Lúkas 4
4
Sátan ag ceglɛ Yésus
(Mat 4.1-11; Mlk 1.12-13)
1Yésus, ŋyálāg la M̀búl Mpúán, a ŋgí sɔ́léné á lɔm lí Yɔ́ldan. Váŋ nɛ́ M̀búl Mpúán a kɛ́la nyɛ́ á éyāŋ; 2ápah á tɔɓéé muúmínáa mí álɔ̄ á sí miceglan mí ǹsɔhɔ. Múŋ á nyúŋ alɔ́ ásɛ, a díéé ɓé tɔ jam. Ɛnɛ́ nyúŋ alɔ́ á lolóó, nzal yu byée nyɛ. 3Váŋ nɛ́ ǹsɔhɔ a lága nyɛ nɛ́: «Kíyáɓɛ́nɛ ɔ lɛ̄ Mɔ́ɔ̄n Ɔlolómɛ̄, kanʼyɛ́ nyí ŋgɔg nɛ́ ɛ yáan ekɔgá.» 4Yésus ɔ pélē nyɛ nɛ́: «Yá ciiɓɛ́ nɛ: mut a ŋgá niŋle ɓé ja á ékɔgá yɔ́-ntámɛ́.» 5Ámbúh náŋ ǹsɔhɔ ɔ ɓétɛ́ nyɛ́ á lóō, á lí kɛ́pte lí diíh, ɔ étɛ̄ nyɛ bikombo bísɛ bí ŋkɔŋ-á-sí; 6ɔ lága nyɛ nɛ́: «Mag kɛ wa lí tíi lí ŋguu á lí kanʼyɛ lí bí bikombo la abyaŋ wɛ́ɛ́ ásɛ, ányúū nɛ byɔ́ bísɛ byá tíéɓɛ́ ma, mag tíi byɔ́ tɔ nzáá mi ŋga díŋɛ. 7Wa hɔ́! Kíyáɓɛ́nɛ wa úmlé má míɓɔ̄ŋ, mag tíi wa byɔ́ bísɛ.» 8Yésus ki ɔ pélē nyɛ nɛ́: «Yá ciiɓɛ́ nɛ: Ɔg kɛ ja li úm lí míɓɔ̄ŋ á li ɓégɛ lí Nyɔ́ŋ-Ɛsáŋɛ́ Lōó jɔ́ɔ, nyɛ́-ntámɛ́ ntámɛ́ kí nɛ́ ɔ ŋgɔ kɛ́ li ɓɔŋle.» 9Váŋ hɔ́ nɛ ǹsɔhɔ á kɛ́ la nyɛ́ á Yélūsalɛm; ɔ ɓétɛ́ nyɛ á njoŋgi nyí ndáá-ēcɛ́ŋ-Ɔlolómɛ̄, ɔ yó nyɛ nɛ́: «Kíyáɓɛ́nɛ ɔ lɛ̄ Mɔ́ɔ̄n Ɔ́lolómɛ̄, ɓógyé vá, ɔ súmblé á sí, 10átɔm nɛ́, yá ciiɓɛ́ nɛ: Ɔlolómɛ̄ ag kɛ li kanʼyɛ lí áŋgɛl yɛ́ɛ́ ányúū yɔ́ɔ nɛ́ ɛ́ tát wa, 11ɛ́g kɛ wa li ɓɛgɛ á mɔ máɓá á li ɓɔŋ nɛ́ akoo wɔ́ɔ áh ɓomtágán ɓé ŋgɔg.» 12Ndí Yésus ɔ pélē nyɛ nɛ́: «Yá pɔ́tɓɛ́ nɛ: Ɔh ceglɛ́gɛ́ ɓé Nyɔ́ŋ-Ɛsáŋɛ́ Lōó jɔ́ɔ.» 13Ɛnɛ́ ǹsɔhɔ a mánɛ patí yɛ́ɛ́ míceglan ɛ́sɛ, ɔ ɓáglán lá Yésus á nlaaŋkán á elɔ́ŋgɔ eceg.
Miɓotlé mí nsɔ́n mí Yésus á Galiléa
(Mat 4.12-17; Mlk 1.14-15)
14Ámbúh náŋ, Yésus, ŋyálāg la Ŋguu M̀búl Mpúán, ɔ tímān á Galiléa. Joó jɛ́ɛ́ lú cáman á yéŋ epah ékombo ɛ́sɛ. 15A ŋgí yéglɛ á ndáá-míɓomán yáɓá. Ɓot bísɛ bú ɓōtlé nyɛ li tíi lí lipém.
Ɓot bí Názalɛt bíg ɓen Yésus
(Mat 13.54-58; Mlk 6.1-6)
16Yésus ɔ sɔ́ á Názalɛt, á ŋkɔŋ a náŋle. Ákaa elɛ́m, á ɔlɔ́ ví évɛɛɓan ví Élōg-Yúda, ɔ níŋgí á ndáá-míɓomán la nyɛ ɔ tɛ́lɛ li sɔ́ŋgɔ. 17Bú tí nyɛ́ kálati Esáya m̀pɔ́tle-a-Ɔlolómɛ̄. Ɛnɛ á vúlú yɔ, ɔ sóŋhán la yé epah kálati yá ciiɓɛ́ nɛ:
18M̀búl á Nyɔ́ŋ-Ɛsáŋɛ́ á káhɛ á lóō jáma,
nyɛ́ nɛ́ a pɔ́hɔ̄ ma
nɛ́ mi lɛgɛ ɓot bí ŋgɔ́ɔ́ Pɔ́l m̀ɓɛɛŋ.
Ɔ óm ma li lɛgɛ lí ɓot-bí-míɓog nɛ́ bíg kɛ li tɛ́lɛ lí kundɛ;
nɛ́ ɓot-bí-ndím bíg kɛ́ li ɛ́n,
nɛ́ ɓá bí lɛ a ndutu, bíg kɛ́ li kuh lí étɔ́hɔ;
19la lí lɛgɛ lí m̀bú á bísaa ányúū Nyɔ́ŋ-Ɛsáŋɛ́.
20Ámbúh náŋ Yésus ɔ vúlké kálati, ɔ tímānɛ̄ yɔ ŋ̀ɛɛle la nyɛ́ ɔ tɔ́ɔ̄ á sí. Ɓot bísɛ bí ɓɛ́ɛ́ á ndáá-míɓomán bú tīŋ nyɛ miíh. 21Váŋ nɛ á ɓōtléé ɓɔ́ li lága nɛ́: «yé eɓaŋgá yá sɔ́ŋglɛ́ vá, nyí lɛn hɔ́ nɛ́ yá yál ányúū ɓɛ́nɛ ɓá maná ámble yɔ.» 22Ɓot bísɛ bí ŋgí tíi nyɛ́ mbóŋ élāām, bú nyág la biɓaŋgá bílāām bí ŋgí pámle nyɛ́ á ányu; ndí bíg laga nɛ́: «Ɓaá mɔɔ́n Yósɛp ɓé nyɔ́ é?» 23La Yésus ɔ pélē nɛ: «Mag yí nɛ́ miníg kɛ ma li kanɛ lí nyí ŋgan nɛ́: ‹Á ǹtála-ɓakɔɔ́kɔn, tálá hɔ́ wā-mɛ̄n. Ɓaá ámblé yé ɛ́sɛ yá lóō á Kafalnáum, ɓɔ̄ŋ nlemlem á jam vá á ŋkɔŋ wɔ́ɔ.›» 24Yésus ɔ kōndyé pɛ nɛ́: «Mag laga ɓɛ́nɛ nɛ́, bí ŋgá kale ɓé m̀pɔ́tle-a-Ɔlolómɛ̄ m̀ɓɛɛŋ á ŋkɔŋ wɛ́ɛ́.
25Kɔɔ la mbálɛ, mag laga ɓɛ́nɛ nɛ́
á eceg yé m̀pɔ́tle-a-Ɔlolómɛ̄ Elías, mikúh mí
ɓondígá mí ɓɛ́ɛ́ ŋgandag á Íslāɛl.
Eceg lóō lí legɓáán mímbú míŋháa la sóŋ ɛ́sáama,
nzal ecɛ́ŋ yú ɓɛ́hán á ékombo,
26tɔ náŋ Elías ah ómɓɛɛ ɓé á mbóg ŋkúh tɔ wá á póla yaɓá
amáh sig á yóg ŋkúh wá á ŋkɔŋ á Salépta,
ékombo yé Sídon.
27Ŋgandag ɓot bí mívɛlɛ ki bí ɓɛ́ɛ́ á Íslāɛl á eceg yé
m̀pɔ́tle-a-Ɔlolómɛ̄ Eliséya,
ndí, tɔ wa ah manáa ɓé á elɔŋ yáɓá
amáh sig Naáman mɔɔ́n ŋkɔŋ á Sília.»
28Ɛnɛ́ ɓot bísɛ bí ɓɛ́ɛ́ á ndáá-miɓomán ɓá ámbléé bíŋ biɓaŋgá, bú álá tɔláá. 29Váŋ nɛ́ bí tɛ́lɓéé, bú nūgɛ́ Yésus nɛ́-tɛ́ɛla á mípāmlé mí tísɔn, bú ɓét la nyɛ́ á lóō lí ɔ́kolá ápah tísɔn Názalɛt ya óŋɓɛ. Miɔ́ŋɔ máɓá mí ɓɛ́ɛ́ nɛ́ bí sógɛ nyɛ́ á nsósógá. 30Ndí Yésus ɔ sɔ̄mɓán á póla yáɓá, ɔ kɛ́ ápah á ŋgí kɛ́.
Yésus ag pámɛ mut m̀búl m̀ɓé á Kafalnáum
(Mat 7.28-29; Mlk 1.21-28)
31Yésus ɔ sūh á Kafalnáum, tísɔn nyí Galiléa. A ŋgí yéglɛ ɓot bísɛ á ɔlɔ́ ví évɛɛɓan ví Élōg-Yúda. 32La ɓɔ́ bú nyág la liyéglɛ́gɛ jɛ́ɛ́ ányúū nɛ a ŋgí pɔ́t la ekíndo. 33Mut wa, átē á ndáá-míɓomán a ɓɛ́ɛ́la m̀búl m̀ɓé, la nyɛ́ ɔ tɛ́ɛ́ nlón la ŋguu nɛ́: 34«Mɔɔ́ a! Yéé ɔ ŋgɔ sōmle ɓɛ́hɛ, á Yésus nyɔ́ á Názalɛt? Ɓaá, wa sɔ́ ja ɓɛ́hɛ li ɓɔgɔ é? Mag yí nzáá ɔ lɛ: Nyɔ́ Mpúán a Ɔlolómɛ̄.» 35Váŋ nɛ́ Yésus a kímɛ́ nyúŋ m̀búl m̀ɓé nɛ: «Lēg ányu, ɔ pám átē á nyɔ́ mut.» Á ékūyá-kúyá, nyúŋ m̀búl m̀ɓé wú ɓɛ́h nyɔ́ŋ mut á sí ɔ́sū ví ɓot la wɔ́ wú pám ɛ́h ɓɛ́ ɓé wɔ li ɓɔŋ lí nyɛ aɓé tɔ wá. 36Ɓot bísɛ bú nyág, bú laglán ɓɔ́ lá ɓɔ́ nɛ́: «Yɔɔ́yɔ́ɔ nyaa lipɔ́tɔg nyí é! Ag kanʼyɛ mimbúl míɓē la ŋguu ekímá ndí mɔ́g míg pám.» 37La joó lí Yésus lú cáman á míkɔŋ mísɛ.
Yésus ag manɛ ɓakɔɔ́kɔ̄n
(Mat 8.14-17; Mlk 1.29-34)
38Eceg Yésus a ɓógyéé á ndáá-miɓomán, ɔ níŋgí á yóg Símɔn. Livɛ́ɛ́ lícɛ̄ŋ lí ɓɛ́ɛ́ li byɛ́ɛ nyaŋɛ́-a-ǹcii a Símɔn, la ɓɔ́ bú sɔ́hyé Yésus nɛ́ a ɓɔ́ŋ jam ányúū yɛ́ɛ̄. 39Yésus ɔ úlɓan á ŋgwáāg yɛ́ɛ̄, ɔ kímɛ́ lívɛ̄ɛ̄, la jɔ́ lú ɓógó nyɛ á nyúū. Váŋ nɛ́ nyɔ́ŋ a tɛ́lɛ, á ékūyá-kúyá ɔ ɓōtlé ɓɔ li ɛɛle. 40Á ébúg-lóō, ɓot bísɛ bí ɓɛ́ɛ́la ɓakɔɔ́kɔ̄n patí ɛ́sɛ, bú sɔ́la nyɛ́ ɓɔ́, Yésus ɔ káhyɛ́ wa sig mɔ, la ɓɔ́ bú tɔ́ɔ mbólí. 41Mimbúl míɓē ki mú pám ŋgandag ɓot á nyúū míg tɛ́ɛ milón nɛ́: «Kɔɔ la mbálɛ ɔ lɛ̄ Mɔ́ɔ̄n Ɔlolómɛ̄!» Váŋ nɛ́ Yésus a kímɛ mɔ̄, ɔ súŋɛ̄ mɔ mpɔ́t, ányúū nɛ mí ŋgí yí nɛ́, nyɛ́ nɛ́ a lɛ Nyɔ́-a-Pɔ́hlɛ.
Miɓógo mí Yésus á Kafalnáum
(Mlk 1.35-39; Mat 4.23)
42Ɛnɛ́ kítí ya kánda, Yésus ɔ pám, ɔ kɛ́ á líɛ̄g ápah mut a sē ɓé. Limut lú ɓōtlé nyɛ li somo. Ɛnɛ́ ɓá kɔ́p nyɛ, bú somó nyɛ li byee la woŋ nɛ́ a táág kɛ, a yíg ɓɔ́. 43Ndí Yésus ɔ yó ɓɔ́ nɛ́: «Ɛ́g ɓat nɛ́, mi lɛ́gɛ́ Pɔ́l M̀ɓɛɛŋ nyí Likanʼyɛ lí Ɔlolómɛ̄ wóŋóó á yíŋí tísɔn etám ki, átɔm nɛ́, ányúū náŋ nɛ́ ma ómɓɛ.» 44A ŋgí kɔplene ɓɔ́ Eɓaŋgá Ɔlolómɛ̄ á ndáá-míɓomán yí Yúdēa.
Currently Selected:
Lúkas 4: NTB
Highlight
Share
Copy

Want to have your highlights saved across all your devices? Sign up or sign in
© 2023, CABTAL