Luka 22

Opangana ddoomwiipha Yesu

(Mat 26.1-5; Mrk 14.1-2; Yoh 11.45-53)

1 # Eks 12.1-27 Ehakallallo ya Buledi Oohikhalla ni Yisiti, yooromolliwa Paska, yahaatamella. 2Allupa mukutho uullupalli ni ahuddihi a malamulo* yahaashaasha ettilla yawi emwiiphe Yesu koma yawoova athu.

Yudasi anaakhullella omuvelleella Yesu

(Mat 26.14-16; Mrk 14.10-11)

3Satana aavollowa mwa Yudasi, ooromolliwattho Isikariyoti, oyo aari mmodda a oohuddera khumi ni eelli. 4Yudasi aaya akambirana ni allupa mukutho uullupalli ni attekweene uullupalli a oowehera enyumba ya Mulluku dda ettilla yoomuvelleellella Yesu waalliwaayo. 5Yaahakallallana, yiiwanana omuvaha makobiri. 6Nave Yudasi ahaakhullella nave ahaashaasha mpata waphaama woomuvelleellella Yesu athu ehiivo.

Yesu ni oohudderaaye anacha yoocha ya Paska

(Mat 26.17-25; Mrk 14.12-21; Yoh 13.21-30)

7Nllapo na Ehakallallo ya Buledi Oohikhalla ni Yisiti naaphiya mvo athu yaphwanelliiwa omwiipha mwaanaankhosa wi emuche va Paska. 8Yesu ahaaruma Petro ni Yohane aalleella wi, “Khaweni mwanikhozere yoocha ya Paska wi niche.”

9Alliwaayo yaamukoha, “Munapaalla nuukhozereni wuuwi nipuro nawi mwachellevo yoocha ya Paska?”

10Aallota wi, “Mwavollowa mu muzindammo muneerokumana ni mullopwana atukhunlle muno wa maaddi. Muthwareni nave mwavollowena mu enyumba anaavolloweeyemo. 11Mwallote ni mwaneena a enyumbeeyo wi, ‘Ahuddihi enakoha wi, eri wuuwi echipindaaka mwawi miyaano ni oohudderaaka nachellemo yoocha ya Paska?’ 12Vano aneerewuutthoonyiherani echipinda yavaddullu yuullupalli, yowaanddellelliwa phaama ddene. Wenko mwakhozerewo yoocha ya Paskaahu.”

13Oohudderaayo yaatimulla, ephwanya ddittheddene ddiri moollikana ni ollota wa Yesu nave yaakhozellawo yoocha ya Paska.

Mugonelo wa Apwiya

(Mat 26.26-30; Mrk 14.22-26; 1 Ako 11.23-25)

14Enthawi yaphiyalliiwa, Yesu aakeraatthi voochella ni amurummwa. 15Aallota wi, “Kookhalla ni munkhella wawi kiche Paskoolla ni nyuwaano kihinaambe ohoosiwa! 16Vawi kinimuulleellani, ngiwa kimuchattho ophiyera ekwakhwanihiwe mu omwene wa Mulluku.”

17Vano Yesu aamukusa kapu, avekella wa Mulluku moothokoza, allota wi, “Akhellani ella muwirye attheenenyu. 18Kinimuulleellani wi waambeella vano ngiwa kimuwiryattho vinyo ophiyera omwene wa Mulluku ophiyalle.”

19Vano Yesu aamukusa buledi avekella omuthokoza Mulluku. Vano aamumeyameya buledooyo aavaha oohudderaaye allota wi, “Olla sika mwiillaaka woovahiwa ekaamba ya nyuwaano. Mweereke yeella vookuupuwellani miyaano.” 20#Yer 31.31-34Emoddamoddave yeeyo, emanlle omucha buledoolle ahaavaha kapu, allota wi, “Kapu yoolla tti echizindikiro ya echipangano yanaanweene ya Mulluku, eyo yeeriwe oweella mu nikhame naka ekaamba ya nyuwaano.#22.20: Ddoolemba ddimodda ddakhalle khaddinna mawu a Yesu mu mavesi 19b-20 vatulli va mawu awi Olla sika mwiillaaka.

21 # Mas 41.9 “Koma dduwellani wi anakivelleella wa adanaaka anacha ni miyaano vaava! 22Vawi mi, Mwaana a Muthu, kineerokhwa moollikana ni mmo Mulluku aganizereeye koma ootulli tti muthu anaakivelleellooyo!”

23Vano yahaamba okohana weekhiiwa wi ttaani a alliwaayo anaaweere ddennddo.

Muullupalli ttaani

24 # Mat 18.1; Mrk 9.34; Luk 9.46 Vano oohudderaalle yaavaanyihana wi ttaani anaganizeriwa va alliwaayo wi tti muullupalli? 25Yesu aallota wi, “Mamwene a ellapo yavattheella ennaahoosa athwiiwa koma oolamulellaayo ennaweeriha athu wi eweereke, ‘Aweera ddaphaama.’ 26#Mat 20.25-27; Mat 23.11; Mrk 9.35; Mrk 10.42-44Koma nyuwaano khamunaphwanella weera ddiiddo vawi muullupalli variyari vanyu akhalleke wonanko mung'onong'ono nave oohoollellooyo akhalleke wonanko oorumeyella. 27#Yoh 13.12-15Muullupalli ttaani? Oyo anacha apaalle oyo anamurumeyella? Tti oyo anacha. Koma miyaano kiri variyari vanyu wonanko oorumeyella.

28“Mookhalla ni miyaano mu ohoosiwa waka otthewene. 29Sika miyaano kinuuvahani omwene, wonanko mmo, Attiitthaaka ekivahilliiwa omwene. 30#Mat 19.28Vano muneerocha ni owirya ni miyaano mu omwenaaka nave muneerokeraatthi vampandoni woomwene wi muweeruze malloko khumi ni meelli a Israele.

Yesu anavallallella ollota wi Petro aneeromuruna

(Mat 26.31-35; Mrk 14.27-31; Yoh 13.36-38)

31“Simoni, Simoni, ngiiwa! Satana ooveka wi aweeseni attheenenyu, wonanko muthu anamuveetha tirigu omuhiyaniha ni madeya. 32Koma miyaano kohuuvekella weyaano Simoni wi echikhulupilwaawo ehimalle. Nave warukunuwa murima, waallipiheke murima ookhulupilila akhwaawaalla.”

33Koma Petro aallota wi, “Apwiya, miyaano kookhozekella omakiwa naari wiiphiwa ni nyuwaano!”

34Koma Yesu aallota wi, “Kinallota ni weyaano Petro, mahiiyu yaalla mutthupi ohininlle, onaakhalle okikhootille oraru.”

Dda okusa mathumba ni masupada

35 # Mat 10.9,10; Mrk 6.8,9; Luk 9.3; 10.4 Yesu ahaakoha oohudderaaye wi, “Kuurumalleemini kuulamulani wi muhikuse makobiri, nthumba na voolendoni apaalle esapato, mwaapaalla ello?”

Alliwa yaallota wi, “Khanaapanlle ello.”

36Yesu aallota wi, “Vano, oyo arina makobiri apaalle nthumba na voolendoni anaphwanella wi akuse. Nave oyo ahinna nsupada akullihe yoowaraaye wi akulle nsupada. 37#Yes 53.12Kinimuulleellani wi, ddinaphwanella ddikwakhwanihiwe mwa miyaano ddallotiwe Mu mawu a Mulluku wi, ‘Yaamweesa wonanko mmodda a athu oohithwara malamulo.’ Vawi nnddo ddalembiwe dda miyaano ddinnakwakhwanella.”

38Oohudderaayo yaallota wi, “Apwiya, ngoonani, nookhalla ni masupada meelli vaava!”

Yesu ahaalleella wi, “Ddookwakhwanella!”

Yesu anavekella va mwaango wa Olivi

(Mat 26.36-46; Mrk 14.32-42)

39Yesu aakhumamo m'muzindanimmo aya o mwaango wa Olivi wonanko mmo addollweellelleeye nave oohudderaaye yaamuthwara. 40Aphiyalleeye omwaangoninko, ahaalleella wi, “Vekellani wi muheesiwe.”

41Nave ahaahiya arakamella wookwakhwana ovokha nlluku, wenko aakokhora nave avekella. 42Aallota wi, “Attiitthaaka, mwaapaallaka mukivenyiherevo kapu a ddookatamihoolla! Ohiri opaalla waka koma opaalla wanyu weereye.” 43Mungelo oovenyera oddullu aamooneyella amullipiha murima. 44Naari Yesu ahoowille wawoopiha m'murimani mwaye, aavekellave ohiyana ni vawaamba nave nikhurumella naye naari wonanko nikhame ninamorella vatthi.#22.43-44: Ddoolemba ddimodda ddakhalle khaddinna mavesi 43-44.

45Avekenlle, voohokollweellani wa oohudderaalle aaphwanye yiikimakona, etopille ni ethakaraka. 46Vano ahaakoha wi, “Munakonella tini? Venyani, muvekelle wi muheesiwe.”

Omakiwa wa Yesu

(Mat 26.47-56; Mrk 14.43-50; Yoh 18.3-11)

47Yesu allotaka ddiiddo, mulloko wa athu waaphiya woohoollelliwa ni Yudasi, mmodda a oohuddera khumi ni eelli. Olliyooyo aawa wa Yesu wi amukhupaarelle. 48Nave Yesu aallota wi, “Yudasi, onakivelleella mi Mwaana a Muthu vookikhupaarellani?”

49Oohuddera yaari ni Yesu yoonilliiwa ddaweereyannddo, yaamukoha Yesu wi, “Apwiya, naakakatthe ni masupadaahwaalla?” 50Nave mmodda a yaayo amuphadda naaru noonnattanatta kaporo a mullupa mukutho muullupalli.

51Koma Yesu aallota wi, “Muhiwanena!” Nave aattannya naaru na muthooyo amuchiriha.

52Vano Yesu aallota ni allupa mukutho uullupalli ni oowehera enyumba ya Mulluku ni attekweene a Ayuda* yawiille vaavwaayo wi, “Ethiyo muphiyalle ni masupada ni ekoonda wi mukimake wonanko miyaano tti echigawenga? 53#Luk 19.47; 21.37Nllapo ni nllapo kaanakhalla ni nyuwaano mu enyumba ya Mulluku koma khamwaakimakille. Olla sika mpataanyu vawi munalamulelliwa ni masiva a epiphi.”

Petro anamuruna Yesu

(Mat 26.57-58,69-75; Mrk 14.53-54,66-72; Yoh 18.12-18,25-27)

54Yesu aamakiwa akuselliwa o enyumba ya mullupa mukutho muullupalli nave Petro ahaathwara voorekama. 55Nave oowehera amodda yaaviddeella munllo variyari va nthato ekeraatthi nave Petro aakeraatthittho vaavo. 56Mullupa mutteko a mutthiyana amoonilleeye akeraatthille vamunllonimvo, aamuwehesesa allota wi, “Muthoollattho aari nimodda ni Yesu!”

57Koma Petro aaruna wi, “We mutthiyana, miyaano nginamudduwella yoolla!”

58Viviralle enthawi yooyeva muthu mmodda aamoona Petro aallota wi, “Wettho tti mmodda a athu yaalla!”

Nave Petro aamwaakhulla wi, “We mullopwana, khe miyaano!”

59Viviralle enthawi yooyeva muthu mmodda aallota moollipihella wi, “Kinallota ddawoona muthoolla aari ni Yesu vawi nayeenettho anavenyera o Galileya!”

60Koma Petro ahaakhullattho wi, “Mullopwana we, nginadduwella eyo onalloteewe!”

Enthawi yeeyo allotaka, mutthupi wahinlla. 61Vano Apwiya yaarukunuwa emuweha Petro nave Petro ahuupuwella wi Apwiya yaamulleella wi, “Mutthupi ohininlle mahiiyu yaalla onaakhalle okikhootille oraru.” 62Vano Petro aakhuma vaatte inllaka ekaamba ya ethakaraka ddinchichi.

Yesu anattheyiwa ni wuukuthiwa

(Mat 26.67-68; Mrk 14.65)

63Athu yamuwehera Yesu yaanamullotella epewe, enamuukutha. 64Yaamukhuneella owiitthoni waye emuukutha nave ellota wi, “Llotella awuukuthalle ttaani?” 65Nave yaamullotella mawu mamodda manchichi a epewe.

Yesu vanthatoni na attekweene a millatu a Ayuda

(Mat 26.59-66; Mrk 14.55-64; Yoh 18.19-24)

66Osaka wene ohinase, attekweene a Ayuda, allupa mukutho uullupalli ni ahuddihi a malamulo yaakumana nave ewaana Yesu o nthato niwa namillatu. 67Yaallota wi, “Nganilleelle, weyaano tti Mesiya?”*

Yesu ahaakhulla wi, “Naari kaakhullenlle, khamukikhulupilila. 68Nave kuukohani nyuwaano khamwaakhulla. 69Waambeella vaavo muneerokoona mi Mwaana a Muthu kikeraatthille o nnattanatta na Mulluku Amasiva Mattheene.”

70Attheenaalle yaallota wi, “Vano weyaano tti Mwaana a Mulluku?”

Yesu aawaakhulla wi, “Mullotillethi nyookha wi tti miyaano.”

71Nave yaallota wi, “Ninapaallellatittho omboni mmodda? Nooddiiwella weekhiihu allotaka yeekha!”

Currently Selected:

Luka 22: MW2019

Highlight

Copy