Zaŋ 9

Yesu a wunan ndey ta nda mahazlaw

1Pas ɓa, Yesu a ŋgway a ta wala ndana ɓa, aŋga mahazlaw dəga meyehek tata. 2Ndah masasəraka jene tata ac ka nəkafa, gege: «Raabi, mebər ta wa masa nda ana e de heyek aŋga mahazlaw ara nesey, mebər tata geyey? Mebər ta papaŋ va mamaŋ?» 3Yesu ke vehecen, gege: «Away, e heyek aŋga mahazlaw sə, mafay te mebər tata, kwa daha aabay tec papaŋ va mamaŋ bay, amaa e heyek ara nesey sə, afa mezlər ta Zlavay de ŋguzdek kad a vəda jaka vara vaw. 4Pas ɓa ɗagay nesey sə, a lada anda ŋgakwaɗ mezlər ta nda mezlərekiyey na avəda. Mbala vaɗ cay, ndana ma ta zlafa meŋgə mezlər ɓasabay, 5kwa e wey e wey masa ya dapa vavara sə, ya nda mawaɗa vavara.»

6Ava dəɓa te megweɗ tata ara nesey, ka caɓ slesleɓ kad fa vara, ka haɗ rəɓasl eve slesleɓ ana, ka kwaran fe ndey ta nda mahazlaw ana, 7ka gwaɗa, gege: «Daɗ ta pana ndey dapa təker te Siluwey,» Siluwey sə, a wal megweɗey Maslaŋ. Nda mahazlaw sə, ke dey, ke penek ndey, mevehek tata, ka wala ndey mambəla ana cay.

8Maslavda tata hay va ndah mawala cəɗem cəɗem e rəkey sə, ac ka wala, a wala ndey mambəla ana sə, ac ka nəkaw, gege: «Naa nda mahazlaw masa e rek cəɗem cəɗem sə, biba?» 9Ndah dərziya, gege: «Aŋga ana.» Ŋgeɗ hay, gege: «Away, aŋga bay, nda maɗala vaw.» Amaa nda ana, gege: «Yey ana.» 10Ac ka nəkafa, gege: «Na ndey takaa ana e wen gwagumaw?» 11E vehecen, gege: «Ndana ɓa mezel Yesu, aŋga ta haɗ rəɓasl eve slesleɓ tata, ka kwarawa fe ndey, ke gweɗiyey, gege: “Daɗ ta pana ndey pe təker te Siluwey”. Ye ke dey, ya ka pana ndey ana. Ava dəɓa ana, ya ka wala ndey mambəla ana.» 12Ac ka gwaɗa, gege: «Nda ana aŋga fəla?» E vehecen, gege: «Ya səniya bay.»

13Ac ka hwadaɗ nda mahazlaw sə, kad vara Farisa hay, 14anjəkar Yesu a haɗ rəɓasl, a kwaran fe ndey ta nda ana, a wunan ndey sə, pas ta masasak vaw. 15Mafay ana, Farisa hay sə, ac ka nəkafa, gege: «Ka da wala ndey ana ara nesey sə, a ŋgana gwagumaw?» E vehecen, gege: «Ke kwerefiyey rəɓasl fe ndey, ya ka pana ndey ana, ya wala ndey mambəla ana.» 16Farisa hay dərziya, gege: «Nda maŋga jeŋ ana nesey sə, e dek da vara Zlav bay, afa e ŋgə mezlər pas ta masasak vaw, a nah yaŋ kad pə ma majawa ta Muyiz aabay.» Amaa ndah dərziya deveŋ eceŋ, gege: «Nda te mebərey sə, e ŋgetek matimaazlaɓ te meŋgə cah hay ana ara nesey sə, dama?» Mafay ana, ac ka vəna vaw avəda dapa taɓa teceŋ. 17Ava dəɓa ana, aca nəkafa nda membəlek dapa mahazlaw sə, gege: «Naa kaa may, ke gweɗ da yaŋ nda mawunakaɗ ndey nesey sə, gwagumaw?» E vehecen, gege: «Aŋga nda mehwedek ma.» 18Amaa mazlakava hay te Zuwef hay ac ka wal makəsiya masa nda ana e heyek da hwaɗ ta mamaŋ aŋga mahazlaw, amaa təlam nesey, a wala ndey mambəla ana sə, aabay. Mafay ana, ac ka zal papaŋ va mamaŋ ta nda ana. 19Ec ke nəkefec, gege: «Nda nesey sə, aŋga wut takwar eve metehwe ana geyey? E heyek aŋga mahazlaw tehwe may geyey? Naa a wala ndey təlam na mambəla ana sə, a ŋgana gwagumaw?» 20Papaŋ va mamaŋ ta nda ana ec ke vehecen, gege: «Anda səniya nesey sə, wut taciya, e heyek aŋga mahazlaw, 21a da wala ndey ana sə, gəla a ŋgana gwagumaw gwagumaw sə, anda səniya sabay. Nda mawunan ndey ana, anda səniya bay. Yaw, aŋga sə, aŋga magəla cay, manəkafa, da ŋguzdakwaɗ ma ana!» 22Papaŋ va mamaŋ ece gweɗ ara nesey sə, afa ece lel fa mazlakava hay te Zuwef hay masa deveŋ eceŋ faŋga. Eceŋ sə, ac ka jawa ma teceŋ daha nda masa a tə yaw da yaŋ Yesu, aŋga Kəristi sə, ac ta mbasana dapa Way ta macə mbahw te Zuwef hay. 23Mafay ana, papaŋ va mamaŋ, gege: «Aŋga sə, aŋga magəla cay, manəkafa, da ŋguzdakwaɗ ma ana!»

24Ava dəɓa ana, Farisa hay sə, ac ka zala nda membəlek dapa mahazlaw sə, saya, ac ka nəkafa, gege: «Gweɗ metehwe ana fa yam te ndey ta Zlavay. Andaw sə, anda səniya, nda ana ŋga, aŋga nda te mebərey.» 25Nda sə, e vehecen, gege: «Gəla aŋga nda te mebərey sə, ya səniya bay. Amaa jene pal amta masa ya səniya sə, “Ya ka njah mahazlaw, amaa təlam nesey, ya wala ndey.”» 26Aca gwaɗa, gege: «Nda ana ka ŋgakaa ɓa mey? A wunakaɗ ndey ana sə, a ŋgana gwagumaw?» 27Ke vehecen, gege: «Ya ka gwaɗakwar tefes cay, amaa akwar ka kəs ma ana aabay. Naa akwa wal macəna saya sə, mafay te melemey? Akwa wal metər ka ndah masasəraka jene tata ana may geyey?» 28Farisa hay sə, aca laf nda ana, gege: «Nda masasəraka jene tata sə, sesəker kaa bəna andaw bay. Andaw sə, andaw ndah masasəraka ta Muyiz. 29Andaw sə, anda səniya, Zlav ka gwaɗa Muyiz, amaa nda ŋgesey sə, anda sən slam masa e dek dapa bay.» 30Nda sə, ke vehecen saya, gege: «Yaw, jene pal amta ɓa masa e rəzliyey. Aya, akwa sən slam masa e dek dapa bay, amaa ka wunawa ndey aɗaw avəda. 31Anda sənakwa nda masa aŋga eve mebərey sə, Zlav a cənan ma tata aabay, amaa a cənan ma ta ndah manahan yaŋ, maŋgana jə masa a waya. 32Dapa manjah tandakwa andə ka cənakwaɗ ndana ka wunan ndey ta nda mahazlaw masa e heyek ava aŋga sə, ɓa geyey? 33Daha nda ana na e dek da vara Zlav bay sə, a zlafa meŋgek jene kwa kusetke aabay!» 34Aca vahan, gege: «Dəga meheyek takaa, ka dapa mebərey sə, ka ta sasərakandaw jene? Ac ka mbasana kad a vəda.»

35Yesu a ta cəna masa Farisa hay ac ka mbasana nda membəlek dapa mahazlaw sə, ka yahaw. Ac ta cə yaŋ ava aŋga, ka gwaɗa, gege: «Ka kəs ma ta Wut ta nda geyey?» 36Nda ana ka vahan, gege: «Bay Mazlakava, Wut ta nda ana sə, wa? Ŋguzdawa, afa ya da kəs ma tata ana may.» 37Yesu a gwaɗa, gege: «Mambəla ana, sa ka wala nda ana, Wut ta nda sə, yey, magwaɗaka nesey.» 38Nda sə, ka vahan, gege: «Bay Mazlakava, ya kəsiya! Ke kekəred fəma tata.» 39Ava dəɓa ana, Yesu e gweɗ, gege: «Ye dek kad pa vavara sə, afa matəɗ ma de ŋgey, afa mahazlaw hay, aca ra wala ndey, ndah masa aca wala ndey may, aca ra həɗazlaɗay.» 40Farisa hay dərziya da cak te Yesu faŋga, ac ka cəna ma masa Yesu ta gwaɗiya sə, ac ka nəkafa, gege: «Naa andaw may, andaw mahazlaw hay la geyey?» 41Yesu ke vehecen, gege: «Daha efes akwar mahazlaw hay sə, ŋgesey, akwar ava mebər aabay. Amaa təlam nesey, akwa gweɗey, “Anda wala ndey”: Mebər takwar a ta njahay ara aŋga ana.»

Currently Selected:

Zaŋ 9: CUVnt

Highlight

Copy