ka akɨ kyugə bumə uŋwən. Mbə zwere uŋwən anigə ba mbənə mbə beni nə uŋwən saŋa. Anigə anó zənə yə́ beni nim. 37Zigə chigə anigə wa Galeli moʼ nu mbə mə́ tiya akə Judas nibi noʼ ungɨŋ unəy mbənə mbə́ mə́ taŋa ba. Yə ghow unóŋ ba uniŋi anjim ma. Mbə́ nibi zwere uŋwən anigə ba ujum mbənə mbə́ niŋi anjim ma saŋa. 38Anigə akə usaʼa uŋunə aki inja figi, ayə ghayn inen kwi mbən chi umbən ubugə awu, mbən sayn úŋwən uŋuw. A bə mə kwi anó zənə umə kaba ighəy kə afaʼa zənə umə kaba ifa yə noʼ abú ba inyo atəw ayi nwi. 39Nji abə noʼo abú Nwiye, cha mbən mə ngwen nə ika ichigə úŋwən. Damugə mbən firi zən kwi mbən yə zoŋo amə Nwiye.” 40Mbə saʼa abey zəw ikɨ Gamaliel. Amaʼazənə mbə gha tiya ba tom wu ungɨŋ na, mbə́ swayn úŋwən akə igwayn anigə chede úŋwən kwi ka u gha ghayn ma anó moʼ akə ukum Yeso. Anigə isayn úŋwən kwi uŋuw. 41Amaʼazənə ba tom wu noʼ sayn mbə́ saʼa abey wu, mbə́ mə́ wuʼe uma damugə Nwiye si zən úŋwən kwi mbə kəʼ izəw ingəʼ anigə ibeʼe idere atəw da Yeso. 42Anigə unəy ujum, mbə mə́ ŋuw ambəŋ Nwiye foro ana ba ni tey unó nibi yə ghayn ukən uchuŋ kwi Yeso mə wa ŋunə Nwiye zoʼo.

Currently Selected:

Ifa 5: NGI

Highlight

Copy