Mezlər ta Maslaŋ hay 2

Medek te Mesfen Mavəna kad yaŋ makəsparav hay

1Mehusek ta pas ta macunam ta Pantikwasta sə, makəsparav hay ac ka ɓəca vaw fakwanay fa slam ana. 2Faŋga faŋga ana, ac ka cəna jene e ŋgek da baymaləvaŋ ara memeɗ masa e bebər elehey. Jeŋ ana, ka nəha way masa ac manjaha dapa. 3Ac ka wala jene ɓa ara neneŋ ta kwakwaw te gəɗey, ka vəna yaŋ, ka njah a yaŋ eceŋ ana amta amta teceŋ fakwanay. 4Ac fakwanay, ec ke nəhec eve Mesfen Mavəna, ec ke gweɗey ava ma ta wunam hay mekele mekele masa aca səniya bay ara masa Mesfen Mavəna te vec gədaŋ te megweɗey.

5Anjəkar de Zeruzelem ana sə, Zuwef hay medek dapa vavara hay fakwanay, macəpa cəv ta Zlavay ava rav pal amta ɓa. 6Dapa masa aca cəna jene e bebər ara memeɗ sə, ndana hay gaa ec ke kwesek vaw kad faŋga. Ac fakwanay, ec ke rəzleceŋ, afa kwa waawa a cəna makəsparav hay ana ece gweɗ ava ma ta wunam tata. 7Ec ke rəzley, ac ka wulakaw, ac ka nəkaw dapa taɓa tec, gege: «Ndah magwaɗa ma ana hay nesey sə, ac fakwan dapa vavara te Gelile biba? 8Naa kwa waawa tandakwa a cəna ma tata vara ndah ana masa aca gwaɗiya sə, a ŋgana gwagumaw? 9Deveŋ andakwa fana nesey sə, ndah medek dapa vavara ta Partey, te Medi, ta Elaŋ, ta Mizawpawtami, te Zudey, ta Kapaduwas, ta Paŋw va dapa vavara ta Azi. 10Dapa vavara te Fərizi, ta Pamfili, ta Misəra, te Lebi, masa zef eve berne te Siren va ndah mekele medek da Rawma. 11Ndah medek de Kəret va da Arab hay ɓa may. Deveŋ andakwa ana sə, ŋgeɗ hay Zuwef hay, ŋgeɗ hay ac ta ŋgwada rav teceŋ ka ta cəp ma majawa ta Muyiz. Amaa anda cənakwaɗ ece gweɗ ava ma tandakwa da yaŋ mezler hay mazlakava masa Zlav ta ŋgiya.»

12Ara nesey, ec ke rəzlec fakwanay, ac ka sən jə masa ac ta ŋgiya ɓasabay, ec ke gweɗ dapa taɓa tec, gege: «Jeŋ ana nesey sə, a wal megweɗ gwagumaw?» 13Amaa ndah dərziya hay, ec ke seser da yaŋ makəsparav hay ana, gege: «Ac fakwanay makwa ana!»

Piyer e bəzedec ma kad ndana hay

14Ara nesey, Piyer va maslaŋ hay kuraw dapa yaŋ ana amta ec ke zleftek, ac ka zlar megweɗec ndah makwasa fəma teceŋ sə, gege: Akwar Zuwef hay dapa vavara te Zudey va akwar ndah de Zeruzelem fakwanay, macak zləmay mambəla ana fa ma masa ya ta gwaɗakwar nesey, akwar da cəna ma da yaŋ ma ana mambəla ana. 15Ndah nesey sə, ece kwey ara masa akwar ta wulakiya bay, afa aŋga na pərek heley, pas te mehel tepey. 16Jeŋ ana e ŋgə təlam nesey sə, ara Zuwel nda mehwedek ma te gweɗ zleezle, gege:

17«Zlav ke gweɗ, gege:

“Mbala pas te memeɗ ta vavara sə,

ye te vec Mesfeney aɗaw kad ndana hay fakwanay.

Dapa ŋgesey ana, wudeh mawula hay va dehwey,

ec te tərec ka ndah mehwedek ma aɗaw hay.

Kad wudeh gawla hay sə, ye te ŋguzdec jene hay waya

masa ya ta ŋgiya.

Marndaw hay deveŋ akwar may,

meshwen e te kəɗeceŋ afa aca ra wala jeŋ ana.

18Aŋga, dapa pas ana hay ŋgesey,

ye te vec Mesfeney aɗaw Mavəna

kad ndah maŋga mezlərey aɗaw hay.

Mawulah va ŋgwazah fakwanay,

ac te tərec ka ndah mehwedek ma aɗaw hay.

19Ye te ŋgə cah hay da baymaləvaŋ,

ye te ŋgə jə marəzla ndana hay dapa vavara.

Bembez, kwakwaw va neneŋ ta cacak ec te təhekey.

20Pas e te weɗ ɓasabay,

kiya a ta ŋgwadata gagaza ana ara bembez.

Ava dəɓa ana, Bay Mazlakava e te vehekey

ke te təɗec ma a yaŋ ndana hay.

Ta pəsaŋga ana ŋgesey, ndana hay ac ta wala gədaŋ tata

ac ta səniya pas ana ŋgesey sə, a fəna dərziya hay.

21Ara nesey, kwa waawa mazala mezel ta Bay Mazlakava ke te jəney sə, a ta mbəlata#Raw 10.11..”»

22Piyer ke gweɗ saya, gege: «Akwar Isreyel hay, macak zləmay fa ma aɗaw hay. Yesu nda Nezeret sə, aŋga nda masa Zlav ta ŋguzdakwaɗ aŋga sə, e dek da vara Zlavay. A ŋguzdakwaɗ jaka pe meŋgə cah hay mazlakava marəzla nda jaka vara vaw dapa taɓa takwar. 23Nda ana sə, Zlav ka vakwaɗ pa ha takwar ara aŋga ta waya. Zlavay, dapa maləmad vaw tata mezleezle ana sə, ka səna jə masa akwar ta ŋgiya sə, avəda. Akwar ka paɗ Yesu ana pa ha ta ndah masa aca sən Zlav bay, aca ra kəɗa avəda cukw cukw fa hap mazləlawa. 24Amaa Zlav ke pərekek avəda, ka mbəla avəda dapa marga ta maməcay, afa maməcay ana aŋga ava gədaŋ kwa kusetke da yaŋ ana aabay#Mat 28.5-6; Mar 16.6; Luk 24.5.. 25Yaw, zleezle bay Deevet ke gweɗ da yaŋ Yesu ana, gege:

“Ya wala Bay Mazlakava cəɗem cəɗem fəma taaɗaw,

aŋga manjaha da ha ta zam aɗaw, afa ye de ŋgə zidaw bay.

26Mafay ana, rav aɗaw manəha eve mewesley,

ya slə laway eve mewesley.

Kwa ya ka məcata sə,

vaw aɗaw, a ta ŋgat masasak vaw

dapa maɓal jene da vara Zlavay,

27afa kaa, Bay Mazlakava

ka ta gərda mesfeney aɗaw

dapa wunam ta ndah maməca aabay.

Ka ta gərda slaw ta vaw

ta nda maŋga mezlər takaa sə,

da kuɗapaɗ dapa jav aabay.

28Ka ka ŋguzdawa cəv te mesfeney,

ke te nəheyey eve mewesley#Jab 16.8-11., afa ka ta njah da cak taaɗaw.”»

29Piyer ke gweɗec saya, gege: «Malama hay Zuwef hay, ya zlafa mapanakwaɗ ma da yaŋ bay Deevet papaŋ ta papaŋ tandakwa ana mambəla ana. Ya gwaɗakwar, bay Deevet sə, ka məcata, ac ka pəsaha avəda, jav tata ana haa pəsna aŋga ɓa fana#2.29 1Ba 2.10. 30Aŋga ana sə, nda mehwedek ma, a səniya Zlav ka gwaɗana ma ɓa eve membeɗey, gege:

“Ava dəɓa takaa sə, ya ta paɗ nda amta dapa tərsam takaa,

a da njah ka bay ara kaa.”»#2.30 Jaab 132.11; 2Sa 7.12-13.

31«Ara nesey, Deevet ana ka səna jə masa Zlav a ta ŋgiya maayaŋ kad fəma sə, avəda. Ke gweɗey da yaŋ mepərek te Kəristi, gege: “Zlav a ta gərda dapa wunam ta ndah maməca sə, aabay, slaw ta vaw tata e te kuɗep aabay.”»

32Yesu ana nesey sə, Zlav ke pərekek avəda dapa maməcay, andaw fakwan təlam nesey, anda tə yaw da yaŋ ma ana. 33Zlav ka kəsa avəda kad a wudam, ka njahaɗ a ha ta zam tata. Zlav Papaŋ ka vana Mesfen tata masa aŋga ta gwaɗa, a ta vana. Yesu ka zlərandakwaɗ Mesfeney ana, ara masa akwa wala va masa akwa cəna təlam nesey. 34Anda sənakwa Deevet ava yaŋ tata ana, ke ŋgeɗ kad a wudam sə, aabay, amaa ke gweɗ da yaŋ Kəristi, gege:

«Bay Zlavay ka gwaɗa Bay Mazlakava aɗaw, gege:

“Dekey njah da ha ta zam aɗaw,

35kasl pa pas masa ye te peɗec maslagəra takaa hay

a hwaɗ ta ha takaa.”»#Jab 110.1.

36Piyer ke gweɗec saya, gege: «A lada hwaɗ ta way te Isreyel hay fakwanay aca ra səna eve metehwe ana, Yesu sə, Zlav ka paɗ ka Bay Mazlakava va Kəristi, aŋga nda masa akwar ka zləlawaɗ fa hap mazləlawa.»

Ndah bakatar mahkar e sekekey kad e veŋ makəsparav hay

37Dapa masa ndah makwasa aca cəna ma nesey sə, rav ke təɗec mabay. Mafay ana, ec ke gweɗec Piyer va maslaŋ hay dərziya, gege: «Ara nesey sə, andaw de ŋgə mey malama hay?»

38Piyer ke vehecen, gege: «Maŋgwada rav takwar, a lada kwa waawa takwar da yah meŋgə beetem eve mezel te Yesu Kəristi mafay ta mapal mebər tata hay va maŋgat Mesfen Mavəna. 39Zlavay ke gweɗey a ta və Mesfen tata sə, kad ndah masa ac fana təlam nesey. Mesfeney ana sə, a ta viya kad akwar va wudeh takwar hay. Asaya, kad ndah dəreŋ va ndah masa Zlavay, Bay tandakwa te zelekeceŋ kad vara vaw.»

40Piyer ke gweɗec ma hay mekele mekele saya masa aca ra kəs ma tata ana, ke vec gədaŋ, gege: «Mavəna vaw ava ndah suwe hay dapa vavara təlam nesey, afa Bay Zlavay da mbəlakwar avəda dapa pas masa e te təɗec ma a yaŋ!»

41Ndana hay mabay deveŋ ndah ana hay ŋgesey ac ka kəs ma ta Piyer, ac ka ŋgat beetem. Pəsaŋga ana ŋgesey, ndana hay ec ke ŋgə bakatar mahkar masa ac ke sekek kad e veŋ makəsparav hay.

Manjah ta makəsparav hay

42Cəɗem cəɗem makəsparav hay aca cak zləmay fe mesesərek ta maslaŋ hay ava rav pal amta. Ac manjaha ara wudeh ta nda amta. Kwa dapa mavan jene ta manday ta masənafa maməc te Yesu va dapa macə mbahw kad Zlavay sə, ac fa slam ana. 43Maslaŋ hay ac ke ŋgə cah hay mabay masa e ŋguzdek gədaŋ ta Zlavay aŋga eve eceŋ. Ndana hay fakwanay ec ke rəzleceŋ mafay ta cah hay ana, ac ka nah yaŋ kad Zlavay. 44Makəsparav hay fakwanay ac macama fa slam ana, aca vən jə masa ac ava aŋga sə, fa vaw teceŋ#2.44 4.32-35. 45Ara megweɗey, ac ka husamda ley tec hay va jene tec hay, aca vən səlay ana fa slam ana. Kwa waawa ka ŋgat jə masa aŋga ta waya ava səlay ana masa da husana. 46Fa pas fa pas, aca cam vaw fa slam ana dapa Way ta kwakwas ava rav amta. Aca ndə ɗaf fa slam ana da way tec hay eve mewesley va ava rav mambəla ana. 47Ac fakwanay, ac ka hahəm Zlavay fa slam ana. Ndana hay fakwanay ec ke hehəmec mabay. Cəɗem cəɗem Bay Zlavay e zelekec ndah masa ec ke mbəlekec dapa mebər teceŋ kad e veŋ macam yaŋ ta ndah tata.

Currently Selected:

Mezlər ta Maslaŋ hay 2: CUVnt

Highlight

Copy