Zaŋ 7
7
Yesu va malamaŋ hay
1Ava dəɓa ana, Yesu ka ŋgway fana fana dapa vavara te Gelile. A wal maŋgway dapa vavara te Zudey sabay, afa mazlakava hay te Zuwef hay ac ka yahaw ke te kəɗey. 2Dapa ŋgesey ana, macunam te Zuwef hay masa mezel macunam ta way meker meekerey#7.2 Way meker meekerey Macunam ana ŋgesey sə, macunam mazlakava vara Zuwef hay. Aŋga ava mehehəm mabay, aca ŋgiya sə, luma guda. Aca ŋgiya dapa berne te Zeruzelem dapa vavara te Zudey. sə, hukw cay. 3Malamaŋ hay ac ka gwaɗa, gege: «Zleftek de Gelile fana, daɗ pa vavara te Zudey, afa ndah masasəraka jene takaa aca ra wala mezlər masa ka ŋgiya. 4Nda masa a wal ndana hay aca ra səna sə, e ŋgə jene meereɓ aabay. Ka ŋgə mezlər hay mazlakava ara nesey sə, ŋguzda yaŋ takaa kad ndana hay.» 5Eve metehwe ana sə, kwa malamaŋ ana hay maa, ac ka kəs ma tata aabay. 6Yesu ke vehecen, gege: «Pas taaɗaw mambəla ana sə, ke husek aabay heley, amaa kad akwar, kwa pas wula wula sə, mambəla ana. 7Ndah dapa vavara aca zlafa mawalakwar fe ndey bay sə, aabay, amaa yey sə, ece weleyey fe ndey bay, afa ye ŋguzdek mezlər tec hay masa ac ta ŋgiya sə, mambəla ana aabay. 8Akwar sə, madaɗ pa macunam ana. Yey sə, ya də aabay, afa pas mambəla ana taaɗaw sə, ke husek bay heley.» 9Ava dəɓa ta magwaɗ ma ana ara nesey sə, ka njahata de Gelile. 10Masa malamaŋ hay ec ke dec pa macunam ana sə, ke cəpeceŋ, amaa e reɓ meereɓey, kwa ndana ka wala aabay.
Yesu a sasərak ndana hay dapa Way ta kwakwas
11Mazlakava hay te Zuwef hay ac ka yahaw dapa macunam ana, ac ka nəkaw, gege: «Aŋga dama?» 12Ndana hay gaa dapa macunam ana, ac ka sasak ma da yaŋ Yesu ana, leŋgeɗ hay ece gweɗ, gege: «Nda ana mambəla ana.» Ndah dərziya, gege: «Away! Nda ana e zlekec ndana hay.» 13Amaa kwa ndana mazlafa megweɗek ma ŋgulac kad a vəda da yaŋ ana sə, aabay, afa aca ŋgə zidaw fa mazlakava hay te Zuwef hay.
14Ta pa ɓala ɓala ta macunam ana sə, Yesu ka də pə Way ta kwakwas, ka sasərak ndana hay. 15Mazlakava hay te Zuwef hay ec ke rəzley fa ma te Yesu ana, ec ke gweɗ, gege: «Gwalaha! Nda ana na meemey, ka sasərak masən ma ta Zlav aabay, amaa a sən ma ana hay mambəla ana sə, a ŋgana gwagumaw?» 16Yesu ke vehecen, gege: «Ma masa ye te sesərekecen kad ndana hay nesey sə, e dek de vereyey bay, amaa ma ta nda mezlərekiyey. 17Nda masa a wal meŋgə jene ara Zlav ta waya sə, a ta səna mesesərekey ana na avəda, daha e dek da vara Zlavay, daha aabay ye gweɗek dapa mawulak yaŋ taaɗaw. 18Nda masasarəka ndana hay ava gədaŋ tata war sə, a wal ŋgesey, ndana hay aca ra hahəmiya. Amaa nda masasarəka ndana hay masa aca ra hahəm nda mezlərekey sə, ŋgesey, aŋga nda masa e gweɗ metehwe ana, maŋgal ma da vara vaw aabay. 19Zleezle sə, Muyiz ka vakwar ma majawa biba? Amaa kwa nda amta deveŋ akwar ka nah yaŋ kad pə ma majawa ana aabay. Yaw, naa akwa yehiyey ke te kəɗey sə, mafay te melemey?» 20Ndana hay ac ka vahan, gege: «Ka ava damkwaw dapa kaa ɓa! Bəna daha aabay mayaha cəv ta makəɗakaa sə, wa?» 21Yesu ke vehecen, gege: «Ya ka ŋgə mezlər pal amta, akwar fakwanay, akwar ka rəzlata. 22Muyiz sə, ka vakwar ma majawa ta maŋgal ŋgwal, eve metehwe ana sə, e dek da vara Muyiz bay, amaa e dek da vara papaŋ ta papaŋ tandakwa hay zleezle. Mafay ana, kwa pas ta masasak vaw sə, akwa ŋgal ŋgwal te wudeh takwar hay. 23Daha ndana a ŋgəlan ŋgwal ta wudiya pas ta masasak vaw sə, ŋgesey, a wal megweɗ ma majawa ta Muyiz de veves bay. Na akwa zam rav da yaŋ yey, mafay ta masa ya ka mbəla ndana avəda pas ta masasak vaw sə, gwagumaw? 24Magərda matəɗana ma yaŋ ndana ara masa akwar ta wala, amaa a lada matəɗ ma takwar ana e de ŋgə eve cəvey ana.»
25Ndah dərziya de Zeruzelem ece gweɗ, gege: «Na nda masa aca yahiya ke te kəɗ sə, aabay? 26Mawala! Aŋga dapa megweɗey fəma ta ndana hay. Ndana mazlafa magwaɗa aabay sə, gwagumaw? Naa mazlakava hay tandakwa ac ka səna eve metehwe ana, aŋga Kəristi geyey? 27Nda nesey sə, anda sənakwa slam masa aŋga dapa. Amaa te Kəristi, daha ka ta dakata sə, ndana a ta sən slam ana masa aŋga dapa sə, aabay.» 28Yesu a sasərak ndana hay dapa Way ta kwakwas, e gweɗ ava gədaŋ, gege: «Akwa səniyey, akwa sən slam masa ya dapa, ye ke dek ta yaŋ taaɗaw sə, aabay. Nda mezlərekiyey sə, aŋga nda masa e gweɗ eve metehwe ana, aŋga sə, akwa səniya bay. 29Yey sə, ya səniya, afa ye dek da cak tata, aŋga te zlərekiyey.» 30Aca yah cəv ka ta təhaziya, amaa kwa nda amta ka pafa ha aabay, afa pas ana tata ke husek bay heley. 31Ava aŋga ana fakwanay ndana hay gaa deveŋ miya aca kəs ma tata jaŋgata. Ece gweɗ, gege: «Daha Kəristi ka dakata sə, e te ŋgə cah hay ka fəna ta nda ana na geyey?»
32Ma masa ndana hay ta sasəkiya da yaŋ Yesu sə, Farisa hay ac ka cəna. Mafay ana, Farisa ana hay va mazlakava hay ta ndaakwas hay ac ka cacal ma, ac ka zlar ndah maɓəla Way ta kwakwas ana ka ta təhaziya. 33Yesu ke gweɗ, gege: «Ya ava akwar heley dapa manjah kusetke, ava dəɓa ana, ya ta vahaɓa vara nda mezlərekiyey. 34Akwar te yehiyey, amaa akwar te ŋgetiyey aabay, afa slam masa ye te də pa sə, akwar ta zlafa medek aabay.» 35E zler dapa ŋgesey ana, mazlakava hay te Zuwef hay ec ke gweɗ dapa taɓa teceŋ, gege: «E te dey ana sə, kad ma, masa anda ta walakwaɗ ɓasabay? E te dey kad vara malamaŋ tandakwa hay masa ac ke kwekwececeŋ kad veŋ Gərek hay geyey? E te sesərekec Gərek ana hay geyey? 36E gweɗ, gege: “Akwar te yehiyey, amaa akwar te ŋgetiyey aabay, afa slam masa ye te də pa sə, akwar ta zlafa medek aabay”. Ma ana hay nesey sə, aca wal megweɗ gwagumaw?»
Pas te memeɗ ta macunam
37Mamaɗ yaŋ ta pas ta macunam ana masa aŋga ava mehehəm ka fəna manah ta macunam ana hay dərziya sə, Yesu ke zlec fəma ta miya ke gweɗ ava gədaŋ, gege: «Daha nda masa yam a kəɗa sə, e de dek vereyey, da saɓa. 38Yaw, mavinda dapa Ɗelewer mavəna, gege: “Nda masa a kəs ma taaɗaw sə, wayam hay ta yam masa yam teceŋ ana ece və mesfeney sə, ec te vevek dapa rav tata.”» 39Yesu e gweɗ ara nesey sə, da yaŋ Mesfen Mavəna masa makəsparav tata hay ac ta ŋgatiya. Dapa ŋgesey ana, makəsparav tata hay ac ka ŋgat Mesfeney ana aabay heley, afa Yesu ke veh a wudam pa slam te mehehəm tata aabay heley.
40Ndah dərziya deveŋ miya masa ac ka cəna ma tata hay sə, ndah mekele ece gweɗ, gege: «Eve metehwe ana, nda nesey sə, aŋga nda mehwedek ma.» 41Ndah mekele, gege: «Aŋga sə, aŋga Kəristi.» Ndah mekele saya, gege: «Mesi ana e te dek sə, jaka pa vavara te Gelile geyey? 42Mavinda gege: “Kəristi sə, e te dek dapa tərsam ta Bay Deevet, e te heyek de Betəlehem, masa Bay Deevet ana aŋga wut ta wunam dərŋga.”» 43Ara nesey, ndah dapa miya sə, aca van vaw dapa taɓa teceŋ mafay tata. 44Ndah dərziya dapa taɓa teceŋ aca wal matəhaziya, amaa kwa ndana mapafa ha aabay.
45Mevehek ta ndah maɓəla Way ta kwakwas sə, bay hay ta ndaakwas hay va Farisa hay, gege: «Akwa kəsek bay sə, mafay te mey?» 46Ndah maɓəla Way ta kwakwas sə, ece vehecen, gege: «Kwa ndana ke gweɗ ara nda ana ŋgesey sə, aabay.» 47Farisa hay ece nəkefeceŋ saya, gege: «Yaw, akwar may, ka fəcakwar avəda kad pe cəv tata ŋga may geyey? 48Deveŋ andaw mazlakava te Zuwef hay va Farisa hay sə, ndana ka kəs ma tata ana ŋga ɓa geyey? 49Makəsa ma tata ana ŋgesey sə, miya ta ndah masa aca sən ma majawa ta Muyiz bay. Ndah ana ŋgesey sə, Zlav ke gwederec avəda.» 50Nikwedem, nda amta deveŋ Farisa hay. Aŋga nda masa ke də vara Yesu zleezle, gege: 51«Ma majawa tandakwa ka və cəv ta matəhaz nda ara nesey sə, aabay. A lada anda cəkakwa zləmay fətiya ɗagay, anda sənakwaɗ jə masa aŋga ta ŋgiya ɗagay.» 52Farisa hay dərziya aca vahan, gege: «Kaa sə, ka nda Gelile ana may geyey? Yahaw dapa ma hay mavinda, ka ŋgat kwa nda mehwedek ma amta masa aŋga nda Gelile ana sə, aabay.»
Ma da yaŋ ŋgwaz maŋga madama
53Ava dəɓa ana, bəɗezl! A ca vəna yaŋ, kwa waawa a daɓa kad wunam tata.
Currently Selected:
Zaŋ 7: CUVnt
Highlight
Share
Copy
Want to have your highlights saved across all your devices? Sign up or sign in
© 2022 CABTAL
