Lúkas 5

Yésus ag pɔhɔ ɓayége ɓɛ́ɛ́ bí ɔ́sū

(Mat 4.18-22; Mlk 1.16-20; Yhn 21.1-11)

1Ɔlɔ́ vá, Yésus a ɓɛ́ɛ́ á tɛ́ɛ á ŋgwáāg ebúle yé Genesálɛt; limut lú díí nyɛ á lí ámble lí pɔ́l Ɔlolómɛ̄. 2Váŋ nɛ́ a ɛ́n míɓoŋgó míɓáa mí cágɛ á ŋgwáāg ebúle, ápah ɓot bí mísombó bí ŋgí so bipéha byáɓá. 3La Yésus ɔ ɓét á m̀ɓoŋgó wá, nyú á ɓɛ́ɛ́ nyú á Símɔn. Ɔ lága nyɔŋ nɛ́ a síndí wɔ́ puh li kɛ á nyaŋɛ́. Yésus ɔ tɔ́ɔ̄ á m̀ɓoŋgó, ɔ ɓōtlé li yéglɛ lí limut. 4Ɛnɛ́ a manɛ li pɔ́t, ɔ laga Símɔn nɛ́: «sīŋglé á nyaŋɛ́ ápah njiɓa ɛ lɛ, wa la ɓot ɓɔ́ɔ miní léé bipéha byáná.» 5Símɔn ɔ yó nyɛ nɛ́: «Etāa, ɓaá sál pɔ́n díɓe lísɛ ɛ́h ɓɛ́ ɓé ɓɛ́hɛ li ól lí tɔ jam. Ndí ákaa wa nɛ́ ɔ ŋgɔ laga náŋ, mag léé bípéha.» 6La ɓɔ́ bú léé bípéha, bú ól kɔh ŋgandag á nyaa nyí lɛ nɛ́ bipéha byáɓá bú ɓōtlé lí wáhe. 7Váŋ nɛ́ ɓá pɛ́ɛ́ míwāndá máɓá mí ɓɛ́ɛ́ á nyúŋú m̀ɓoŋgó nɛ́ mí sɔ́ mí óŋgānɛ́ ɓɔ́. Ɛnɛ́ ɓá sɔ́, bú byáŋ elɔŋ la ɓɔ́, bú yáhɛ míŋ miɓoŋgó míɓáa la kɔh á nyaa nyí lɛ nɛ́ mú ɓōtlé lí yín. 8Ɛnɛ́ Símɔn Pétlos a ɛ́n naŋ, ɔ ɓɛ́hán á míkoo mí Yésus, ɔ sɔ́hyé nyɛ́ nɛ́: «Ɛtáŋɛ, kɛnɛ́g, nɛŋɛ́ la ma, átɔm nɛ́ mí lɛ m̀ɓɔŋ-miɓé.» 9Woŋ á byeléé Símɔn la ɓá bísɛ bí ɓɛ́ɛ́ elɔŋ la nyɛ́, ányúū ɔbul ví kɔh bí ólóó. 10Nlemlem á jam wú byēé Yákop la Yohánɛs, ɓɔɔ́n bí Zebedéo ɓá bí ɓɛ́ɛ́ elɔŋ la Símɔn. Yésus aá la Símɔn nɛ́: «Ɔh kɔnɔ́g ɓé woŋ, li ɓotle la lɛn ɔg ɓɛ́ ja nlɔ́ɔ́ ɓot.» 11La ɓɔ́ bú cág míɓoŋgó á sí, bú cóó byoóm bísɛ, bú ōŋ nyɛ.

Yésus ag manɛ mut-a-mivɛlɛ

(Mat 8.1-14; Mlk 1.40-45)

12Ɔlɔ́ vá, Yésus a ɓɛ́ɛ́ á tísɔn ya, ɔ ɓómán la mut wa, nyɔ́ a ɓɛ́ɛ́ nyɛ́ asɛ̄ la mivɛlɛ. Ɛnɛ́ nyɔ́ŋ mut a ɛ́n nyɛ, ɔ kúēlé nyɛ́ a sí míkoo, asú a sí, ɔ sɔ́hyé Yésus nɛ́: «Ɛtáŋɛ kíyáɓɛ́nɛ ɔg diŋ, púɛ́ ma.» 13La Yésus ɔ sámbá wɔ, ɔ síiɓán nyɛ, ɔ yó nɛ́: «Mag diŋ náŋ, púú.» Á ékūyá-kúyá mivɛlɛ mú ɓógó nyɔ́ŋ mut á nyúū. 14Ndí Yésus ɔ ɓéhyɛ́ nyɛ nɛ́: «Ɔh laglág ɓé tɔ mut yé ya loo, ndí, kɛ̄n étɛ̄ nyuú yɔ́ɔ ǹtíi-nsúlé, ámbúh náŋ ɔ tí likaale ányúū mbólí nyuú wa kūh, likɔlɓan la bitɛ́ɛ́yéné bí Móse. Náŋ ag kɛ ɓɔ́ li ɓɛ́ lí ndembye.» 15Joó li Yésus lú cámān ɓavoóm bísɛ, limut ŋgandag ki lú koman á li ámblé lí nyɛ, la li kuh lí mbólí nyuú. 16La Yésus ɔ yíg ɓɔ, ɔ kɛ́ á míkánɛ enɛŋɛ́ á líɛ̄g ápah mut tɔ wa a sē ɓé.

Yésus ag tɔɔyɛ eɓóg-mut mbólí

(Mat 9.1-8; Mlk 2.1-12)

17Ɔlɔ́ vá, Yésus a ɓɛ́ɛ́ a ŋgí yéglɛ á líŋgīndá. Yéŋ eti ɛ́ ɓɛ́ɛ́la ɓot bí Élōg-Falísái la ɓayéglɛ mbéndá, ɓá bí sɔ́lénéé á míkɔŋ mísɛ mí Galiléa, mí Yúdēa la mí mí Yélūsalɛm. Ŋguu Nyɔ́ŋ-Ɛsáŋɛ́ ɛ ɓɛ́ɛ́ la nyɛ́ á li manɛ lí ɓákɔɔ́kɔ̄n. 18Váŋ nɛ́ ɓot ɓá sɔ́, bí ɓɛ́gɛ eɓóg-mut á sáŋkálɛ; bí ŋgí somo nyɛ́ lí níŋgɛ nɛ́ bí tɛ́ɛ́yɛ́ nyɛ́ ɔ́sū ví Yésus. 19Ndí, bíh yíi ɓé ákaa ɓá nyɛɛ́ lí ɓɔŋ átɔm nɛ́ limut lí ɓɛ́ɛ́ ŋgandag, la ɓɔ́ bú ɛ́n hɔ́ nɛ bí ɓét la nyɛ́ á lóō lí ǹduu, bú ɓáāg voóm, bú súhɛ́nɛ́ nyɛ váŋ la sáŋkálɛ wɛɛ́ á m̀mím á limut, ɔ́sū ví Yésus. 20Ɛnɛ́ Yésus a ɛ́n ŋyéɓé wáɓá, ɔ lága ŋ̀kɔɔ́kɔn nɛ́: «Ma láakɛ́ wa míɓē mɔ́ɔ.» 21Ɓayí-mbéndá la Falísái bú ɓōtlé lí pɔ́t la m̀mím nɛ́: «Nzáá mut nyɔ́ á ŋga óŋo Ɔlolómɛ̄ é? Ɓaá, nzáá a ŋga lá li laakɛ lí míɓē amáh sig Ɔlolómɛ̄ nyɛ́-ntámɛ́!» 22Kasig Yésus a ŋgí yí míɔ̄ŋɔ máɓá, ɔ bíhī ɓɔ nɛ́: «Ányúū yéé miní byɛ́ɛ́ nyíŋ nyaa míɔ̄ŋɔ á mímīm máná é? 23Á póla mí mam míɓáa, yéé ɛ́ ŋga lēt lí laga: Ma láakɛ́ míɓē mɔ́ɔ, tɔ nɛ́: tɛ́lɛ́ ɔ wɛ́ɛ é? 24Jɔ́ hɔ́ nɛ́, yíán nɛ́ Mɔɔ́n Mut a byɛ́ɛ́ ŋguu nyí li laakɛ lí míɓē á ŋkɔŋ-á-sí» Yésus ɔ lága éɓōg-mut nɛ́: «Tɛ́lɛ́, nyɔ̄ŋ sáŋkálɛ wɔɔ, soóg á yóg yɔ́ɔ.» 25Á ékūyá-kúyá, ɔ tɛ́lɛ́ ɔ́sū váɓá ɔ nyɔ̄ŋ sáŋkálɛ wɛɛ́, ɔ tímān á yóg yɛ́ɛ̄ ag ɓégɛ Ɔlolómɛ̄. 26Ɓot bísɛ bí ɓɛ́ɛ́ váŋ bú nyág la ɓɔ́ bú ɓōtlé li ɓégɛ li Ɔlolómɛ̄; a sí ŋgandag woŋ, bú laga nɛ́: «lɛn nɛ́ ɓaá ɛ́n bínanaŋga bí mam.»

Yésus ag yáŋa Lévi la ɓaɓɔŋ-miɓé

(Mat 9.9-13; Mlk 2.13-17)

27Ámbúh náŋ, á mípām mí Yésus, ɔ ɛ́n ŋ̀komanɛ-ŋkuh-á-gɔ́mna nyɔ́ bí ŋgá yáŋa nɛ́ Lévi, á tɔ́ɔ̄ á voóm wɛ́ɛ a nsɔ́n. A byɛ́la nyɛ́ nɛ́: «ōŋ ma.» 28La Lévi ɔ yíg mam mɛ́ɛ́ mísɛ, ɔ tɛ́lɛ, ɔ ōŋ nyɛ́. 29Ámbúh náŋ, Lévi ɔ yáŋa Yésus á líndēmá á yóg yɛ́ɛ̄; múŋ á jéŋ lindémá, ɓot bí ɓɛ́ɛ́ bí tɔ́ɔ̄ la ɓɔ́ á téɓeli bí ɓɛ́ɛ́ ja: nlɔŋ á ɓákomanɛ-ŋkuh-á-gɔ́mna la ɓáŋá ɓot ɓatám. 30Elōg-Falísái la ɛɓáɓá ɓáyī-mbéndá bú ɓōtlé li dumlan, la li laga lí ɓayége bí Yésus nɛ́: «Ányúū yéé miní ŋga dí, miníg nyú ki elɔŋ la ɓakomanɛ-ŋkuh-á-gɔ́mna la ɓaɓɔŋ-miɓé é?» 31Yésus ɔ nyɔ̄ŋ mpɔ́t aá la ɓɔ́ nɛ́: «Ah ɓot bí lɛ mbólí ɓé nɛ bí byɛ́ɛ̄ kóó ǹtála ndí ɓakɔɔ́kɔ̄n. 32Māh sɔ́ ɓé ma li yáŋa lí ɓá bí tɛ́ɛ́ sim, ndí ɓaɓɔŋ-miɓé á li ɓɔŋ nɛ́ bí vēŋé bílɛ̄m.»

Bíg bihi Yésus ányúū etɔɔ-nzal

(Mat 9.14-15; Mlk 2.18-20)

33Elōg-Falísái la ɓayí-mbéndá bú laga Yésus nɛ́: «ɓayége bí Yohánɛs la ɓáhá bíg yɔg li tɔɔ lí nzal la li kánɛ, ndí ɓayége ɓɔ́ɔ bíg dí, bíg nyú.» 34Ndí Yésus ɔ tímānɛ̄ ɓɔ́ nɛ́: «Miníg ɔ́ŋɔ nɛ́ miní lɛ́ nɛ́ maná tɔɔyɛ ɓayáŋlɛ á ŋgand aúg nzal, kí sɔ́mbɔ́ ɛ́ tɔ́ɔ̄ elɔŋ la ɓɔ́ é? 35Ndí eceg ɛg kɛ li sɔ́ yé bí ŋga nyɔ̄ŋle ɓɔ́ sɔ́mbɔ́, muŋ á nyúŋ alɔ́ hɔ́, bíg kɛ li tɔɔ lí nzal.»

Mbyáŋgá mam mí péná la mam mí kwaŋ

(Mat 9.16-17; Mlk 2.21-22)

36Yésus ɔ kánɛ sīg-pɛ ɓɔ́ ví ɔŋgaáŋgan nɛ́: «Mut tɔ wa a ŋgá ɓógtɛ ɓé písīs liɓato á ŋkánág á mbɔ́tí, á li lɔndɔ lí yɔ á nyí ǹdunɛ; kí á ɓɔŋ náŋ, ŋkánág á mbɔ́tí ág lɔɓe, ndí písīs liɓato nyí ŋkánág á mbɔ́tí ki ɛ́h la ɓé li byelɓan á nyí ǹdunɛ. 37Mut tɔ wa a ŋgá ɔlɔ ɓé míkānág mí mílɔg á míndunɛ mí bílōgá, ányúū nɛ mikánág mí mílɔg míg ɓól bíŋ bilógá, milɔg má kómɓán á sí, bibyelé kí byá ɓɔ́lan. 38Jɔ́ hɔ́ nɛ, mikánág mí mílɔg míg kɛ ja á míkānág mí bílōgá. 39Tɔ nzáá a nyú nlom á wáany, a ŋgá ɓɛ́la ɓé pɛ kóó li nyú lí ŋkánág, ányúū nɛ ag laga nɛ́: Nlom á wáany nɛ́ a lɛ́ nláám.»

Currently Selected:

Lúkas 5: NTB

Highlight

Copy