Matéus 14

Nyɛmb nyí Yohánɛs Ǹtíi-nzoɓan

(Mlk 6.14-29; Lúk 9.7-9; 3.19-20)

1Múŋ á yéŋ eceg, Elóde ŋ̀kanʼyɛ a Galiléa, ɔ ámblé pɔ́l Yésus, 2la nyɛ́ ɔ lāgá ɓáɓɔŋle ɓɛ́ɛ́ nɛ́: «Yohánɛs Ǹtíi-nzoɓan nyɔ́ŋ! Nyɛ́ nɛ́ a pāhye! Ányúū náŋ nɛ́ a byɛ́ɛ̄ ŋguu li ɓɔŋ lí bínanaŋga bí mam.» 3Ɛ́ lolóó nɛ́, Elóde a byelháánɛ Yohánɛs, ɔ kághánɛ̄ nyɛ la nsáŋ-á-bícɛɛ, ɔ óm nyɛ á m̀ɓog ányúū Elódiáda, ŋ̀gáá mɔ́ɔ̄nyāŋ Filípo. 4Átɔm nɛ́ Yohánɛs á ŋgí laga Elóde nɛ́: «Ɔh byɛ́ɛ́ ɓé kúndɛ lí nyɔŋ lí ŋ̀gáá mɔ́ɔ̄nyɔ̄ŋ.» 5La mbálɛ nɛ́, Elóde a ŋgí somo li ólhánɛ lí Yohánɛs, ndí a ŋgí kɔn límut woŋ, ányúū nɛ ɓot bí ŋgí nyɔŋ Yohánɛs kaa m̀pɔ́tle-a-Ɔlolómɛ̄. 6Ndí, á ɔ́lɔ̄ ví ŋgand libyáa lí Élóde, ŋgɔn nyí Elódiáda yu yém á ɔ́sū ví Élóde la ɓacɛn ɓɛ́ɛ́, náŋ ɔ nyɛ́ɛlé nyɛ. 7Ányúū náŋ, ɔ kān-sɔŋ ɔ́sū ví ɓot bísɛ nɛ́ ag kɛ nyɛ́ lí tíi lí yé ɛ́sɛ a ŋga kɛ́ nyɛ́ lí ɓāt. 8Váŋ nɛ́ Elódiáda a sɔgláánɛ ŋgɔn yɛ́ɛ̄ nɛ ɛ lágá Élóde nɛ́: «Vá ápah mi tɛ́ɛ́, tí ma m̀mú á Yohánɛs Ǹtíi-nzoɓan á nlɛ́há-á-páan.» 9Elóde ɔ súnan. Ndí, kasig a manáá lí kan lí sɔŋ ɔ́sū ví ɓácɛn ɓɛ́ɛ́, ɔ kānʼyɛ́ nɛ náŋ a ɓɔ̄ŋɓɛ́; 10la nyɛ́ ɔ óm nɛ́ bí sɛ́m Yohánɛs m̀mú á ndáá-m̀ɓog. 11Bú sɔ́ bí ɓɛ́gɛ wɔ́ á nlɛ́há-á-páan, bú lōɛ́ wɔ́ nyíŋ ŋgɔn mindígá la yɔg yu kɛ́ wɔ́ li tíi lí nyaŋɛ́. 12Ámbúh náŋ, Ɓayége bí Yohánɛs bú sɔ́ lí nyɔ̄ŋ lí m̀bim wɛ́ɛ́, bú jé wɔ; la ɓɔ́ bú kɛ̄ lí yíhɛ lí Yésus yé yá loo.

Yésus ag díɛ́hɛ limut lí byɛ́ɛ̄ akóó á páam átáan

(Mlk 6.30-44; Lúk 9.10-17; Yhn 6.1-15)

13Ɛnɛ́ Yésus a ámblé nyíŋ pɔ́l, ɔ nyɔ̄ŋ m̀ɓoŋgó, ɔ kɛ̄ á mɓagɓanɛ́ á voóm a liɛ́g. Eceg limut lá ámblé nāŋ, ɓot bú ɓógyéné á tísɔn yáɓá á lí oŋ lí nyɛ jé lí sí. 14Á mísuh mɛ́ɛ́ mí m̀ɓoŋgó, Yésus ɔ ɛ́n limut licɛ́ŋ, ɔ kɔ̄nlé jɔ ŋgɔ́ɔ́, la nyɛ́ ɔ tɔ́ɔyɛ́ ɓákɔɔ́kɔ̄n ɓáɓá mbólí. 15Ɛnɛ́ ŋgōgó ya vín, ɓayége bí Yésus bú sīŋglé nyɛ́ ɓɛɓɛ, bú lāgá nyɛ nɛ́: «Nyɔ́ voóm a lɛ ɔ́tīgá, eceg ki yá kɛ, soɛ́ jé limut, lí kɛ á míkɔŋ á lí sóm lí lídī.» 16Ndí Yésus ɔ pélē ɓɔ̄ nɛ́: «Nsɛ́ŋ a sē ɓé ɓɔ li kɛ wóŋ, ɓɛ́nɛ-mɛ̄n tíán ɓɔ́ lídī.» 17La ɓɔ́ bú lāgá nyɛ nɛ́: «Bi byɛ́ɛ́ ja bíkɔgá bítáan la kɔh ɛ́ɓáa vá.» 18Yésus aá la ɓɔ́ nɛ́: «Sɔ́án lā ma byɔ́ vá.» 19Ɔ kānʼyɛ́ limut nɛ́ lí tɔ́ɔ̄ á lóō lí bíkāā. Ámbúh náŋ, ɔ nyɔ̄ŋ bíŋ bikɔgá bítáan la yíŋ kɔh ɛ́ɓáa. Ɛnɛ́ a ɓétɛ́ miíh á lóō, ɔ tí Ɔ́lolómɛ̄ mítamlan, ɔ búg bíkɔgá ɔ tí byɔ́ ɓayége ɓɛ́ɛ́ nɛ bí kaa byɔ́ la limut. 20Ɓot bísɛ bú dí, bú yál. Bú tímān la bitun byá bug. Bitun bí yégléé bí yáhɛ́ɛ jóom lí bísɛɛ la bíɓáa. 21Ɓot bí díéé bí ɓɛ́ɛ́ jam-kaa akóó á páam átáan ɔ ɓógtɛ́ ɓondígá la ɓɔɔ́n.

Yésus ag wɛɛ á lóō lí míndīm

(Mlk 6.45-52; Yhn 6.16-21)

22Á ékūyá-kúyá, Yésus ɔ nyághánɛ́ ɓayége ɓɛ́ɛ́ lí ɓét á m̀ɓoŋgó, ɔ dúgɛ́ ɓɔ nɛ́ bí ɓēhé á nyúŋú mií á ébúle. Nyɛ́ ɔ yéglé ag soɛ limut. 23Ámbúh mikɛ mí jéŋ limut, ɔ kɛ̄ lí kánɛ á lóō lí ɔkolá á mɓagɓanɛ́. Tɛɛla á ébúg-lóō, a ɓɛ́ɛ́ váŋ nyɛ́-ntámɛ́. 24Kasig m̀ɓoŋgó á nɛŋɓéé la m̀byáŋ ɔ́sōō, minɔŋgɔ́ mí ŋgí lɔ́g wɔ́ ŋgɔá ki ɛg émb wɔ́. 25La miyɛ́ mí kítí, Yésus ɔ sɔ́ á ŋgwáāg yāɓá ag wɛɛ á lóō lí míndīm. 26Ɛnɛ́ ɓáyēge ɓɛ́ɛ́ ɓá ɛ́n nyɛ ag wɛɛ á lóō lí míndīm, bú pámblan, bú lāgá nɛ́: «Ŋkúgu nyú!» Á ŋkɔnwoŋɛ́ wāɓá, bú ɓōtlé lí tɛ́ɛ lí mílōn. 27Á ékūyá-kúyá, Yésus aá la ɓɔ́ nɛ́: «Miníh kótóg ɓé, má nyɔ́ŋ!» 28Váŋ nɛ̄ Pétlos a lāgá nyɛ nɛ́: «Ɛtáŋɛ, kɔɔ la mbálɛ, kíyáɓɛ́nɛ wā-mɛ̄n nyɔ́ŋ, kanʼyɛ́ ma nɛ́ mi wɛ́ɛ á lóō lí míndīm, mi sīŋglé wa ɓɛ́ɓɛ.» 29Yésus ɔ lāgá nyɛ nɛ́: «Sɔ́!» Váŋ nɛ̄ Pétlos a sūh á m̀ɓoŋgó ɔ ɓōtlé lí wɛɛ á lóō lí míndīm, ág siŋgle nyɛ́ ɓɛ́ɓɛ. 30Ndí ɛnɛ́ Pétlos a ógtán ŋgɔá, ɔ kɔ̄n woŋ, ɔ káhá lí tíɓe la nyɛ́ ɔ lón nɛ: «Á Ɛ́tāŋɛ sūŋ ma.» 31Á ékūyá-kúyá, Yésus ɔ lɛ́g wɔ́ ɔ byēé nyɛ ag lāgá nyɛ nɛ́: «Á mut a ŋyéɓé ntɔ́ga nyɔ́, ányúū yéé ɔ ŋgɔ péndan é?» 32Ɛnɛ́ ɓɔ́ bíɓáa ɓá ɓét á m̀ɓoŋgó, ŋgɔá yu vɔ́lɓe. 33Ɓot bí ɓɛ́ɛ́ átē á m̀ɓoŋgó bú úm míɓɔ̄ŋ á ɔ́sū ví Yésus, bú lāgá nɛ: «Kɔɔ la mbálɛ, ɔ lɛ̄ Mɔ́ɔ̄n Ɔlolómɛ̄!»

Yésus ag manɛ ɓakɔɔ́kɔ̄n á Genesálɛt

(Mlk 6.53-56)

34Ɛnɛ́ Yésus la ɓayége ɓɛ́ɛ́ ɓá yáɓe, bú pám á ŋkɔŋ á Genesálɛt. 35Ɓot bí nyúŋ ŋkɔŋ bú lēm nyɛ, bú cámānɛ́ pɔ́l misɔ́ mɛ́ɛ́ á ŋkɔŋ ásɛ, la ɓot bú sɔ́la nyɛ́ ɓakɔɔ́kɔ̄n bísɛ. 36Váŋ nɛ̄ ɓá sɔ́hyé nyɛ nɛ́ a mwáhɛ́ ɓakɔɔ́kɔ̄n bí síiɓán tɔ lisúg jɛ́ɛ́ lí mbɔ́tí. Ɓot bísɛ bí síiɓáán jɔ́ bú tɔ́ɔ̄ mbólí.

Currently Selected:

Matéus 14: NTB

Highlight

Copy