Zaŋ 8

1Yesu ka data kad fa ŋguɗa ta Awliviyey hay. 2Ta slamɓal te pərek, ke veh kad pə Way ta kwakwas ana saya, ndana hay gaa ec ke dey kad vara vaw, ka njah maanjahay, ke sesərekeceŋ. 3Ndah mesesərekecen ma majawa kad ndana hay va Farisa hay ac ka hwadana ŋgwaz ɓa kad fəma tata. Ŋgwaz ana sə, ece təhezek dapa maŋgə madama. Ac ka zlacaɗ fəma ta ndana hay fakwanay, 4ac ka gwaɗa Yesu, gege: «Nda masasəraka nda, wala, anda təhezek ŋgwaz nesey dapa maŋgə madama.» 5Dapa ma majawa sə, Muyiz ke gweɗ, gege: «Tərsam ta ŋgwaza hay ana ara nesey sə, te mekelec eve kekeŋ aca ra məcaɗay. Yaw, na kaa may, ke gweɗ gwagumaw?» 6Ece gweɗ ara nesey sə, aca ŋgayiya, afa aca wal majawiya ava ma hay. Amaa Yesu ke zeŋ kad fa vara, ka vah jene fa vara ava wut ta ha. 7Ara masa ece dey ta manəkafa ma hay, Yesu ka baŋgaɗa yaŋ, gege: «Da lada sə, ndana deveŋ akwar masa ke ŋgə mebər kwa kusetke aabay sə, da kalaw kamma!» 8Ke zeŋ saya, ka vah jene fa vara. 9Ndah mehwedek ŋgwaz ana, aca cəna ma ana ara nesey sə, bəɗezl! Aca vəna yaŋ amta amta, madaɓa kamma sə, marndaw hay, magəra sə, Yesu aŋga amta. Ara masa ŋgwaz ana, aŋga faŋga heley fəma tata, 10Yesu ka baŋgaɗa yaŋ saya, ka nəkafa ŋgwaz ana, gege: «Ŋgwaz, ndah macafakaa lalaw sə, ac kəla? Ndana macadakaa ava ma sə, aabay war geyey?» 11Ŋgwaz sə, ka vahan, gege: «Bay Mazlakava, kwa nda amta aabay.» Yesu ka gwaɗa, gege: «Yey may, ya təɗakaa ma yaŋ aabay. Daɓa, amaa e zler təlam nesey, ke te ŋgə mebər sabay.»

Yesu sə, aŋga slam mawaɗa ta vavara

12Yesu e gweɗ kad ndana hay saya, gege: «Yey sə, ya slam mawaɗa ta vavara. Nda masa e cəpiyey sə, a də dapa ləvaŋ aabay, a ta ŋgat slam mawaɗa masa a hwad nda kad pa manjah katar ka midakw.» 13Farisa hay ac ka gwaɗa, gege: «Ka tə yaw fə yaŋ takaa ana sə, matə yaw takaa ana ŋgesey, tehwe bay.» 14Yesu ke vehecen, gege: «Kwa ya tə yaw da yaŋ yey ana, amaa matə yaw aɗaw ana tehwe, afa ya sən slam masa ye dek dapa va masa ye də kad pa. Amaa akwar sə, akwa sən slam masa ye dek dapa va masa ye də kad pa bay. 15Akwar sə, akwa təɗ ma yaŋ ndana hay ara mawulak yaŋ ta ndana, amaa yey sə, ya təɗ ma yaŋ ndana aabay. 16Yaw, kwa daha ya təɗana ma yaŋ ndana sə, matəɗ ma taaɗaw ana aŋga eve cəvey ana, afa ya təɗana ma yaŋ ndana sə, ya amta bay, amaa andaw ava Papa mezlərekiyey. 17Mavinda dapa ma majawa takwar dapa slam mekele, gege: “Matə yaw ta ndah ecew sə, ndana hay aca kəsiya”. 18Yey sə, ya tə yaw da yaŋ yey ana. Papa nda mezlərekiyey, a tə yaw da yaŋ yey ana may.» 19Aca gwaɗa, gege: «Papakw ana aŋga dama?» Yesu ke vehecen, gege: «Akwar sə, akwa səniyey bay, akwar ta sən Papa aabay may. Efes daha akwa səniyey sə, akwa səna Papa avəda may.» 20Yesu e gweɗec ma ana nesey sə, aŋga dapa masasərak ndana hay dapa Way ta kwakwas, aŋga da cak ta slam ta map jə ta mavə jene kad Zlavay dapa way ana. Ndana mazlafa mapafa ha aabay, afa pas te metəhez tata ke husek bay heley.

Madaɓa te Yesu

21Yesu e gweɗec ndah ana saya, gege: «Yey sə, ya ta daɓa. Akwar sə, akwar te yehiyey, amaa akwar ta məcata dapa mebər takwar. Slam masa ye te də kad pa sə, akwar ta zlafa medə pa bay.» 22Mazlakava hay te Zuwef hay ece gweɗ dapa taɓa tec, gege: «Nda ana a ta kəɗa yaŋ tata avəda geyey? Afa e gweɗ, gege: “Pa slam masa ye te dey sə, akwar ta zlafa medə pa aabay.”» 23Yesu gege: «Akwar sə, akwar ndah dapa dar, yey sə, ya nda da wudam. Akwar sə, akwar ndah ta vavara nesey, yey sə, ya nda ta vavara na bay. 24Mafay ana, ya ka gwaɗakwar, “Akwar ta məcata dapa mebər takwar”. Daha akwar ka kəsaw, masa “Yey sə, yey” aabay sə, akwar ta məcata dapa mebər takwar.» 25Ac ka gwaɗa, gege: «Kaa ana sə, ka wa?» Yesu ke vehecen, gege: «Yey sə, ya nda masa ya ka gwaɗakwaɗ dəga dapa mezlerey ana. 26Ya ava ma hay gaa te megweɗ da yaŋ akwar va ma hay masa ya da təɗakwar ma yaŋ ava aŋga. Amaa nda mezlərekiyey sə, aŋga nda masa e gweɗ eve metehwe ana. Ma hay masa ya gwaɗiya kad ndah ta vavara nesey sə, ye cənek da vara vaw.» 27Amaa ac ka cəna masa e gweɗec da yaŋ Papaŋ sə, aabay. 28Ara nesey, Yesu gege: «Pas masa akwar ka ta baŋgaɗa Wut ta nda avəda sə, akwar ta səna avəda, “Yey sə, yey”. Asaya, akwar ta səniya, yey sə, ye ŋgə jene ava mawulak yaŋ taaɗaw pal yey amta sə, aabay, ye gweɗ sə, ma masa Papa ta sasərakawa. 29Nda mezlərekiyey sə, aŋga ava yey. Ke gərdeyey ya amta sə, aabay, afa cəɗem cəɗem ye ŋgə jə masa a wafa.» 30Masa Yesu e gweɗ ara nesey, ndana hay gaa aca kəs ma tata ana.

Tərsam ta Abəraham metehwe ana

31Yesu ke gweɗec kad Zuwef hay makəsa ma tata sə, gege: «Daha akwar manjaha dapa ma aɗaw, ŋgesey, akwar ndah masasəraka jene taaɗaw metehwe ana. 32Ara nesey, akwar ta səna metehwe ana sə, avəda, metehwe ana ŋgesey, a ta pəlakwar avəda dapa ɓeley.» 33Ac ka vahan, gege: «Andaw sə, andaw ndah dapa tərsam ta Abəraham, kwa ndana deveŋ andaw masa ka njah ɓel ta ndana sə, aabay. Naa ka gwaɗandaw: “Ac ta pəlakwar avəda dapa ɓeley” sə, a ŋgana gwagumaw?» 34Yesu ke vehecen, gege: «Eve metehwe ana ya gwaɗakwar kwa waawa maŋga mebərey sə, aŋga ɓel te mebərey ana. 35Ɓel sə, a njah cəɗem cəɗem da hwaɗ ta way aabay. Amaa wut ta nda ta way ana sə, aŋga da hwaɗ ta way ana cəɗem cəɗem. 36Daha Wat ka pəlakwar dapa ɓeley sə, akwa tərata ndah mapəla metehwe ana. 37Ya səniya, akwar sə, akwar dapa tərsam ta Abəraham, amaa akwa yah me te kəɗiyey ka macəhwandaw, afa ma taaɗaw e sehw pa akwar aabay. 38Yey sə, ya gwaɗ ma masa ya ta wala vara Papa, amaa akwar sə, akwa ŋgə jə masa akwar ta cəna vara papaŋ takwar.» 39Ac ka vahan, gege: «Papaŋ ta papaŋ taciya sə, Abəraham.» Yesu gege: «Daha efes akwar ndah dapa tərsam ta Abəraham sə, akwa ŋgə mezlər hay masa Abəraham ana a ŋgiya.» 40Yey sə, ya ka gwaɗakwaɗ metehwe ana masa ye te cənek da vara Zlavay. Amaa təlam nesey, akwa yah cəv te mekəɗiyey ka macəhwandaw jaŋgata. Abəraham sə, ka ŋgaw ara ŋga aabay. 41Amaa akwar sə, akwa ŋgə mezlər ta papaŋ takwar. Ac ka vahan, gege: «Andaw sə, anda heyek fa zaŋ ana bay, papaŋ taciya sə, pal amta, aŋga Zlavay.» 42Yesu gege: «Daha Zlav aŋga Papaŋ takwar sə, efes akwa weliyey, afa ye dek sə, dapa Zlavay ana, ya fana nesey sə, mafay tata. Ye dek sə, ta yaŋ taaɗaw bay, amaa aŋga te zlərekiyey. 43Ma masa ya gwaɗakwar sə, akwa cəna bay mafay te mey? Afa akwa zlafa macəna ma aɗaw ana bay. 44Papaŋ takwar sə, bay ta haalay. Jene hay masa akwa wal maŋgiya fakwan nesey sə, a wafa kad papaŋ takwar. Aŋga sə, aŋga nda makəɗa nda ka macəhwandaw dəga dapa mezler ta vavara. A sən metehwe ana bay, afa metehwe ana vara vaw aabay. Daha e gweɗ ava maŋgal ma sə, ŋgesey, jə tata, afa aŋga nda maŋgəla ma, aŋga papaŋ ta maŋgal ma. 45Taaɗaw sə, ye gweɗ metehwe ana, mafay ana akwa gwam ka kəs ma ana bay. 46Ndana wa deveŋ akwar fana, masa a zlafa matə yaw da yaŋ mebər vereyey ɓa? Daha ye gweɗ metehwe ana, naa akwa gwam ka kəs ma ana bay sə, mafay te melemey? 47Nda ta Zlavay sə, a cak zləmay fa ma ta Zlavay ana. Akwa gwam ke cəkefiyey zləmay bay sə, afa akwar ndah ta Zlav bay.»

48Zuwef hay ac ka vahan, gege: «Anda zlafa megweɗ eve metehwe ana, kaa sə, ka nda Samariya ana, ka ava damkwaw dapa yaŋ.» 49Yesu ke vehecen, gege: «Ya ava damkwaw dapa yaŋ aabay, ya ŋgə sə, ya hahəlan yaŋ ta Papa, amaa akwar sə, akwa gwam ka hahəlawa yaŋ bay. 50Yaw, yey sə, ya ka yah ndana da hahəlawa yaŋ sə, aabay. Amaa ndana pal amta ɓa masa a ta hahəlawa yaŋ, aŋga sə, ma ta təɗa ma yaŋ ndana hay sə, aŋga. 51Ya gwaɗakwar, nda mapafa yaŋ ma aɗaw sə, kwa a ta wala maməc aabay.» 52Zuwef ana hay sə, ac ka gwaɗa, gege: «Anda səniya təlam nesey, ka ava damkwaw dapa yaŋ takaa ɓa. Anda səniya sə, Abəraham ka məcata, ndah mehwedek ma ec ke məcec may. Naa kaa sə, ka gwaɗa: “Nda masa ka pafa yaŋ ma aɗaw sə, kwa a ta məc aabay”. 53Kaa sə, ka mazlakava fa papaŋ ta papaŋ taciya Abəraham masa ka məcata sə, la geyey? Ndah mehwedek ma ta Zlav may, ac ke məceceŋ, naa kaa sə, ka pə yaŋ takaa ka wa la wa?» 54Yesu ke vehecen, gege: «Daha yey ana ya hahəl yaŋ taaɗaw, mahahəl yaŋ ana ŋga a ŋgata ara jene taambəla. Mahahəlawa yaŋ sə, Papa, nda masa akwa zaliya Zlav takwar. 55Akwa səniya bay, amaa yey sə, ya səniya. Daha ya gwaɗa, ya səniya bay sə, ŋgesey, ya tərata ara akwar, ndah maŋgəla ma hay. Amaa yey sə, ya səniya, ya pafa yaŋ ma tata. 56Abəraham, papaŋ ta papaŋ takwar ke weslə gaa da yaŋ mawala pas te medek taaɗaw kad pa vavara. Ka wala, ke weslə mabay da yaŋ ana.» 57Zuwef ana hay ac ka gwaɗa, gege: «Mavay takaa kwa a husa kwakwar zlam bay heley, naa ka gwaɗa ka ka wala Abəraham?» 58Yesu ke vehecen, gege: «Eve metehwe ana ya gwaɗakwar dəga Abəraham mahaya bay heley sə, yey sə, yey.» 59Mafay ana, ac ka kwakwal kekeŋ pa ha ka ta kaliya, amaa Yesu ndek! A raɓata, ka data kad a vəda dapa Way ta kwakwas.

Currently Selected:

Zaŋ 8: CUVnt

Highlight

Copy